நீலகிரி

குன்னூர்:

நீலகிரி மாவட்டம் குன்னூர் பஸ் நிலையத்தில் கொரோனா பரவல் தடுப்பு நடவடிக்கையாக முகக்கவசம் அணிதல், சமூக இடைவெளியை கடைபிடித்தல் போன்றவற்றை வலியுறுத்தி விழிப்புணர்வு நிகழ்ச்சி நடைபெற்றது. இதற்கு நீலகிரி மாவட்ட கலெக்டர் இன்னசென்ட் திவ்யா தலைமை தாங்கி பேசினார். பின்னர் குன்னூர் அருகே உள்ள உபதலை சமுதாய கூடத்தில் உலக மாற்றுத்திறனாளிகள் தின விழா நடைபெற்றது. அதில் கலெக்டர் இன்னசென்ட் திவ்யா கலந்துகொண்டு கொரோனா காலத்தில் சிறப்பாக பணியாற்றிய டாக்டர்கள் உள்பட 10 பேருக்கு பாராட்டு சான்றிதழ்களை வழங்கினார்.

பின்னர் 15 பயனாளிகளுக்கு ரூ.1 லட்சத்து 27 ஆயிரத்து 681 மதிப்பில் நலத்திட்ட உதவிகளையும், தொழிற்பயிற்சி முடித்த 15 பேருக்கு சான்றிதழ்களையும் கொடுத்தார். அப்போது மாற்றுத்திறனாளி சான்றிதழ் பெற வந்த கேத்தி அச்சனகல் பகுதியை சேர்ந்த வெங்கடேஷ்(வயது 6) என்ற சிறுவனிடம் உடல் நலம் குறித்து விசாரித்தார். இதில் குன்னூர் சப்-கலெக்டர் ரஞ்சித் சிங் மற்றும் அதிகாரிகள் கலந்துகொண்டனர்.

பின்னர் கலெக்டர் நிருபர்களிடம் பேசும்போது, நீலகிரி மாவட்டத்தை பொருத்தவரை புரெவி புயலின் தாக்கம் அதிகமாக இல்லை. இருப்பினும் முன்னெச்சரிக்கை நடவடிக்கைகள் எடுக்கப்பட்டு, மீட்பு பணிகளை செய்ய தயார் நிலையில் குழுவினர் உள்ளனர். புரெவி புயல் காரணமாக மழை பெய்யும். ஆனால் தீவிர மழையாக இருக்காது. மழை மற்றும் காற்று அதிகமாக இருக்கும்போது பொதுமக்கள் வீட்டை விட்டு வெளியே வரக்கூடாது என்றார்.

தமிழகத்தின் தென் மாவட்டங்களில் புரெவி புயல் காரணமாக அதி கனமழை பெய்யக்கூடும் என்று எச்சரிக்கை விடுக்கப்பட்டு உள்ளது. இதற்கிடையே கடந்த சில நாட்களாக நீலகிரி மாவட்டம் ஊட்டியில் வெயில் அடித்து வந்தது. இந்தநிலையில் நேற்று முன்தினம் நள்ளிரவு முதல் சாரல் மழை பெய்து வருகிறது.


தற்போது பெய்து வரும் மழைக்கு முன்னெச்சரிக்கை நடவடிக்கைகள் குறித்து கலெக்டர் இன்னசென்ட் திவ்யா கூறும்போது, நீலகிரி மாவட்டத்துக்கு புரெவி புயல் எச்சரிக்கை இல்லை. இருப்பினும் கடந்த வாரம் நிவர் புயல் காரணமாக அனைத்து துறையினர் அடங்கிய குழுக்கள் தயார் நிலையில் இருக்க அறிவுறுத்தப்பட்டு உள்ளது. அபாயகரமான இடங்களாக கண்டறியப்பட்ட பகுதிகள் தொடர்ந்து கண்காணிக்கப்பட்டு வருகிறது.

