வேலூர்

வேலூர்:

வேலூர் மாவட்டத்தில் கொரோனா தொற்றால் பாதிக்கப்பட்டோரின் எண்ணிக்கை அதிகரித்து கொண்டே செல்கிறது. தினமும் 100-க்கும் மேற்பட்டோருக்கு தொற்று உறுதியாகி வருகிறது. இதனை தடுக்க மாவட்ட நிர்வாகம் பல்வேறு நடவடிக்கைகள் மேற்கொண்டு வருகிறது. பொது இடங்களில் அனைவரும் முக கவசம் அணிய வேண்டும். சமூக இடைவெளியை பின்பற்ற வேண்டும் என்று பல்வேறுத்துறையை சேர்ந்த அலுவலர்கள் விழிப்புணர்வு ஏற்படுத்தி வருகிறார்கள்.

இந்த நிலையில் தமிழக அரசு பொது இடங்களில் முககவசம் அணியாத நபர்களுக்கு ரூ.200, சமூக இடைவெளியை பின்பற்றாத நபர்களுக்கு ரூ.500 அபராதமும் விதிக்கப்படும். மேலும் கடைகளில் பணிபுரியும் ஊழியர்கள் முக கவசம் அணியாவிட்டாலோ, சமூக இடைவெளியை பின்பற்றாவிட்டாலோ அந்த கடைக்கு ரூ.5 ஆயிரம் அபராதம் விதிக்கப்படும். கொரோனா தொற்று பாதித்த நபர்களின் குடும்பத்தினர் வீட்டை விட்டு வெளியே வந்தால் ரூ.5 ஆயிரம் அபராதம் வசூலிக்கப்படும் என்று அரசாணை வெளியிட்டது. அதன்படி வேலூர் மாவட்டத்தில் அரசின் விதிமுறைகளை பின்பற்றாத நபர்களுக்கு உள்ளாட்சி அமைப்பினர் அபராதம் விதித்து வருகின்றனர்.

வேலூர் பழைய பஸ் நிலையம், மண்டித்தெருவில் நடைபெறும் சிறப்பு மருத்துவ முகாமில் முக கவசம் அணியாத நபர்களுக்கு கட்டாய கொரோனா பரிசோதனை செய்யப்பட்டு வந்தது. ஆனாலும் பலர் முக கவசம் அணியாமல் பொது இடங்களில் சுற்றித்திரிந்தனர். அதனால் தொற்று பாதித்த நபர்கள் மூலம் பிறருக்கு கொரோனா பரவும் அபாயம் காணப்பட்டது.

இந்த நிலையில் வேலூர் மாவட்டத்தில் முக கவசம் அணியாத அனைவருக்கும் கட்டாய கொரோனா பரிசோதனை மேற்கொள்ளும்படி கலெக்டர் சண்முகசுந்தரம் உத்தரவிட்டுள்ளார். அதன்பேரில் வேலூர் மண்டித்தெரு, கலெக்டர் அலுவலகம் அருகே உள்பட பல்வேறு இடங்களில் நடந்த சிறப்பு மருத்துவ முகாமில் முக கவசம் அணியாதவர்களுக்கு கட்டாய பரிசோதனை செய்யப்பட்டது.

மேலும் வேலூர் பழைய மீன்மார்க்கெட் அருகே வருவாய்த்துறை, போலீசார் அடங்கிய குழுவினர் முக கவசம் அணியும்படி வாகன ஓட்டிகளிடம் அறிவுறுத்தினர்.

வேலூர்:

மத்திய அரசு கொண்டு வந்துள்ள வேளாண் சட்டத்திற்கு எதிராக தி.மு.க. கூட்டணி கட்சிகள் சார்பில் நேற்று தமிழகம் முழுவதும் ஆர்ப்பாட்டம் நடந்தது.

வேலூர் அண்ணா கலையரங்கம் அருகே தி.மு.க. கூட்டணி கட்சியினர் ஆர்ப்பாட்டம் செய்தனர். இதில் தி.மு.க. பொதுச்செயலாளர் துரைமுருகன், வேலூர் மாவட்ட செயலாளர் ஏ.பி.நந்தகுமார் எம்.எல்.ஏ., அவைத்தலைவர் முகமது சகி, கார்த்திகேயன் எம்.எல்.ஏ. உள்பட ஏராளமானோர் பங்கேற்றனர்.

கம்யூனிஸ்ட் கட்சியின் மாவட்ட செயலாளர்கள் தயாநிதி, சாமிக்கண்ணு மற்றும் காங்கிரஸ், ம.தி.மு.க., முஸ்லிம் லீக், விடுதலைச் சிறுத்தைகள், திராவிடர் கழகம், திராவிடர் கழக தமிழர் இயக்க பேரவை கட்சி நிர்வாகிகள், தொண்டர்கள் திரளாக கலந்து கொண்டனர்.

