ஈரோடு

சென்னிமலை:

ஈரோடு மாவட்டத்தில் கீழ்பவானி வாய்காலில் கான்கிரீட் தளம் அமைக்க விவசாயிகள் எதிர்ப்பு தெரிவித்து வருகின்றனர்.

இந்த திட்டத்தில் 200 கி.மீ நீளம் கொண்ட கீழ்பவானி கால்வாயில் கான்கிரீட் தளம் அமைக்க விவசாயிகள் கடும் எதிர்ப்பு தெரிவித்து வருகின்றனர். விவசாயிகள் கடும் எதிர்ப்பால் ஏற்கனவே கடந்த 2013 ம் ஆண்டு கைவிடப்பட்ட இந்த திட்டம் தற்போது மீண்டும் செயல்வடிவம் பெற்றுள்ளது.

இதனை கண்டித்து இன்று முதல் போராட்டங்களை தீவிரபடுத்த விவசாயிகள் திட்டமிட்டு தொடர் போராட்டம் நடத்த போவதாக அறிவித்து இருந்தனர்.

இன்று காலை சென்னிமலை யூனியன், முருங்கத்தொழுவு ஊராட்சி, தலவுமலை அருகில்கீழ் பவானி வாய்க்கால் கரையில் ஆண்கள், பெண்கள், என 500- க்கும் மேற்பட்டோர் திரண்டு இந்த திட்டத்திற்கு எதிராக கோ‌ஷம் எழுப்பினர். மேலும் மத்திய, மாநில அரசுகள் இந்த திட்டத்தினை கைவிட வேண்டும் எனவும் கோ‌ஷம் எழுப்பினர்.

இந்த போரட்டத்திற்கு முருங்கத்தொழுவு ஊராட்சி மன்ற முன்னாள் தலைவர் ரவி தலைமை தாங்கினார். பல்வேறு விவசாயிகள் சங்க நிர்வாகிகள் கலந்து கொண்டனர்.

கீழ்பவானி கால்வாய் மூலம் ஈரோடு, திருப்பூர், கரூர் மாவட்டங்களில் 2 லட்சத்து 7 ஆயிரம் ஏக்கர் விளை நிலங்கள் பாசனம் பெறுகின்றன. கான்கிரீட் தளம் அமைத்தால் நிலத்தடி நீர் செறிவூட்டுதல் தடைபட்டு, கிராமங்களில் குடிநீர் தட்டுப்பாடு ஏற்படும். மேலும் பல லட்சம் ஏக்கர் விவசாயமும் பாதிப்படையும் என விவசாயிகள் எதிர்ப்பு தெரிவித்து பேசினர்.

மேலும், கான்கிரீட் தளம் அமைப்பதை கைவிட்டு மற்ற பராமரிப்பு பணிகளையும் தூர்வாரும் பணிகளையும் மேற்கொள்ள விவசாயிகள் வலியுறுத்தினர்.

விவசாயிகளிடம் கருத்து கேட்காமல் கால்வாயில் கான்கிரீட் தளம் அமைக்கப்படுவதாகவும், கீழ்பவானி திட்டத்தில் மறைமுக பாசன பகுதிகள் பாலைவனமாவதுடன், கரைகளில் உள்ள ஆயிரக்கணக்கான மரங்கள் வெட்டப்படும் என்றும் விவசாயிகள் தெரிவித்துள்ளனர்.

இயற்கைக்கு முரணாகவும், கசிவு நீர் திட்டங்களுக்கு எதிராகவும் உள்ள இந்த பணிகளை அனுமதிக்க மாட்டோம் என கீழ்பவானி பாசன பாதுகாப்பு இயக்கத்தின் நிர்வாகி முருங்கத்தொழுவு ரவி தெரிவித்தார்.

ஈரோடு:

பொது வினியோக திட்டத்தின் கீழ் பல்வேறு மாநிலங்களில் இருந்து உணவு பொருட்கள் கொள்முதல் செய்யப்பட்டு ஈரோட்டில் உள்ள மத்திய சேமிப்பு கிடங்கில் இருப்பு வைக்கப்படும். பின்னர் அந்த பொருட்கள் மாவட்டத்தில் உள்ள ரேஷன் கடைகளுக்கு அனுப்பி வைக்கப்பட்டு பொதுமக்களுக்கு வினியோகம் செய்யப்படும்.

