நீங்கள் தேடியது "Bomb Threaten"

ஊட்டி:

நீலகிரி மாவட்டம் ஊட்டி அடுத்த கேத்தி பகுதியில் செயல்பட்டு வரும் தனியார் பள்ளியில் சுமார் 300-க்கும் மேற்பட்ட மாணவ-மாணவிகள் தங்கி படித்து வருகின்றனர்.

இந்த நிலையில் நேற்று பகல் 1 மணிஅளவில் அந்த பள்ளிக்கு இ-மெயில் மூலம் வெடிகுண்டு மிரட்டல் வந்தது. அதில், உங்களின் பள்ளிக்கு வெடிகுண்டு வைக்கப்பட்டு உள்ளது. மாணவர்களை காப்பாற்றிக்கொள்ளுங்கள் என குறிப்பிடப்பட்டு இருந்தது.

தொடர்ந்து பள்ளி நிர்வாகம் சார்பில் ஊட்டி போலீசாருக்கு தகவல் தெரிவிக்கப்பட்டது. மேலும் பள்ளி ஆசிரியர்கள் உடனடியாக மாணவர்களை வகுப்பில் இருந்து வெளியேற்றினர்.

தொடர்ந்து மோப்ப நாய்களுடன் வந்திருந்த வெடிகுண்டு நிபுணர்கள் மற்றும் போலீசார் அந்த பள்ளியில் அனைத்து பகுதிகளிலும் அங்குலம்-அங்குலமாக சோதித்து பார்த்தனர்.

ஆனால் வெடிகுண்டு இருப்பதற்கான எந்த தடயமும் கிடைக்கவில்லை. தொடர்ந்து மிரட்டல் விடுக்கப்பட்டு இருந்த பள்ளியில் போலீசார் பாதுகாப்பு பணியில் ஈடுபட்டு வருகின்றனர்.

நீலகிரி மாவட்டத்தில் இ-மெயில் மூலம் வெடிகுண்டு மிரட்டல் வருவது தொடர்கதையாக நீடித்து வருகிறது. கடந்த அக்டோபர் மாதம் ஊட்டி சர்வதேச பள்ளி, குன்னூர் பள்ளி மற்றும் 4 நட்சத்திர ஓட்டல்களுக்கும் வெடிகுண்டு மிரட்டல் விடுத்து இ-மெயில் வந்திருந்தது. இதனால் போலீசார் அந்த பகுதிகளில் தீவிர சோதனை மேற்கொண்டனர். ஆனால் அங்கு வெடிகுண்டு எதுவும் சிக்கவில்லை.

ஊட்டி அரசு மருத்துவ கல்லூரிக்கு நேற்று முன்தினம் வெடிகுண்டு மிரட்டல் விடுத்து இ-மெயில் வந்தது. தொடர்ந்து போலீசார் மருத்துவ கல்லூரியில் சோதனை நடத்தினர். பின்னர் இ-மெயிலில் வந்தது பொய்த்தகவல் என்பது தெரியவந்தது.

இந்த நிலையில் மீண்டும் கேத்தி பகுதியில் உள்ள தனியார் பள்ளிக்கு வெடிகுண்டு மிரட்டல் விடுத்து இ-மெயில் வந்தது பரபரப்பை ஏற்படுத்தி உள்ளது. இதனை யார் செய்கிறார்கள் என்பது குறித்து ஊட்டி சைபர் கிரைம் போலீசார் தீவிர விசாரணை மேற்கொண்டு வருகின்றனர்.

வெடிகுண்டு மிரட்டல் விடுக்கப்படும் இ-மெயில்கள் வெளிநாடுகளில் இருந்து வருவதால், இதனை யார் அனுப்புகின்றனர், எங்கிருந்து வருகிறது என்பது குறித்த எந்தவித துப்பும் கிடைக்கவில்லை. இதனால் போலீசார் துப்பு துலக்க முடியாமல் திணறி வருகின்றனர்.

இதற்கிடையே கேத்தி தனியார் பள்ளிக்கு வெடிகுண்டு மிரட்டல் விடுக்கப்பட்டது அங்கு படிக்கும் மாணவர்கள் மற்றும் பெற்றோர்களிடம் பீதியை ஏற்படுத்தி உள்ளது.

