சிவகங்கை

காரைக்குடி:

காரைக்குடி மற்றும் அதை சுற்றியுள்ள பகுதிகள் செட்டிநாடு பகுதி என்று அழைக்கப்பட்டு வருகிறது. இந்த பகுதியில் காணப்படும் ஆயிரம் ஜன்னல் வீடு, ஆத்தங்குடி மற்றும் கானாடுகாத்தான் பகுதியில் உள்ள அரண்மனை போல் காணப்படும் வீடுகள், ஆத்தங்குடியில் தயாரிக்கப்படும் டைல்ஸ்கள், பாரம்பரியமிக்க முறையில் கைத்தறி மூலம் தயாரிக்கப்படும் செட்டிநாட்டு பட்டுப்புடவை மற்றும் சேலைகள், செட்டிநாட்டு உணவு வகைகள் ஆகியவைகள் இதன் பெருமையை உலகிற்கு பறைசாற்றி வருகிறது. இந்த வகையில் மேலும் ஒரு வைரக்கற்களாக இங்கு தயாரிக்கப்படும் இந்த செட்டிநாட்டு பலகாரங்கள் வகைகளும் பிரசித்தி பெற்றது.

பொதுவாக விழாக்காலம், திருமணம் உள்ளிட்ட சுபநிகழ்ச்சிகளுக்காக இந்த செட்டிநாட்டு பலகாரங்களுக்கு அதிக அளவில் ஆர்டர்கள் வந்து சேரும். இதுதவிர ஆண்டுதோறும் வரும் தீபாவளி பண்டிகையின்போதும் இந்த செட்டிநாட்டு பலகாரங்களின் தேவை அதிகரிக்கும். நொறுங்க தின்றால் நூறு வயது என்று அப்போதே நமது முன்னோர்கள் கூறியுள்ளனர். அதை உறுதிப்படுத்தும் வகையில் இங்கு தயாரிக்கப்படும் செட்டிநாடு பலகாரங்களும் அமைந்துள்ளது. அந்த அளவிற்கு இந்த பலகாரங்கள் தயாரிக்கும் முறையும் அடங்கி உள்ளது. இங்கு 5, 7 மற்றும் 9 வரிசை கொண்ட செட்டிநாட்டு தேன்குழல் முறுக்குகள், அதிரசம், மணகோலம், சீடை, தட்டை, கை முறுக்கு, பிரண்டை முறுக்கு, மாவு உருண்டை, காரா பூந்தி, மிக்சர், மைசூர்பாகு உள்ளிட்ட பலகாரங்கள் தயாரிக்கப்பட்டு வருகிறது.

இந்தாண்டு தீபாவளி பண்டிகை அடுத்த மாதம் 14-ந்தேதி கொண்டாடப்பட உள்ளது. இன்னும் ஒரு மாத காலம் மட்டும் உள்ளதால் தற்போதே இந்த செட்டிநாட்டு பலகாரங்கள் தயாரிக்கும் பணி காரைக்குடி, கோட்டையூர், பள்ளத்தூர், கொத்தமங்கலம், செட்டிநாடு உள்ளிட்ட பல்வேறு பகுதியில் மும்முரமாக தற்போது நடைபெற்று வருகிறது.

இந்த பணியில் ஈடுபட்டுள்ள கோட்டையூரை சேர்ந்த மீனாள்பெரியகருப்பன் ஆச்சி கூறியதாவது:-

தீபாவளி பண்டிகை வர இருப்பதையடுத்து தற்போது இந்த பலகாரங்கள் தயாரிக்கும் பணி நடந்து வருகிறது. பலகாரங்கள் தயாரிக்க செக்கு எண்ணெய் பயன்படுத்துவதால் 3 மாதங்கள் வரை கெட்டு போகாமல் இருக்கும். இந்தாண்டு முன்கூட்டியே பலகாரங்கள் செய்யும் பணியை தொடங்கி உள்ளதால் ஆர்டர்கள் வர தொடங்கி உள்ளது. பலகாரங்களை கடந்தாண்டு போலவே வெளிநாடுகளில் வாழும் தமிழர்களுக்கும் அவரது உறவினர்கள் வாங்கி அனுப்பி வைப்பார்கள் என்று எதிர்பார்க்கிறோம்.

இவ்வாறு அவர் கூறினார்.

