ஆட்டோமொபைல்

எம்ஜி மோட்டார் இந்தியா நிறுவனம், தங்கள் வரிசையில் உள்ள பெரும்பாலான மாடல்களுக்கு 1.5 சதவீதம் வரை விலை உயர்வை அறிவித்துள்ளது. வாகன விலைகளில் ஏற்படும் மாற்றங்கள் வருகிற 1-ந்தேதி முதல் அமலுக்கு வரும். விலை மாற்றங்களின் அளவு மாடல் மற்றும் வேரியண்ட்-க்கு ஏற்ப வேறுபடும். அதிகரித்து வரும் உள்ளீட்டு செலவுகள் மற்றும் பொருளாதார சரிசெய்தல் காரணமாக வாகனங்களின் விலைகளில் திருத்தம் செய்யப்பட்டுள்ளதாக எம்ஜி நிறுவனம் தெரிவித்துள்ளது.

இந்தியாவில் எம்ஜி பேட்ஜ் கொண்ட தற்போதைய கார்களின் வரிசை கொமெட் EV உடன் தொடங்குகிறது. இந்த மாடல் ரூ.4.99 லட்சம் (எக்ஸ்-ஷோரூம்) ஆரம்ப விலையில் வருகிறது. அதைத் தொடர்ந்து ரூ.10 லட்சம் (எக்ஸ்-ஷோரூம்) விலையில் வரும் விண்ட்சர் EV உள்ளது. இதைத் தொடர்ந்து, ஐசி எஞ்சின் கார்களின் வரிசையில், ஆஸ்டர மாடல் ரூ.11.30 லட்சம் (எக்ஸ்-ஷோரூம்) விலையில் தொடங்குகிறது.

அடுத்தது ஹெக்டார் ரூ.17.5 லட்சம் (எக்ஸ்-ஷோரூம்) விலையில் கிடைக்கிறது. எம்ஜி குளோஸ்டர் ரூ. 41.07 லட்சம் (எக்ஸ்-ஷோரூம்) விலையில் விலை உயர்ந்த மாடல்களில் முதலிடத்தைப் பிடித்துள்ளது.

இந்த நிறுவனத்தின் எலெக்ட்ரிக் கார்கள் நுகர்வோருக்கு பேட்டரி-ஆஸ்-எ-சர்வீஸ் (BaaS) வழங்குகின்றன. இந்த மாடல், காரின் விலையிலிருந்து பேட்டரி விலையைப் பிரிப்பதன் மூலம் நுகர்வோருக்கு வாகனத்தின் ஆரம்ப செலவைக் குறைப்பதை நோக்கமாகக் கொண்டுள்ளது.

எம்ஜி மோட்டார் நிறுவனம் புதிய தயாரிப்புகளுடன் ஆடம்பர சந்தையில் நுழையத் தயாராகி வருகிறது. உயர் ரக வாகனப் பிரிவில் நுழைவதற்கான அறிகுறியாக, எம்9 லிமோசினை அறிமுகப்படுத்தும் திட்டங்களை நிறுவனம் வெளியிட்டுள்ளது.

இந்த ஆண்டின் பிற்பகுதியில், எம்ஜி நிறுவனம் அதன் எலெக்ட்ரிக் வாகன வரிசையில் செயல்திறன் சார்ந்த புதுமைகளை மேம்படுத்துவதை நோக்கமாகக் கொண்ட சைபர்-ஸ்டர் என்ற எலெக்ட்ரிக் ஸ்போர்ட்ஸ் காரையும் அறிமுகப்படுத்தும்.

இந்த இரண்டு பிரீமியம் வாகனங்களும் புதிதாக நிறுவப்பட்ட டீலர்ஷிப் நெட்வொர்க், எம்ஜி செலக்ட் (MG Select) மூலம் விற்கப்படும். இது மிகவும் பிரத்யேக வாடிக்கையாளர் அனுபவத்தை வழங்க வடிவமைக்கப்பட்டுள்ளது.

இதுதவிர எம்ஜி நிறுவனம் மஜெஸ்டர் (Majestor) மாடலின் டீசரை வெளியிட்டுள்ளது. இது குளோஸ்டர் மாடலில் இருந்து பெறப்பட்ட ஒரு சொகுசு எஸ்யூவியாக இருக்கலாம். இந்த மாடல் இந்திய சந்தையில் எம்ஜி நிறுவனம் அதன் பிரீமியம் சலுகைகளை விரிவுபடுத்துவதற்கான லட்சியத்தைக் குறிக்கிறது.

ஹோண்டா மோட்டார்சைக்கிள் மற்றும் ஸ்கூட்டர் இந்தியா நிறுவனம் இந்தியாவில் புதிதாக அறிமுகம் செய்த ரெபெல் 500 மற்றும் எக்ஸ்-ஏடிவி (X-ADV) ஆகியவற்றின் விநியோகங்களைத் தொடங்கியுள்ளது. இரண்டு மாடல்களும் ஹோண்டாவின் பிக்-விங் டாப்லைன் டீலர்ஷிப்களில் விற்பனைக்கு கிடைக்கின்றன.

இந்தியாவில் உள்ள பிக்-விங் டீலர்ஷிப்களில் எக்ஸ்-ஏடிவி விற்பனைக்கு வந்தாலும், ரெபெல் 500 டெல்லி என்சிஆர், பெங்களூரு மற்றும் மும்பையில் மட்டுமே விற்பனைக்கு கிடைக்கிறது. ஹோண்டா ரெபெல் 500 ரூ. 5.12 லட்சத்தில் விலை நிர்ணயம் செய்யப்பட்டுள்ளது. மேலும் மேட் பிளாக் மெட்டாலிக் என்ற ஒரே ஒரு நிறத்தில் மட்டுமே கிடைக்கிறது.