பெங்களூரு:

பெங்களூரு சம்பங்கி ராமநகரில் நட்சத்திர ஓட்டலான ஐபிஸ் ஓட்டல் உள்ளது. இந்த ஓட்டலுக்கு வெடிகுண்டு மிரட்டல் மின்னஞ்சலில் நேற்று இரவு வந்தது. அதில் ஓட்டல் வளாகத்தில் வெடிகுண்டு வைத்துள்ளோம். இன்னும் சில மணி நேரத்தில் வெடிகுண்டு வெடிக்கும் என்று எழுதப்பட்டிருந்தது. இந்த செய்தியை பார்த்த ஓட்டல் ஊழியர்கள் போலீசாருக்கு தகவல் கொடுத்தனர்.

உடனடியாக வெடிகுண்டு செயலிழக்கும் பிரிவு, வெடிகுண்டு கண்டறியும் பிரிவு மற்றும் தீயணைப்பு படையினர் சம்பவ இடத்திற்கு சென்று ஓட்டல் வளாகத்தை ஆய்வு செய்தனர். வெடிபொருட்கள் அல்லது ரசாயன பொருட்கள் எதுவும் கண்டுபிடிக்கப்படவில்லை. அது போலி வெடிகுண்டு மிரட்டல் என்பது தெரியவந்தது.

வெடிகுண்டு மிரட்டல் விடுத்த நபரை கண்டுபிடிக்கும் நடவடிக்கையில் போலீசார் ஈடுபட்டுள்ளனர்.

நாடு முழுவதும் விமானங்கள் மற்றும் பள்ளிகளுக்கு வெடிகுண்டு மிரட்டல் விடுக்கும் சம்பவங்கள் சமீப காலமாக அதிகரித்து வருகிறது. இதனைத் தொடர்ந்து அதிகாரிகள் சோதனையிடும் போது அது புரளி என தெரியவருகிறது.

இந்த நிலையில், திருச்சி மாவட்டத்தில் பள்ளிகள் மற்றும் ஒரு கல்லூரிக்கு இன்று வெடிகுண்டு மிரட்டல் விடுத்துள்ள சம்பவம் அதிர்ச்சியை ஏற்படுத்தி உள்ளது.

திருச்சியில் மகாத்மா காந்தி நூற்றாண்டு மேல்நிலைப்பள்ளி, ராஜாஜி வித்யாலயா, சந்தானம் வித்யாலயா, ராஜம் கிருஷ்ணமூர்த்தி மேல்நிலைப்பள்ளி மற்றும் ஹோலி கிராஸ் பெண்கள் கல்லூரிக்கு வெடிகுண்டு மிரட்டல் விடுக்கப்பட்டுள்ளது.

சம்பந்தப்பட்ட பள்ளிகள் மற்றும் கல்லூரியில் வெடிகுண்டு நிபுணர்கள் சோதனையில் ஈடுபட்டனர். 

ஆலந்தூர்:

சென்னை விமான நிலைய இயக்குனர் அலுவலகத்தில் உள்ள இணையதளத்திற்கு நேற்று நள்ளிரவு இமெயிலில் தகவல் வந்தது. அதில் சென்னை விமான நிலையத்தில் சக்தி வாய்ந்த வெடிகுண்டுகள் வைக்கப்பட்டுள்ளன. விமான நிலையத்தை பாதுகாத்துக் கொள்ளுங்கள் என்று குறிப்பிடப்பட்டு இருந்தது.

இமெயில் மிரட்டலில் குறிப்பிட்ட விமானத்திற்கோ அல்லது விமான நிலையத்தில் குறிப்பிட்ட பகுதிக்கு என்றோ குறிப்பிடாமல் இருந்ததால் விமான நிலையம் மற்றும் விமான நிலைய வளாகப் பகுதிகள் அனைத்திலும் பாதுகாப்பு அதிகாரிகள் சோதனையிட்டனர்.

விமானங்களை நிறுத்தி வைக்கும் பகுதி, ஓடுபாதை, விமானங்களுக்கு எரிபொருள் நிரப்பும் இடம், பயணிகள் புறப்பாடு, சரக்கு பார்சல்களை விமானங்களில் ஏற்றும் பகுதி ஆகிய இடங்களில் இன்று காலை வரை விடிய,விடிய சோதனை நடைபெற்றது. ஆனால் வெடிகுண்டுகள் எதுவும் இல்லை. வெடிகுண்டு மிரட்டல் புரளி என்பது தெரிந்தது.