வேலூர் மாவட்டத்தில் குடியாத்தம், பேரணாம்பட்டு, கே.வி.குப்பம், அணைக்கட்டு, திருவலம் உள்பட 27 இடங்களில் ஆர்ப்பாட்டம் நடந்தது.

இந்த நிலையில் ஆர்ப்பாட்டத்தில் ஈடுபட்டவர்கள் மீது அந்தந்த போலீஸ் நிலையங்களில் வழக்கு பதிவு செய்யப்பட்டுள்ளது.

இதில் துரைமுருகன், எம்.எல்.ஏ.க்கள் நந்தகுமார், கார்த்திகேயன் மற்றும் தி.மு.க. கூட்டணி கட்சியினர் உள்பட 2 ஆயிரம் பேர் மீது போலீசார் வழக்கு பதிவு செய்துள்ளனர்.

ஊரடங்கு காலத்தில் அனுமதியின்றி கூட்டம் கூடியது, போக்குவரத்துக்கு இடையூறாக ஆர்ப்பாட்டம் செய்தது, கொரோனா பரவல் இருப்பது தெரிந்தும் அதிகளவில் கூட்டத்தை கூட்டியது, சமூக இடைவெளியை கடைபிடிக்காதது, பேரிடர் கால விதிமீறல் என 5 பிரிவுகளில் வழக்கு பதிவு செய்யப்பட்டுள்ளது.

இதேபோல் வாணியம்பாடியில் நடந்த ஆர்ப்பாட்டத்தில் கதிர்ஆனந்த் எம்.பி. பங்கேற்றார். அங்கும் ஆர்ப்பாட்டத்தில் ஈடுபட்டவர்கள் மீது வழக்கு பதிவு செய்யப்பட்டுள்ளது.

வேலூர்:

தமிழகத்தில் பிரதமர் கிசான் திட்டத்தில் விவசாயிகளுக்கு அவர்களுடைய வங்கி கணக்கில் நேரடியாக உதவித்தொகை வழங்கப்பட்டு வருகிறது. இந்த திட்டத்தில் ரூ.120 கோடி வரை முறைகேடு நடந்திருப்பது கண்டுபிடிக்கப்பட்டது. தமிழகம் முழுவதும் விவசாயிகள் அல்லாத நபர்கள் இந்த திட்டத்தில் போலியாக சேர்ந்து உதவித்தொகை பெற்றது தெரியவந்தது. போலியாக சேர்ந்தவர்களிடமிருந்து பணம் திரும்ப வசூல் செய்யப்பட்டு வருகிறது.

இந்த திட்டத்தில் வேலூர் மாவட்டத்தில் 3,242 பேர் விவசாயிகள் அல்லாதவர்கள் என்பதும், ரூ.1 கோடியே 23 லட்சம் முறைகேடு செய்திருப்பதும் தெரியவந்துள்ளது. அவர்களின் வங்கி கணக்கில் இருந்து இதுவரை ரூ.70 லட்சம் திரும்பப் பெறப்பட்டுள்ளது. மாவட்டத்தில் முறைகேட்டில் ஈடுபட்டதாக வேளாண்மை துறையில் தற்காலிக கணினி ஆபரேட்டர்களாக பணியாற்றிய 8 பேர் பணிநீக்கம் செய்யப்பட்டுள்ளனர்.

மேலும் 20 பேர் பெயர் கொண்ட பட்டியலை வேளாண்மைத்துறை அதிகாரிகள், சி.பி.சி.ஐ.டி. போலீசாரிடம் வழங்கி உள்ளனர். இதுகுறித்து போலீசார் விசாரணை நடத்தி வருகின்றனர். மேலும் இந்த மோசடி தொடர்பாக சோளிங்கர் வேளாண்மை அலுவலகத்தில் பணிபுரிந்துவந்த தற்காலிக கணினி ஆபரேட்டர் சுப்பிரமணி என்பவரை சி.பி.சி.ஐ.டி. போலீசார் கைது செய்தனர். அதேபோன்று காட்பாடியில் கம்ப்யூட்டர் மையம் நடத்தி வந்த சந்தோஷ் என்பவரும் கைது செய்யப்பட்டார்.