ரெபெல் 500 பைக்கில் 471 சிசி லிக்விட்-கூல்டு பேரலல் ட்வின்-சிலிண்டர் மோட்டார் பொருத்தப்பட்டுள்ளது. இது 8,500 ஆர்பிஎம்மில் 45.6 ஹெச்பி பவரையும், 6,000 ஆர்பிஎம்மில் 43.3 என்எம் பீக் டார்க்கையும் உருவாக்குகிறது. இந்த எஞ்சின் 6-ஸ்பீடு கியர்பாக்ஸுடன் இணைக்கப்பட்டுள்ளது. இந்த எஞ்சின் வலுவான அடிப்பகுதியுடன், டார்க் நிறைந்த செயல்திறனை வழங்குகிறது. இந்த வடிவமைப்பு ரிலாக்ஸ்டு எர்கானமிக்ஸ் மற்றும் 690 மிமீ குறைந்த இருக்கை உயரம் கொண்ட ரெட்ரோ-க்ரூஸரின் வடிவமைப்பாகும்.

மறுபுறம், ஹோண்டா எக்ஸ்-ஏடிவி ரூ. 11.91 லட்சம் (எக்ஸ்-ஷோரூம்) விலையில் கிடைக்கிறது. இதன் விலை மிகவும் அதிகமாக உள்ளது. ஹோண்டா எக்ஸ்-ஏடிவி 745 சிசி லிக்விட் கூல்டு பேரலல்-ட்வின் எஞ்சினைப் பெறுகிறது. இந்த யூனிட் 6,750 ஆர்பிஎம்மில் 57 hp பவரையும் 4,750 rpm இல் 69 என்எம் அதிகபட்ச டார்க்கை உற்பத்தி செய்கிறது.

புதிய எக்ஸ்-ஏடிவி ஆனது யுஎஸ்பி டைப்-சி சார்ஜிங் போர்ட், 5-இன்ச் முழு-வண்ண TFT டிஸ்ப்ளே போன்ற அம்சங்களை கொண்டுள்ளது. மேலும், ஹோண்டா ரோட்சின்க் ஆப் கனெக்ட், ரைடர்களுக்கு அழைப்புகள் மற்றும் எஸ்எம்எஸ் எச்சரிக்கைகளைப் பெறவும், டர்ன்-பை-டர்ன் நேவிகேஷன் அணுகவும், வாய்ஸ் கண்ட்ரோல் வசதியையும் வழங்குகிறது.

இது ரைடு-பை-வயர் தொழில்நுட்பம், நான்கு ரைடு மோட்கள்- ஸ்டாண்டர்ட், ஸ்போர்ட், ரெயின் மற்றும் கிராவெல் பெறுகிறது. மாறுபட்ட சாலை நிலைமைகளில் உகந்த இழுவைக்காக ஹோண்டா செலக்டபில் டார்க் கண்ட்ரோல் (HSTC) மற்றும் க்ரூஸ் கண்ட்ரோல் சிஸ்டத்தையும் பெறுகிறது. ஹோண்டா நிறுவனம் தனது எக்ஸ்-ஏடிவி மாடலை- கிராஃபைட் பிளாக் மற்றும் பேர்ல் கிளேர் வைட் என இரண்டு வண்ணங்களில் வழங்குகிறது.

லம்போர்கினி நிறுவனம் தனது மிகவும் சக்திவாய்ந்த காருக்கான உற்பத்தி பணிகளை அமைதியாக மேற்கொண்டு வருவதாக தெரிகிறது. சமீபத்தில் லீக் ஆன வர்த்தக ஆவணம் ஒரு புதிய வரையறுக்கப்பட்ட ஹைப்பர் காரின் பெயரை வெளிப்படுத்தியிருக்கலாம். இந்த மாடல் ஃபெனோமினோ (Fenomeno) என்று அழைக்கப்படுகிறது. இது ரெவெல்டோவை அடிப்படையாகக் கொண்ட ஒரு மாடலாக இருக்கும்.

ரெவெல்டோ நிறுவனத்தின் முதன்மை மாடல் ஆகும். இது 3.8 kWh பேட்டரி பயன்படுத்தி இயங்கும் மூன்று எலெக்ட்ரிக் மோட்டார்களைக் கொண்ட 6.5 லிட்டர் V12 ஹைப்ரிட் பவர்டிரெயினுடன் வருகிறது. இந்த அமைப்பு மொத்தம் 1014 hp பவர் வெளிப்படுத்துகிறது. இத்துடன் 8-ஸ்பீடு டூயல் கிளட்ச் டிரான்ஸ்மிஷன் வழங்கப்படுகிறது.

ஃபெனோமினோ புதிய ரெவல்டோ அடிப்படையிலான மாடலாக இருப்பதற்கான கோட்பாடு சந்தேகங்களால் சூழப்பட்டுள்ளது. ஏனெனில் காரின் இலகுவான மற்றும் வேகமான பதிப்புகள் முற்றிலும் புதிய பெயருக்குப் பதிலாக S, SV அல்லது SVJ போன்ற வேரியண்ட்களை பெற வாய்ப்புள்ளது.

தற்போது வரை, லம்போர்கினி நிறுவனம் ஃபெனோமினோ தொடர்பான எந்த தகவலையும் வெளியிடவில்லை. இருப்பினும், லம்போர்கினி வாடிக்கையாளர்களுக்கு சமீபத்தில் ஒரு புதிய மாடலின் முன்னோட்டம் வழங்கப்பட்டதாக தகவல்கள் தெரிவிக்கின்றன. இது நிறுவனத்தின் பிரபல மாடல்களில் ஒன்றால் ஈர்க்கப்பட்ட வடிவமைப்பைக் கொண்டிருந்ததாகக் கூறப்படுகிறது.

