வேலூர்

வேலூர்:

வேலூர் சத்துவாச்சாரியில் கடந்த சில நாட்களாக 3 சிறுவர்கள் சிலர் திருட்டு சம்பவங்களில் ஈடுபட்டு வருகின்றனர்.

கடந்த 2 மாதங்களுக்கு முன்பு சத்துவாச்சாரி கானாறு தெரு, பள்ளிக்கூட தெரு பகுதியில் 2 வீடுகளில் சிறுவர்கள் புகுந்து திருட்டில் ஈடுபட்டனர். பொது மக்கள் அவர்களை விரட்டிச் சென்றபோது தப்பிவிட்டனர்.

சத்துவாச்சாரி வ.உ.சி. நகரில் உள்ள ஒரு வீட்டில் சிறுவர்கள் புகுந்து ரூ.5 ஆயிரம் பணத்தை திருடி சென்று விட்டனர்.

இதேபோல் சத்துவாச்சாரி கலெக்டர் அலுவலகம் எதிரே ஆஞ்சநேயர் கோவில் பின்புறம் உள்ள ஒரு வீட்டில் புகுந்து அங்கிருந்த வெள்ளி சாமான்கள், பூஜை பொருட்களை திருடினர். சத்தம் கேட்டு வீட்டில் இருந்தவர்கள் கண்விழித்தனர். அவர்கள் வீட்டில் சிறுவர்கள் திருடிச் செல்வதை கண்டு கூச்சலிட்டனர். இதனால் பயந்துபோன சிறுவர்கள் வெள்ளி பொருட்களை அங்கேயே போட்டு விட்டு தப்பி ஓடி விட்டனர்.

இந்த நிலையில் சத்துவாச்சாரி சக்திநகர் 1-வது தெருவில் ஒரு குடும்பத்தினர் வீட்டை பூட்டிவிட்டு சிகிச்சைக்காக ஆஸ்பத்திரிக்கு சென்றிருந்தனர். கடந்த ஒருவாரமாக வீடு பூட்டி கிடந்தது. இதனை பயன்படுத்திக் கொண்டு திருட்டு கும்பல் வீட்டின் பூட்டை உடைத்து உள்ளே புகுந்தனர்.

பீரோவில் வைத்திருந்த 12 பவுன் நகை, மற்றும் பணத்தை கொள்ளையடித்து சென்றுள்ளனர். இதுகுறித்து அவர்கள் சத்துவாச்சாரி போலீஸ் நிலையத்தில் புகார் செய்தனர். போலீசார் அங்கு வந்து கொள்ளையர்களின் தடயங்களை சேகரித்து விசாரித்து வருகின்றனர்.

சத்துவாச்சாரி பகுதியில் தொடர்ந்து திருட்டு நடப்பதால் பொதுமக்கள் பீதியடைந்துள்ளனர். போலீசார் ரோந்து பணியை தீவிரப்படுத்த வேண்டும் என்று பொதுமக்கள் வலியுறுத்தியுள்ளனர்.

ஏற்கனவே சத்துவாச்சாரியில் பல்வேறு இடங்களில் கைவரிசை காட்டியுள்ள 3 சிறுவர்கள் தான் இங்கும் கைவரிசை காட்டியிருக்கலாம் என்று சந்தேகிக்கப்படுகிறது. இது தொடர்பாக போலீசார் விசாரணை நடத்தி 3 சிறுவர்களையும் கைது செய்து நடவடிக்கை எடுக்க வேண்டும்.

அந்த 3 சிறுவர்களுக்கும் 15 வயது முதல் 18 வயதுக்கு உள்ளாகவே இருக்கும் என்று கூறப்படுகிறது.

வேலூர்:

வேலூர் மாவட்டம் பள்ளிகொண்டா அடுத்த வெட்டுவானம், பஜனை கோவில் தெருவை சேர்ந்தவர் சதாசிவம் (வயது53). விவசாயி. இவருக்கு ஒரு மகள், 2 மகன்கள் உள்ளனர்.

சதாசிவத்திற்கு தேசிய நெடுஞ்சாலை அருகே ஏரிக் கரையை ஒட்டி விவசாய நிலம் உள்ளது. சதாசிவம் தினமும் விவசாய நிலத்திற்கு சென்று வருவது வழக்கம். இந்த நிலையில் இன்று காலை 6 மணி அளவில் சதாசிவம் சென்னை-பெங்களூர் தேசிய நெடுஞ்சாலையை கடக்க முயன்றார். இன்று அதிகாலை கடுமையான பனி மூட்டம் நிலவியதால் ஓசூரில் இருந்து சென்னை நோக்கி வேகமாக வந்த அரசு பஸ் சாலையை கடக்கும் சதாசிவத்தின் மீது எதிர்பாராத விதமாக மோதியது.

