திருவண்ணாமலை

செய்யாறு:

செய்யாறை அடுத்த தவசி கிராமத்தை சேர்ந்தவர் முனிரத்தினம் (வயது 45), ஓட்டலில் சமையல் மாஸ்டராக வேலை செய்து வந்தார். இவரது மனைவி தங்கம்மாள். இவர்களுக்கு மணிகண்டன் என்ற மகனும், செண்பகபூஜா என்ற மகளும் உள்ளனர்.

நேற்று முன்தினம் முனிரத்தினம் ஓட்டலில் வேலை செய்து கொண்டிருந்த போது திடீரென மயங்கி விழுந்தார். உடனடியாக சக ஊழியர்கள் அவரை மீட்டு சிகிச்சைக்காக செய்யாறு மாவட்ட தலைமை அரசு மருத்துவமனைக்கு கொண்டு சென்றனர். அங்கு அவரை பரிசோதனை செய்த டாக்டர்கள், முனிரத்தினம் ஏற்கனவே இறந்துவிட்டதாக தெரிவித்தனர். இதுகுறித்து செய்யாறு போலீசார் வழக்குப்பதிவு செய்து விசாரணை நடத்தி வருகின்றனர்.

திருவண்ணாமலை :

திருவண்ணாமலை அருணாசலேஸ்வரர் கோவிலுக்கு தினமும் ஆயிரக்கணக்கான பக்தர்கள் வந்து சாமி தரிசனம் செய்து விட்டு செல்கின்றனர். நேற்று ராஜகோபுரம் முன்பு ஏராளமான பக்தர்கள் நின்று சாமி தரிசனம் செய்தனர். மதியம் 1 மணியளவில் வாலிபர் ஒருவர் ராஜகோபுரத்தின் மீது வெளிப்புறம் வழியாக சுமார் 20 அடிக்கு மேல் ஏறி ஒரு இடத்தில் அமர்ந்து கொண்டார். இதைப்பார்த்தவர்கள் கோவிலின் ராஜகோபுர பகுதியில் பாதுகாப்பு பணியில் இருந்த போலீசாரிடம் தெரிவித்தனர்.

இதையடுத்து போலீசார் ராஜகோபுரத்தின் கீழ்பகுதியில் நின்றவாறு அவரிடம் பேச்சுக்கொடுத்தனர். அப்போது அவர், நான் புதியதாக வாங்கிய செல்போனை ஒருவர் எடுத்து சென்று தலைமறைவாகி விட்டார். அவரிடம் இருந்து செல்போனை வாங்கி தராவிட்டால் ராஜகோபுரம் மேலிருந்து குதித்து தற்கொலை செய்து கொள்வேன் என்று மிரட்டல் விடுத்து உள்ளார்.

இதனால் அப்பகுதியில் பரபரப்பு ஏற்பட்டது. பின்னர் இது குறித்து தீயணைப்பு துறைக்கு தகவல் தெரிவிக்கப்பட்டது. இதையடுத்து தீயணைப்புத் துறையினர் மற்றும் போலீசார் அந்த நபரிடம் சுமார் 1 மணி நேரம் சமரச முயற்சியில் ஈடுபட்டனர். அதன்பின் ராஜகோபுரத்தின் மேல் ஏறி சென்று அவரை பத்திரமாக மீட்டு கீழே அழைத்து வந்தனர். கோபுரத்தின் முன் இதனை ஏராளமானோர் பார்க்க திரண்டதால் பரபரப்பு ஏற்பட்டது. பின்னர் அவரை போலீசார் திருவண்ணாமலை டவுன் போலீஸ் நிலையத்திற்கு அழைத்து சென்று விசாரணை நடத்தினர்.

விசாரணையில் அவர் புதுச்சேரி மாநிலம் காரைக்கால் வர்சிகுடி வடக்கு கூவம் பகுதியை சேர்ந்த புருஷோத்தமன் (வயது 23) என்பதும் மனநலம் பாதிக்கப்பட்டவர் என்பதும் தெரியவந்தது. அவர், கடந்த 3 வருடங்களுக்கு மேலாக திருவண்ணாமலையில் சுற்றி திரிந்து வந்துள்ளார். அவரிடம் போலீசார் தொடர்ந்து விசாரணை நடத்தி வருகின்றனர்.