இந்த நிலையில் பொது வினியோக திட்டத்தின் சார்பில், ஈரோடு மாவட்டத்துக்கு தேவையான புழுங்கல் அரிசியை தெலுங்கானா மாநிலம் கரிம் நகர் பகுதியில் இருந்து கொள்முதல் செய்ய முடிவு செய்யப்பட்டது. இதைத்தொடர்ந்து அங்கு 1,300 டன் புழுங்கல் அரிசி கொள்முதல் செய்யப்பட்டு ரெயில் மூலம் ஈரோட்டிற்கு அனுப்பி வைக்கப்பட்டது.

இந்த ரெயில் நேற்று காலை ஈரோடு ரெயில் நிலையத்தை வந்தடைந்தது. 21 பெட்டிகளில் கொண்டு வரப்பட்ட 1,300 டன் அரிசியை தொழிலாளர்கள் ரெயிலில் இருந்து இறக்கி லாரிகளில் ஏற்றினார்கள். பின்னர் லாரியில் ஏற்றப்பட்ட அரிசி ஈரோடு மூலப்பாளையம் மற்றும் பவானி ரோட்டில் உள்ள மத்திய சேமிப்பு கிடங்குகளுக்கு கொண்டு செல்லப்பட்டன.

ஈரோடு:

மதுரை நாகமலை புதுக்கோட்டை பகுதியை சேர்ந்தவர் பிரபாகரன் (வயது 28). திருமணம் ஆகாதவர். இவர் தனது தாயுடன் ஈரோடு மாவட்டம் அந்தியூர் அருகே உள்ள காட்டூரில் குடியிருந்து வந்தார். சென்னம்பட்டி வனத்துறை அலுவலகத்தில் வனக்காப்பாளராக பணியாற்றி வந்தார்.

இந்த நிலையில் அந்தியூர் வனத்துறை ஊழியர்கள் அந்தியூர் அருகே உள்ள கொம்புதூக்கி அம்மன் கோவில் பகுதியில் நேற்று ரோந்து சென்றனர்.

அப்போது அங்கு பிரபாகரன் பிணமாக கிடந்தார். உடனே இதுபற்றி பர்கூர் போலீசாருக்கு தகவல் கொடுத்தனர். அதைத்தொடர்ந்து போலீஸ் சப்-இன்ஸ்பெக்டர் செந்தில்குமார் மற்றும் போலீசார் சம்பவ இடத்துக்கு விரைந்து சென்று, பிரபாகரனின் உடலை கைப்பற்றி பிரேத பரிசோதனைக்காக அந்தியூர் அரசு ஆஸ்பத்திரிக்கு அனுப்பி வைத்தனர்.

இதுகுறித்து போலீசார் நடத்திய விசாரணையில், பிரபாகரன் விஷம் குடித்து தற்கொலை செய்து கொண்டார் என்பது தெரியவந்தது. ஆனால் அவர் எதற்காக தற்கொலை செய்து கொண்டார்? என்று தெரியவில்லை. இதுபற்றி போலீசார் வழக்குப்பதிவு செய்து விசாரணை நடத்தி வருகிறார்கள்.

ஈரோடு:

தாளவாடி, சூசைபுரம், கல்மண்டிபுரம், எரகனள்ளி, தலமலை, திம்பம், ஆசனூர் மற்றும் அதன் சுற்றுவட்டார பகுதிகளில் கடந்த சில வாரங்களாக வெயில் வாட்டி வந்தது. இந்த நிலையில் தாளவாடி பகுதியில் நேற்று இரவு 10 மணி அளவில் தூறல் மழை பெய்ய தொடங்கியது. பின்னர் 2 மணி நேரம் மிதமான மழை பெய்தது. இதனால் ஆசனூர் மற்றும் தாளவாடி வனப்பகுதியில் உள்ள ஒடையில் மழைநீர் பெருக்கெடுத்து ஓடியது. சத்தியமங்கலம் புலிகள் காப்பகத்துக்கு உள்பட்ட வனப்பகுதியிலும் மழை பெய்தது. இதனால் வனப்பகுதியில் உள்ள பல குளம் மற்றும் குட்டைகள் நிரம்பி உள்ளன.

