நீலகிரி

குன்னூர்:

குன்னூர் அருகே வெலிங்டன் கன்டோன்மெண்ட் போர்டில் உள்ள சுகாதார துறையில் 100-க்கும் மேற்பட்ட ஊழியர்கள் பணிபுரிந்து வருகின்றனர். இங்கு 30 ஆண்டாக பணியாற்றிய பரமேஸ்வரன் என்பவர் கடந்த பிப்ரவரி மாதத்தில் உடல் நலக்குறைவால் உயிரிழந்தார். அவருக்கு வழங்க வேண்டிய பண பலன்கள் வழங்கவில்லை. அத்துடன் அவரது குடும்பத்தினர் வசித்து வரும் குடியிருப்பை காலி செய்யுமாறு நிர்வாகம் நோட்டீஸ் அனுப்பியதாக கூறப்படுகிறது.

எனவே கன்டோன்மெண்ட் நிர்வாகத்தை கண்டித்து தொழிலாளர் சங்கம் சார்பில் நுழைவு வாசலில் சுகாதாரத்துறை ஊழியர்கள் வேலை நிறுத்தத்தில் ஈடுபட்டனர். இதற்கு சங்க தலைவர் அசோகன் தலைமை தாங்கினார். சங்க செயலாளர் சர்வேஸ்வரன், நிர்வாகிகள் சுரேஷ், சுந்தரம், ராஜ்குமார் ஆகியோர் முன்னிலை வகித்தனர். பின்னர் அவர்கள் தங்கள் கோரிக்கையை வலியுறுத்தி கோஷம் எழுப்பினார்கள்.

இதையடுத்து தலைமை நிர்வாக அதிகாரி பூஜா பலிச்சா தலைமையில் பேச்சுவார்த்தை நடந்தது. அதில், மரணமடைந்த பரமேஸ்வரனின் பண பலன்களை வழங்குவது, அவரது குடும்பத்தினரை குடியிருப்பிலிருந்து காலி செய்வதை தற்காலிகமாக நிறுத்தி வைப்பது என்று முடிவு செய்யப்பட்டது. இதையடுத்து வேலை நிறுத்தம் கைவிடப்பட்டது.

ஊட்டி:

நீலகிரி மாவட்டம் ஊட்டி சுற்றுவட்டார பகுதிகளில் கொரோனா வைரஸ் வேகமாக பரவி வருகிறது. வைரஸ் தொற்று கண்டறியப்பட்ட பகுதிகள் தனிமைப்படுத்தி கண்காணிக்கப்பட்டு வருகின்றன. குறிப்பாக அணிக்கொரை, குருத்துக்குளி, பணஹட்டி உள்ளிட்ட கிராமங்கள் தொற்று பரவும் பகுதியாக அறிவிக்கப்பட்டு கண்காணிக்கப்படுகிறது. ஊட்டி ஊராட்சி ஒன்றியத்துக்கு உட்பட்ட கிராமங்களில் பல இடங்கள் தனிமைப்படுத்தப்பட்டு கண்காணிக்கப்பட்டு வந்தன.

அப்பகுதிகளில் வசிக்கும் மக்களுக்கு ஊராட்சி ஒன்றிய தலைவர் மாதன் பல்வேறு வகையான காய்கறிகள் அடங்கிய தொகுப்பை தொடர்ந்து வழங்கி வந்தார். கொரோனா தொற்று காலத்தில் தனிமைப்படுத்தப்பட்ட பகுதிகளில் பொதுமக்களுக்கு அதிக அளவில் காய்கறிகளை வழங்கியதற்காக ஊட்டி ஊராட்சி ஒன்றிய தலைவர் மாதனுக்கு நேற்று கலெக்டர் இன்னசென்ட் திவ்யா கேடயம் வழங்கி பாராட்டினார்.

ஊட்டி கலெக்டர் அலுவலகத்தில் நடந்த இந்நிகழ்ச்சியில் வட்டார வளர்ச்சி அலுவலர்கள் ரமேஷ், சந்திரசேகரன் ஆகியோர் கலந்து கொண்டனர்.

கூடலூர்:

கூடலூரில் இருந்து ஓவேலி பேரூராட்சிக்கு உட்பட்ட லாரஸ்டன் 4-ம் நெம்பர் கிராமம் உள்ளது. இங்கு சுமார் 200 குடும்பங்கள் வசித்து வருகின்றனர். அடர்ந்த வனங்கள், தேயிலை தோட்டங்களுக்கு இடையே இக்கிராமம் உள்ளது. இங்கு தோட்ட மற்றும் கூலி தொழிலாளர்கள் பெரும்பான்மையாக உள்ளனர்.