இந்த நிலையில் ஆற்காடு வட்டார வேளாண் அலுவலகத்தில் உதவி வேளாண்மை அலுவலராக பணிபுரிந்துவந்த ராஜசேகர் என்பவரை சி.பி.சி.ஐ.டி. போலீசார் கைதுசெய்துள்ளனர். விழுப்புரம் மாவட்டத்தை சேர்ந்த இவர் அந்தப்பகுதி விவசாயிகளின் பெயரில் போலியாக வங்கி கணக்குகளை சேர்ந்து மோசடி செய்திருப்பது தெரியவந்தது.

இவருக்கு உதவியாக 2 பேர் இருந்ததாக கூறப்படுகிறது. அவர்களை சி.பி.சி.ஐ.டி. போலீசார் தேடி வருகின்றனர்.

வேலூர்:

தமிழகத்தில் நாளுக்கு நாள் அதிகரித்து வரும் கொரோனாவால் பாதிக்கப்பட்டவர்களின் எண்ணிக்கையும் உயர்ந்த வண்ணம் உள்ளது. இருப்பினும் குணமடைவோரின்  எண்ணிக்கையும் கணிசமாக உயர்ந்துள்ளது. மற்ற மாவட்டங்களை விட சென்னையில் தான் கொரோனாவால் பாதிக்கப்படுவர்களின் எண்ணிக்கை உயர்ந்து கொண்டே செல்கிறது.

இந்நிலையில் வேலூர் மாவட்டத்தில் ஏற்கனவே 14,015 பேருக்கு தொற்று கண்டறியப்பட்ட நிலையில் புதிதாக 157 பேருக்கு கொரோனா உறுதி செய்யப்பட்டுள்ளது. இதனால் பாதிக்கப்பட்டோர் எண்ணிக்கை 14,172 ஆக உயர்ந்துள்ளது.

இதுவரை 12,870 பேர் கொரோனாவில் இருந்து குணமடைந்து வீடு திரும்பியுள்ளனர். 214 பேர் உயிரிழந்துள்ளனர்.

நாட்டறம்பள்ளி:

நாட்டறம்பள்ளி அருகே மலையனூர் மலை கிராமத்தையொட்டி ஆந்திர மாநிலம் பருத்தி கொல்லை கிராமம் உள்ளது.

இந்த கிராமத்தை சேர்ந்தவர் முருகன் இவரது மகள் சோனியா (வயது17). அங்குள்ள அரசு பள்ளியில் பிளஸ்-2 படித்து வந்தார். இவர்களுக்கு சொந்தமான விவசாய நிலத்தில் நிலக்கடலை பயிரிட்டுள்ளனர்.

இங்கு காட்டுப்பன்றிகள் அதிகளவு வந்து தொல்லை கொடுத்தது. மேலும் அந்த பகுதியில் ஒற்றை காட்டு யானை ஒன்று சுற்றி திரிகிறது.

நேற்று விவசாய நிலத்தில் நிலக்கடலை அறுவடை செய்தனர். இரவு காட்டுப்பன்றி காவலுக்காக முருகனின் மனைவி மற்றும் மகள் சோனியா ஆகியோர் விவசாய நிலத்தில் காவலுக்கு இருந்தனர்.

நள்ளிரவில் அயர்ந்து தூங்கிவிட்டனர். அப்போது ஒற்றை காட்டு யானை நிலத்திற்குள் புகுந்தது. இதனைக் கண்ட முருகனின் மனைவி யானையை விரட்ட முயற்சி செய்து கத்திக் கூச்சலிட்டார்.

அப்போது தூங்கிக்கொண்டிருந்த சோனியாவை ஒற்றை யானை மிதித்தது. இதில் உடல் நசுங்கிய மாணவி சம்பவ இடத்திலேயே பரிதாபமாக இறந்தார்.

சிறிது நேரம் அங்கேயே இருந்த காட்டுயானை காட்டுப்பகுதிக்குள் சென்றுவிட்டது.

தனது கண் முன்னே யானை மகளை மிதித்துக் கொன்றதைக் கண்ட முருகனின் மனைவி அழுது துடித்தார்.

மேலும் இதுகுறித்து வனத்துறையினருக்கு தகவல் தெரிவித்தனர். சித்தூர் மாவட்ட வனத்துறை அதிகாரிகள் சம்பவ இடத்திற்கு சென்று பார்வையிட்டு விசாரணை நடத்தினர். மாணவியின் உடல் குப்பம் அரசு ஆஸ்பத்திரிக்கு கொண்டு செல்லப்பட்டது.

தொடர்ந்து ஒற்றை காட்டு யானை நாட்டறம்பள்ளி ஒட்டியுள்ள தமிழக ஆந்திர எல்லை வனப்பகுதியில் சுற்றி திரிகிறது. அடர்ந்த காட்டுக்குள் யானையை விரட்ட வேண்டும் என கிராம மக்கள் வலியுறுத்தி உள்ளனர்.