விருதுநகர்

வத்திராயிருப்பு:

மேற்கு தொடர்ச்சி மலைப்பகுதியில் சதுரகிரியில் சுந்தரமகாலிங்கம் கோவில் அமைந்துள்ளது. கடந்த சில நாட்களாக மலைப்பகுதியில் பெய்து வரும் தொடர் மழையின் காரணமாக சதுரகிரி சுந்தர மகாலிங்கம் கோவிலுக்கு செல்லும் மலைப்பாதையில் உள்ள வழுக்குப் பாறை, சங்கிலிப்பாறை, மாங்கனி ஓடை, எலும்பு ஓடை, கருப்பசாமி கோவில் ஓடை உள்ளிட்ட ஓடைகளில் நீர்வரத்து அதிகரித்து உள்ளது.

சதுரகிரி மலைப்பகுதியில் பெய்யும் மழை அந்த ஓடைகளின் வழியாக வந்து லிங்கம் கோவில் ஓடை, கலங்கரை அம்மச்சாரம்மன் கோவில் ஓடை, கல்லணை ஆறு வழியாக சென்று மகாராஜபுரம், மாத்தூர் பகுதியில் உள்ள கண்மாய்களுக்கு செல்கிறது.

இதனால் இப்பகுதியில் உள்ள விவசாயிகளுக்கு பாசனத்திற்கு தேவையான தண்ணீர் கிடைக்கும் என விவசாயிகள் கூறினர்.

தொடர் மழையின் காரணமாக கண்மாய்களுக்கு தொடர்ச்சியாக நீர் வரத்து வந்து கொண்டிருப்பதால் நிலத்தடி நீர் மட்டம் அதிகரிப்பதுடன், விவசாய பணிகளுக்கும் மிகவும் உதவியாக இருக்கும் என பொதுமக்கள் கூறினர்.

அருப்புக்கோட்டை:

அருப்புக்கோட்டை அருகே உள்ள பெரியபுளியம்பட்டி, சின்னபுளியம்பட்டியில் ஆயிரக்கணக்கான ஏக்கரில் சோளம், கம்பு, சூரியகாந்தி, பருத்தி உள்ளிட்ட பயிர்கள் பயிரிடப்படுகின்றன.

இங்குள்ள மானாவாரி விளைநிலங்களில் ஆடிப்பட்டத்தில் விதைவிதைத்து ஐப்பசி, கார்த்திகை மாதத்தில் அறுவடை செய்வது வழக்கம். இந்தநிலையில் அருப்புக்கோட்டை மற்றும் அதன் சுற்றுவட்டார பகுதிகளில் கடந்த சிலநாட்களாக கனமழை பெய்தது.

இதனால் பெரியபுளியம்பட்டி மற்றும் சின்னபுளியம்பட்டி பகுதியில் 3 ஆயிரம் ஏக்கர் அளவில் பயிரிடப்பட்ட மக்காச்சோளம், நெட்டைசோளம், குட்டைசோளம், கம்பு உள்ளிட்ட பயிர்கள் முழுவதும் மழைநீரில் மூழ்கி அழுகத்தொடங்கியுள்ளன.

விவசாய நிலங்களுக்கு செல்லமுடியாத அளவு மழைநீர் விளைநிலங்களில் தேங்கி நிற்கிறது. தொடர் கனமழையால் விவசாய நிலங்களுக்கு செல்லும் பாதையும் முழங்கால் அளவு சேறும் சகதியுமாக காணப்படுகிறது.

ஏக்கருக்கு ரூ.20 ஆயிரம் முதல் ரூ.40 ஆயிரம் வரை செலவு செய்து சாகுபடி செய்துள்ளோம். இந்த பயிர்கள் தற்போது அறுவடை காலத்தில் மழைநீரில் மூழ்கி இருப்பது வேதனை அளிக்கிறது என விவசாயிகள் கவலையுடன் கூறினர்.

உரம், பூச்சிக்கொல்லி என அனைத்து விலைகளும் உயர்ந்துள்ளதால் அரசு தங்களுக்கு உரிய இழப்பீடு வழங்க நடவடிக்கை எடுக்க வேண்டும் விவசாயிகள் கோரிக்கை விடுத்துள்ளனர்.

விருதுநகர்:

மனித வாழ்வில் தீப்பெட்டி என்பது இன்றியமையாததாக உள்ளது. ஆனால் நவீன காலத்திற்கு ஏற்ப தற்போது எத்தனையோ மாற்றங்கள் வந்தாலும் தீப்பெட்டியின் பயன்பாடு தொடர்ந்து அதிகரித்த வண்ணம் உள்ளது.

