வேலூர்

ஜோலார்பேட்டை:

ஜோலார்பேட்டை அடுத்த காவேரிப்பட்டை சேர்ந்தவர் உதயகுமார். இவர் கடந்த மாதம் ஆன்-லைனில் பொருள் வாங்கியுள்ளார்.

அதன் பின்னர் உதயகுமார் போனுக்கு ஒரு தகவல் வந்துள்ளது. அதில் உங்களுக்கு ரூ.10 லட்சம் மதிப்பிலான கார் பரிசாக விழுந்துள்ளது. அதற்கு ரூ.3 லட்சம் கட்டினால் போதும் என தெரிவித்தித்தனர். முன் பணமாக ரூ.1 லட்சம் தரவேண்டும் எனவும். காருக்கு உண்டான ஆர்.சி.புக், இன்சூரன்ஸ் உள்ளிட்ட ஆவணங்களை உதயகுமாரின் வாட்ஸ் அப்பில் பதிவிட்டனர்.

இதனால் உதயகுமார் அவர்கள் அனுப்பிய வங்கி கணக்கில் ரூ.1 லட்சம் செலுத்தி உள்ளார். அதன்பின் சர்வீஸ் சார்ஜ் ரூ.25 ஆயிரம் அனுப்ப கூறினர்.

அதையும் அனுப்பி உள்ளார். இந்த நிலையில் கடந்த 2 வாரங்களாக கார் வராததால் அவர்கள் தகவல் அனுப்பிய செல்போனில் தொடர்பு கொண்ட போது போன் ஸ்விட்ச் ஆக் செய்யப்பட்டுள்ளது தெரியவந்தது.

இதுகுறித்து உதயகுமார் ஜோலார்பேட்டை போலீசில் புகார் செய்தார். போலீசார் வழக்கு பதிவு செய்து விசாரணை நடத்தி வருகின்றனர்.

வேலூர்:

வேலூர் அடுத்த அரியூரில் இருந்து அப்துல்லாபுரம் செல்லும் சாலையோரம் வடக்கு மேடு கிராமத்தின் அருகே சுமார் 40 வயது மதிக்கத்தக்க பெண் இறந்து கிடந்தார்.

இதனைக் கண்ட அப்பகுதி பொதுமக்கள் அரியூர் போலீஸ் நிலையத்திற்கு தகவல் தெரிவித்தனர். இன்ஸ்பெக்டர் நந்தகுமார் மற்றும் போலீசார் சம்பவ இடத்துக்கு சென்று பார்வையிட்டனர். இறந்த பெண் பச்சை மற்றும் நீலம் கலந்த புடவை அணிந்திருந்தார். அவர் யார் எந்த ஊரைச் சேர்ந்தவர் என்பது தெரியவில்லை.

அவரது உடலில் ரத்த காயங்கள் எதுவும் இல்லை. போலீசார் பெண்ணின் பிணத்தை கைப்பற்றி அடுக்கம்பாறை அரசு ஆஸ்பத்திரிக்கு அனுப்பி வைத்தனர்.

பெண்ணை  மர்ம நபர்கள் கொலை செய்து சாலையோரம் வீசி சென்றிருக்கலாம் என்ற சந்தேகம் எழுந்துள்ளது.

இறந்த பெண் யார் என்பது கண்டுபிடித்தால் உண்மை நிலவரம் தெரியவரும் என போலீசார் தெரிவித்தனர்.

அந்த பகுதியில் பெண் யாராவது மாயமாகி உள்ளார்களா வேலூர் மற்றும் அரியூர் பகுதியில் உள்ள லாட்ஜிகளில் தங்கியிருந்த பெண்கள் யாராவது மாயமானார்களா என்பது குறித்து போலீசார் விசாரணை நடத்தி வருகின்றனர். இந்த சம்பவம் அந்த பகுதியில் பரபரப்பை ஏற்படுத்தியது.

குடியாத்தம்:

குடியாத்தம் வனச்சரக பகுதியில் உள்ள விவசாய நிலங்களில் கடந்த சில நாட்களாக காட்டு யானைகள் புகுந்து அட்டகாசம் செய்து வருகின்றன. வனத்துறையினர் யானைகளை தொடர்ந்து காட்டுக்குள் விரட்டி கண்காணித்து வருகின்றனர்.

இந்த நிலையில் குடியாத்தம் அடுத்த மோர்தானா அருகே உள்ள ஜங்காலபள்ளி கிராமத்தை ஒட்டி உள்ள விவசாய நிலத்திற்குள் நேற்று இரவு 8 மணிக்கு ஒற்றை காட்டு யானை புகுந்தது. அங்கிருந்த நெற்பயிரில் புகுந்து அங்கும் இங்குமாக ஓடியது.மேலும் வாழை மரங்களை சாய்த்தது.விவசாய நிலத்தில் போடப்பட்டிருந்த போர்வெல்களை பிடுங்கி வீசி எறிந்தது.