சிவகங்கை:

சிவகங்கை கொட்டக்குடி தெருவை சேர்ந்தவர் மனோகரன் (வயது 66). தி.மு.க.வை சேர்ந்த இவர் கடந்த 1989-ம் ஆண்டு முதல் 1991-ம் ஆண்டு வரை சிவகங்கை தொகுதி எம்.எல்.ஏ.வாக இருந்தவர். இவர் நேற்று மதுரை செல்ல திட்டமிட்டு இருந்தார்.

அதன்படி அதே ஊரை சேர்ந்த தையாபுதீன்(42) என்பவருடன் மோட்டார் சைக்கிளில் சிவகங்கையில் இருந்து மதுரைக்கு வந்து கொண்டிருந்தார். சிவகங்கை-மதுரை தேசிய நெடுஞ்சாலையில் படமாத்தூர் அருகே வந்தபோது அந்த வழியாக ஒரு லாரி வந்தது. எதிர்பாராதவிதமாக அந்த லாரி, மனோகரன் உள்ளிட்ட 2 பேர் வந்த மோட்டார் சைக்கிள் மீது மோதியது. மேலும் மோதிய வேகத்தில் அந்த லாரி சாலையோரம் கவிழ்ந்தது.

இந்த விபத்தில் மனோகரன் மற்றும் அவரது நண்பர் தையாபுதீன் ஆகிய 2 பேரும் மோட்டார் சைக்கிளில் இருந்து தூக்கி வீசப்பட்டு பலத்த காயம் அடைந்து உயிருக்கு போராடினர். இதற்கிடையே அந்த பகுதியை சேர்ந்தவர்கள் விரைந்து வந்து மீட்பு பணியில் ஈடுபட்டனர். காயம் அடைந்தவர்களை காப்பாற்ற முயன்றனர்.

ஆனால் முன்னாள் எம்.எல்.ஏ. மனோகரன், தையாபுதீன் ஆகிய 2 பேரும் சம்பவ இடத்திலேயே அடுத்தடுத்து பரிதாபமாக இறந்தனர். இந்த சம்பவத்தில் லாரி டிரைவர் ஜம்சித் (32) காயத்துடன் உயிர் தப்பினார்.

இதுதொடர்பாக பூவந்தி போலீசார் சம்பவ இடத்திற்கு விரைந்து வந்து விசாரணை நடத்தினர். பலியான 2 பேர் உடல்களையும் மீட்டு சிவகங்கை அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.

மேலும் இந்த விபத்து தொடர்பாக வழக்குப்பதிவு செய்து கேரள மாநிலம் மலப்புரம் பகுதியை சேர்ந்த லாரி டிரைவர் ஜம்சித்தை கைது செய்தனர்.

முன்னாள் எம்.எல்.ஏ. மனோகரன் விபத்தில் பலியான தகவல் அறிந்ததும் சிவகங்கை பகுதியை சேர்ந்த பல்வேறு கட்சியினர் மருத்துவமனைக்கு வந்து அவருடைய உடலுக்கு அஞ்சலி செலுத்தினர்.

சிவகங்கை:

சிவகங்கையை அடுத்த காஞ்சிரங்கால் ஊராட்சியை சேர்ந்த அரசனிபட்டி கிராமத்தில் சிவகங்கை தொகுதி எம்.பி. கார்த்தி பா. சிதம்பரத்தின் நாடாளுமன்ற தொகுதி வளர்ச்சி நிதியில் இருந்து ரூ. 5 லட்சத்து 83 ஆயிரம் செலவில் கட்டப்பட்ட நாடக மேடை திறப்பு விழா மாவட்ட கலெக்டர் ஜெயகாந்தன் தலைமையில் நடைபெற்றது. ஊராட்சி தலைவர் மணிமுத்து முன்னிலை வகித்தார். நாடக மேடையை திறந்து வைத்து கார்த்தி சிதம்பரம் எம்.பி. பேசினார்.

விழாவில் வட்டார வளர்ச்சி அலுவலர் (கிராம ஊராட்சி) பாஸ்கரன், மாவட்ட ஊராட்சி கவுன்சிலர் ஆரோக்கியசாந்தாராணி, முன்னாள் மாவட்ட காங்கிரஸ் தலைவர் ராஜரத்தினம், மகளிர் காங்கிரஸ் மாநில துணைத்தலைவர் ஸ்ரீவித்யாகணபதி உள்பட பலர் கலந்து கொண்டனர்.