திருவண்ணாமலை:

திருவண்ணாமலை மாவட்டத்தில் நேற்று முன்தினம் பல்வேறு இடங்களில் மழை பெய்தது. திருவண்ணாமலையில் பெய்த பலத்த மழையால் பல்வேறு பகுதிகளில் மழைநீர் தேங்கி காணப்பட்டது. மேலும் நொச்சிமலை பகுதியில் உள்ள ஏரியில் இருந்து மழைநீர் வெளியே செல்ல வழியில்லாததால் அதன் அருகில் உள்ள குடியிருப்பு பகுதிகளில் தண்ணீர் புகுந்தது. இதனால் அப்பகுதியை சேர்ந்த பொதுமக்கள் அவதி அடைந்தனர்.

இதையடுத்து நேற்று பகலில் நொச்சிமலை குடியிருப்பு பகுதிகளில் இருந்து தண்ணீரை வெளியேற்றும் பணியில் நெடுஞ்சாலைத்துறையினர் ஈடுபட்டனர். மழைநீர் செல்லும் கால்வாயை பொக்லைன் எந்திரம் மூலம் சீர் செய்தனர். தொடர்ந்து அப்பகுதியில் தேங்கி இருந்த தண்ணீர் படி, படியாக குறைய தொடங்கியது.

அதேபோல் திருவண்ணாமலையை அடுத்த மங்கலம் ஊராட்சிக்கு உட்பட்ட கோடிதிப்பை பகுதியில் 50-க்கும் மேற்பட்ட குடும்பங்கள் வசித்து வருகின்றனர். நேற்று முன்தினம் பெய்த மழையால் அப்பகுதியில் உள்ள தெருக்களில் மழைநீர் தேங்கியது. சில குடியிருப்புகளிலும் மழைநீர் புகுந்தது.

திருவண்ணாமலை மாவட்டத்தில் நேற்று முன்தினம் பெய்த மழையில், அதிகபட்சமாக கலசபாக்கத்தில் 159 மில்லி மீட்டர் மழையளவு பதிவாகி உள்ளது. மற்ற பகுதிகளில் பெய்த மழையின் அளவு மில்லி மீட்டரில் வருமாறு:-

கீழ்பென்னாத்தூர் - 96.8, ஜமுனாமரத்தூர் - 69, திருவண்ணாமலை - 54, போளூர் - 12.6, தண்டராம்பட்டு - 8, சேத்துப்பட்டு - 2.8, ஆரணி - 1 ஆகும். மேலும் குப்பநத்தம் அணைக்கு விநாடிக்கு 70 கன அடி நீர் வரத்தும், மிருகண்டாநதி அணைக்கு விநாடிக்கு 80 கன அடி நீர் வரத்தும், செண்பகதோப்பு அணைக்கு விநாடிக்கு 32 கன அடி நீர்வரத்தும் ஏற்பட்டு உள்ளது.

சேத்துப்பட்டு:

திருவண்ணாமலை மாவட்டம் தேசூர் அரசு பள்ளியில் படிக்கும் கள்ளப்புலியூர் கிராமத்தை சேர்ந்த 11-ம் வகுப்பு மாணவருக்கு கொரோனா உறுதியானது.

இதையடுத்து தேசூர் அரசு மேல்நிலைப்பள்ளி தலைமை ஆசிரியர் ஆரணி மாவட்ட கல்வி அதிகாரிக்கு தகவல் தெரிவித்தார். அதை தொடர்ந்து, பள்ளிக்கு 3 நாட்கள் விடுமுறை அளிக்கப்பட்டது.

பள்ளி முழுவதும் சுத்தம் செய்து, கிருமி நாசினி தெளிக்கப்பட்டது.

இதையடுத்து கள்ளப்புலியூர் கிராமத்தை சேர்ந்த மாணவர்கள் அனைவருக்கும் கொரோனா பரிசோதனை செய்யப்பட்டது.

மேலும் பள்ளிக்கு வந்த 20-க்கும் மேற்பட்ட ஆசிரியர், ஆசிரியர்களுக்கு தொடர் பரிசோதனை எடுக்கப்பட்டு வருகிறது. 3 நாட்கள் விடுமுறை அளிக்கப்பட்டு பள்ளி மூடப்பட்டது. சுகாதராதுறையினர், மருத்துவ குழுவினர் அங்கு முகாமிட்டு கண்காணித்து வருகின்றனர்.