இதுகுறித்து, சென்னை விமான நிலைய போலீசார் வழக்கு பதிவு செய்து வெடிகுண்டு மிரட்டல் வந்த இமெயில் முகவரியை வைத்து விசாரணை நடத்தி வருகிறார்கள். சென்னை விமான நிலையத்தில் கடந்த 3 நாட்கள் வெடிகுண்டு புரளிகள் இல்லாத நிலையில் மீண்டும் மிரட்டல் வரத்தொடங்கி உள்ளது.

இந்தியாவில் சில நாட்களாக உள்நாடு, வெளிநாடுகளுக்கு செல்லும் விமானங்களுக்கு தொடர்ந்து வெடிகுண்டு மிரட்டல்கள் வருகின்றன. கடந்த 2 வாரங்களில் 400 விமானங்களுக்கு மிரட்டல் விடுக்கப்பட்டது.

இந்த மிரட்டல்கள் இ-மெயில் மற்றும் சமூக வலைதளங்களில் வந்தது. இதுதொடர்பாக தீவிர விசாரணை நடத்தப்பட்டு வருகிறது. வெடிகுண்டு மிரட்டல் புரளி தொடர்பாக மைனர் சிறுவன் உள்பட 2 பேர் கைது செய்யப்பட்டுள்ளனர்.

இந்த நிலையில் வெடிகுண்டு மிரட்டல் பின்னணியில் மகாராஷ்டிராவை சேர்ந்த வாலிபர் இருப்பதாக போலீசார் தெரிவித்துள்ளனர்.

இதுதொடர்பாக மகாராஷ்டிராவின் கோண்டியா மாவட்டத்தில் உள்ள கிழக்கு விதர்பா பகுதியை சேர்ந்த ஜகதீஷ் உய்கே (வயது 35) என்பவரை போலீசார் தேடி வருகிறார்கள். இவர் பயங்கரவாதம் குறித்து புத்தகம் எழுதியுள்ளார் என்றும், பிரதமர் அலுவலகம், மத்திய ரெயில்வே அமைச்சர், மகாராஷ்டிரா முதல்-மந்திரி, துணை முதல்-மந்திரி, விமான அலுவலகங்கள், டி.ஜி.பி., ரெயில்வே பாதுகாப்புப் படை உள்ளிட்ட பல்வேறு அரசு நிறுவனங்களுக்கு ஜகதீஷ் உய்கே இ-மெயில்களை அனுப்பியதாகவும் தேசிய பாதுகாப்பு முகமை வட்டாரங்கள் தெரிவித்தன.

மேலும் பயங்கரவாத அச்சுறுத்தல்கள் குறித்து தனக்குள்ள அறிவு குறித்து விவாதிக்க பிரதமர் மோடியை சந்திக்க வேண்டும் என்றும் அவர் கேட்டுக்கொண்டார். அதேபோல் ரகசிய பயங்கரவாதக் குறியீடு பற்றிய தகவலை முன்வைக்க வாய்ப்பளிக்காவிட்டால் துணை முதல்-அமைச்சரும் உள்துறை அமைச்சருமான தேவேந்திர பட்னாவிஸ் வீட்டிற்கு முன்பு போராட்டம் நடத்தப்படும் என்று மிரட்டல் விடுத்தார்.

இ-மெயிலில் மிரட்டல் அனுப்பியது தொடர்பாக போலீசார் விசாரணை தொடங்கிய பிறகு ஜகதீஷ் உய்கே தலைமறைவாகி விட்டார். அவரை கைது செய்ய தனிப்படை அமைக்கப்பட்டுள்ளது, கடந்த 2021-ம் ஆண்டு ஜகதீஷ் உய்கே கைது செய்யப்பட்டிருந்தார் என்பது குறிப்பிடத்தக்கது.

கோவை:

கோவையில் கடந்த சில நாட்களாக தனியார் பள்ளிகள், ஓட்டல்கள், கல்லூரிகளை குறிவைத்து மர்மநபர்கள் இ-மெயில் மூலமாக வெடிகுண்டு மிரட்டல் விடுத்து வருகின்றனர்.

வெடிகுண்டு மிரட்டல் விடுத்த நபர்கள் யார் என்பது குறித்து போலீசார் விசாரித்து வருகின்றனர்.

இந்த நிலையில் நேற்று கோவையில் உள்ள தனியார் மருத்துவமனைகளுக்கு வெடிகுண்டு மிரட்டல்கள் விடுக்கப்பட்டுள்ளன.

ஈச்சனாரி அருகே உள்ள தனியார் மருத்துவ கல்லூரி முதல்வருக்கு வந்த மெயிலில் வெடிகுண்டு வைக்கப்பட்டுள்ளதாக கூறப்பட்டிருந்தது.