பின்னர் கார்த்தி சிதம்பரம் எம்.பி. நிருபர்களிடம் கூறியதாவது :- மத்தியில் உள்ள பா.ஜ.க. அரசு தமிழர்களுக்கு விரோதமான அரசு. நமக்கு சேர வேண்டிய தொகுதி வளர்ச்சி நிதியை நிறுத்தி வைத்துள்ளது. இது நம்முடைய பணம். நமது ஊரின் வளர்ச்சிக்கு செல்ல வேண்டிய பணம். இதை நிறுத்தி வைத்துக்கொண்டு நமக்கு துரோகம் செய்கின்றனர். நடிகை குஷ்பு 180 டிகிரி அந்தர் பல்டி அடித்துள்ளார். இது சாதாரணமான விஷயம் இல்லை. தமிழக அரசு தொழில் முனைவோர்களிடம் புரிந்துணர்வு ஒப்பந்தம் போடுவதாக கூறுவது வேடிக்கையாக உள்ளது.

இதற்கு முன்பு போட்ட ஒப்பந்தங்களின் நிலை என்ன என்று தெரியவில்லை. தேர்தலுக்கு 6 மாதம் முன்பு இதுபோல நாடகங்கள் நடக்கிறது. ஜி.எஸ்.டி. வரியை பொறுத்தவரை அது முற்றிலும் ரத்து செய்யப்பட வேண்டிய ஒன்றாகும். அனைத்து மாநிலங்களுக்கும் வரவேண்டிய பங்கு இதுவரை கிடைக்கவில்லை. மத்திய அரசுடன் இணக்கமான அரசாக தமிழக அரசு இருந்தும் இதுவரை அந்த தொகை வழங்கப்படவில்லை.

தி.மு.க.- காங்கிரஸ் கூட்டணி உறுதியாக உள்ளது. இந்த கூட்டணியில் மேலும் சில கட்சிகள் சேரலாம். நடைபெறவுள்ள தேர்தலில் தமிழகத்தில் தி.மு.க. தலைமையிலான கூட்டணி அமோக வெற்றி பெறும்.

இவ்வாறு அவர் கூறினார்.

திருப்புவனம்:

சிவகங்கை மாவட்டம், திருப்புவனம் அருகே உள்ள கீழடியில் 5 கட்டங்களாக நடைபெற்ற அகழ்வாராய்ச்சி பணிகளில் மொத்தம் 14 ஆயிரத்து 598 பொருட்கள் கண்டுபிடிக்கப்பட்டுள்ளன.

கடந்த பிப்ரவரி 19-ந்தேதி 6-ம் கட்ட அகழாய்வு பணிகள் தொடங்கப்பட்டன. இந்த பணிகள் கீழடி, கொந்தகை, அகரம், மணலூர் ஆகிய பகுதிகளில் நடைபெற்றன. இதில் சூதுபவளம், அகேட், பல வரிசைகள் கொண்ட செங்கல் சுவர், விலங்கின முழு உருவ எலும்புக்கூடு, எடைக்கற்கள், உறைகிணறுகள், முதுமக்கள் தாழிகள், குழந்தையின் எலும்புக்கூடு, மனித மண்டை ஓடு, மனித முழு உருவ எலும்புக்கூடு, பளபளப்பான செவ்வண்ண பானை, தங்க நாணயம், சீன மண்பாண்ட ஓடு, கத்திகள், சங்கு வளையல்கள், நத்தை ஓடுகள், சுடுமண் உலை உள்ளிட்ட 900-க்கும் மேற்பட்ட பொருட்கள் கண்டுபிடிக்கப்பட்டுள்ளன.

இந்த நிலையில் கடந்த செப்டம்பர் 30-ந்தேதியுடன் 6-ம் கட்ட அகழ்வாராய்ச்சி பணிகள் முடிவடைந்தன. தொடர்ந்து பொருட்கள் ஆவணப்படுத்துதல் (வரைபடம் தயாரிக்கும்) பணிகள் நடைபெற்று வருகிறது. கீழடியில் 38 அடுக்குகள் கொண்ட உறை கிணறு கண்டுபிடிக்கப்பட்ட நிலையில் தற்போது மழை பெய்து வருவதால் அந்தப்பணி பாதிக்கப்பட்டு சுவர்கள் கரைந்து வருகிறது. இந்த நிலையில் நேற்று மதுரை ஐகோர்ட்டு கிளை நீதிபதி கிருஷ்ணன் ராமசாமி கீழடி, கொந்தகை பகுதிக்கு வருகை தந்தார். அவரை திருப்புவனம் தாசில்தார் மூர்த்தி வரவேற்றார். இரு இடங்களிலும் கண்டுபிடிக்கப்பட்ட பொருட்கள் குறித்த விவரங்களை நீதிபதி கேட்டறிந்தார்.

