காஞ்சிபுரம்

ஆலந்தூர்:

துபாயில் இருந்து சென்னைக்கு இன்று காலை 9 மணி அளவில் விமானம் வந்தது. அதில் வந்த பயணிகளுக்கு சுகாதார ஊழியர்கள் பரிசோதனை செய்தனர்.

அப்போது நாகை மாவட்டத்தை சேர்ந்த வாலிபர் ஒருவருக்கு கடுமையான காய்ச்சல் மற்றும் மூச்சுத்திணறல் இருந்தது.

இதையடுத்து அவரை பாதுகாப்பாக சிறப்பு ஆம்புலன்ஸ் மூலம் சென்னை அரசு ஆஸ்பத்திரிக்கு அழைத்து சென்றனர். அவரை கொரோனா வைரஸ் தாக்கி இருக்கலாம் என்ற சந்தேகம் ஏற்பட்டுள்ளது.

அவரது சளி மற்றும் ரத்தம் பரிசோதனைக்காக எடுக்கப்பட்டு இருக்கிறது. பரிசோதனை முடிவிலேயே அவருக்கு கொரோனா பாதிப்பு உள்ளதா? என்பது தெரியவரும். அவரை தனி வார்டில் டாக்டர்கள் தீவிரமாக கண்காணித்து வருகிறார்கள்.

அவர் கடந்த 2 ஆண்டுகளாக குவைத்தில் டிரைவராக பணியாற்றி வந்துள்ளார். தற்போது அவர் திரும்பி வந்த போது காய்ச்சலால் பாதிக்கப்பட்டு இருக்கிறார்.

இதைத் தொடர்ந்து அவருடன் விமானத்தில் பயணம் செய்த மற்ற பயணிகளுக்கும் தீவிர மருத்துவ பரிசோதனை செய்யப்படுகிறது.

ஸ்ரீபெரும்புதூர்:

ஸ்ரீபெரும்புதூர் வட்டார வளர்ச்சி அலுவலகம் அருகே ஸ்ரீபெரும்புதூர் - குன்றத்தூர் செல்லும் சாலையில் நேற்று காலை ஒரு சொகுசு கார் வேகமாக சென்றது.

அப்போது காரை பின் தொடர்ந்து ஒரு புல்லட் பைக் வேகமாக வந்தது. பைக்கில் வந்த இரண்டு மர்மநபர்கள் திடீரென காரை வழிமறித்து அதில் இருந்த 3 வாலிபர்களை துப்பாக்கியை காட்டி மிரட்டினர்.

இதனால் காரில் வந்த 3 பேரும் பயந்து வண்டியை நிறுத்திவிட்டு அங்கிருந்து தப்பி ஒடி விட்டனர். பின்னர் பைக்கில் வந்த மர்ம நபர்களில் ஒருவன் காரை கடத்தி சென்றான்.

கண் இமைக்கும் நேரத்தில் நடந்த இந்த சம்பவத்தை பார்த்த பொது மக்கள் பீதியில் அலறி அடித்து ஓடினர்.

இது குறித்து தகவல் அறிந்ததும் ஸ்ரீபெரும்புதூர் உதவி போலீஸ் சூப்பிரண்டு கார்த்திகேயன், போலீஸ் இன்ஸ்பெக்டர் விநாயகம் சம்பவ இடத்திற்கு விரைந்து வந்து விசாரணை மேற் கொண்டனர்.

அந்த பகுதியில் உள்ள சி.சி.டி.வி.கேமராவில் மர்ம நபர்களின் உருவம் பதிவாகி உள்ளது. அதை வைத்து அவர்களை தேடி வருகின்றனர்.

காரில் இருந்து தப்பி ஓடிய 3 பேரும் எங்கு போனார்கள் என்று தெரிய வில்லை.? அவர்கள் யார்? கடத்தப்பட்டார்களா? ரவுடி கும்பலா? என்று பல்வேறு கோணத்தில் போலீசார் விசாரணை நடத்தி வருகிறார்கள்.

காஞ்சிபுரம்:

ஓமன் நாட்டில் என்ஜினீயராக வேலை பார்த்து திரும்பிய காஞ்சிபுரத்தை சேர்ந்தவருக்கு கொரோனா பாதிப்பு உறுதி செய்யப்பட்டு உள்ளது. தற்போது அவர் சென்னை ராஜீவ்காந்தி மருத்துவ மனையில் தீவிர சிறப்பு சிகிச்சை பிரிவில் கண்காணிக்கப்பட்டு வருகிறார்.

அவரது குடும்பத்தைச் சேர்ந்த உறவினர்கள், நண்பர்கள் என 22 பேருக்கு காஞ்சிபுரம் சுகாதாரதுறை சார்பில் பரிசோதனைகள் செய்யப்பட்டது. அவர்களும் கண்காணிக்கப்பில் இருந்து வருகின்றனர்.

என்ஜினீயர் வீடு இருந்த தெருக்கள் முழுவதும் கிருமி நாசினி தெளிக்கப்பட்டு வருகிறது. அங்கு வசிப்பவர்களுக்கு கொரோனா வைரஸ் குறித்து விழிப் புணர்வு ஏற்படுத்தப்பட்டு வருகின்றன.