செட்டிப்பாளையம் போலீசார் சம்பவ இடத்திற்கு விரைந்து வந்து சோதனை செய்தனர். சோதனையின் முடிவில் அது புரளி என்பது தெரியவந்தது.

இதேபோல் சிங்காநல்லூர், புலியகுளம் பகுதிகளில் உள்ள 2 மருத்துவமனைகளுக்கும் வெடிகுண்டு மிரட்டல் விடுக்கப்பட்டது.

இதுகுறித்து அந்தந்த பகுதி போலீசார் தீவிர விசாரணை நடத்தி வருகின்றனர். வெடிகுண்டு மிரட்டல் வந்த மெயில் முகவரியை வைத்து எங்கிருந்து மிரட்டல் வந்தது. அதனை விடுத்தது யார்? என விசாரித்து வருகின்றனர்.

கோவையில் தொடர்ந்து பள்ளிகள், கல்லூரிகள், ஓட்டல்கள், ஆஸ்பத்திரிகளுக்கு வெடிகுண்டு மிரட்டல் வந்துள்ள சம்பவம் கோவை மக்களிடையே பீதியை ஏற்படுத்தி உள்ளது.

மிரட்டல் விடுக்கும் நபர்கள் யார் என்பதை கண்டறிவதில் போலீசாருக்கு கடும் சவால் ஏற்பட்டுள்ளது. தற்போது போலீசார் தொழில் நுட்ப உதவியுடன், வெடிகுண்டு மிரட்டல் விடுக்கும் நபர்கள் யார் என்பதை கண்டறியும் பணியில் ஈடுபட்டுள்ளனர்.

டிஜிட்டல் தொழில்நுட்பம் அறிந்த நபர்களே இதுபோன்ற மிரட்டல்கள் விடுத்து வருகின்றனர். டார் எனப்படும் பிரவுசரை பதிவிறக்கம் செய்து, அதன் மூலம் மிரட்டல் விடுத்து இ-மெயில் அனுப்புகிறார்கள்.

டார், வி.பி.என் போன்ற தேடுபொறி தளங்களை பயன்படுத்தும்போது எங்கிருந்து அனுப்புகின்றனர் என்பதை உறுதி செய்ய முடியாது.

உள்ளூரில் இருந்து அனுப்பினாலும் வெளிநாட்டில் இருப்பது போலவே முகவரி காட்டும். இதுபோன்ற மிரட்டல்களில் ஈடுபடும் நபர்களை கண்டறிய தொழில்நுட்ப உதவியுடன் தீவிர விசாரணை செய்து வருகிறோம்.

இவ்வாறு அவர் தெரிவித்தார்.

தூத்துக்குடி:

தூத்துக்குடியில் இருந்து சென்னைக்கு தினமும் இரவு 8.15 மணிக்கு முத்துநகர் எக்ஸ்பிரஸ் புறப்பட்டு செல்கிறது. இந்த நிலையில் நேற்று மாலை 6 மணி அளவில் தூத்துக்குடி போலீஸ் கட்டுப்பாட்டு அறைக்கு ஒரு போன் வந்தது.

அதில் எதிர்புறம் பேசிய நபர் முத்துநகர் எக்ஸ்பிரஸ் ரெயில் புறப்படுவதற்கு 10 நிமிடத்திற்கு முன்பு ரெயில் நிலையத்தில் வெடிகுண்டு பெட்டி வெடிக்கும் என்று கூறி விட்டு போன் தொடர்பை துண்டித்து விட்டார்.

தூத்துக்குடி மாவட்ட போலீஸ் சூப்பிரண்டு பாலாஜி சரவணன் உத்தரவின் பேரில் மத்திய பாகம் போலீஸ் இன்ஸ்பெக்டர் அய்யப்பன், சப்-இன்ஸ்பெக்டர் முருகப்பெருமாள், ரெயில்வே சப்-இன்ஸ்பெக்டர் மகாகிருஷ்ணன் மற்றும் போலீசார் ரெயில் நிலையத்துக்கு விரைந்து சென்று அதிரடி சோதனை நடத்தினர்.

அவர்கள் ரெயில் நிலையத்தில் சந்தேகப்படும்படியான நபர்கள் நடமாட்டம் உள்ளதா என சோதனை நடத்தினர். மேலும் மோப்ப நாய் மியா மற்றும் வெடிகுண்டு நிபுணர்கள் ரெயில் நிலையத்துக்கு வந்து அதிரடி சோதனை நடத்தினர்.