மாநில தொல்லியல் துறை துணை இயக்குனர் சிவானந்தம் அகழாய்வில் கண்டுபிடிக்கப்பட்ட பொருட்கள் பற்றிய விவரங்களை விளக்கிக் கூறினார். ஏற்கனவே நேற்று முன் தினம் ஐகோர்ட்டு நீதிபதிகள் கிருபாகரன், வைத்தியநாதன் ஆகியோர் வந்து பார்வையிட்டு சென்றது குறிப்பிடத்தக்கதாகும்.

காரைக்குடி:

சிவகங்கை மாவட்ட போலீஸ் சூப்பிரண்டு ரோஹித்நாதன் மாவட்ட போலீசாருக்கு அதிரடி உத்தரவுகளை பிறப்பித்து வருகிறார். அதன்படி போலீஸ் நிலையத்திற்கு வந்து பொதுமக்கள் கொடுக்கும் புகார்கள் குறித்து அவர்கள் இருக்கும் இடத்திற்கே சென்று விசாரணை நடத்தி உடனடியாக தீர்வு காண வேண்டும் என்றும், மாவட்டம் முழுவதும் ஒரே இடத்தில் வைத்து பொதுமக்களை வரவழைத்து நீண்ட நாள் பிரச்சினைகள், கொடுக்கல்-வாங்கல் பிரச்சினைகள், குடும்ப பிரச்சினைகள் உள்ளிட்ட பல்வேறு பிரச்சினைகளுக்கு புகார் மனுக்கள் கொடுத்து இதுநாள் வரை தீர்வாகாமல் இருக்கும் பொதுமக்களை ஒரே இடத்தில் சந்தித்து அவர்களின் பிரச்சினைகளை தீர்த்து வைப்பதற்காக புகார் மனுக்கள் மேளா நிகழ்ச்சி நடத்தப்பட்டு வருகிறது.

அதன்படி நேற்று காரைக்குடி 100அடி சாலையில் உள்ள ஒரு திருமண மண்டபத்தில் காரைக்குடி துணை போலீஸ் சூப்பிரண்டு அருண் தலைமையில் போலீஸ் இன்ஸ்பெக்டர் சுந்தரமகாலிங்கம் மற்றும் போலீஸ் சப்-இன்ஸ்பெக்டர்கள், சிறப்பு சப்-இன்ஸ்பெக்டர்கள் மற்றும் போலீசார் புகார் மனுக்கள் குறித்து பொதுமக்களை நேரடியாக வரவழைத்து விசாரணை நடத்தினர். இதில் அதிகஅளவில் பணம் கொடுக்கல்-வாங்கல் பிரச்சினை, குடும்ப பிரச்சினையால் கணவன்-மனைவி பிரிந்து வாழ்தல், வரதட்சணை பிரச்சினை, சொத்து பிரச்சினை, வில்லங்க பிரச்சினை, முன்விரோத போக்கு உள்ளிட்ட பிரச்சினைகள் குறித்து விசாரணை நடத்தி சமரச தீர்வு காணப்பட்டது.

மேலும் காரைக்குடி பகுதியில் புகார் கொடுத்த பொதுமக்களின் வீடுகளுக்கே நேரடியாக மாவட்ட துணை போலீஸ் சூப்பிரண்டு அருண் மற்றும் போலீஸ் சப்-இன்ஸ்பெக்டர் சுந்தரமகாலிங்கம் மற்றும் போலீசார் சென்று விசாரணை நடத்தி பிரச்சினைகளுக்கு சுமூக தீர்வை ஏற்படுத்தினர். போலீசாரின் இந்த நேரடி சந்திப்பு பொதுமக்கள் இடையே நல்ல வரவேற்பை பெற்று வருகிறது.

மானாமதுரை:

சிவகங்கை மாவட்ட துணை போலீஸ் சூப்பிரண்டு ரோஹித்நாதன், மானாமதுரை துணை போலீஸ் சூப்பிரண்டு சுந்தரமாணிக்கம் ஆகியோர் ஆலோசனையின் பேரில் மானாமதுரை பகுதியில் உள்ள போலீஸ் நிலையத்திற்கு புகார் கொடுக்க வரும் பொதுமக்களின் பிரச்சினைகளை தீர்க்க புதிய நடைமுறை கடைபிடிக்கப்பட்டு வருகிறது.