நீலகிரியில் 2 நாட்கள் மழை இருக்கும். ஆனால் தாக்கம் இருக்காது என்று தெரிவிக்கப்பட்டு உள்ளது. அதிக காற்று வீசினாலோ அல்லது மழை பெய்தாலோ பாதுகாப்பை கருத்தில் கொண்டு பொதுமக்கள் வீட்டை விட்டு வெளியே வருவதை தவிர்க்க வேண்டும் என்றார்.

கூடலூர்:

தமிழகத்தின் முதுமலை புலிகள் காப்பகம், கேரளாவின் முத்தங்கா சரணாலயம், கர்நாடகாவின் பந்திப்பூர் புலிகள் காப்பகம் ஆகியவை 3 மாநிலங்கள் இணையும் இடங்களில் அருகருகே அமைந்து உள்ளன. இங்கு காட்டுயானைகள், புலிகள், காட்டெருமைகள், மான்கள், சிறுத்தைப்புலிகள் உள்ளிட்ட வனவிலங்குகள் அதிகளவில் வாழ்ந்து வருகின்றன. இது தவிர சந்தனம், ரோஸ்வுட், தேக்கு உள்ளிட்ட விலை உயர்ந்த மரங்களும் உள்ளன. மாநில எல்லைகளில் அடர்ந்த வனப்பகுதி உள்ளதால் வன குற்றங்களை தடுக்க வனத்துறையினர் தினமும் ரோந்து பணி மேற்கொண்டு வருகின்றனர்.

இதற்கிடையில் கேரளா, கர்நாடகா மாநில வனப்பகுதியில் மாவோயிஸ்டுகள் நடமாட்டம் இருப்பதாக கண்டறியப்பட்டுள்ளது. இதேபோல் தென்மேற்கு பருவமழை முடிவடைந்து விட்டதால் இனி வரும் மாதங்கள் கோடை காலம் என்பதால் வனப்பகுதியில் காட்டுத்தீ பரவும் அபாயம் உள்ளது. இதனால் காட்டுத்தீ ஏற்படாமல் தடுக்க முன்னெச்சரிக்கை நடவடிக்கைகளை வனத்துறையினர் மேற்கொண்டு வருகின்றனர்.

இந்த நிலையில் வனப்பகுதியில் குற்ற சம்பவங்கள் நடைபெறாமல் தடுப்பது குறித்தும், மாவோயிஸ்டு நடமாட்டத்தை கட்டுப்படுத்துவது குறித்தும் 3 மாநிலங்களை சேர்ந்த முதுமலை, முத்தங்கா, பந்திப்பூர் வனத்துறையினர் நேற்று முன்தினம் மாநில எல்லைகள் இணையும் இடத்தில் ஆலோசனை நடத்தினர். இதில் முதுமலை புலிகள் காப்பக வனச்சரகர்கள் தயானந்தன், சிவக்குமார், முத்தங்கா சரணாலய வனச்சரகர் சுனில் குமார், கர்நாடகாவின் மூலஹல்லா வனச்சரகர் மகாதேவ் மற்றும் வன ஊழியர்கள் கலந்து கொண்டனர்.

அப்போது வனப்பகுதியில் மாவோயிஸ்டு நடமாட்டத்தை கண்டறிந்து போலீசுக்கு தகவல் கொடுப்பது, எதிர் வரும் நாட்களில் வறட்சியான காலநிலை தொடங்க உள்ளதால் காட்டுத்தீ பரவாமல் தடுக்க இணைந்து செயல்படுவது, பழைய மற்றும் புதிய வன குற்றவாளிகளை கண்டறிந்து மீண்டும் குற்றங்கள் நடைபெறாமல் தடுப்பது. வனங்களை பாதுகாக்கும் பணியில் 3 மாநில வனத்துறையினரும் இணைந்து செயல்படுவது, தகவல்களை உடனுக்குடன் பரிமாறுவது என்று முடிவு செய்யப்பட்டது.