முத்துநகர் எக்ஸ்பிரஸ் ரெயிலில் ஒவ்வொரு பெட்டியாக சோதனை நடத்தினர். இந்த சோதனை காரணமாக இரவு 8.15 மணிக்கு புறப்பட வேண்டிய அந்த ரெயில் தாமதமாக 8.45 மணிக்கு புறப்பட்டது.

இதேபோல் தூத்துக்குடியில் இருந்து மணியாச்சிக்கு இரவு 10.10 மணிக்கு புறப்படும் ரெயிலிலும் போலீசார் சோதனை நடத்தினர். அந்த ரெயில் புறப்பட்டு செல்லும் வரை ரெயில் நிலையத்தில் பலத்த போலீஸ் பாதுகாப்பு போடப்பட்டு இருந்தது.

இதற்கிடையே கட்டுப்பாட்டு அறைக்கு வந்த போன் நம்பரை வைத்து போலீசார் விசாரணை நடத்தியதில் அதன் சிக்னல் குரும்பூரை காட்டியது. உடனே போலீசார் அங்கு சென்று விசாரணை நடத்தினர். அதில் அந்த நபர் குரும்பூர் அருகே உள்ள சேதுக்குவாய்த்தான் கிராமத்தை சேர்ந்த கணேசமூர்த்தி (வயது 42) என்பது தெரியவந்தது.

அவரை குரும்பூர் போலீஸ் இன்ஸ்பெக்டர் முத்துகிருஷ்ணன் தலைமையிலான போலீசார் கைது செய்து போலீஸ் நிலையத்துக்கு அழைத்து சென்று விசாரணை நடத்தினர்.

அதில், கணேசமூர்த்திக்கு மனைவி மற்றும் 1 மகன் இருப்பதும், அவர் வெல்டிங் பட்டறை தொழிலாளியாக வேலை பார்ப்பதும் தெரியவந்தது. குடும்ப பிரச்சினை காரணமாக அவரது மனைவி கோபித்துக்கொண்டு சென்றதாக கூறப்படுகிறது. இதனால் மது அருந்திய கணேசமூர்த்தி போதையில் வெடிகுண்டு மிரட்டல் விடுத்தது தெரியவந்தது.

இதையடுத்து போக்குவரத்துக்கும், பொதுமக்களுக்கும் இடைஞ்சல் விளைவிக்கும் விதமான செயல்களில் ஈடுபட்டதாக கூறி இன்ஸ்பெக்டர் முத்துகிருஷ்ணன் வழக்குப்பதிவு செய்து கணேசமூர்த்தியை கைது செய்தார்.

சேலம்:

அ.தி.மு.க.வில் ஒற்றை தலைமை விவகாரம் விஸ்வரூபம் எடுத்துள்ளது. இதில் இணை ஒருங்கிணைப்பாளர் எடப்பாடி பழனிசாமிக்கு பல்வேறு மாவட்ட செயலாளர்கள், நிர்வாகிகள் ஆதரவு தெரிவித்துள்ளனர்.

இந்த நிலையில் நேற்று சென்னை காவல்துறை தலைமை கட்டுப்பாட்டு அறைக்கு செல்போனில் தொடர்பு கொண்டு ஒருவர் பேசினார். அப்போது அவர் அ.தி.மு.க. ஒருங்கிணைப்பாளர் ஓ.பன்னீர்செல்வத்துக்கு, கட்சி பொதுக்குழு கூட்டத்தில், தலைமை பொறுப்பு வழங்கவில்லை என்றால் சேலம் ஜங்ஷன் ரெயில் நிலையத்துக்கு வெடிகுண்டு வைப்பேன் என மிரட்டல் விடுத்தார்.

இதைத்தொடர்ந்து சென்னை கட்டுப்பாட்டு அறையில் இருந்து சேலம் மாநகர நுண்ணறிவு பிரிவுக்கும், சூரமங்கலம் போலீஸ் நிலையத்துக்கும் தகவல் கொடுக்கப்பட்டது. இதையடுத்து போலீசாரின் கண்காணிப்பு வளையத்துக்குள் ரெயில்நிலையம் கொண்டு வரப்பட்டது.

சேலம் மாநகர் போலீசார் மற்றும் ரெயில்வே போலீசார் துப்பறியும் மோப்பநாய் உதவியுடன் ரெயில் நிலையம் முழுவதும் சோதனை மேற்கொண்டனர்.