இதனைக் கண்ட பொதுமக்கள் அதனை விரட்ட முயன்றனர். மேலும் இதுகுறித்து வனத்துறை அதிகாரிகளுக்கு தகவல் தெரிவித்தனர்.

குடியாத்தம் வனச்சரகர் மகேந்திரன் வனவர் பிரகாஷ் மற்றும் வனக்காவலர்கள் சம்பவ இடத்திற்கு வந்து பட்டாசு வெடித்து காட்டு யானையை விரட்டியடித்தனர். சுமார் 4 மணிநேர போராட்டத்திற்கு பிறகு யானை காட்டுக்குள் சென்றது.

காட்டு யானை புகுந்த பகுதி ஜங்காலபள்ளி கிராமத்தின் மிக அருகில் உள்ளது. இதனால் பொதுமக்கள் பீதி அடைந்துள்ளனர்.

ஒற்றை காட்டு யானையை அடர்ந்த காட்டுப்பகுதியில் விரட்டியடிக்க வேண்டும்.யானை சேதப்படுத்திய பயிர்களுக்கு இழப்பீடு வழங்க வேண்டும் என பொதுமக்கள் வலியுறுத்தி உள்ளனர். 

ஆம்பூர்:

திருப்பத்தூர் மாவட்டம் ஆலங்காயம் அடுத்த பூங்குளம்புதூரை சேர்ந்தவர் உமாபதி. இவருடைய மகள் நந்தினி (வயது 22). குடியாத்தம் சாமரிஷி குப்பம் கிராமத்தை சேர்ந்த கோதண்டன் மகன் ராமதாஸ் (வயது29). ஓசூரில் உள்ள வெல்டிங் பட்டறையில் வேலை பார்த்து வந்தார்.

ராமதாஸ்  நந்தினி இருவரும் காதலித்து வந்தனர். இதற்கு பெற்றோர்கள் எதிர்ப்பு தெரிவித்ததாக கூறப்படுகிறது.

இதனால் காதல் ஜோடி நேற்று இரவு வீட்டை விட்டு வெளியேறினர். அவர்கள் ஆம்பூர் பச்சகுப்பம் இடையே உள்ள தார்வழி ரெயில்வே தண்டவாள பகுதிக்கு சென்றனர்.

தண்டவாளத்தின் அருகே அமர்ந்து காதல் ஜோடி நீண்ட நேரம் பேசிக் கொண்டிருந்தனர்.அப்போது இருவரும் தற்கொலை செய்ய முடிவு செய்தனர்.

இதனையடுத்து சென்னையில் இருந்து பெங்களூர் செல்லும் தண்டவாளத்தில் தலையை வைத்து படுத்தபடி செல்போனில் செல்பி எடுத்தனர்.

அப்போது வேகமாக வந்த எக்ஸ்பிரஸ் ரெயில் அவர்கள் மீது மோதியது.இதில் உடல் துண்டாகி இருவரும் இறந்தனர்.

இன்று காலை காதல் ஜோடி தண்டவாளத்தில் பிணமாக கிடந்ததை கண்ட பொதுமக்கள்  இது குறித்து ஜோலார்பேட்டை ரெயில்வேபோலீசாருக்கு தகவல் தெரிவித்தனர். சம்பவ இடத்திற்கு ஜோலார்பேட்டை ரெயில்வே போலீசார் மற்றும் ஆம்பூர் டி.எஸ்.பி சச்சிதானந்தம் ஆகியோர் வந்தனர்.

சம்பவ இடத்தில் இருந்த செல்போனை மீட்டனர். அதில் காதல்ஜோடி செல்பி எடுத்த படம் பதிவாகி இருந்தது.

மேலும் இதுதொடர்பாக அவரது உறவினர்களுக்கும் தகவல் தெரிவிக்கப்பட்டது. சம்பவ இடத்திற்கு வந்த அவர்கள் இறந்தவர்களை அடையாளம் காட்டினர்.

இதனைத்தொடர்ந்து போலீசார் உடலை மீட்டு பிரேத பரிசோதனைக்கு அனுப்பி வைத்தனர்.

ரெயில்வே போலீசார் இதுதொடர்பாக வழக்குப்பதிவு செய்து காதல்ஜோடி சாவுக்கு காரணம் என்ன என்பது குறித்து விசாரணை நடத்தி வருகின்றனர்.இந்த சம்பவம் அந்த பகுதியில் பெரும் பரபரப்பை ஏற்படுத்தியது.