இந்த புதிய கார் ஆகஸ்ட் மாதம் மான்டேரி கார் வாரத்தில் உள்ள பெப்பிள் பீச் கான்கோர்ஸ் டி'எலிகன்ஸில் அறிமுகமாகும். இது சமீபத்திய காலங்களில் மிகவும் பிரத்யேக கார்கள் சிலவற்றின் அறிமுகத்திற்கான இடமாக மாறியுள்ளது. கடந்த காலத்தில், இது லான்சாடர் கான்செப்ட் மற்றும் டெமராரியோ போன்ற மாடல்களின் பிரத்யேக பிரீமியர்களை நடத்தியது.

ராயல் என்ஃபீல்டு நிறுவனம் கடந்த ஆண்டு ஜூலை மாதத்தில் கெரில்லா 450 மாடலை அறிமுகம் செய்ததது. கவர்ச்சிகர வடிவமைப்பு காரணமாக இந்த மாடல் வாடிக்கையாளர்கள் மத்தியில் உடனடி கவனம் பெற்றது. கெரில்லா 450 போன்ற டிசைன் அதற்கு முன்பு வரை வேறெந்த ராயல் என்ஃபீல்டு பைக்கிலும் காணப்படவில்லை.

இந்த குறிப்பிட்ட ராயல் என்ஃபீல்டு கெரில்லா 450 மோட்டார்சைக்கிளை இத்தாலிய பைக் தயாரிப்பாளரான பெப்போ ரோசெல் என்பவர் வடிவமைத்தார். மேலும் இந்த மாடல் 2025 ஆம் ஆண்டு வீல்ஸ் அண்ட் வேவ்ஸ் விழாவில் காட்சிப்படுத்தப்பட்டது.

இந்த பைக்கின் பிரேம் மற்றும் எஞ்சின் வழக்கமான கெரில்லா 450 பைக்கில் இருந்து தக்கவைக்கப்பட்டாலும், வழக்கமான கெரில்லா 450 பைக்கை விட ஆக்ரோஷமாகவும் மூர்க்கமாகவும் தோற்றமளிக்கும் வகையில் ஏராளமான மாற்றங்கள் செய்யப்பட்டுள்ளன.

இந்த மோட் (Mod) அதன் மெயின்-ஃபிரேமை நிலையான மாடலில் இருந்து தக்க வைத்துக் கொண்டுள்ளது. இருப்பினும், இந்த மோட் ஒரு XTR பெப்போ Sub Frame-ஐ பெறுகிறது. இது உயர்த்தப்பட்ட இருக்கை மற்றும் ஒரு சிறிய டெயில் பகுதியைக் கொண்டுள்ளது. மேலும், வழக்கமான ஹேண்டில்பார்களை குறைந்த ஸ்லங் கிளிப்-ஆன் பார்களில் பொறுத்துவதற்கு நீக்கியுள்ளது. மேலும், பைக் முழுவதும் GRR 450 டெக்கால் அதற்கு மிகவும் ஆக்ரோஷமான ஈர்ப்பை அளிக்கிறது.

பின்புறத்தில், பெப்போ ஏப்ரிலியா RS 660-இன் ஸ்விங் ஆர்மைப் பயன்படுத்தியிருக்கலாம். இது ஒரு தனிப்பயன் ஃபூட் பெக்குடன் இணைக்கப்பட்டுள்ளது. தனிப்பயன்-கட்டமைக்கப்பட்ட கெரில்லா 450, ஷோவா இன்வெர்ட்டட் ஃபோர்க் மற்றும் முன் மற்றும் பின்புறத்தில் நைட்ராக்ஸ் மோனோஷாக் ஆகியவற்றைப் பெறுகிறது.

பெப்போ, நிலையான மாடல்களில் காணப்படுவது போல் 450cc எஞ்சினையே தக்க வைத்துக் கொண்டுள்ளது. இருப்பினும், செயல்திறனை மேம்படுத்த ஒரு பெரிய கார்பன் ஃபைபர் ஏர்பாக்ஸ் மற்றும் ரேசிங் இன்ஸ்பயர்டு டைட்டானியம் எக்ஸாஸ்ட் ஆகியவற்றைக் கொண்டுள்ளது. ராயல் என்ஃபீல்ட் கெரில்லா 450 மாடலில் உள்ள எஞ்சின் 40 hp பவர் மற்றும் 40 Nm டார்க் இழுவிசையை வெளிப்படுத்தியது.

2025 டொயோட்டா லேண்ட் குரூசர் பிராடோ சர்வதேச சந்தையில் வெளியிடப்பட்டது. புது மாடல் தற்போது டொயோட்டா எஸ்யூவியின் ஒட்டுமொத்த செயல்திறனை மேம்படுத்தும் என்று கூறப்படும் மைல்டு ஹைப்ரிட் பவர்டிரெய்னைப் பெறுகிறது. புதிய எஸ்யூவி மாடலை இந்தியாவில் அறிமுகம் செய்வது குறித்து நிறுவனம் இதுவரை எந்த தகவலும் வழங்கவில்லை என்றாலும், இந்த ஆண்டின் தொடக்கத்தில் இந்திய சாலைகளில் இந்த மாடலின் டெஸ்டிங் நடைபெற்றது.

எஞ்சின் மற்றும் பவர்டிரெய்ன்:

2025 டொயோட்டா லேண்ட் குரூசர் பிராடோ மாடல் 2.8 லிட்டர் 4-சிலிண்டர் டர்போ-டீசல் எஞ்சின் மூலம் இயக்கப்படுகிறது. இத்துடன் 8-ஸ்பீடு ஆட்டோமேட்டிக் கியர்பாக்ஸ் வழங்கப்படுகிறது. மேலும் 48V மைல்டு ஹைப்ரிட் சிஸ்டம் பொருத்தப்பட்டுள்ளது. இந்த பவர்டிரெய்ன் 204 ஹெச்பி பவர், 500 நியூட்டன் மீட்டர் டார்க் இழுவிசையை வெளிப்படுத்துகிறது.