கூடலூர்:

கூடலூரில் தேயிலை, காபி, குறுமிளகு, நேந்திரன் வாழை விவசாயத்துக்கு இணையாக பாக்கு விவசாயமும் நடைபெற்று வருகிறது. இங்கு விளையும் பாக்குகளை மொத்த வியாபாரிகள் வாங்கி செல்கின்றனர். இதனால் கணிசமான வருவாயை ஆண்டுதோறும் விவசாயிகள் ஈட்டி வருகின்றனர். இந்த நிலையில் கூடலூர், பந்தலூர் தாலுகாக்களில் உள்ள பாக்கு மரங்களை மாகாளி நோய் தாக்கி வருகிறது. இதனால் அறுவடைக்கு தயாராக உள்ள பாக்குகள் மரங்களில் இருந்து கீழே உதிர்ந்து வருகிறது. இதனால் விவசாயிகள் கவலை அடைந்து உள்ளனர். மேலும் அவர்கள் நஷ்டத்தை சந்திக்கும் சூழல் ஏற்பட்டுள்ளது.

இதுகுறித்து விவசாயிகள் கூறும்போது, ஆண்டுக்கு ஒருமுறை பாக்கு விளைகிறது. கேரளா, கர்நாடகா மற்றும் தமிழகத்தின் நீலகிரி, கன்னியாகுமரி உள்ளிட்ட மாவட்டங்களில் பாக்கு விளைகிறது. கேரளாவில் தென்மேற்கு பருவமழை பெய்ய தொடங்கியதும் மரங்களில் பாக்கு விளைய தொடங்குகிறது. செப்டம்பர் அல்லது அக்டோபர் மாதங்களில் மரங்களில் விளைச்சல் அதிகரிக்கும். பின்னர் நவம்பர் முதல் ஜனவரி வரை பாக்கு அறுவடை செய்யப்படும் காலமாகும். இந்த ஆண்டில் பாக்கு விளைச்சல் அதிகரித்து இருந்தது. ஆனால் மாகாளி நோய் தாக்கி மரங்களில் இருந்து பாக்குகள் உதிர்ந்து வருகிறது. இதனால் நஷ்டம் ஏற்பட்டுள்ளது என்று அவர்கள் கவலையுடன் கூறினர்.

இதுகுறித்து கூடலூர் தோட்டக்கலைத்துறையினர் கூறும்போது, இந்த ஆண்டில் தென்மேற்கு பருவமழை நன்றாக பெய்துள்ளது. இதனால் விவசாய நிலங்களுக்குள் தண்ணீர் புகுந்து பல நாட்கள் தேங்கி நின்றது. பாக்கு தோப்புகளில் மழைநீர் தேங்காமல் இருக்க விவசாயிகள் முன்னெச்சரிக்கை நடவடிக்கையை மேற்கொண்டிருக்க வேண்டும். ஆனால் தண்ணீர் வெளியே செல்ல முடியாத வகையில் பல இடங்களில் சூழ்ந்து இருந்ததால் பாக்கு மரங்களை மாகாளி நோய் தாக்கி வருகிறது. எனவே போடோ மிக்சர் கலவையை பயன்படுத்தி பாக்கு மரங்களை பாதுகாக்கலாம். இதன் மூலம் நோய் கட்டுப்படுத்தப்படும் என்றனர்.

இதற்கிடையில் பாக்கு தோட்டங்களில் மர்ம ஆசாமிகள் இரவில் நுழைந்து பாக்குகளை திருடி செல்கின்றனர். பின்னர் மறுநாள் காலையில் மொத்த வியாபாரிகளிடம் குறைந்த விலைக்கு விற்று விடுகின்றனர். இதை தடுக்கவும், குற்றவாளிகளை கண்டறியவும் பாக்குகளை கொள்முதல் செய்யும் கடைகளில் கண்காணிப்பு கேமராக்களை பொருத்த வேண்டும். அடையாள ஆவணங்கள் வைத்துள்ள விவசாயிகளிடம் மட்டுமே பாக்குகள் கொள்முதல் செய்ய வேண்டும்.