இதேபேல் ஈரோடு மாவட்டத்தின் நேற்று முன்தினம் பல்வேறு பகுதிகளில் பரவலாக மழை பெய்தது. ஈரோடு மாநகரில் நேற்று மதியம் முதல் மழை விட்டுவிட்டு பெய்தது. இந்த மழையால் மாநகரில் தாழ்வான பகுதிகளில் மழை நீர் சாக்கடை கழிவுநீருடன் சேர்ந்து சாலைகளில் பெருக்கெடுத்து ஓடியது.

ஈரோடு மாவட்டத்தில் நேற்று முன்தினம் பெய்த மழை அளவு மில்லி மீட்டரில் வருமாறு:-

பவானிசாகர் -27.8, ஈரோடு -25, பவானி -18, அம்மாபேட்டை -17.2, தாளவாடி -17, கொடுமுடி -15.8, கவுந்தப்பாடி -13.4, மொடக்குறிச்சி -10, எலந்தகுட்டைமேடு -7.2, சத்தியமங்கலம் -7, வரட்டுப்பள்ளம் -5, கோபி -5, சென்னிமலை -3, கொடிவேரி -1. மாவட்டத்தில் மொத்தம் 172.4 மில்லி மீட்டர் மழை பொழிந்துள்ளது.

ஈரோடு:

உங்கள் தொகுதியில் ஸ்டாலின் என்ற பெயரில் தி.மு.க. தலைவர் மு.க.ஸ்டாலின் தமிழகம் முழுவதும் தேர்தல் பிரசாரம் செய்து வருகிறார். அந்த வகையில் ஈரோடு வடக்கு மாவட்ட தி.மு.க. சார்பில் உங்கள் தொகுதியில் ஸ்டாலின் என்ற தலைப்பில் தேர்தல் பிரசாரம் பங்களாப்புதூர் அடுத்து புஞ்சை துரையம் பாளையத்தில் உள்ள சத்தியமங்கலம்-அத்தாணி தேசிய நெடுஞ்சாலையில் இன்று காலை நடந்தது.

இதற்காக அங்கு பிரம்மாண்ட பந்தல், மேடை அமைக்கப்பட்டிருந்தது. மேலும் விழா நடைபெறும் இடம் முழுவதும் ஸ்டாலின் தான் வராரு விடியல் தர போராரு என்ற வாசகங்கள் அடங்கிய பேனர்கள் வைக்கப்பட்டிருந்தன.

இதில் கலந்து கொள்ள வந்த தி.மு.க. தலைவர் மு.க.ஸ்டாலினுக்கு உற்சாக வரவேற்பு அளிக்கப்பட்டது. வரவேற்பை பெற்று கொண்ட அவர் பொதுமக்களை சந்தித்து வணக்கம் தெரிவித்தார். பின்னர் பொதுமக்கள் இருக்கும் இடத்திற்கே சென்று அவர்களிடம் மனுக்களை வாங்கினார். அப்போது அங்கு இருந்த ஆண்கள், பெண்கள் அனைவரும் உற்சாக மிகுதியில் மு.க.ஸ்டாலினுக்கு வணக்கம் தெரிவித்து அவருடன் கைகுலுக்கி மகிழ்ந்தனர். பெண்கள் ஆர்வத்துடன் மு.க.ஸ்டாலினுடன் செல்பி எடுத்து கொண்டனர். முன்னதாக மு.க.ஸ்டாலின் வந்ததும் ஸ்டாலின் தான் வாராரு என்ற பாடல் ஒலிபரப்பப்பட்டது.

இந்த பிரசார கூட்டத்தில் கோபிசெட்டிபாளையம், அந்தியூர், பவானி, பவானிசாகர் தொகுதிகளை சேர்ந்த பொதுமக்களிடம் தி.மு.க. தலைவர் மு.க.ஸ்டாலின் கோரிக்கை மனுக்களை பெற்று மேடையில் அமைக்கப்பட்டு இருந்த பெட்டியில் போட்டார். மனு கொடுத்த அனைவருக்கும் ஒப்புகை சீட்டு வழங்கப்பட்டது.