மேலும் வெடிகுண்டு நிபுணர்கள் மெட்டல் டிடெக்டர் கருவி கொண்டு ரெயில் நிலைய அறைகள் மற்றும் பார்சல்கள், பயணிகள் உடமைகள் ஆகியவற்றை சோதனை செய்தனர். தொடர்ந்து சேலம் ரெயில் நிலையத்திற்கு வந்த எக்ஸ்பிரஸ் மற்றும் பயணிகள் ரெயில்களில் விடிய விடிய போலீசார் சோதனை நடத்தினர். வெடிகுண்டு எதுவும் சிக்கவில்லை.

இதனிடையே மிரட்டல் விடுத்த நபரின் செல்போன் எண்ணை கொண்டு போலீசார் தீவிர விசாரணையில் இறங்கினர். இதில் அந்த நபர் தாம்பரத்தில் இருந்து மிரட்டல் விடுத்தது கண்டறியப்பட்டது.

இதையடுத்து அந்த நபரை இன்று காலை தாம்பரம் சேலையூர் பகுதியில் வைத்து போலீசார் அதிரடியாக கைது செய்தனர். அவரது பெயர் வினோத்குமார் (வயது 36) என்பதும், அவர் சிதம்பரம், உடையூர் பகுதியை சேர்ந்தவர் என்பதும், சிதம்பரம் அரசு உயர்நிலைப்பள்ளியில் பஸ் டிரைவராக பணியாற்றி வருவதும் தெரியவந்தது.

கைதான வினோத்குமார் ஓ.பன்னீர் செல்வம் மீது இருந்த பற்று காரணமாக மிரட்டல் விடுத்ததாக போலீசார் தெரிவித்தனர்.

தொடர்ந்து அவரிடம் போலீசார் தீவிர விசாரணை நடத்தி வருகிறார்கள். மேலும் அவரை ஜெயிலில் அடைப்பதற்கான ஏற்பாடுகளும் செய்யப்பட்டு வருகிறது.

போரூர்:

சென்னை கே.கே. நகர் ராணி அண்ணா நகர் குடியிருப்பு சார்பில் மழை வெள்ளத்தால் பாதிக்கப்பட்ட கேரள மாநில மக்களுக்கு ரூ. 1 லட்சத்து 42 ஆயிரம் நிதி வழங்கும் நிகழ்ச்சி அப்பகுதியில் நடந்தது.

இதில் விருகம்பாக்கம் தொகுதி எம்.எல்.ஏ. வி.என். ரவி கலந்து கொண்டார். நிகழ்ச்சி நடந்து கொண்டிருந்த போது போலீஸ் கட்டுப்பாட்டு அறைக்கு தொடர்பு கொண்ட மர்ம நபர் ‘கே.கே. நகரில் எம்.எல்.ஏ. பங்கேற்கும் நிகழ்ச்சியில் வெடிகுண்டு வைக்கப்பட்டுள்ளது’ என்று கூறி இணைப்பை துண்டித்து விட்டார்.

இதுபற்றி உடனடியாக போலீஸ் அதிகாரிகளுக்கு தகவல் தெரிவிக்கப்பட்டது. அசோக் நகர் உதவி கமி‌ஷனர் வின்சென்ட் ஜெயராஜ், கே.கே. நகர் இன்ஸ்பெக்டர் பாலமுரளி மற்றும் போலீசார் அங்கு விரைந்து வந்தனர். அவர்கள் வெடிகுண்டு நிபுணர்கள் மற்றும் மோப்ப நாய் ஜூலியுடன் நிகழ்ச்சி நடைபெற்ற இடம் முழுவதும் சோதனை நடத்தினர்.

ஆனால் அங்கு வெடிகுண்டு எதுவும் சிக்கவில்லை. வெறும் புரளி என்பது கண்டறியப்பட்டது.இதைத் தொடர்ந்து எம்.எல்.ஏ. பங்கேற்ற நிகழ்ச்சி தொடர்ந்து நடைபெற்றது.

வெடிகுண்டு மிரட்டல் விடுத்து பேசிய மர்ம நபர் குறித்து கே.கே. நகர் போலீசார் விசாரணை நடத்தி வருகின்றனர். இச்சம்பவத்தால் அப்பகுதி நேற்று இரவு பரபரப்பாக காணப்பட்டது. #ADMK #Bombthreat