காஞ்சிபுரம்

மாமல்லபுரம்:

மார்த்தாண்டம் பகுதியைச் சேர்ந்தவர் ரவீந்திரன் (வயது50). வக்கீலான இவர் தனது இரண்டாவது மனைவியுடன் சென்னை அண்ணாநகர் பகுதியில் வசித்து வந்தார்.

கடந்த 7-ந்தேதி அவர் மாமல்லபுரம் அடுத்த வடநெம்மேலியில் உள்ள தனியார் விடுதியில் தனியாக வந்து தங்கியிருந்தார். அவரது அறை நேற்று மாலை வரை திறக்கவில்லை.

சந்தேகம் அடைந்த விடுதி நிர்வாகத்தினர் மாமல்லபுரம் போலீசாருக்கு தகவல் கொடுத்தனர். போலீசார் அறைக்கதவை திறந்து பார்த்த போது அங்குள்ள கட்டிலில் ரவீந்திரன் இறந்து கிடந்தார். அருகில் வி‌ஷப்பாட்டிலும் கிடந்தது. அவர் வி‌ஷம் குடித்து தற்கொலை செய்து இருப்பது தெரிந்தது.

ரவீந்திரன் எதற்காக வி‌ஷம் குடித்து தற்கொலை செய்தார் என்பது குறித்து மாமல்லபுரம் போலீசார் விசாரணை நடத்தி வருகிறார்கள்.

சோழிங்கநல்லூர்:

சென்னையில் குற்றச் செயல்களை தடுக்கவும், ரவுடிகளை பிடிக்கவும் போலீஸ் கமி‌ஷனர் விஸ்வநாதன் அதிரடி உத்தரவு பிறப்பித்துள்ளார்.

இதையடுத்து இரவு நேரங்களில் போலீசார் கண்காணிப்பு பணியை தீவிரப்படுத்தி வருகிறார்கள். ரவுடிகள் கைது செய்யப்படும் சம்பவம் தொடர்ந்து நடந்து வருகிறது.

இந்த நிலையில் கூடுதல் கமி‌ஷனர் சாரங்கன், தெற்கு மண்டல இணை கமி‌ஷனர் மகேஸ்வரி, அடையாறு துணை கமி‌ஷனர் சே‌ஷசாயி, துரைப்பாக்கம் சரக துணை கமி‌ஷனர் லோகநாதன் ஆகியோர் மேற்பார்வையில் கண்ணகி நகர் பகுதி இன்ஸ்பெக்டர் சிவக்குமார் மற்றும் சப்-இன்ஸ்பெக்டர் வசந்த ராஜா தீவிர கண்காணிப்பில் ஈடுபட்டனர்.

ஒக்கியம், துரைப்பாக்கம் பாலம் அருகில் இன்று காலை 3 மோட்டார் சைக்கிளில் வந்த 7 பேரை நிறுத்தி விசாரித்தனர். அவர்கள் கண்ணகி நகரைச் சேர்ந்த கிருஷ்ணமூர்த்தி, சிவக்குமார், ஜாகீர், நடராஜன், வெங்கடேசன், காளிதாஸ், அஸ்வின்குமார் என்பது தெரிந்தது.

அவர்கள் பல்வேறு கொலை மற்றும் கொள்ளை வழக்குகளில் தொடர்புடையவர்கள் என்றும் தெரிந்தது. அவர்கள் 7 பேரையும் போலீசார் கைது செய்தனர்.

அவர்களிடம் இருந்து பட்டாக்கத்திகள், 3 மோட்டார் சைக்கிள்கள் பறிமுதல் செய்யப்பட்டன. அதிகாலையில் பட்டாக்கத்திகளுடன் சுற்றியது ஏன்? யாரையேனும் கொலை செய்ய திட்டமிட்டார்களா? என்பது குறித்து அவர்களிடம் விசாரணை நடந்து வருகிறது.

ஆலந்தூர்:

புதுச்சேரி முதல்-மந்திரி நாராயணசாமி பெங்களூர் செல்வதற்காக சென்னை விமான நிலையம் வந்தார். அப்போது அவர் நிரூபர்களுக்கு பேட்டியளித்தார். அவர் கூறியதாவது:-

பிரதமர் நரேந்திர மோடி மாநில அரசும், மத்திய அரசும் இணைந்து செயல் பட வேண்டும் என்கிற கூட்டுறவு தத்தவத்தை சொல்லி வருகிறார்.