தமிழகத்தில் குட்டி ஜப்பான் என்றழைக்கப்படும் சிவகாசியில் சிறிய அளவில் எண்ணற்ற தீப்பெட்டி ஆலைகள் செயல்பட்டு வருகின்றன. இங்கிருந்து தயாரிக்கப்படும் தீப்பெட்டிகள் நாடு முழுவதும் விற்பனைக்கு கொண்டு செல்லப்படுகிறது.

பல ஆண்டுகளாக ஒரு ரூபாய்க்கு தீப்பெட்டி விற்கப்பட்டு வந்தது. மூலப்பொருட்களான தீப்பெட்டி குச்சிகள், மருந்துகள், அட்டை போன்றவற்றின் விலை தற்போது அதிகரித்துள்ளது. மேலும் தொழிலாளர்களின் சம்பளமும் அதிகரித்து உள்ளது.

இதனையெல்லாம் கருத்தில் கொண்டு கடந்த சில மாதங்களுக்கு முன்பு சிவகாசியில் தீப்பெட்டி உற்பத்தியாளர் சங்கம் சார்பில் நடந்த ஆலோசனை கூட்டத்தில் ஒரு ரூபாய்க்கு விற்கப்படும் தீப்பெட்டியை 2 ரூபாய்க்கு விலை ஏற்றம் செய்து விற்க தீர்மானிக்கப்பட்டது. அதன்படி டிசம்பர் 1ம் தேதியான இன்று முதல் தீப்பெட்டி 2 ரூபாய் விலை உயர்த்தப்பட்டு உள்ளது.

மேற்கு தொடர்ச்சி மலையில் சதுரகிரி சுந்தரமகாலிங்க சுவாமி கோவில் அமைந்துள்ளது. வழக்கமாக அமாவாசை, பிரதோஷம், பவுர்ணமி ஆகிய நாட்களில் மட்டும் சாமி தரிசனம் செய்ய பக்தர்களுக்கு அனுமதி வழங்கப்படும்.

இ்ந்தநிலையில் வத்திராயிருப்பு மற்றும் சதுரகிரி, சாப்டூர் மலைப்பகுதிகளில் தொடர்ந்து கனமழை பெய்து வருகிறது. இதனால் நாளை (வியாழக்கிழமை) பிரதோஷம் மற்றும் அமாவாசையை முன்னிட்டு வருகிற 5-ந் தேதி வரை பக்தர்களுக்கு அனுமதி கிடையாது என கோவில் நிர்வாகத்தின் சார்பாகவும், வனத்துறையினர் சார்பாகவும் தெரிவிக்கப்பட்டுள்ளது.

விருதுநகர்:

சிவகாசி அருகே உள்ள என்.ஆர்.டி. நகரைச் சேர்ந்தவர் ஜேசுதாஸ். இவரது மகன் மைக்கேல் அஜய் (வயது 9) 5-ம் வகுப்பு படித்து வந்த இவன் கடந்த 26-ந் தேதி திடீரென மாயமானான்.

பல இடங்களில் தேடியும் அவனை பற்றிய தகவல் கிடைக்கவில்லை. இது குறித்து சிவகாசி டவுண் போலீசில் ஜேசுதாஸ் புகார் செய்தார். அதன் பேரில் போலீசார் விசாரணை நடத்தி வந்தனர்.

இந்த நிலையில் அந்தப்பகுதியில் உள்ள ஒரு குட்டையில் மைக்கேல் அஜய் உடல் மிதப்பதாக தகவல் கிடைத்தது. போலீ சார் அங்கு சென்று உடலை மீட்டு பிரேத பரிசோதனைக்கு அனுப்பி வைத்தனர்.

மைக்கேல் அஜய் குட்டையில் குளித்தபோது மூழ்கி இறந்திருக்கலாம் என முதலில் கருதப்பட்டது. ஆனால் போலீசார் அந்தப்பகுதியில் உள்ள சி.சி.டி.வி. கேமரா பதிவுகளை ஆய்வு செய்தபோது 13 வயது சிறுவன், மைக்கேல் அஜய்யை அழைத்துச் செல்வது தெரியவந்தது.

இதனைத் தொடர்ந்து அந்த சிறுவனை அழைத்து போலீசார் விசாரித்தனர். இதில் அவன் தான் மைக்கேல் அஜய்யை கொலை செய்தது தெரியவந்தது. அதன் பேரில் போலீசார் சிறுவனை கைது செய்து சிறுவர் சீர்திருத்தப் பள்ளியில் அடைத்தனர்.