இதுவரை பாக்கு திருடர்களை போலீசாரால் கண்டுபிடிக்க முடியவில்லை. எனவே இரவில் தோட்டங்களுக்குள் நுழைந்து பாக்குகளை திருடி செல்லும் கும்பலை பிடிக்க போலீசார் உரிய நடவடிக்கை எடுக்க வேண்டும் என்ற கோரிக்கை எழுந்து உள்ளது.

ஊட்டி:

மலை மாவட்டமான நீலகிரியில் கேரளா, கர்நாடகா ஆகிய மாநிலங்கள் மற்றும் கோவை மாவட்டத்தை இணைக்கும் சாலைகள் உள்ளன. தமிழக மற்றும் மாவட்ட எல்லையில் நாடுகாணி, கக்கநல்லா, எருமாடு, பர்லியார், குஞ்சப்பனை, பாட்டவயல், முள்ளி உள்பட 16 சோதனைச்சாவடிகள் உள்ளன. எல்லை பகுதிகளில் மாவோயிஸ்டு நடமாட்டம் இருப்பதால் போலீசார் கண்காணிப்பு பணியை தீவிரப்படுத்தி உள்ளனர். போலீசார், வனத்துறையினர், நக்சல் தடுப்பு பிரிவு போலீசார் இணைந்து ரோந்து பணியில் ஈடுபட்டு வருகிறார்கள். வனப்பகுதிகளை ஒட்டி உள்ள கிராமங்களில் வசிக்கும் பழங்குடியின மக்களிடம் சந்தேகப்படும்படியான நபர்கள் நடமாட்டம் இருந்தால் போலீசாருக்கு தகவல் தெரிவிக்க வேண்டும் என்று அறிவுறுத்தப்பட்டு வருகிறது.

நீலகிரியில் வாகன திருட்டு உள்பட குற்ற சம்பவங்களில் ஈடுபடுபவர்களை கண்காணிக்க மாவட்ட எல்லைகளில் உள்ள சோதனைச்சாவடிகளில் தலா ஒரு அதிநவீன தானியங்கி கேமரா பொருத்தப்பட்டு உள்ளது. இதன் மூலம் தானாகவே அந்த வழியாக செல்லும் வாகனங்களின் பதிவு எண் புகைப்படத்துடன் பதிவு செய்யப்படுகிறது. சந்தேகப்படும்படியான நபர் குற்ற செயலில் ஈடுபட்டு தப்பினால், வாகன பதிவு எண்ணை கொண்டும், பதிவு காட்சிகளை வைத்தும் குற்றவாளியை பிடிக்க நடவடிக்கை எடுக்கப்படுகிறது. குற்ற சம்பவங்கள் நடைபெறுவதை தடுக்கவும், பொதுமக்கள் கூடும் இடங்கள் மற்றும் முக்கிய இடங்களை கண்காணிக்கவும் கேமராக்கள் பொருத்தப்பட்டு வருகிறது.

இதுகுறித்து நீலகிரி மாவட்ட போலீஸ் சூப்பிரண்டு சசிமோகன் கூறும்போது, நீலகிரி மாவட்டத்தில் பர்லியார், நாடுகாணி, கக்கநல்லா உள்ளிட்ட சோதனைச்சாவடிகளில் தலா 4 கேமராக்கள் பொருத்தப்பட்டு உள்ளன. அதில் ஒன்று அதி நவீன தானியங்கி கேமரா ஆகும். சாலை பாதுகாப்பு மற்றும் நக்சல் தடுப்பு பிரிவு நிதியின் மூலம் கேமராக்கள் பொருத்தப்படுகிறது. குற்ற சம்பவங்கள் நடைபெறாமல் இருக்க பஜார்கள், வாகன நிறுத்தும் இடங்கள், பொதுமக்கள் அதிகம் கூடும் இடங்கள் என மாவட்டம் முழுவதும் இதுவரை 2 ஆயிரத்து 500 கேமராக்கள் பொருத்தப்பட்டு உள்ளன. மேலும் மற்ற இடங்களில் கேமராக்கள் கண்காணிப்பு தேவையா? என்று கண்டறிந்து கூடுதலாக பொருத்த நடவடிக்கை எடுக்கப்பட்டு வருகிறது என்றார்.