இந்த கிராமத்தில் இருந்து கூடலூருக்கு செல்லும் சாலையில் வட்டப்பாறை என்ற இடத்தில் 3 ஏக்கர் பரப்பளவில் மயானம் உள்ளது. இங்குள்ள புதர்களை அகற்றிவிட்டு மரக்கன்றுகள் நடும் பணியில் வனத்துறையினர் ஈடுபட்டனர். இது குறித்து தகவல் அறிந்த பொது மக்கள், அதற்கு எதிர்ப்பு தெரிவித்து ஆர்.டி.ஓ, தாசில்தாரிடம் புகார் தெரிவித்தனர்.

இந்த நிலையில் நேற்று காலை 9 மணிக்கு மயானத்தில் மரக்கன்றுகள் நடும் பணியில் வனத்துறையினர் ஈடுபட்டு இருந்தனர். இதையறிந்த கிராம மக்கள் திரண்டு வந்து வனத்துறையினரை முற்றுகையிட்டு போராட்டத்தில் ஈடுபட்டனர். கிராம மக்கள் பயன்படுத்தி வரும் மயான நிலத்தை வனத்துறை யினர் கைப்பற்றி வனமாக மாற்ற முயற்சிப்பதாக குற்றம் சாட்டினர். இதனால் அங்கு பரபரப்பு ஏற்பட்டது.

இது குறித்து தகவலறிந்த கூடலூர் வனச்சரகர் ராம கிருஷ்ணன் தலைமையிலான வனத்துறையினர் சம்பவ இடத்திற்கு விரைந்து வந்தனர். பின்னர் அவர்கள் கிராம மக்களிடம் பேச்சுவார்த்தை நடத்தினர். மயான நிலத்தில் மரக்கன்றுகள் மட்டுமே நடுவதாகவும், வழக்கம்போல் கிராம மக்கள் நிலத்தை பயன்படுத்திக்கொள்ளலாம் என உறுதி அளித்தனர். இதை ஏற்றுக்கொண்ட கிராம மக்கள், அங்கிருந்து கலைந்து சென்றனர்.

கோத்தகிரி:

கோத்தகிரி மற்றும் அதன் சுற்றுவட்டார பகுதிகளில் நாவல் மரங்கள் அதிகளவில் உள்ளன. தற்போது சீசன் என்பதால், இந்த மரங்களில் கொத்துக்கொத்தாக காய்கள் காய்த்து பழுத்துள்ளன. இந்த பழம் கரடிகளுக்கு மிகவும் பிடித்தது என்பதால் இந்த பழங்களை சாப்பிடுவதற்காக கூட்டங்கூட்டமாக தேயிலை தோட்டங்களில் முகாமிட்டு உள்ளது.

குறிப்பாக கோத்தகிரி அர வேனு அருகே உள்ள கேத்தரின் நீர்வீழ்ச்சி செல்லும் சாலை, மூணு ரோடு, அரவேனுவில் இருந்து அளக்கரை செல்லும் சாலை உள்ளிட்ட பகுதிகளில் உள்ள தேயிலைத் தோட்டங்களில் தனது குட்டிகளுடன் நடமாடுகின்றன. அத்துடன் அங்குள்ள நாவல் மரங்கள் மீது ஏறி பழங்களை பறித்து சாப்பிட்டு வருகின்றன. கரடிகள் நடமாட்டம் அதிகரித்து உள்ளதால், குடியிருப்பு வாசிகள், தேயிலைத் தோட்டத்தில் தேயிலை பறிக்கும் தொழிலாளிகள் மற்றும் பொதுமக்கள் பீதியடைந்து உள்ளனர்.

இது குறித்து அந்தப்பகுதியை சேர்ந்த பொதுமக்கள் கூறும்போது, நாவல்பழங்களை சாப்பிடுவதற்காக பட்டப்பகலில்கூட கரடிகள் அதிகளவில் வருகின்றன. அவைகள் பழங்களை சாப்பிட்ட பின்னர், அங்குள்ள தேயிலை தோட்டங்களுக்குள் பதுங்கி இருக்கிறது. இதனால் பயமாக இருக்கிறது. எனவே அசம்பாவித சம்பவங்கள் ஏற்படுவதற்கு முன்பு வனத்துறையினர் அந்த கரடிகளை அடர்ந்த வனப்பகுதிக்குள் துரத்த நடவடிக்கை எடுக்க வேண்டும் என்றனர்.