இதைச் சொல்லித்தான் 4 ஆண்டுகளுக்கு முன்பாக பா.ஜ.க. ஆட்சிக்கு வந்தது. வந்த பிறகு மத்திய அரசு, மாநிலத்தின் உரிமைகளை பறிக்கின்ற செயலில் ஈடுபட்டு வருகிறது. கல்வி என்பது மாநில உரிமைக்கான சம்பந்தப்பட்டது. மத்திய அரசு அதை எடுத்து கொள்வதற்கு படிப்படியாக நீட் தேர்வை கொண்டு வந்தது. இதற்கு உச்சநீதிமன்றத்தை காரணம் காட்டுகிறது. இப்போது தேசிய உயர்கல்வி ஆணையம் அமைக்க நடவடிக்கை எடுத்து வருகிறது. ஏற்கனவே யூ.ஜி.சி. சிறப்பாக செயல்பட்டு வருகிறது.

தேசிய உயர்கல்வி ஆணையம் மூலமாக யூ.ஜி.சி. மற்றும் மாநிலத்தின் உறவை தடுக்க செயல்பட்டு வருகிறது. அதன் மூலம் மத்திய அரசுக்கு வேண்டிய மாநிலங்களுக்கு கல்வி வளர்ச்சிக்கு நிதி கொடுக்க முடியும். வேண்டாத மாநிலங்களுக்கு நிதி கொடுக்காமல் இருக்க முடியும்.

மத்திய அரசு, ஆளுனர் மற்றும் துணை நிலை ஆளுனர்களை கைப்பாவையாக வைத்துக் கொண்டு மாநில அரசின் அன்றாட செயல்பாடுகளில் தலையிடுகிறது. கூட்டாட்சி தத்துவம் வெறும் பேச்சாக இருக்கிறது. செயல்பாட்டில் இல்லை. அதனால் தான் மாநிலங்களுக்கு தனிப்பட்ட சுதந்திரம் இருக்க வேண்டும் என்று தி.மு.க. செயல் தலைவர் சொன்னதை நான் முழுமையாக வரவேற்கிறேன்.

பாராளுமன்ற தேர்தலுக்காக தமிழ்நாட்டில் காங்கிரஸ் தலைமையில் 3-வது அணி அமைய வாய்ப்பு இருக்கிறது என்பது வெறும் வதந்தி. தி.மு.க. கூட்டணியில் காங்கிரஸ் ஒரு அங்கமாக செயல்பட்டு வருகிறது. 3-வது அணிக்கு பேச்சு இல்லை. புதுச்சேரி மாநிலத்திலும் இதே நிலைதான்.

மத்திய மந்திரி நிர்மலா சீதாராமன் என்ன பேசுகிறார் என்று தெரியாமல் பேசுகிறார். பா.ஜ.க. மதம் சார்ந்த கட்சி காங்கிரஸ் மதசார்பற்ற கட்சி காங்கிரசின் கொள்கையே அனைத்து மதத்தையும் அரவணைத்து செல்வது தான். நாங்கள் இந்து கோவிலுக்கு போவோம், மசூதிக்கு போவோம், கிறிஸ்தவ ஆலயத்திற்கும் செல்வோம். ஆனால் பா.ஜ.க. ஒரே மதம், ஒரே நாடு என்று சொல்வார்கள்.

காங்கிரசை விமர்சிப்பதற்கு பா.ஜ.க.விற்கு எந்த தகுதியும் அருகதையும் கிடையாது. புதுவை கவர்னர் கிரேண்பேடி என்னுடைய அதிகாரத்திற்கு உட்பட்டு தான் செயல்படுகிறேன் என்று சொல்லி வருகிறார்.

இது தொடர்பாக உச்ச நீதிமன்றத்தில் வழக்கு இருக்கிறது. தீர்ப்பு வந்த பிறகுதான் அவருடைய அதிகாரத்தை பற்றி தெரியும். கிரேண்பேடி தலையிட்டால் புதுவை மாநிலத்தில் வளர்ச்சிக்கான பணிகள் எதுவும் தடைப்படவில்லை. தாமதம் தான் ஆகிறது.

இவ்வாறு அவர் கூறினார். #Parliamentelections #Narayanasamy

காஞ்சீபுரம்:

பசுமை வழிச்சாலைக்காக காஞ்சிபுரம் மாவட்டத்தில் நிலம் கையகப்படுத்தும் பணிகள் நேற்று நிறைவடைந்தது.

காஞ்சீபுரம் அடுத்த மணல்மேடு பகுதியில் நேற்று நிலம் அளவிடும் பணி நடைபெற்று வந்த நிலையில் திட்டத்திற்கு எதிர்ப்பு தெரிவித்து அப்பகுதிக்கு விவசாயிகள் சங்க பிரதிநிதிகள் வந்தனர்.

அங்கு பாதுகாப்புப் பணியில் ஈடுபட்டிருந்த காஞ்சீபுரம் ஏ.டி.எஸ்.பி. சந்திரசேகரன் தலைமையிலான போலீசார் திட்டத்திற்கு எதிர்ப்பு தெரிவித்த மார்க்சிஸ்ட் கம்யூனிஸ்ட் கட்சியின் மாவட்டச் செயலாளர் நேரு, மற்றும் நிர்வாகிகள் மோகனன், சங்கர், கனகராஜ் உள்ளிட்ட 6 பேரை கைது செய்து காவல் நிலையம் அழைத்துச் சென்றனர்.

