ஈரோடு

ஈரோடு:

ஈரோடு, லட்சுமி தியேட்டர் பவானி மெயின் ரோடு பகுதியை சேர்ந்தவர் மணிகண்டன்(வயது23).

நேற்று மணிகண்டன் ஈரோடு பஸ் நிலையத்தில் இருந்து பன்னீர்செல்வம் பார்க் செல்லும் டவுன் பஸ்சில் ஏறினார்.

மணிகண்டனுக்கு பின்னால் 40 வயது மதிக்கத்தக்க நபர் நின்று கொண்டிருந்தார். பஸ் நாச்சியப்பா வீதியில் வந்து கொண்டிருந்த போது மணிகண்டன் அருகில் நின்று கொண்டிருந்த மர்ம நபர் மணிகண்டன் பர்சை பறித்து கொண்டு பஸ்சில் இருந்து ஓடினார். இதனை பார்த்து அதிர்ச்சி அடைந்த மணிகண்டன் திருடன்..திருடன்..என கத்தினார். அவரது சத்ததை கேட்டு அந்த பகுதியை மக்கள் சிலர் அந்த மர்ம நபரை விரட்டி சென்று பிடித்தனர்.

இது குறித்து டவுன் போலீசுக்கு தகவல் தெரிவிக்கப்பட்டது. அவர்கள் சம்பவ இடத்துக்கு விரைந்து வந்து பொது மக்களிடம் இருந்து அந்த நபரை மீட்டு விசாரணைக்காக டவுன் போலீஸ் நிலையத்துக்கு அழைத்து சென்றனர்.

விசாரணையில் அந்த நபர் சத்தியமங்கலம், ரங்கசமுத்திரத்தை சேர்ந்த குமார்(45) என தெரிய வந்தது. இதையடுத்து டவுன் போலீசார் வழக்கு பதிவு குமாரை கைது செய்தனர்.மேலும் அவனிடம் இருந்து பணமும் பறிமுதல் செய்யப்பட்டது.

கோபி:

கோபி மொடச்சூர் ரோட்டை சேர்ந்தவர் தர்மதுரை. சோன்பப்டி தயாரிக்கும் நிறுவனத்தில் வேலை பார்த்து வருகிறார். மனைவி பெயர் கமலேஸ்வரி. இவர்களுக்கு ஒரு மகனும், ஒரு மகளும் உள்ளனர்.

மகள் பெயர் சன்மதினா (வயது7).மகன் பெயர் கிருஷ்ணன்(8). இந்த நிலையில் சன்மதினா. கோபி அருகே உள்ள குழவி கரட்டில் உள்ள தனது பாட்டி வீட்டுக்கு சென்றாள்.

நேற்று இரவு சிறுமி சன்மதினா பாட்டி வீட்டு முன் விளையாடி கொண்டிருந்தாள். அப்போது எதிர்பாராத விதமாக கால் இடறி கீழே விழுந்தாள். இதில் படுகாயத்துடன் துடித்த சிறுமியை மீட்டு கோபி அரசு ஆஸ்பத்திரிக்கு அனுப்பி வைத்தனர்.

ஆனால் செல்லும் வழியிலேயே சன்மதினா பரிதாபமாக இறந்தாள். சிறுமியின் உடல் கோபி அரசு ஆஸ்பத்திரியில் பிரேத பரிசோதனைக்காக வைக்கப்பட்டுள்ளது.

அவளது உடலை பார்த்து பெற்றோர் உறவினர்கள் கதறி அழுத காட்சி மிகவும் உருக்கமாக இருந்தது.

இது குறித்து கோபி போலீசார் வழக்கு பதிவு செய்து விசாரணை நடத்தி வருகின்றனர்.

பெருந்துறை:

பெருந்துறையை அடுத்துள்ள வாவிக்கடை பகுதியில் பைபாஸ் ரோட்டில் பெட்ரோல் பங்க் ஒன்று உள்ளது. இந்த பங்கின் அருகே ரோட்டோரத்தில் சுற்றுப்புறப்பகுதியில் இருந்து கொண்டு வந்து கொட்டப்பட்ட குப்பைகள் தேங்கி கிடந்தன.

இந்த குப்பைகளுக்கு நேற்று காலை யாரோ சிலர் தீ வைத்துள்ளனர். இந்த குப்பையில் பிடித்த தீ வேகமாக காற்றின் காரணமாக கொளுந்துவிட்டு எரிந்தது. இதனைக் கண்ட அந்தப்பகுதியினர் அச்சத்துடன் பெருந்துறை தீயணைப்பு நிலையத்திற்கு தகவல் கொடுத்தனர்.

சம்பவ இடத்திற்கு விரைந்து வந்த பெருந்துறை தீயணைப்பு நிலைய அலுவலர் வேலுச்சாமி தலைமையிலான தீயணைப்பு வீரர்கள் கொழுந்து விட்ட தீயை கட்டுப்படுத்தி அணைத்தனர். அருகில் பெட்ரோல் பங்க் இருந்ததால் தீயணைப்பு வீரர்களும் மிகவும் பாதுகாப்புடன் தீயை அணைத்தனர். இந்த சம்பவம் அந்த பகுதியில் பெரும் பரபரப்பை ஏற்படுத்தியது. 

ஈரோடு:

ஈரோடு முத்தம் பாளையம் அடுத்த நல்லிபாளையம் பாரதி நகரைச் சேர்ந்தவர் பிரபு. கார் டிரைவர். இவரது மனைவி இந்துமதி (வயது 26). இவர்களுக்கு ஒரு மகனும், ஒரு மகளும் உள்ளனர்.

கணவன்- மனைவிக்கு இடையே அடிக்கடி குடும்ப தகராறு இருந்து வந்ததாக கூறப்படுகிறது. இந்த நிலையில் இன்று அதிகாலை 1.30 மணி அளவில் பிரபு பணியை முடித்துக் கொண்டு வீட்டுக்கு வந்தார்.

வீட்டு கதவை தட்டினார். ஆனால் கதவு திறக்கவில்லை.மேலும் வீட்டில் இருந்து ஏதோ ஒரு சத்தம் கேட்டது.

இதனால் பதட்டமடைந்த பிரபு வீட்டின் மேற்கூரையை பிரித்து உள்ளே பார்த்ததார். அப்போது இந்துமதி தூக்கில் தொங்கிக்கொண்டு உயிருக்கு போராடிக் கொண்டிருந்தார். பிரபு அலறினார்.

அவரது சத்தம் கேட்டு அக்கம் பக்கத்தினர் ஓடி வந்து வீட்டின் கதவை உடைத்து உள்ளே சென்று உயிருக்கு போராடிக்கொண்டிருந்த இந்துமதியை மீட்டு ஈரோட்டில் உள்ள தனியார் ஆஸ்பத்திரிக்கு கொண்டு சென்றனர்.

பின்னர் மேல் சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர். இந்துமதியை பரிசோதித்த டாக்டர்கள் அவர் வரும் வழியிலேயே இறந்து விட்டதாக தெரிவித்தனர்.

இது குறித்து தாலுகா போலீசார் வழக்குப்பதிவு செய்து விசாரணை நடத்தி வருகின்றனர். இந்துமதி என்ன காரணத்திற்காக தற்கொலை செய்து கொண்டார்? என்பது குறித்தும் தீவிரமாக விசாரணை நடத்தி வருகின்றனர்.