ஊட்டி:

ஊட்டியில் உள்ள அரசு விருந்தினர் மாளிகையில் உலக எய்ட்ஸ் தின நிகழ்ச்சி நடைபெற்றது. கலெக்டர் இன்னசென்ட் திவ்யா முன்னிலை வகித்தார். நீலகிரி மாவட்ட கண்காணிப்பு அதிகாரி சுப்ரியா சாஹூ தலைமை தாங்கி பேசியதாவது:-

நீலகிரி மாவட்டத்தில் கடந்த 2013-ம் ஆண்டு முதல் இதுவரை 43 ஆயிரத்து 802 கர்ப்பிணிகளுக்கு எச்.ஐ.வி.(எய்ட்ஸ்) பரிசோதனை மேற்கொள்ளப்பட்டது. மேலும் ஏ.ஆர்.டி. கூட்டு மருந்து சிகிச்சை அளிக்கப்பட்டு, பிறக்கும் குழந்தைகளுக்கு எச்.ஐ.வி. தொற்று பரவுவது தடுக்கப்படுகிறது.

எச்.ஐ.வி.-யால் பாதிக்கப்பட்டவர்கள் தாழ்வு மனப்பான்மையுடன் இருக்கக்கூடாது. அரசு திட்டங்களில் பயன்பெற முன்வர வேண்டும். எய்ட்ஸ் குறித்த விழிப்புணர்வை மக்களிடம் ஏற்படுத்தி எய்ட்ஸ் இல்லாத நிலையை உருவாக்க உறுதி ஏற்போம்.

இவ்வாறு அவர் கூறினார்.

தொடர்ந்து கலெக்டர் இன்னசென்ட் திவ்யா கூறியதாவது:-

எச்.ஐ.வி. பரிசோதனையை விரிவுபடுத்துவதற்கு அரசு மருத்துவமனைகள் மற்றும் ஆரம்ப சுகாதார நிலையங்களில் 14 நம்பிக்கை மையங்கள் செயல்பட்டு வருகின்றன. எச்.ஐ.வி. பாதித்தவர்கள் சிகிச்சைக்காக மருத்துவமனைக்கு சென்று வர பஸ் பாஸ், உழவர் பாதுகாப்பு திட்டத்தின் கீழ் மாதந்தோறும் ரூ.1,000 ஓய்வூதியம், இளம் விதவை வயது வரம்பை தளர்த்தி மாத ஊதியம், முதியோர் உதவித்தொகை, இலவச மருத்துவ காப்பீடு திட்டம், ரேஷன் கார்டு இல்லாதவர்களுக்கு சிறப்பு முன்னுரிமை அளித்து ரேஷன் கார்டு வழங்கும் திட்டம், பசுமை வீடுகள் திட்டத்தின் கீழ் இலவச வீடு போன்ற நலத்திட்ட உதவிகள் வழங்கப்படுகிறது. நீலகிரியில் எய்ட்ஸ் பாதித்த 444 பேருக்கு அரசின் நலத்திட்ட உதவிகள் வழங்கப்பட்டு வருகிறது என்றார்.