போலீசார் அவர்களிடம் இருந்து செல்போன்களை பறித்து விட்டதாகவும் கூறப்படுகின்றது. போராட்டத்தில் ஈடுபட்டவர்களை காஞ்சீபுரம் ஏ.டி.எஸ்.பி. சந்திர சேகரன் ஒருமையில் பேசுவதாகவும் நில எடுப்பு பணிகள் நடைபெறும் இடத்தில் அதிக அளவில் போலீசாரை குவித்து மக்களுக்கு அச்சுறுத்தல் ஏற்படுத்துவதாகவும் குற்றம் சுமத்தினர்.

இந்த நிலையில் போராட்டக்காரர்களை அடைத்து வைத்திருந்த மாகரல் காவல் நிலையத்தினை ஏராளமானோர் முற்றுகையிட்டு போராட்டத்தில் ஈடுபட்டனர்.

இதனையடுத்து டி.எஸ்.பி. பஞ்சாட்சரம் அவர்களுடன் பேச்சுவார்த்தையில் ஈடுபட்டார். இதனையடுத்து கைது செய்யப்பட்டவர்கள் விடுவிக்கப்பட்டனர். #Greenwayroad

காஞ்சீபுரம்:

காஞ்சீபுரத்தில் உள்ள பிரசித்தி பெற்ற ஏகாம்பரநாதர் கோவிலில் பல்லவ மன்னர் கலை நுட்பத்துடன் இரட்டை திருமாளிகையை உருவாக்கினார். இந்த திருமாளிகை சீரமைப்பு பணியில் முறைகேடு நடந்துள்ளதாக கூறப்படுகிறது.

இது குறித்து காஞ்சீபுரத்தைச் சேர்ந்த சிவபக்தர் அண்ணாமலை என்பவரின் மகன் டில்லிபாபு என்பவர் காஞ்சிபுரம் நீதிமன்றத்தில் வழக்கு ஒன்றை தொடர்ந்திருந்தார். அவர் தாக்கல் செய்த மனுவில் கூறி இருந்ததாவது:-

காஞ்சீபுரத்தில் உள்ள உலகப்பிரசித்தி பெற்ற ஏகாம்பரநாதர் திருக்கோயிலில் கடந்த 2014-ம் ஆண்டில் கோயிலில் உள்ள ஆயிரங்கால் மண்டபம் மற்றும் இரட்டை திருமாளிகை ஆகியவற்றை புனரமைக்க 1.50 கோடி ஒதுக்கீடு செய்யப்பட்டது.

கோயில் நிர்வாகம் சார்பில் தன்னிச்சையாக எந்தவித திட்ட மதிப்பீடும் இல்லாமல் அரசு அங்கீகாரம் பெற்ற ஸ்தபதியின் கருத்து இல்லாமல் இணையதளம் மூலம் நன்கொடை வேண்டி விளம்பரம் செய்துள்ளனர்.

பழங்கால கோயில் என்பதால் புனரமைப்புப் பணிக்கு நவீன இயந்திரங்களைப் பயன்படுத்தக்கூடாது. இந்த புனரமைப்புப் பணியின் போது அழகிய சிற்பங்கள், சதுரங்கத் தூண்கள் 60, பல உருளைத் தூண்கள் காணாமல் போய் உள்ளன.

இது குறித்து தகவல் அறியும் உரிமைச் சட்டத்தின் கீழ் கேள்வி எழுப்பியும் உரிய பதில் கிடைக்கவில்லை. எனவே இது குறித்து விசாரணை நடத்த உத்தரவிட வேண்டும்.

இவ்வாறு அந்த மனுவில் கூறப்பட்டிருந்தது.

இந்த வழக்கு நீதிபதி மீனாட்சி முன்னிலையில் விசாரணைக்கு வந்தது. அப்போது வழக்கில் குற்றம் சாட்டப்பட்டுள்ள திருப்பணி ஆணையர் கவிதா, வேலூர் இணை ஆணையர் சிவாஜி, காஞ்சீபுரம் துணை ஆணையர் ரமணி, கோயில் செயல் அலுவலர் முருகேசன், பொறியியல் கண்காணிப்பாளர் பால சுப்பிரமணி, ஸ்தபதி நந்தகுமார் ஆகிய 6 பேர் மீதும் வழக்கு பதிவு செய்து விசாரணை நடத்த உத்தரவிட்டார்.

இச்சம்பவம் காஞ்சீபுரம் பகுதியில் பரபரப்பை ஏற்படுத்தி உள்ளது. #KanchipuramEkambareswararTemple