கொலை தொடர்பாக போலீசார் நடத்திய விசாரணையில், மைக்கேல் அஜய்யுடன் 13 வயது சிறுவனுக்கு அடிக்கடி தகராறு ஏற்பட்டுள்ளது. இதனை ஜேசுதாஸ் தட்டிக்கேட்டுள்ளார். இதில் ஆத்திரமடைந்த 13 வயது சிறுவன் நீச்சல் கற்றுத்தருவதாக கூறி மைக்கேல் அஜய்யை குட்டைக்கு அழைத்துச் சென்று நீரில் மூழ்கடித்துள்ளான் என தெரிய வந்துள்ளது.

விருதுநகர்:

விருதுநகர் மாவட்டம், அருப்புக்கோட்டையில் குற்ற சம்பவங்களை தடுக்கும் வகையில் மாவட்ட போலீஸ் சூப்பிரண்டு மனோகர் உத்தரவின்படி, துணை சூப்பிரண்டு சகாயஜோஸ் மேற்பார்வையில் தாலுகா போலீஸ் இன்ஸ்பெக்டர் பார்த்திபன் தலைமையில், சப்-இன்ஸ்பெக்டர் ஜோதிமுத்து, போலீஸ்காரர்கள் செல்வக்குமார், பரமசிவம், சிவக்குமார், சுதாகர் ஆகியோர் கொண்ட தனிப்படையும், காரியாபட்டி சப்-இன்ஸ்பெக்டர் அசோக்குமார் தலைமையில் போலீசார்கள் சிவபாலன், கார்த்திக் ஆகியோர் கொண்ட தனிப்படையும் தீவிர ரோந்து பணியில் ஈடுபட்டு வந்தனர்.

இந்த நிலையில் காந்திநகர் அருகே சந்தேகத்திற்கு இடமாக நின்ற காரை சோதனை செய்தபோது அதில் 6 பேர் இருந்தனர். அவர்களிடம் விசாரித்தபோது முன்னுக்கு பின் முரணாக பேசினர். இதனைத் தொடர்ந்து 6 பேரையும் காருடன் போலீஸ் நிலையம் கொண்டு வந்து தீவிர விசாரணை நடத்தப்பட்டது.

இதில் அவர்கள் கடந்த மாதம் 26-ந் தேதி அருப்புக்கோட்டை அருகே கஞ்சநாயக்கன்பட்டி லட்சுமி நகரில் ஓய்வு பெற்ற வட்டார வளர்ச்சி அலுவலர் கணேசனை கட்டிப்போட்டு நகை, பணம் கொள்ளையடித்தவர்கள் என தெரியவந்தது.

இதன் அடிப்படையில் 6 பேரையும் போலீசார் கைது செய்தனர். அவர்களது பெயர் கஞ்சநாயக்கன்பட்டி கோபிகண்ணன் (வயது 30), ராஜபாளையம் சம்பத் குமார் (51), திருமங்கலம் மகேஸ்வர்மா (27), அஜய்சரவணன் (29), மதுரையைச் சேர்ந்த அலெக்ஸ்குமார் (36), மூர்த்தி (34) என தெரியவந்தது. அவர்கள் வைத்திருந்த கார் தான் கொள்ளைக்கு பயன்படுத்தப்பட்டது தெரியவந்தது.

இதனைத் தொடர்ந்து காரை பறிமுதல் செய்த போலீசார் அதில் இருந்த ரூ.88 ஆயிரம், 2 பவுன் தங்க நகை, கத்தி ஆகியவற்றை கைப்பற்றினர்.

கொள்ளை சம்பவத்தில் ஈடுபட்ட இவர்களுக்கு அருப்புக்கோட்டை டவுன் போலீஸ் ஏட்டு இளங்குமரன் உடந்தையாக இருந்துள்ளது தெரியவந்தது.

அவர் கஞ்சநாயக்கன்பட்டி லட்சுமி நகரில் வசித்து வருகிறார். இவரது வீட்டின் அருகே தான் கணேசன் வசித்து வருகிறார். அவரது மனைவி இறந்து விட்டதால் கணேசன் தனியாக வசிப்பதை அறிந்த இளங்குமரன், தனது சகோதரர் சம்பத்குமாரிடம் தெரிவித்து கும்பலாக வந்தால் நகை, பணம் கொள்ளையடிக்கலாம் என திட்டம் வகுத்து கொடுத்துள்ளார்.

அதன் பேரில் தான் கொள்ளை சம்பவத்தில் ஈடுபட்டதாக கைதான சம்பத்குமார் உள்பட 6 பேரும் போலீசாரிடம் தெரிவித்தனர். அதன் அடிப்படையில் போலீசார் ஏட்டு இளங்குமரனை தேடி வருகின்றனர்.

கைதான அலெக்ஸ் குமார், மூர்த்தி ஆகியோர் மீது கொலை வழக்கு உள்ளது என்பது குறிப்பிடத்தது.