வெளிப்புற தோற்றம்:

புதிய மேம்பட்ட லேண்ட் குரூசர் பிராடோ அதன் முந்தைய மாடலில் இருந்து பெரும்பாலான வெளிப்புற கூறுகளைத் தக்க வைத்துக் கொண்டுள்ளது. இது "டொயோட்டா" பாரம்பரிய முன்பக்க கிரில், சதுரங்க வடிவம் கொண்ட மிரர்கள் மற்றும் ஃபெண்டர் பொருத்தப்பட்டுள்ளது. இத்துடன் செவ்வக வடிவம் கொண்ட ஹெட்லைட்கள் மற்றும் முன்புறம் டூயல் டோன் ஃபாக்-லேம்ப்களை கொண்டுள்ளது. மேலும், பம்பரில் ஃபாக் லேம்ப்களை கொண்டுள்ளது.

2025 லேண்ட் குரூசஸர் பிராடோ, டிரெயில் டஸ்ட் / கிரேஸ்கேப், ஹெரிடேஜ் ப்ளூ / கிரேஸ்கேப், பிளாக், விண்ட் சில் பியர்ல், விண்கல் ஷவர், ஐஸ் கேப், அண்டர்-கிரவுண்ட் மற்றும் ஹெரிடேஜ் புளூ உள்பட எட்டு வண்ண தீம்களில் கிடைக்கிறது.

உட்புறம் மற்றும் அம்சங்கள்:

2025 டொயோட்டா லேண்ட் க்ரூஸர் பிராடோ உள்புறத்தில் 12.3-இன்ச் டச்-ஸ்கிரீன் இன்ஃபோடெயின்மென்ட் யூனிட், ஹீட்டெட் மற்றும் வென்டிலேடெட் முன்புற இருக்கைகள், ஒரு HUD மற்றும் தேவையைப் பொறுத்து அதிக இடத்தை உருவாக்க அனுமதிக்கும். 60/40 ஸ்பிலிட் பின்புற இருக்கை ஆகியவை உள்ளன. இது கன்சோல் கூல் பாக்ஸ், Qi வயர்லெஸ் சார்ஜர், USB சார்ஜிங் போர்ட்கள் மற்றும் பலவற்றை பெறுகிறது.

வெளியீட்டு விவரம்:

புதிய பிராடோ மாடல் இந்திய சந்தையில் அறிமுகம் செய்வது குறித்த எந்த விவரங்களுக்கும் நிறுவனம் இன்னும் தெரிவிக்கவில்லை. இருப்பினும், முந்தைய தகவல்களின் படி இந்த ஆண்டின் இரண்டாம் பாதியில் இந்தியாவில் அறிமுகமாகும் என்று எதிர்பார்க்கலாம்.

ரைஸ் மோட்டோ அதன் சமீபத்திய ஹெல்டன் ஹெல்மெட் சீரிஸை இந்தியாவில் அறிமுகம் செய்தது. புதிய ஹெல்டன் சீரிஸ் ஹெல்மெட் விலை ரூ.3,499 ஆகும். ஹெல்டன் ISI, DOT மற்றும் ECE தரநிலைகளுக்கு இணங்கும் வகையில் உருவாக்கப்பட்டு இருக்கிறது. மேலும் இந்த ஹெல்மெட் மூன்று விதமான அளவுகளில் கிடைக்கிறது.

ரைஸ் ஹெல்டன் சீரிஸ் மாடல் மேம்பட்ட பாலிகார்பனேட் மற்றும் ஷெல் பயன்படுத்தி உருவாக்கப்பட்டு இருக்கிறது. இதன் எடை 1,500 கிராம். இந்த ஹெல்மெட் அதிக வேகத்தில் இழுவையைக் குறைக்கும் ஏரோடைனமிக் வடிவமைப்பைக் கொண்டுள்ளது. ஒருங்கிணைந்த முன்புற வென்ட்கள் ஹெல்மெட்டுக்குள் காற்றைச் செலுத்துகின்றன, அதே நேரத்தில் பின்புற எக்ஸாஸ்ட் வென்ட்கள் வெப்பத்தை வெளியேற்றி, உங்களை குளிர்ச்சியாகவும் கவனம் சிதறாமலும் வைத்திருக்கின்றன.

இதில் இரட்டை டி-ரிங் லாக் வழங்கப்படவில்லை. ஆனால் மைக்ரோமெட்ரிக் சின்ஸ்ட்ராப் சரிசெய்யக்கூடிய தன்மையை உறுதி செய்கிறது. இதில் ஃபேக்டரி ஃபிட் செய்யப்பட்ட, ஆன்டி ஃபாகிங் பின்காக் இல்லை, ஆனாலும் இதன் விசர் 108 டிகிரி கோணக் காட்சியை வழங்குகிறது.

ரைஸ் ஹெல்டன் ஒரு பிரத்யேக ப்ளூடூத் இண்டர்காம் ஸ்பீக்கர் பாக்கெட்டைப் பெறுகிறது. இது தொடர்பு சாதனங்களை தடையின்றி ஒருங்கிணைக்க அனுமதிக்கிறது. லைனர்களை ஹெல்மெட்டிலிருந்து எடுக்கலாம் மற்றும் துவைக்கக் கூடியவை. ஹெல்டன் கிளாஸ் மற்றும் மேட் மோனோடோன் பிளாக் உள்பட ஐந்து வித நிறங்களில் கிடைக்கிறது.

ரைஸ் ஹெல்டன் ஒரு வருட நிறுவன உத்தரவாதத்துடன் வருகிறது. மேலும் இதை நிறுவனத்தின் வலைத்தளம் அல்லது சில்லறை விற்பனைக் கடையில் வாங்கலாம்.