இந்த நிலையில் கொரோனா பீதி காரணமாக காஞ்சிபுரத்தில் முக கவசங்களுக்கு திடீர் தட்டுப்பாடு ஏற்பட்டு உள்ளது. மருந்து கடைகளிலும், ஆஸ்பத்திரிகளிலும் முன் எச்சரிக்கை நடவடிக்கையாக பொதுமக்கள் முக கவசங்களை கூடுதலாக கேட்டு வாங்கி செல்கிறார்கள். இதனால் சில மருந்து கடைகளில் எண்-95 வகை முக கவசம் கூடுதல் விலைக்கு விற்கப்படுகிறது.

காஞ்சிபுரத்தில் செய்யப்பட்டுள்ள முன் எச்சரிக்கை நடவடிக்கைகள் குறித்து காஞ்சிபுரம் மாவட்ட சுகாதாரத்துறை நலபணிகள் துணை இயக்குனர் பழனி கூறியதாவது:-

காஞ்சிபுரம் நகர் முழுவதும் சுகாதார பணியாளர் குழு அமைத்து பஸ் நிலையம், ரெயில் நிலையம், கோயில்கள் உள்ளிட்ட இடங்களில் கொரோனா பாதிப்பில் இருந்து தற்காத்து கொள்ளும் வழிமுறைகளை எடுத்து கூறி வருகின்றனர்.

பள்ளி மாணவ-மாணவிகள் இடையே கைகழுவும் செயல்முறை விழிப்புணர்வு ஏற்படுத்தப்படுகிறது.

கொரோனா வைரஸ் பாதிக்கப்பட்டவரின் வீடு அமைந்துள்ள பகுதிகள் முழுவதும் கிருமிநாசினி தெளிக்கப்பட்டு உள்ளது. அப்பகுதியில் வசிக்கும் பொதுமக்களை சுகாதார துறை ஊழியர்கள் தொடர்ந்து கண்காணித்து வருகின்றனர்.

இவ்வாறு அவர் கூறினார்.

மாமல்லபுரம்:

தெலுங்கானா மாநிலத்தைச் சேர்ந்தவர் சைலேஷ் வரராவ் (20). தாம்பரத்தில் உள்ள தனியார் கல்லூரியில் பிடெக் முதலாம் ஆண்டு படித்து வந்தார்.

மாமல்லபுரத்துக்கு சுற்றுலா வந்த போது நண்பர்களுடன் கடற்கரை கோவில் அருகே கடலில் குளித்தார். அப்போது ராட்சத அலையில் சிக்கி சைலேஷ் வரராவ் பரிதாபமாக உயிரிழந்தார்,

மாமல்லபுரம் அடுத்த பையனூரை சேர்ந்தவர் பிரகாஷ் (24) ரிசார்ட் ஊழியராக வேலை பார்த்து வந்தார். இரவு வேலை முடிந்து வீடு செல்லும் போது பூச்சேரி டோல்கேட் அருகே நிறுத்தி வைத்தப்பட்டிருந்த லாரி அருகே படுத்து தூங்கினார். அப்போது டிரைவர் லாரியை எடுத்த போது பிரகாஷ் டயரில் சிக்கி உடல் நடங்கி சம்பவ இடத்திலேயே பரிதாபமாக இறந்தார்.

இதுகுறித்து மாமல்லபுரம் போலீசார் விசாரணை நடத்தி வருகிறார்கள்.

காஞ்சிபுரம்:

மஸ்கட்டில் இருந்து சொந்த ஊருக்கு திரும்பிய காஞ்சிபுரம் என்ஜினீயருக்கு கொரோனா வைரஸ் பாதிப்பு இருப்பது உறுதி செய்யப்பட்டுள்ளதாக வெளியான தகவல் மாவட்டம் முழுவதும் பெரும் பரபரப்பை ஏற்படுத்தி உள்ளது.

கொரோனா பாதிப்பு என்ஜீனியர் பற்றிய தகவல்களை சுகாதாரத்துறையினர் மிகவும் ரகசியமாக வைத்துள்ளனர். என்ஜீனியரின் குடும்பத்தினரை மருத்துவ அதிகாரிகள் கண்காணித்து வருகிறார்கள்.

இது தொடர்பாக காஞ்சிபுரத்தில் மாவட்ட கலெக்டர் பொன்னையா, இன்று நிருபர்களிடம் கூறியதாவது:-

கொரோனா பாதிப்புக்குள்ளான இளைஞரின் குடும்பத்தினர் 19 பேரை சுகாதார துறையினர் தங்களது கட்டுப்பாட்டுக்குள் கொண்டு வந்துள்ளனர். அவர்களுக்கு மருத்துவ பரிசோதனைகள் செய்யப்பட்டு வருகின்றன என்றார்.

ஸ்ரீபெரும்புதூர்:

ஸ்ரீபெரும்புதூர் அடுத்த கருணாகரச்சேரி கிராமத்தைச் சேர்ந்தவர் ஞானவேல் (வயது55). விவசாயி. இவர் அதே பகுதியில் நிலத்தை குத்தகைக்கு எடுத்து விவசாயம் செய்து வந்தார்.

இந்நிலையில் இன்று காலை விவசாய வேலைகளை கவனிக்க வயல் வெளிக்கு சென்றார். அப்போது மின்சார ஒயர் அறுந்து கீழே விழுந்து கிடந்தது. அதை கவனிக்காமல் ஞானவேல் மின்சார வயரை மிதித்துள்ளார். இதில் மின்சாரம் தாக்கி தூக்கி வீசப்பட்ட ஞானவேல் சம்பவ இடத்திலேயே பலியானார்.