இதில் தூக்கி வீசப்பட்ட சதாசிவம் தலையில் படுகாயமடைந்து ரத்த வெள்ளத்தில் சம்பவ இடத்திலேயே துடிதுடித்து பரிதாபமாக இறந்தார்.

இதுகுறித்து தகவலறிந்த பள்ளிகொண்டா போலீஸ் இன்ஸ்பெக்டர் சுப்புலட்சுமி மற்றும் போலீசார் சம்பவ இடத்திற்கு வந்து சதாசிவம் உடலை மீட்டு பிரேத பரிசோதனைக்காக வேலூர் அடுக்கம்பாறை அரசு ஆஸ்பத்திரிக்கு அனுப்பி வைத்தனர். மேலும் போலீசார் வழக்குப்பதிவு செய்து விசாரணை நடத்தி வருகின்றனர்.

வேலூர்:

தமிழக - ஆந்திர மாநில எல்லை பகுதியான, வேலூர் மாவட்டம் காட்பாடி அடுத்த கிறிஸ்டியான்பேட்டையில் போலீஸ், வணிகவரி மற்றும் வட்டார போக்குவரத்து மற்றும் வனத்துறைகளின் சோதனைச்சாவடி தனித்தனியாக இயங்கி வருகிறது.

சேலம் மாவட்டம் தலைவாசல் பகுதியைச் சேர்ந்தவர் விஜய். இவர், சொந்தமாக நெல்அறுவடை இயந்திரம் வைத்துள்ளார். விஜய் உட்பட 5 பேர், ஆந்திர மாநிலத்தில் நெல்அறுவடை செய்வதற்காக, சேலத்தில் இருந்து வேலூர் மாவட்டம் காட்பாடி வழியாக ஆந்திராவுக்கு நெல் அறுவடை எந்திரங்களை நேற்று முன்தினம் ஓட்டிச் சென்றனர்.

காட்பாடி கிறிஸ்டியான் பேட்டை சோதனை சாவடிக்கு அவர்கள் வந்தனர். அப்போது, அங்கு பணியிலிருந்த வட்டார போக்குவரத்து அலுவலர்கள், இவர்களின் வாகனங்களை மடக்கியுள்ளனர். தொடர்ந்து, ஒரு வாகனத்துக்கு தலா 500 ரூபாய் வீதம் 5 வாகனங்களுக்கும் லஞ்சம் வாங்கிய பிறகே, அவர்களை தொடர்ந்து செல்ல அதிகாரிகள் அனுமதித்ததாக தெரிகிறது.

இதனால், விஜய் உட்பட 5 பேரும், இப்படி வரும் வழியெல்லாம் சோதனை என்ற பெயரில் வசூலிக்கிறார்களே என புலம்பியபடியே வாகனத்தை ஓட்டிச்சென்றனர்.

ஆந்திர எல்லையை நெருங்குவதற்கு சிறிது தூரத்துக்கு முன்னரே, அவர்களின் வாகனங்களை காட்பாடி போலீஸ் சோதனை சாவடியில் பணியிலிருந்த சிறப்பு சப் இன்ஸ்பெக்டர் பிரகாஷ், பைக்கில்ல் வேகமாகச் சென்று மடக்கினார்.

இதைக்கண்ட விஜய் உட்பட 5 பேரும் நெல்அறுவடை எந்திரவாக னங்களை நிறுத்திவிட்டு, வேகமாக கீழே இறங்கி, பதட்டத்துடனேயே அவர் அருகில் வந்தனர். தொடர்ந்து, அவர்களிடம் சிறப்பு சப்-இன்ஸ்பெக்டர் பிரகாஷ் மாமூல் தரும்படி கேட்டுள்ளார். 5 வாகனங்களுக்கும் 300 ரூபாய் வாங்கியபடியே, அவர்களிடம் டேய், என்கிட்ட பேசாதே... ஆர்டிஓக்கு வண்டிக்கு 500 ரூபாய் கொடுக்கிறீர்கள், அதெல்லாம் தெரியவில்லை எனக்கூறி புறப்பட்டுச் சென்றுள்ளார்.

நெல்அறுவடை எந்திரம் ஓட்டி வந்தவர்களிடம் சிறப்பு சப்-இன்ஸ்பெக்டர் பிரகாஷ் லஞ்சம் வாங்கிய வீடியோ காட்சி, சமூக வலைத்தளங்களில் நேற்று வைரலாக பரவியது. அது மட்டுமின்றி, போலீஸ் துறை வட்டாரத்திலும் பரபரப்பை ஏற்படுத்தியது.

இதுகுறித்து தகவலறிந்த வேலூர் போலீஸ் சூப்பிரண்டு செல்வகுமார், லஞ்சம் வாங்கிய சிறப்பு சப்-இன்ஸ்பெக்டர் பிரகாஷை அதிரடியாக சஸ்பெண்டு செய்து உத்தரவிட்டார்.