யமஹா நிறுவனம் தனது உலகளாவிய மாடல்களை பன்முகப்படுத்த நீண்ட காலமாக செயல்பட்டு வருகிறது. இந்தியாவில் யமஹா நிறுவனம் FZ சீரிசை பல ஆண்டுகளாக விற்பனை செய்து வருகிறது. இதில் 149 cc எஞ்சின் உள்ளது. சமீபத்தில், இந்த நிறுவனம் இந்தியாவில் அதன் புதிய FZ மோட்டார்சைக்கிள் மாடலுக்கான வடிவமைப்பு காப்புரிமையை பெற விண்ணப்பித்து இருந்தது.

காப்புரிமை விண்ணப்பம் மூலம் வடிவமைப்பு கூறுகள் மற்றும் மாற்றங்களை மறைக்கப்பட்டு இருந்தாலும், புதிய யமஹா FZ பைக்கில் எதிர்பார்க்கப்படும் சில விவரங்களை இது வெளிப்படுத்துகிறது. அதன்படி இது யமஹா FZ S-FI போன்ற ஒரு கலப்பின பவர்டிரெய்னைப் பெறும் என்று எதிர்பார்க்கப்படுகிறது.

புதிய யமஹா FZ சில வடிவமைப்பு மாற்றங்களைச் சந்தித்திருப்பதை காப்புரிமை புகைப்படம் காட்டுகிறது. வரவிருக்கும் FZ மாடலில் டோன்-டவுன் வடிவமைப்பு கூறுகள் மற்றும் பெட்ரோல் டேங்கில் டர்ன் இண்டிகேட்டர்கள் இருக்கும் என்பதைக் குறிக்கிறது.

மேலும், புதிய மாடல் TFT திரையைப் பெறும் என்று எதிர்பார்க்கப்படுகிறது. இந்த சீரிசின் மற்ற மாடல்களில் பெயின்ட் செய்யப்பட்ட ரிம் அமைப்பைத் தவிர்க்க தயாராக உள்ளது.

இந்தியாவில் வரவிருக்கும் மோட்டார்சைக்கிளின் குறிப்பிட்ட விவரங்கள் அல்லது வெளியீட்டு விவரத்தை யமஹா இன்னும் உறுதிப்படுத்தவில்லை. இருப்பினும், வடிவமைப்பு காப்புரிமை பெற்றிருப்பதைக் கருத்தில் கொண்டு, இந்த ஆண்டு இறுதிக்குள் இது விற்பனைக்கு வரும் என்று எதிர்பார்க்கப்படுகிறது.

மேலும், புதிய FZ நாட்டில் தற்போதுள்ள FZ சீரிசின் மிகவும் மலிவு விலை மாடலாக இருக்கும் என்று எதிர்பார்க்கப்படுகிறது. இந்த நிறுவனம் அதன் FZ சீரிசில் மொத்தம் ஏழு மாடல்களைக் கொண்டுள்ளது, அவற்றில் FZ-X, FZ S-FI வெர்ஷன் 3.0, FZ S-FI வெர்ஷன் 4.0, FZ S-FI வெர்ஷன் 4.0 DLX, FZ-FI, FZ S-FI, மற்றும் FZ S ஹைப்ரிட் ஆகியவை அடங்கும்.

இவற்றில் யமஹா FZ S FI என்பது இந்த சீரிசில் குறைந்த விலை பைக் ஆகும். இதன் விலை ரூ.1.18 லட்சம் (எக்ஸ்-ஷோரூம்) என்று தொடங்குகிறது.

கியா நிறுவனம் சமீபத்தில் கேரன்ஸ் கிளாவிஸ் மாடலை இந்தியாவில் அறிமுகப்படுத்தியது. இப்போது அதன் எலெக்ட்ரிக் மாடலை அறிமுகப்படுத்த கியா நிறுவனம் தயாராகி வருகிறது. இது குறித்துது வெளியாகி உள்ள தகவலின்படி, கியா கேரன்ஸ் கிளாவிஸ் EV அடுத்த மாதம் 15-ந்தேதி இந்தியாவில் அறிமுகம் செய்யப்படும் என்று கூறப்படுகிறது.

எனினும், கியா நிறுவனம் இதுவரை அதிகாரப்பூர்வ அறிவிப்பு வெளியிடவில்லை. கியா நிறுவத்தின் புதிய கேரன்ஸ் கிளாவிஸ் எலெக்ட்ரிக் எம்பிவி மாடலில் இருந்து எதிர்பார்க்கக்கூடிய அம்சங்களை பார்ப்போம்.

கியா கேரன்ஸ் கிளாவிஸ் EV: பவர்டிரெய்ன்

கியா கேரன்ஸ் கிளாவிஸ் மாடல் ஹூண்டாய் கிரெட்டா EV-இல் இருந்து பேட்டரியை பெற வாய்ப்புள்ளது. அதாவது, 42 kWh பேட்டரி மற்றும் 51.4 kWh பேட்டரி பேக், விருப்பங்களாகக் கிடைக்கின்றன. இந்த பேட்டரி பேக் விருப்பங்கள் முறையே 390 கிமீ மற்றும் 473 கிமீ வரம்பை வழங்கும் என்று எதிர்பார்க்கப்படுகிறது.

கியா கேரன்ஸ் கிளாவிஸ் EV: எதிர்பார்க்கப்படும் வெளிப்புறம்

கியா கேரன்ஸ் கிளாவிஸ் EV அதன் ஐசி எஞ்சின் மாடலில் உள்ள பெரும்பாலான வெளிப்புற கூறுகள் மற்றும் வடிவமைப்பை தக்கவைத்துக்கொள்ள வாய்ப்புள்ளது. இது முக்கோண ஃபிரேமிற்குள் இணைக்கப்பட்ட 3-பாட் LED ஹெட்லேம்ப்கள், ஆங்குலர் LED DRLகள், முன்புறத்தில் ஒரு க்ளோஸ்டு-ஆஃப் கிரில் மற்றும் பலவற்றைப் பெறும் என்று எதிர்பார்க்கப்படுகிறது. மேலும், கியா கேரன்ஸ் கிளாவிஸ் EV-யில் புதிதாக வடிவமைக்கப்பட்ட ஏரோ-ஸ்பெசிஃபிக் அலாய் வீல்கள் வழங்கப்படும் என்று எதிர்பார்க்கப்படுகிறது.

