காஞ்சிபுரம்

காஞ்சீபுரம்:

காஞ்சீபுரத்தை அடுத்த பெருநகர் அருகே தனியார் நிறுவன ஊழியர் ஸ்ரீதர் மோட்டார் சைக்கிளில் வந்தார். அப்போது 3 வாலிபர்கள் அவரை வழி மறித்து தாக்கி செல்போனை பறித்தனர்.

இது பற்றி அவர் கிராம மக்களிடம் தெரிவித்தார். திரண்டு வந்தபொதுமக்கள் வழிப்பறியில் ஈடுபட்ட 3 வாலிபர்களை மடக்கி பிடித்து தர்ம அடி கொடுத்தனர். பின்னர் அவர்களை பெருநகர் போலீசில் ஒப்படைத்தனர். 3 பேரிடம் போலீசார் விசாரணை நடத்தி வருகிறார்கள்.

ஆலந்தூர்:

சிங்கப்பூரில் இருந்து சென்னைக்கு இன்று அதிகாலை 3 மணியளவில் பயணிகள் விமானம் வந்தது. அதில் வந்த பயணிகளின் உடைமைகளை சுங்கத்துறை அதிகாரிகள் சோதனை செய்தனர்.

அப்போது சென்னையை சேர்ந்த ராஜேஸ்வரி, பேகம், சிவகங்கையை சேர்ந்த சுரேஷ் அருண் ஆகியோரின் கைப்பைகளில் விலை உயர்ந்த செல்போன்கள், தங்க நகைகள், மறைத்து வைத்து கடத்தி வந்தது தெரிந்தது.

இதையடுத்து மொத்தம் 87 செல்போன்கள், 400 கிராம் தங்கநகை பறிமுதல் செய்யப்பட்டது. செல்போனின் மதிப்பு ரூ 25 லட்சம் ஆகும். தங்க நகையின் மதிப்பு ரூ 12 லட்சம் ஆகும்.

அவற்றை அதிகாரிகள் பறிமுதல் செய்தனர். இதுபற்றி பிடிபட்ட 4 பேரிடமும் அதிகாரிகள் விசாரித்து வருகிறார்கள். #Tamilnews

காஞ்சீபுரம்:

உத்திரமேரூரில் காவிரி நதிநீர் வெற்றி குறித்து நன்றி தெரிவிக்கும் பொதுக்கூட்டம் நடந்தது. காஞ்சீபுரம் மேற்கு மாவட்ட அ.தி.மு.க. செயலாளர் வாலாஜாபாத் பா.கணேசன் தலைமை தாங்கினார். அமைப்பு செயலாளர்கள் வி.சோமசுந்தரம், மைதிலி திருநாவுக்கரசு, காஞ்சீபுரம் எம்.பி. மரகதம் குமரவேல் உள்ளிட்டோர் முன்னிலை வகித்தனர்.

அமைச்சர் பென்ஜமின் சிறப்பு விருந்தினராக கலந்து கொண்டார். அமைச்சர் ஜெயக்குமார் கலந்து கொண்டு புதுப்பிக்கப்பட்ட எம்.ஜி.ஆர். சிலையை திறந்து வைத்து பேசினார். அவர் கூறியதாவது:-

இது வரலாற்று சிறப்பு மிக்க நாள். தீய சக்திகளை வீட்டுக்கு அனுப்பிய நாள் இந்த நாள். எம்.ஜி.ஆர். தமிழகத்தில் தீய சக்திகளை விரட்டி ஆட்சி அமைத்த நாள். அந்த நாளில் எம்.ஜி.ஆரின் சிலையை உத்திரமேரூரில் திறந்து வைப்பது பொருத்தமான நாள். 90 கிலோ மீட்டர் தூரம் உள்ள உத்திரமேரூர் வருவதற்கு 4 மணி நேரம் ஆகிறது.

இதனால் 8 வழி பசுமை சாலை வந்தால் சேலத்திற்கே 5 மணிநேரத்தில் போகும்போது 1 மணி நேரத்திற்குள் உத்திரமேரூர் வந்துவிடலாம். இப்போது இரண்டரை கோடி வாகனங்கள் உள்ளது. வரும் வருடத்தில் 5 கோடி வாகனங்கள் பெருகிவிடும். இந்த மக்கள் தொகை அடிப்படையில் வருங்கால தேவையை சிந்தித்து அமைக்கப்படுவதுதான் இந்த பசுமை வழிச்சாலை திட்டம்.

