சிவகங்கை

சிவகங்கை:

சிவகங்கை மாவட்ட குடிமைப்பொருள் வழங்கல் குற்ற புலனாய்வு பிரிவு போலீஸ் சப்-இன்ஸ்பெக்டர் முத்துகிருஷ்ணராஜா, சிறப்பு சப் இன்ஸ்பெக்டர்கள் சவுந்தராஜன், சுரேஷ் மற்றும் போலீசார் காரைக்குடியை அடுத்த பள்ளத்தூர் அருகேயுள்ள செட்டிநாடு பைபாஸ் ரோட்டில் நேற்று வாகன சோதனையில் ஈடுபட்டிருந்தனர். அப்போது மணப்பாறை பகுதியில் இருந்து வந்த ஒரு மினி லாரியை தடுத்து நிறுத்தி சோதனை செய்தனர். அதில் 32 (1,520 கிலோ) ரேஷன் அரிசி மூட்டைகள் இருந்தன.

இதைத்தொடர்ந்து போலீசார், அந்த லாரியை ஓட்டி வந்த மணப்பாறை அடுத்த வையபட்டியைச் சேர்ந்த டிரைவர் சங்கர்(வயது 40) என்பவரை கைது செய்தனர். மேலும் லாரியுடன் கடத்தல் அரிசியை பறிமுதல் செய்தனர்.

விசாரணையில் அந்த அரிசியை அறந்தாங்கி பகுதிக்கு கொண்டு செல்வது தெரிந்தது. இதைத்தொடர்ந்து பறிமுதல் செய்யப்பட்ட ரேஷன் அரிசி மூட்டைகளை காரைக்குடியில் உள்ள நுகர்பொருள் வாணிப கழக கிடங்கில் ஒப்படைத்தனர்.

சிங்கம்புணரி:

சிவகங்கை மற்றும் அதன் சுற்றுவட்டார பகுதிகளில் தொடர் மழை பெய்தது. இதனால் அனைத்து நீர்நிலைகளும் வேகமாக நிரம்பி வருகின்றன. திண்டுக்கல் மாவட்டம் நத்தம் அருகே கரந்தமலை பகுதியில் இருந்து உருவாகி வரும் பாலாறு, பள்ளபட்டி, மேலப்பட்டி, கிருங்காகேட்டை வழியாக சிங்கம்புணரி வந்து அடைகிறது.

சிங்கம்புணரியில் இருந்து மட்டிக்கண்மாய் வழியாக ஆ.காளாப்பூர், சிலநீர்பட்டி வழியாக திருப்பத்தூர் பெரிய கண்மாயை சென்றடையும் வகையில் ஆறு அமைக்கப்பட்டுள்ளது.

இந்நிலையில் கடந்த சில நாட்களுக்கு முன்பு கடும் மழை காரணமாக வெள்ளப்பெருக்கு ஏற்பட்டு பாலாற்றில் அதிகப்படியான தண்ணீர் வந்ததால் விவசாயிகள் மகிழ்ச்சி அடைந்தனர். சிங்கம்புணரி ஒன்றியத்திற்குட்பட்ட பிரான்மலை, வையாபுரிபட்டி, சிங்கம்புணரி, சிவபுரிபட்டி மட்டிகண்மாய், ஆ.காளாப்பூர், எஸ்.வி.மங்கலம் போன்ற பகுதியில் உள்ள கண்மாய்கள், குளங்கள் அனைத்தும் 90 சதவீதத்துக்கு மேல் நிரம்பின.

இந்நிலையில் நேற்று மீண்டும் பாலாற்றில் வெள்ளப்பெருக்கு ஏற்பட்டது. அந்த தண்ணீர் சிங்கம்புணரி வழியாக திருப்பத்தூர் நோக்கி சென்றது. இதனால் விவசாயிகள், பொதுமக்கள் மகிழ்ச்சி அடைந்தனர். சிறுவர்கள் தண்ணீரில் துள்ளி குதித்து உற்சாகமாக குளியல் போட்டனர்.

சிவகங்கை:

இளையான்குடியை அடுத்த சாலை கிராமம் பிச்சன் குறிச்சியை சேர்ந்தவர் செல்லையா (வயது70). இவர் 9 வயது சிறுமிக்கு பாலியல் தொல்லை கொடுத்தாராம். இதுதொடர்பாக சிறுமியின் தாய் கொடுத்த புகாரின்பேரில் சிவகங்கை அனைத்து மகளிர் போலீஸ் நிலைய இன்ஸ்பெக்டர் முத்து மீனாட்சி, சப்-இன்ஸ்பெக்டர் பிரபா ஆகியோர் விசாரணை நடத்தி வழக்குப்பதிவு செய்து செல்லையாவை கைது செய்தனர்.

சிங்கம்புணரி:

சிங்கம்புணரி ஒன்றியத்துக்கு உட்பட்ட பகுதிகளில் நேற்று முன்தினம் மாலை 3 மணிக்கு தொடங்கிய மழை நேற்று காலை வரை கனமழையாக பெய்தது. இதனால் இந்த பகுதிகளில் மழைநீர் ஆங்காங்கே தேங்கி குளம் போல் காட்சி அளித்தது.

இந்தநிலையில் சிங்கம்புணரி உள்வட்டம் பகுதி மற்றும் எஸ்.எஸ். கோட்டை உள்வட்டம் ஆகிய பகுதிகளில் உள்ள 12 வீடுகள் மழையால் சேதம் அடைந்தன. சிங்கம்புணரி உள் வட்டம் பகுதியில் உள்ள ஆ.காளாப்பூர், மூவன்பட்டி, எஸ்.வி. மங்கலம், மேலப்பட்டி ஆகிய பகுதியில் கனமழைக்கு ஓட்டு வீடுகள், வீட்டின் ஓடுகள், வீட்டின் மண் சுவர்கள் இடிந்து சேதமாகின.

இதேபோல் எஸ்.எஸ். கோட்டை உள்வட்டம் பகுதியில் மேலையூர், சூரக்குடி, டீ மாம்பட்டி, ஏரியூர், என்.மாம்பட்டி ஆகிய பகுதியில் 6 வீடுகள் சேதமடைந்தன. சிங்கம்புணரி உள்வட்டம் பகுதியில் சேதமடைந்த வீடுகளுக்கு வருவாய் ஆய்வாளர் ராஜா முகமது தலைமையில் கிராம நிர்வாக அலுவலர்கள் சிலம்பரசன், அருண் ஆகியோர் விரைந்து சென்று இடிந்த வீடுகளை ஆய்வு செய்து நிவாரணம் வழங்க அறிக்கை தயார் செய்தனர்.

அதேபோல் எஸ்.எஸ்.கோட்டை உள் வட்டத்தில் வருவாய் ஆய்வாளர் முரளி தலைமையிலான கிராம நிர்வாக அலுவலர்கள் அந்த பகுதிகளுக்கு விரைந்து சென்று வீடுகளின் சேதம் மதிப்பீடு குறித்து கணக்கெடுக்கும் பணி நடைபெற்றது.