கியா கேரன்ஸ் கிளாவிஸ் EV: இன்டீரியர்

வெளிப்புறத்தைப் போலவே, கியா கேரன்ஸ் கிளாவிஸ் EV-யும் அதன் ஐசி எஞ்சின் மாடலில் உள்ள இன்டீரியர் அம்சங்களைத் தக்க வைத்துக் கொள்ளும் என்று எதிர்பார்க்கப்படுகிறது. புதிய எலெக்ட்ரிக் எம்பிவி மாடலில் 22.62-இன்ச் டூயல் ஸ்கிரீன் செட்டப் பெறும் என்று எதிர்பார்க்கப்படுகிறது. இதில் 10.25-இன்ச் டிஜிட்டல் இன்ஸ்ட்ரூமென்ட் பேனல் மற்றும் 10.25-இன்ச் டச்ஸ்கிரீன் இன்ஃபோடெயின்மென்ட் டிஸ்ப்ளே, வென்டிலேட் செய்யப்பட்ட முன் இருக்கைகள், வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்-பிளே, 8-ஸ்பீக்கர் போஸ் சவுண்ட் சிஸ்டம் வழங்கப்படலாம்.

கியா கேரன்ஸ் கிளாவிஸ் EV: எதிர்பார்க்கப்படும் விலை

கியா கேரன்ஸ் கிளாவிஸ் EV காரின் விலை சுமார் ரூ.16 லட்சம் முதல் ரூ.20 லட்சம் (எக்ஸ்-ஷோரூம்) வரை இருக்கும் என எதிர்பார்க்கப்படுகிறது. அறிமுகம் செய்யப்பட்டதும், கியா கேரன்ஸ் கிளாவிஸ் EV, டாடா ஹேரியர் EV மற்றும் ஹூண்டாய் கிரெட்டா EV போன்ற மாடல்களுக்கு போட்டியாக இருக்கும்.

குரூஸர் பைக் பிரிவில் தனது இருப்பை வலுப்படுத்த பஜாஜ் ஆட்டோ திட்டமிட்டுள்ளது. இது ஆரம்பத்தில் 180 சிசி மோட்டார்சைக்கிளாக அறிமுகப்படுத்தப்பட்ட அவெஞ்சர் வடிவத்தில் அறிமுகம் செய்யப்பட்டு, பின்னர் இது 160 சிசி மற்றும் 220 சிசி மாடலை பெற்றது. பின்னர், 180 சிசி வெர்ஷன் நிறுத்தப்பட்டது, தற்போதைய வரிசையில் 160 ஸ்ட்ரீட் மற்றும் 220 குரூஸ் மட்டுமே விற்பனையில் உள்ளன.

220 சிசி குரூஸர்களின் எண்ணிக்கையை அதிகரிக்க, பஜாஜ் ஆட்டோ இப்போது அவெஞ்சர் ஸ்ட்ரீட் 220 மாடலை மீண்டும் கொண்டு வர உள்ளது. பஜாஜ் நிறுவனம் இந்த பைக்கை விற்பனை செய்வதற்கான அனுமதி கோரி ஏற்கனவே டெல்லி போக்குவரத்துத் துறையில் விண்ணப்பித்துள்ளது. புதிய பைக் குறித்து அதிகாரப்பூர்வ அறிவிப்பு வெளியாகும் முன்பே, இதுபற்றிய ஆவணம் ஆன்லைனில் கசிந்தது.

இதன் மூலம் இந்த பைக் அறிமுகம் குறித்த எதிர்பார்ப்பு ஏற்பட்டுள்ளது. விண்ணப்ப ஆவணங்களில் உள்ள தகவல்களின் அடிப்படையில், அவெஞ்சர் 220 குரூஸ் பைக்கின் என்ட்ரி லெவல் மாடலாகவும், அவெஞ்சர் 220 ஸ்ட்ரீட் இந்த பிரிவில் டாப் எண்ட் மாடலாகவும் இருக்கும்.

இந்த பைக்கின் மொத்த எடை 310 கிலோ, வீல்பேஸ் 1,490 மிமீ, அகலம் 806 மிமீ, நீளம் 2,210 மிமீ மற்றும் உயரம் 1,070 மிமீ இருக்கும். இது 220 க்ரூஸை விட சற்று சிறியதாக ஆக்குகிறது. மேலும், இது விண்ட்ஷீல்ட் மற்றும் பில்லியன் பேக்ரெஸ்ட் ஆகியவற்றை இழக்கும்.

அவெஞ்சர் ஸ்ட்ரீட் 220, குரூஸர் மோட்டார்சைக்கிளின் ஸ்போர்ட் வெர்ஷனாக அமைக்கப்பட்டுள்ளது. இதில் அலாய் வீல்கள், ரியர்-வியூ மிரர்கள், ஃபோர்க் கெய்ட்டர்கள், எக்ஸாஸ்ட் மஃப்ளர் கவர், முன் மற்றும் பின் ஃபெண்டர்கள் மற்றும் எஞ்சின் கேசிங் உள்ளிட்டவை பிளாக்டு-அவுட் செய்யப்பட்டுள்ளன.

மெக்கானிக்கல் பிரிவில், இந்த பைக் 8,500 rpm இல் 18 hp பவர், 7,000 rpm இல் 17 Nm டார்க் வெளிப்படுத்தும் 220cc ஆயில்-கூல்டு சிங்கிள்-சிலிண்டர் எஞ்சின் வழங்கப்படுகிறது. இந்த யூனிட் உடன் 5-ஸ்பீடு கியர்பாக்ஸ் வழங்கப்படுகிறது.