திருவண்ணாமலை:

திருவண்ணாமலை மாவட்டத்தில் நேற்று முன்தினம் பல்வேறு பகுதிகளில் மழை பெய்தது. இதில் அதிகபட்சமாக செங்கத்தில் 64 மில்லி மீட்டர் மழையளவு பதிவாகி உள்ளது. மற்ற பகுதிகளில் பெய்த மழையின் அளவு மில்லி மீட்டரில் வருமாறு:-

தண்டராம்பட்டு-52, கலசபாக்கம்-45, வந்தவாசி-37, போளூர்-31.8, ஜமுனாமரத்தூர்-22, செய்யாறு-18, திருவண்ணாமலை-6, ஆரணி-4.5, சேத்துப்பட்டு-3.4, கீழ்பென்னாத்தூர்-2.8 ஆகும்.

மாவட்டம் முழுவதும் அவ்வப்போது பெய்து வரும் மழையினால் சாத்தனூர் அணைக்கு நேற்று விநாடிக்கு 208 கன அடி தண்ணீரும், மிருகண்டாநதிக்கு விநாடிக்கு 48 கன அடி தண்ணீரும் வரத்து ஏற்பட்டுள்ளது. இதனால் விவசாயிகள் மகிழ்ச்சி அடைந்துள்ளனர்.

இதேபோல போளூர் பகுதியில் உள்ள ஏரி மற்றும் குளங்களுக்கு தண்ணீர் வரத்து அதிகரித்து வருகிறது. இதனால் விவசாயிகள் மகிழ்ச்சி அடைந்துள்ளனர்.

ஜவ்வாதுமலை அடிவாரத்தில் உற்பத்தியாகும் மஞ்சள் ஆற்றில் இருந்து போளூர் பெரிய ஏரிக்கு தண்ணீர் நேற்று அதிகாலை முதல் வேகமாக வருகிறது.

திருவண்ணாமலையில் மலையை சிவனாக வழிபடுவதால் பவுர்ணமி நாட்களில் அருணாசலேஸ்வரர் கோவிலின் பின்புறம் உள்ள மலையை சுற்றி 14 கிலோ மீட்டர் மலை சுற்றும் பாதையில் ஆயிரக்கணக்கான பக்தர்கள் கிரிவலம் செல்வார்கள். கொரோனா ஊரடங்கு காரணமாக கடந்த 2020-ம் ஆண்டு ஏப்ரல் மாதத்தில் இருந்து திருவண்ணாமலையில் பவுர்ணமி கிரிவலத்திற்கு மாவட்ட நிர்வாகம் மூலம் தொடர்ந்து தடை விதிக்கப்பட்டு வருகிறது.

இந்த மாதத்திற்கான பவுர்ணமி நேற்று அதிகாலை 5.20 மணிக்கு தொடங்கி இன்று அதிகாலை 5.51 மணிக்கு நிறைவடைந்தது. இந்த மாதமும் பவுர்ணமி கிரிவலத்திற்கு தடை விதிக்கப்பட்டது. அதுமட்டுமின்றி வெள்ளிக்கிழமை முதல் ஞாயிற்றுக்கிழமை வரை என 3 நாட்கள் அருணாசலேஸ்வரர் கோவில் மற்றும் கிரிவலப்பாதையில் உள்ள அஷ்டலிங்க கோவில்களில் பக்தர்கள் சாமி தரிசனத்திற்கு தடை விதிக்கப்பட்டு இருந்த நிலையில் 4-வது நாளாக நேற்றும் அருணாசலேஸ்வரர் கோவிலில் பக்தர்களுக்கு சாமி தரிசனம் செய்ய அனுமதிக்கப்பட வில்லை.

இதை அறியாத வெளி மாநில பக்தர்கள் புரட்டாசி பவுர்ணமியன்று சாமி தரிசனம் செய்ய திருவண்ணாமலைக்கு நேற்று முன்தினம் இரவே வருகை புரிந்தனர். இதில் சிலர் நேற்று முன்தினம் இரவு முதலே கிரிவலம் செல்ல தொடங்கினர். நேற்று அதிகாலையில் பவுர்ணமி நேரத்தில் கிரிவலம் செல்ல வந்த பக்தர்கள் கிரிவலப்பாதையில் உள்ள அஷ்டலிங்க சன்னதிகள் மூடப்பட்டிருந்ததால் ஏமாற்றம் அடைந்தனர்.