ஒரு திட்டம் நிறைவேற்ற நிலம் எடுக்கும்போது சில பாதிப்புகள் ஏற்படும். அப்போது அந்த நில உரிமையாளர்களின் வாழ்வாதாரம் பாதிக்கப்படாமல் பார்த்துக்கொள்வது ஒரு அரசின் கடமை. அதன்படி ஒரு ஹெக்டேருக்கு ரூ.1 கோடி முதல் ரூ.9 கோடிவரை கொடுக்கப்படுகிறது.

பொதுமக்கள் நலன்கருதி செயல்படுத்தப்படுவதுதான் இந்த திட்டம். அரசியல் காழ்ப்புணர்ச்சியோடு அரசு எந்த திட்டம் கொண்டு வந்தாலும் எதிர்ப்பதற்கென்றே ஒரு கூட்டம் உள்ளது.

சமூக ஆர்வலர் என்ற பெயரில் ஒருவர் எனது வீட்டில் செத்துபோன நண்டை எடுத்து வந்து போராட்டம் செய்கிறார். உயிரோடு உள்ள நண்டை எடுத்து வந்தாலும் குழம்பு வைத்து சாப்பிட்டு இருப்போம்.

ஜெயலலிதா அமைத்த இந்த அரசு கலைக்கப்பட வேண்டும் என்று செயல்படுபவர் துரோகி. அந்த துரோகி தான் தினகரன். இப்போது தி.மு.க.வுடன் சேர்ந்து கொண்டு இந்த அரசை எப்படியாவது கலைத்து விட வேண்டும் என்ற ஒரே நோக்கத்தில் செயல்படுகிறார். எத்தனை தினகரன், ஸ்டாலின் வந்தாலும் இந்த இயக்கத்தை அசைக்க முடியாது.

ஸ்டாலின் வந்தாலும், அவருடன் தினகரன் சேர்ந்தாலும் இன்னும் 100 ஆண்டுகள் இந்த ஆட்சிதான் மலரும்.

இவ்வாறு அவர் பேசினார்.

கூட்டத்தில் மாவட்ட பேரவை செயலாளர் கே.யூ.எஸ்.சோமசுந்தரம், மாவட்ட மாணவரணி செயலாளர் வீ.வள்ளிநாயகம், நிர்வாகிகள் அத்திவாக்கம் செ.ரமேஷ், பிரகாஷ்பாபு, தும்பவனம் ஜீவானந்தம், நாகராஜன், குண்ணவாக்கம் ஆர்.கிருஷ்ணமூர்த்தி, தென்னேரி வரதராஜூலு உள்ளிட்ட அ.தி.மு.க. நிர்வாகிகள் கலந்து கொண்டனர்.

பின்னர் அமைச்சர் ஜெயக்குமார் நிரூபர்களிடம் கூறியதாவது:-

1995-ல் சட்டமன்றத்தில் ஆளுனர் குறித்து விவாதிக்கலாம் என்று ஒரு தீர்மானத்தை ஜெயலலிதா கொண்டு வந்தார். 1999-ல் தி.மு.க. ஆளுனர் மீதுள்ள அதிகாரத்தில் யாரும் தலையிடக் கூடாது, ஆளுனர் குறித்து பேசவே கூடாது. சட்டமன்றத்தில் விவாதிக்க கூடாது என்று கூறியது தி.மு.க.தான். தற்போது ஆளுனர் குறித்து விவாதிக்க கூறினால் அது முடியவில்லை.

அரசு நிர்வாகத்தில் எந்த தலையீடும் இல்லாமல் அவரது பணிகளை தூய்மை இந்தியா என்ற பல்வேறு திட்டங்களை பார்த்துக்கொண்டு வருகிறார். அரசியல் ரீதியாக அவரை எதிர்க்கணும், அவர்களை அடையாளப்படுத்திக் கொள்ள வேண்டும் என்ற ரீதியில் தி.மு.க.வினர் போராட்டங்களை நடத்தி வருகின்றனர்.

இவ்வாறு அவர் கூறினார். #MKStalin #ADMK

மதுராந்தகம்:

மதுராந்தகத்தை அடுத்த சோத்துப்பாக்கத்தைச் சேர்ந்தவர் முத்துகுமார்.

இவர் மதுராந்தகம் அருகே சென்னை-திருச்சி தேசிய நெடுஞ்சாலையில் உள்ள பாக்கம் என்ற இடத்தில் அரவிந்த் செராமிக்ஸ் என்ற டைல்ஸ் கடை நடத்தி வருகிறார்.