இந்த நிலையில் நெல் எந்திரங்கள் கொண்டு வந்தவர்களிடம் ஆர்.டி.ஓ. சோதனைச்சாவடியில் லஞ்சம் பெறும் மற்றொரு வீடியோ வெளியாகி உள்ளது. இதனால் பரபரப்பு ஏற்பட்டது. 

வேலூர்:

வேலூர் மாவட்டத்தில் சைபர் கிரைம் தொடர்பான குற்றங்கள் நிகழாமல் தடுப்பது குறித்து பொதுமக்களுக்கு விழிப்புணர்வு ஏற்படுத்துவது தொடர்பாக வங்கி மேலாளர்களுக்கான ஆலோசனை கூட்டம் போலீஸ் சூப்பிரண்டு அலுவலகத்தில் நடந்தது.

நிகழ்ச்சியில் மாவட்ட சைபர் கிரைம் கூடுதல் எஸ்.பி. சுந்தரமூர்த்தி முன்னிலை வகித்தார்.

இன்ஸ்பெக்டர் அபர்ணா வரவேற்றார். எஸ்.பி. செல்வகுமார் தலைமை வகித்து பேசியதாவது:-

சைபர் கிரைம் குற்றங்களை தடுக்க வாடிக்கையாளர் விவரங்களை யாரிடமும் தெரிவிக்க கூடாது. ஏ.டி.எம். மையங்களில் பணம் எடுக்கச் செல்லும்போது வாடிக்கையாளர்கள் ஹெல்மெட் அணிந்தோ, முகத்தில் துணி கட்டியோ செல்லக்கூடாது.

வாடிக்கையாளர் முன்பின் தெரியாத நபரிடம் பணம் எடுக்க ஏ.டி.எம். கார்டு ரகசிய நம்பரை தரக்கூடாது. ஆன்லைன் மூலமாக நடக்கும் மோசடி குறித்து பொதுமக்களிடம் விழிப்புணர்வு ஏற்படுத்த வேண்டும்.

மேலும் சைபர் கிரைம் தொடர்பான வழக்கு விசாரணைக்கு உரிய ஒத்துழைப்புகளை வங்கி மேலாளர்கள் அளிக்க வேண்டும்‌. அதேபோல் ஏ.டி.எம். மையங்களில் பாதுகாப்பு உறுதிப்படுத்தியும் ஏ.டி.எம். மெஷினில் ஆடியோ மூலம் பொதுமக்களுக்கு விழிப்புணர்வு ஏற்படுத்த வேண்டும்.

இவ்வாறு எஸ்.பி. ஆலோசனை வழங்கினார்.

குடியாத்தம்:

குடியாத்தம் நகராட்சிக்கு சொந்தமான இடங்களில் உள்ள கடைகளில் வாடகை பாக்கி ஒரு கோடியே 50 லட்சத்திற்கும் மேலாக உள்ளதாக கூறப்படுகிறது.

இந்த வாடகை பாக்கியை வசூலிக்க நகராட்சி அதிகாரிகள் தீவிர முயற்சி செய்து வருகின்றனர். இருப்பினும் நகராட்சி கடைகளில் வாடகைக்கு உள்ளவர்கள் சிலர் பல மாதங்களாக வாடகை செலுத்தாமல் உள்ளதாக கூறப்படுகிறது.

நீண்ட நாட்களாக வாடகை செலுத்தாத கடைகளுக்கு சீல் வைக்குமாறு வேலூர் மண்டல நகராட்சிகளின் நிர்வாக இயக்குனர் பி.குபேந்திரன் உத்தரவிட்டார்.

அவரது உத்தரவின்பேரில் குடியாத்தம் நகராட்சி ஆணையாளர் பொறுப்பு சிசில் தாமஸ் மேற்பார்வையில் குடியாத்தம் நகராட்சி ஆணையாளர் மேலாளர் டி.கே. சுகந்தி, வருவாய் ஆய்வாளர் சந்திரமோகன், நகரமைப்பு ஆய்வாளர் வெங்கடேசன், உதவியாளர் யுவராஜ் உள்ளிட்டோர் கொண்ட நகராட்சி அதிகாரிகள் குடியாத்தம் நகராட்சிக்குட்பட்ட அண்ணா தெரு, அர்ஜுன முதலி தெரு, பழைய பஸ் நிலையம் உள்ளிட்ட பகுதிகளில் வாடகை பாக்கி வைத்திருந்த 12 கடைகளுக்கு சீல் வைத்தனர்.

நகராட்சி அதிகாரிகள் வாடகை பாக்கி வைத்திருக்கும் கடைகளுக்கு சீல் வைக்க வரும் தகவல் அறிந்ததும் சில கடைக்காரர்கள் தங்களின் வாடகை பாக்கியை நகராட்சி அலுவலகத்தில் செலுத்தியுள்ளனர்.