பொதுமக்கள் கொடுத்த மனுக்களில் இருந்து சில மனுக்களை எடுத்து மனு கொடுத்தவர்களை பேச அழைத்தார். அப்போது அவர்களது கோரிக்கைகளுக்கு பதில் அளித்து மு.க.ஸ்டாலின் பேசினார். அப்போது தி.மு.க. ஆட்சிக்கு வந்ததும் உங்களின் கோரிக்கை 100 நாட்களுக்குள் தீர்க்கப்படும் என்று பேசினார்.

பின்னர் மனுக்கள் போடப்பட்ட பெட்டியை பொதுமக்கள் முன்னிலையில் மு.க.ஸ்டாலின் பூட்டி சீல் வைத்தார்.

மொடக்குறிச்சி:

மொடக்குறிச்சியை அடுத்த லக்காபுரத்தை சேர்ந்தவர் ராஜன் (வயது 56). இவர் அந்த பகுதியில் உள்ள டாஸ்மாக் கடையில் விற்பனையாளராக பணியாற்றி வருகிறார்.

சம்பவத்தன்று இரவு விற்பனை முடிந்ததும் டாஸ்மாக் கடையை அடைத்துவிட்டு உள்ளே இருந்து வரவு, செலவு கணக்குகளை பார்த்து கொண்டிருந்தார். அப்போது கடைக்கு 4 பேர் மது குடிக்க வந்தனர்.

பின்னர் அவர்கள் 4 பேரும் மதுபானம் வேண்டும் என்று ராஜனிடம் கேட்டு உள்ளனர். அதற்கு அவர், ‘கடை நேரம் முடிந்துவிட்டது. எனவே மதுபானம் தர முடியாது,’ என கூறினார்.

இதனால் 4 பேரும் ஆத்திரம் அடைந்து ராஜனை தகாத வார்த்தையால் திட்டியதுடன், அவரை தாக்கியதாக கூறப்படுகிறது. இதில் கண் மற்றும் தலையில் ராஜனுக்கு காயம் ஏற்பட்டது. பின்னர் அவர்கள் 4 பேரும் அங்கிருந்து தப்பி சென்றுவிட்டனர்.

இதுகுறித்த புகாரின் பேரில் மொடக்குறிச்சி போலீசார் வழக்குப்பதிவு செய்து ராஜனை தாக்கிய 4 பேரையும் வலைவீசி ேதடி வந்தனர்.

இந்த நிலையில் லக்காபுரத்தில் இருந்து ஆனைக்கல்பாளையம் செல்லும் பகுதியில் உள்ள ஒரு வீட்டில் 4 பேர் பதுங்கி இருப்பதாக மொடக்குறிச்சி போலீசாருக்கு ரகசிய தகவல் கிடைத்தது. உடனே போலீசார் அந்த பகுதியில் உள்ள வீட்டுக்கு விரைந்து சென்று பதுங்கி இருந்த 4 பேரையும் பிடித்து விசாரணை நடத்தினர்.

விசாரணையில், ‘அவர்கள் லக்காபுரம் நொச்சிக்காட்டு வலசு பகுதியை சேர்ந்த நிதி நிறுவன அதிபரான அன்பரசன் (38), அந்த நிறுவனத்தின் ஊழியரான ஈரோடு ரயில்வே காலனி மோளக்கவுண்டன்பாளையத்தை சேர்ந்த பிரவீன்குமார் (33), லட்சுமி நகர் ரணியன் வீதியை சேர்ந்த நந்தகுமார் (30), ஈரோடு கள்ளுக்கடை மேடு முத்துக்குமார வீதியை சேர்ந்த தயாளன் (32) என்பதும், அவர்கள் 4 பேரும் சேர்ந்து டாஸ்மாக் விற்பனையாளரான ராஜனை தாக்கியதும்,’ தெரிய வந்தது. இதைத்தொடர்ந்து 4 பேரையும் போலீசார் கைது செய்தனர்.