மேலும் அருணாசலேஸ்வரர் கோவிலில் சாமி தரிசனம் செய்ய முடியாததால் பக்தர்கள் மிகுந்த ஏமாற்றம் அடைந்தனர். பக்தர்கள் ராஜகோபுரம் முன்பு கற்பூரம் ஏற்றி வழிபட்டு சென்றனர். மேலும் நேற்று அதிகாலை முதல் கிரிவலப்பாதையில் உள்ள முக்கிய சாலை சந்திப்பு பகுதிகளில் போலீசார் மூலம் தடுப்புகள் அமைக்கப்பட்டு பக்தர்கள் கிரிவலம் செல்லாமல் தடுக்க கண்காணிப்பு பணியில் ஈடுபட்டனர். அப்போது கிரிவலம் செல்ல வந்த பக்தர்களை போலீசார் திருப்பி அனுப்பினர். இருப்பினும் சிலர் மாற்றுத் பாதையில் கிரிவலப்பாதைக்கு வந்து தங்களது கிரிவலத்தை தொடர்ந்தனர்.

நேற்று பகலிலும், இரவிலும் தனித்தனியாக சிலர் கிரிவலம் சென்றனர். பக்தர்கள் கூட்டமின்றி கிரிவலப்பாதை வெறிச்சோடி காணப்பட்டது. போலீசார் தொடர்ந்து கிரிவலப்பாதையில் ரோந்து பணியில் ஈடுபட்டனர்.

திருவண்ணாமலை:

திருவண்ணாமலை கலெக்டர் முருகேஷ் வெளியிட்டுள்ள அறிக்கையில் கூறி இருப்பதாவது:-

பஞ்சபூத ஸ்தலங்களில் அக்னி ஸ்தலமாக திருவண்ணாமலை அருணாசலேஸ்வரர் கோவில் திகழ்கிறது. இக்கோவிலின் பின்புறம் உள்ள மலையை சுற்றி 14 கிலோ மீட்டர் மலை சுற்றும் பாதையில் ஒவ்வொரு மாதமும் பவுர்ணமி நாட்களில் கிரிவலம் செல்வதற்கு பல்வேறு மாவட்டங்களில் இருந்தும், மாநிலங்களில் இருந்தும் லட்சக்கணக்கான பக்தர்கள் மற்றும் பொதுமக்கள் வருகை புரிவார்கள்.

இந்த மாதத்திற்கான பவுர்ணமி கிரிவலம் வருகிற 20-ந் தேதி (திங்கட்கிழமை) அதிகாலை 5.20 மணிக்கு தொடங்கி மறுநாள் 21-ந் தேதி (செவ்வாய்க்கிழமை) அதிகாலை 5.51 மணி வரை உள்ளது. கொரோனா பரவலை கட்டுப்படுத்த தளர்வுகளுடன் கூடிய ஊரடங்கு நடைமுறையில் உள்ளதால் திருவண்ணாமலை பவுர்ணமி கிரிவலம் நடைபெறும் நாட்களில் மலை சுற்றும் பாதையில் 14 கிலோ மீட்டர் கிரிவலம் வருவதற்கு அனுமதி கிடையாது.

இதன் காரணமாக திருவண்ணாமலை பவுர்ணமி கிரிவலம் வர வேண்டாம் என பக்தர்கள் மற்றும் பொதுமக்களிடம் கேட்டுக் கொள்ளப்படுகிறது. தமிழ்நாடு அரசின் கொரோனா மேலாண்மைக்கான தேசிய வழிகாட்டு நெறிமுறைகளின்படி கொரோனா வைரஸ் தொற்று பரவலை கட்டுப்படுத்தவும், பொதுமக்களை பாதுகாக்கவும் எடுக்கப்பட்டுள்ள இந்த நடவடிக்கைக்கு பக்தர்கள் மற்றும் பொதுமக்கள் முழு ஒத்துழைப்பு வழங்க வேண்டும்.

இவ்வாறு அதில் கூறப்பட்டுள்ளது.