முன்னதாக பிளஸ்-2, எஸ்.எஸ்.எல்.சி. பொதுத்தேர்வில் அதிக மதிப்பெண்கள் பெற்ற 2 மாணவ-மாணவிகளுக்கு மாவட்ட ஆட்சியரின் விருப்புரிமை நிதியில் இருந்து தலா ரூ.10 ஆயிரத்துக்கான காசோலை, 7 பேருக்கு மாதந்தோறும் தலா ரூ.1000 உதவித்தொகை பெறுவதற்கான ஆணை, ஆவின் பாலகம் அமைக்க 4 பேருக்கு ஆணை, 2 பேருக்கு மருத்துவ காப்பீட்டு அட்டைகள், 2 பேருக்கு இலவச பஸ் பாஸ் உள்பட 20 பயனாளிகளுக்கு நலத்திட்ட உதவிகள் வழங்கப்பட்டது. நிகழ்ச்சியில் போலீஸ் சூப்பிரண்டு சசிமோகன், சப்-கலெக்டர் மோனிகா, சுகாதார பணிகள் துணை இயக்குனர் பாலுசாமி, மாவட்ட எய்ட்ஸ் கட்டுப்பாட்டு மற்றும் தடுப்பு அலகு திட்ட மேலாளர் (பொறுப்பு) அறிவழகன் மற்றும் அரசுத்துறை அலுவலர்கள் கலந்துகொண்டனர்.

ஊட்டி:

நீலகிரியில் உள்ள மேற்கு தொடர்ச்சி மலையில் குறிஞ்சி செடிகள் பரவலாக காணப்படுகிறது. இந்த செடிகளில் பூத்துக்குலுங்கும் நீல நிற மலர்களால் நீலகிரி என்ற பெயர் வந்தது. குறிஞ்சி செடிகளில் பல வகைகள் உள்ளன. அதில் சில மலர்கள் 3 மாதங்களுக்கு ஒருமுறை, ஆண்டுக்கு ஒருமுறை, 7 ஆண்டுகளுக்கு ஒருமுறை மற்றும் 12 ஆண்டுகளுக்கு ஒருமுறை பூக்கும். கடந்த 2 ஆண்டுகளுக்கு முன்பு கல்லட்டியில் குறிஞ்சி மலர்கள் பூத்துக்குலுங்கின. அப்போது சுற்றுலா பயணிகளை கவருவதற்காக குறிஞ்சி விழா நடத்தப்பட்டது. சமீபத்தில் தேசிய, மாநில நெடுஞ்சாலை ஓரங்களில் குறிஞ்சி மலர்கள் பூத்துக்குலுங்கியதை காண முடிந்தது.

இந்த நிலையில் தோட்டக்கலைத்துறை கட்டுப்பாட்டில் ஊட்டியில் செயல்பட்டு வரும் மரவியல் பூங்காவில் தற்போது குறிஞ்சி மலர்கள் பூத்துக்குலுங்கி சுற்றுலா பயணிகளை கவர்ந்து வருகிறது.

பூங்கா நுழைவுவாயில் பகுதியில் குறிஞ்சி செடிகளில் நீல நிறங்களில் மலர்கள் காணப்படுகிறது. இது ‘ஸட்ரோபிலாந்தஸ் குந்தியான்ஸ்’ என்ற வகையை சேர்ந்தது ஆகும். அவை கோவில் மணிகளின் உருவம் போல காட்சி அளிக்கிறது. பூத்துக்குலுங்கும் குறிஞ்சி மலர்களை தேனீக்கள் மொய்க்க தொடங்கி உள்ளன. குறிஞ்சி மலர்கள் பூக்க தொடங்கினாலும், ஊட்டி மரவியல் பூங்காவுக்கு சுற்றுலா பயணிகள் வருகை மிகவும் குறைந்த எண்ணிக்கையில் உள்ளது.

எனினும் பூங்காவுக்கு வந்து செல்லும் சில சுற்றுலா பயணிகள் மற்றும் நடைபயிற்சிக்கு வரும் உள்ளூர் மக்கள் குறிஞ்சி மலர்களை புகைப்படம் எடுத்து செல்கின்றனர்.