பொதுமக்களை போலீஸ் நிலையத்திற்கு வந்து அலையவிடாமல் நேரடியாக அவர்கள் வீடுகளுக்கே சென்று போலீசார் விசாரணை நடத்தி தீர்வு காண நடவடிக்கை எடுக்கப்பட்டு வருகிறது. மானாமதுரை போலீஸ் இன்ஸ்பெக்டர் சேது, சப்-இன்ஸ்பெக்டர் அர்ச்சுனன் மற்றும் போலீசார் போலீஸ் நிலைத்திற்கு வந்து புகார் கொடுத்த பொதுமக்களின் பிரச்சினைகள் தொடர்பாக அவர்களின் வீடுகளுக்கு நேரடியாக சென்று விசாரணை நடத்தி தீர்வு காணும் நடவடிக்கையில் ஈடுபட்டு வருகின்றனர்.

போலீசாரின் இந்த புதிய முயற்சிக்கு பொதுமக்களின் தரப்பில் நல்ல வரவேற்பை பெற்றுள்ளது. இதற்காக பொதுமக்கள் போலீசாரை பாராட்டி வருகின்றனர்.

சிவகங்கை:

சிவகங்கை அரசினர் தொழில் பயிற்சி நிலையத்தின் முதல்வர் வெங்கடகிருஷ்ணன் விடுத்துள்ள அறிக்கையில் கூறியுள்ளதாவது:-

சிவகங்கை அரசு தொழிற்பயிற்சி நிலையத்தில் அரசு ஒதுக்கீட்டின் படி நடைபெற்ற முதல் கட்ட கலந்தாய்வில் நிரப்பப்படாமல் காலியாக உள்ள இடங்கள் 2-ம் கட்ட கலந்தாய்வு மூலம் நிரப்பப்பட உள்ளது.

அதன்படி பொறியியல் மற்றும் பொறியியல் அல்லாத பிரிவுகளில் பிற்படுத்தப்பட்டோர், மிகவும் பிற்படுத்தப்பட்டோர், தாழ்த்தப்பட்டோர், தாழ்த்தப்பட்ட அருந்ததியினருக்கு, மின்சார பணியாளர், பொருத்துநர், கம்மியர், இரண்டு மற்றும் மூன்று சக்கர வாகனம் பழுதுபார்த்தல், பற்ற வைப்பவர், ஆடை தயாரித்தல், கணினி இயக்குபவர் மற்றும் திட்டமிடல் உதவியாளர் ஆகிய பிரிவுகளில் சில இடங்கள் காலியாக உள்ளன. இந்த காலி இடங்கள் 2-ம் கட்ட கலந்தாய்வு மூலம் வருகிற அக்டோபர் 16 மற்றும் 17-ந் தேதி நிரப்பப்படஉள்ளது.

இந்த பிரிவுகளில் சேர விரும்புபவர்கள் 8-ம் வகுப்பு மற்றும் 10-ம் வகுப்பு தேர்ச்சி பெற்றிருக்க வேண்டும். இதற்கான விண்ணப்பங்களை சிவகங்கை மற்றும் காரைக்குடியில் உள்ள அரசு தொழிற் பயிற்சி நிலையங்களில் இலவசமாக ஆன்லைனில் பதிவேற்றம் செய்து தரப்படும். எனவே மேற்கண்ட தொழில் பிரிவுகளில் சேர விருப்பம் உள்ளவர்கள் உடனடியாக விண்ணப்பித்து பயனடையலாம்.

இவ்வாறு அவர் கூறியுள்ளார்.

மானாமதுரை:

மானாமதுரை குறிஞ்சிநகர் பகுதியை சேர்ந்தவர் ரவி (வயது 50). இவர் மானாமதுரை அண்ணா சிலை அருகே நடந்து சென்று கொண்டிருந்தார். அப்போது அந்த வழியாக மோட்டார் சைக்கிளில் வந்த மானாமதுரை பட்டறை தெருவை சேர்ந்த சோனைபாண்டி, ரவி மீது மோதினார். இதில் ரவியின் தலையில் பலத்த காயம் ஏற்பட்டு சிகிச்சைக்காக மதுரை அரசு மருத்துவமனையில் சேர்க்கப்பட்டு சிகிச்சை பலனின்றி இறந்தார். இதுகுறித்து மானாமதுரை போலீசார் வழக்குப்பதிவு செய்து விசாரணை நடத்தி வருகின்றனர்.