மஹிந்திரா & மஹிந்திரா நிறுவனம் கடந்த 2022 ஆம் ஆண்டு இந்திய சந்தையில் ஸ்கார்பியோ N மாடலை அறிமுகப்படுத்தியது. அதன் பின்னர், இந்த எஸ்யூவி பல்வேறு புதுப்பிப்புகள் மற்றும் வெர்ஷன்களைப் பெற்றுள்ளது. புதிய அம்சங்களைச் சேர்ப்பதன் மூலம் எஸ்யூவியை மேலும் புதுப்பிக்க மஹிந்திரா திட்டமிட்டுள்ளதாக தகவல்கள் தெரிவிக்கின்றன.

எஸ்யூவி-யின் புதுப்பிக்கப்பட்ட மாடல் பயணிகளின் பாதுகாப்பு மற்றும் வசதிக்காக புதிய அம்சங்களுடன் வரும். வடிவமைப்பில் எந்த மாற்றங்களும் இல்லாமல் இந்த திருத்தங்கள் இணைக்கப்படலாம் என்பது குறிப்பிடத்தக்கது. இருப்பினும், அவற்றைச் சமாளிக்க பிராண்ட் ஒரு புதிய மாறுபாட்டை வழங்கக்கூடும். இந்த மாற்றங்களுடன், சந்தையில் நல்ல வரவேற்பைப் பெறுவதை உறுதி செய்வதற்காக, பண்டிகைக் காலத்தில் இந்த எஸ்யூவி-யின் புது வெர்ஷன் நாட்டில் அறிமுகப்படுத்தப்படலாம். புதிய வெர்ஷனில் கவனம் செலுத்த வேண்டிய முதல் அம்சம் லெவல் 2 ADAS ஆகும். இதில் லேன் கீப் அசிஸ்ட், ஹை-பீம் அசிஸ்ட், லேன் டிபாச்சர் அலெர்ச், ஆட்டோ எமர்ஜென்சி பிரேக்கிங் மற்றும் பல அடங்கும்.

இதனுடன், கேபினின் உணர்வை மேம்படுத்த பிராண்ட் ஒரு பனோரமிக் சன்ரூஃப்பைச் சேர்க்க வாய்ப்புள்ளது. இந்த அம்சங்கள் XUV700 மாடலில் நீண்ட காலமாக வழங்கப்படுகின்றன. மேலும் XUV3XO மற்றும் தார் ராக்ஸ் போன்ற சமீபத்திய மாடல்களிலும் சேர்க்கப்பட்டுள்ளன.

மெக்கானிக்கல் அம்சங்களை பொருத்தவரை, மஹிந்திரா ஸ்கார்பியோ N மாடலில் எந்த மாற்றங்களும் இருக்காது. இது 2.0 லிட்டர் டர்போ பெட்ரோல் மற்றும் 2.2 லிட்டர் டீசல் எஞ்சினுடன் MT மற்றும் AT ஆப்ஷன்களுடன் தொடர்ந்து விற்பனை செய்யப்படும்.

இந்திய சந்தையில் தற்போது, இந்த எஸ்யூவி விலை ரூ.13.99 லட்சம் (எக்ஸ்-ஷோரூம்) தொடக்க விலையில் விற்கப்படுகிறது மற்றும் மிகவும் விலையுயர்ந்த வேரியண்டிற்கு ரூ.25.15 லட்சம் (எக்ஸ்-ஷோரூம்) வரை நிர்ணயம் செய்யப்பட்டுள்ளது.

இந்தியாவில் ஸ்பீட் T4-க்கு பாஜா ஆரஞ்சு என்ற புதிய நிறத்தை டிரையம்ப் அறிமுகப்படுத்தியுள்ளது. புதிய நிறம் தவிர இந்த மோட்டார்சைக்கிளில் வடிவமைப்பு அல்லது இயந்திர மாற்றம் எதுவும் செய்யப்படவில்லை. மேலும் இது மற்ற மாடல்களில் காணப்படும் அதே எஞ்சின் மற்றும் வடிவமைப்பைத் தக்க வைத்துக் கொண்டுள்ளது. டிரையம்ப் பாஜா ஆரஞ்சு வேரியண்ட் ரூ.1.99 லட்சத்தில் (எக்ஸ்-ஷோரூம்) கிடைக்கிறது.

டிரையம்ப் ஸ்பீடு T4: எஞ்சின் மற்றும் பவர்டிரெய்ன்

டிரையம்ப் ஸ்பீடு T4 பைக்கில் 398.15 சிசி லிக்விட்-கூல்டு சிங்கிள்-சிலிண்டர் எஞ்சின் உள்ளது, இது 6-ஸ்பீடு கியர்பாக்ஸுடன் இணைக்கப்பட்டுள்ளது. இது 7,000 ஆர்பிஎம்மில் 30.6 ஹெச்பி பவரையும், 5,000 ஆர்பிஎம்மில் சுழலும் போது 36 என்எம் பீக் டார்க்கையும் வழங்கும் திறன் கொண்டது.

டிரையம்ப் ஸ்பீடு T4: அம்சங்கள்

டிரையம்ப் ஸ்பீட் T4, முழு LED ஹெட்லேம்ப், LED DRL மற்றும் பின்புற லைட் சிக்னேச்சர் மற்றும் ஒருங்கிணைந்த LCD திரையுடன் கூடிய அனலாக் ஸ்பீடோமீட்டரைப் பெறுகிறது. இது அதன் நியோ-ரெட்ரோ ஆளுமையை பராமரிக்கிறது. இது USB போர்ட், டூயல்-சேனல் ABS மற்றும் பலவற்றையும் கொண்டுள்ளது.