நேற்று கடைக்கு சென்ற அவர் இரவு நீண்ட நேரமாகியும் வீடு திரும்பவில்லை. இதனால் உறவினர்கள் அவர் செல்போனுக்கு தொடர்பு கொண்டனர். ஆனால் அது சுவிட்ச் ஆப் செய்யப்பட்டு இருந்தது.

இதையடுத்து கடைக்கு உறவினர்கள் மற்றும் நண்பர்கள் சென்றனர். அப்பகுதியைச் சேர்ந்த சிலரிடம் கேட்டபோது, “முத்துக்குமார் கடையை பூட்டிவிட்டு காரில் ஏறும்போது 5 பேர் கொண்ட கும்பல் அவரை வழிமறித்து காருடன் கடத்தி சென்றதாக” தெரிவித்தனர்.

இதனால் அதிர்ச்சி அடைந்த உறவினர்கள் மதுராந்தகம் போலீசில் புகார் செய்தனர். உடனே போலீசார் மாவட்டம் முழுவதும் தீவிர வாகன சோதனையில் ஈடுபட்டனர்.

அனைத்து சாலைகளிலும் தற்காலிக சோதனைச் சாவடி அமைத்து விசாரணை நடத்தினர். முத்துக்குமாரின் செல்போன் சிக்னலை வைத்து அவர் எந்த பகுதியில் இருக்கிறார் என்பதை கண்டுபிடிக்கும் முயற்சியில் போலீசார் ஈடுபட்டுள்ளனர்.

இதுகுறித்து வழக்குப் பதிவு செய்துள்ள போலீசார் தொழில் அதிபர் முத்துக்குமாரை பணம் கேட்டு மிரட்டுவதற்காக மர்ம கும்பல் கடத்தி சென்றதா? அல்லது தொழில் போட்டியில் கடத்தப்பட்டாரா? என்று விசாரித்து வருகிறார்கள்.

மேலும் அவருக்கு யாராவது விரோதிகள் இருக்கிறார்களா? என்று உறவினர்களிடம் விசாரணை நடத்தப்படுகிறது. #Tamilnews

தாம்பரம்:

மேற்கு தாம்பரம் ரங்கநாதபுரத்தைச் சேர்ந்தவர் அபீத் முகமது (90). இவருடைய 3 மகன்கள், 2 மகள்கள் திருமணம் முடிந்து தனியாக உள்ளனர்.

தற்போது, அபீத்முகமது அவரது மகள் மெகர்நிசா வீட்டில் தங்கி இருக்கிறார். நேற்று இரவு அபீத்முகமது வீட்டில் உள்ள ஒரு அறையில் கட்டிலில் படுத்து தூங்கினார். அவரது மகள் மெகர்நிஷா பாயில் படுத்து இருந்தார்.

வீட்டில் இருந்த மற்றவர்கள் வேறு அறையில் தூங்கினார்கள். இந்த நிலையில் அமீத்முகமது மெகர்நிஷா ஆகியோர் படுத்து இருந்த அறையில் இருந்து நள்ளிரவு கரும்புகை வந்தது.

உடனே அக்கம் பக்கத்தில் உள்ளவர்களும், அடுத்த அறையில் இருந்தவர்களும் அங்கு சென்றனர். அப்போது அங்கு இருந்த பொருட்கள் எரிந்து கொண்டிருந்தன. அபீத்முகமது, மெகர்நிஷா ஆகியோர் உடல் கருகிய நிலையில் மயங்கி கிடந்தனர்.

உடனே அவர்களை குரோம்பேட்டை அரசு ஆஸ்பத்திரிக்கு கொண்டு சென்றனர். பின்னர் சென்னை கீழ்ப்பாக்கம் ஆஸ்பத்திரியில் அனுமதிக்கப்பட்டனர். இதில் அபீத்முகமது பரிதாபமாக உயிர் இழந்தார். மெகர் நிசாவுக்கு தொடர்ந்து சிகிச்சை அளிக்கப்படுகிறது.

இந்த சம்பவம் குறித்து தாம்பரம் போலீசார் வழக்கு பதிவு செய்து விசாரணை நடத்தி வருகிறார்கள்.

வீட்டில் இருந்த கொசு வத்தி சுருளில் இருந்து தீ பரவியதால் இந்த தீ விபத்து ஏற்பட்டு இருப்பது தெரிய வந்துள்ளது. மேலும் விசாரணை நடைபெறுகிறது.