டிரையம்ப் ஸ்பீடு T4: வண்ண விருப்பங்கள்

முன்னதாக, ட்ரையம்ப் ஸ்பீட் T4 நான்கு வண்ண விருப்பங்களை மட்டுமே கொண்டிருந்தது - காஸ்பியன் ப்ளூ / பேர்ல் மெட்டாலிக் ஒயிட், லாவா ரெட் க்ளாஸ் / பேர்ல் மெட்டாலிக் ஒயிட், பாண்டம் பிளாக் / பேர்ல் மெட்டாலிக் ஒயிட், மற்றும் பாண்டம் பிளாக் / ஸ்டார்ம் கிரே. தற்போது பாஜா ஆரஞ்சு என்ற புதிய நிறத்தைப் பெறுகிறது.

டிரையம்ப் ஸ்பீடு T4: விலை மற்றும் போட்டியாளர்கள்

ட்ரையம்ப் ஸ்பீடு T4 பைக் ரூ.1.99 லட்ச ஆரம்ப விலையில் கிடைக்கிறது. இது ஹார்லி-டேவிட்சன் X440, யெஸ்டி ரோட்ஸ்டர், ராயல் என்பீல்டு கிளாசிக் 350, ராயல் என்ஃபீல்ட் கெரில்லா 450 மற்றும் ஜாவா 42 FJ 350 போன்ற மாடல்களுக்கு போட்டியாக உள்ளது.

இந்திய சந்தையில் பெரும் எதிர்பார்ப்புக்கு மத்தியில் அறிமுகம் செய்யப்பட்ட மாடல் மாருதி சுசுகியின் ஜிம்னி. எதிர்பார்ப்புக்கு ஏற்ற வகையில், இந்த மாடலின் விற்பனை நல்லமுறையில் தான் நடைபெற்று வருகிறது. இந்த வரிசையில், கடந்த மே 2025 இல் மாருதி சுசுகி ஜிம்னி 1.5 மடங்கு விற்பனை வளர்ச்சியைக் கண்டுள்ளது.

மாருதி சுசுகி ஜிம்னி 4X4 ஆஃப்-ரோடர் இந்த ஆண்டு மே மாதம் 682 யூனிட் விற்பனையை பதிவு செய்துள்ளது. இது கடந்த ஆண்டு மே மாதத்தில் பதிவு செய்யப்பட்ட மொத்த விற்பனையான 274 யூனிட்களை விட அதிகம் ஆகும். இந்த விற்பனை உயர்வு ஜிம்னிக்கு 149 சதவீத ஆண்டு வளர்ச்சியைக் கொடுத்துள்ளது.

ஜூன் 2023 ஆண்டு அறிமுகம் செய்யப்பட்டதில் இருந்து ஜூன் மாதத்தில் மாருதி சுசுகி 1 லட்சத்திற்கும் அதிகமான யூனிட் விற்பனையைப் பதிவு செய்துள்ளது.

மாருதி சுசுகி ஜிம்னி மாடல் 1.5 லிட்டர் 4 சிலிண்டர் நேச்சுரலி ஆஸ்பிரேட்டட் பெட்ரோல் எஞ்சின் மூலம் இயக்கப்படுகிறது. இது 105 hp பவரையும் 134 Nm டார்க்கையும் வழங்குகிறது. இது 5-ஸ்பீடு மேனுவல் டிரான்ஸ்மிஷன் அல்லது 4-ஸ்பீடு டார்க் கன்வெர்ட்டர் ஆட்டோமேட்டிக் உடன் இணைக்கப்பட்டுள்ளது.

ஜிம்னி மாடலின் மேனுவல் வேரியண்ட் லிட்டருக்கு 16.94 கிலோமீட்டர் மைலேஜ் வழங்குகிறது. அதே நேரத்தில் ஆட்டோமேடிக் வேரியண்ட் லிட்டருக்கு 16.39 கிலோமீட்டர் மைலேஜை வழங்குகிறது என்று நிறுவனம் கூறுகிறது.

மாருதி சுசுகி ஜிம்னி காரில் கன்மெட்டல் கிரே நிற கிரில் பொருத்தப்பட்டுள்ளது. இது குரோம் முலாம் பூசப்பட்டும், ஆக்ரோஷமான தோற்றத்தை அளிக்கிறது. மற்ற முக்கிய வெளிப்புற சிறப்பம்சங்களில் வட்ட வடிவ LED ஹெட்லேம்ப்கள், பக்கவாட்டு மற்றும் பின்புற விளிம்புகளில் டிரிப் ரெயில் உள்ளன. ஜிம்னி லேடர் ஃபிரேமில் உருவாக்கப்பட்டு இருக்கிறது. இதில் 15 இன்ச் சக்கரங்கள் வழங்கப்பட்டு இருக்கிறது.

மாருதி சுசுகி ஜிம்னியின் உட்புறத்தில், ஆல்பா வேரியண்டில் 9 இன்ச் தொடுதிரை இன்ஃபோடெயின்மென்ட் சிஸ்டம் மற்றும் ஜீட்டா வகைகளில் 7 இன்ச் இன்ஃபோடெயின்மென்ட் திரை போன்ற அம்சங்களைப் பெறுகிறது. இது ஆர்காமிஸின் சரவுண்ட் சென்ஸ், 4-ஸ்பீக்கர் செட்டப் மற்றும் வயர்லெஸ் ஆண்ட்ராய்டு ஆட்டோ மற்றும் ஆப்பிள் கார் பிளே கனெக்டிவிட்டி ஆகியவற்றையும் பெறுகிறது.

இந்திய சந்தையில் மாருதி சுசுகி ஜிம்னி ஜீட்டா வேரியண்டின் விலை ரூ.12.76 லட்சத்திலிருந்து (எக்ஸ்-ஷோரூம்) தொடங்குகிறது. மேலும் ஆல்பா வேரியண்ட் ரூ.13.71 லட்சத்தில் இருந்து (எக்ஸ்-ஷோரூம்) தொடங்குகிறது.