சிவகங்கை

சிவகங்கை:

சிவகங்கை மாவட்ட செய்தி மக்கள் தொடர்புத்துறை மற்றும் கதர் கிராம தொழில்கள் வாரியம் சார்பில் காந்தி பிறந்த நாள் விழா மற்றும் தீபாவளி சிறப்பு விற்பனை தொடக்க விழா சிவகங்கையில் மாவட்ட கலெக்டர் ஜெயகாந்தன் தலைமையில் நடைபெற்றது. மானாமதுரை தொகுதி எம்.எல்.ஏ. நாகராஜன் முன்னிலை வகித்தார். செய்தி மக்கள் தொடர்பு அலுவலர் பாண்டி வரவேற்று பேசினார்.

விழாவில் மகாத்மா காந்தியின் திருவுருவப்படத்தை கலெக்டர் திறந்து வைத்து சிறப்பு விற்பனையை தொடங்கி வைத்து கூறியதாவது:- சிவகங்கை மாவட்டத்திற்கு இந்த ஆண்டு தீபாவளி பண்டிகையையொட்டி ரூ.85 லட்சத்திற்கு கதர் விற்பனை செய்ய இலக்கு நிர்ணயிக்கப்பட்டு உள்ளது. மேலும் அனைத்து கதர் பாலியஸ்டர் மற்றும் பட்டு ரகங்களுக்கு 30 சதவீதம் தள்ளுபடி வழங்கப்படுகிறது.

கதர் ஆடை வாங்கி அணிவதனால் பல அடித்தட்டு மக்களின் அன்றாட வாழ்க்கை நடைபெறுகிறது. தமிழக அரசு கதர் கிராம தொழில் வாரியம் மூலமாக பல லட்சக்கணக்கான ஏழை எளிய நெசவாளர்களுக்கு தொடர்ந்து வேலை வாய்ப்பளிக்கிறது. எனவே கதர் ஆடைகளை வாங்கி ஏழை நெசவாளர்களுக்கு உதவ வேண்டும்.

இவ்வாறு அவர் கூறினார்.

விழாவில் சிவகங்கை ஊராட்சி ஒன்றியகுழு தலைவர் மஞ்சுளா பாலச்சந்தர், தியாகி சண்முக காந்தி, ஆர்.டி.ஓ. முத்துக்கழுவன், உதவி மக்கள் தொடர்பு அலுவலர் வெற்றிவேந்தன், ஊராட்சி ஒன்றிய துணைத்தலைவர் கேசவன், கூட்டுறவு வங்கி இயக்குனர் ஜெயபிரகாஷ் உள்பட பலர் கலந்து கொண்டனர்.

சிவகங்கை:

சிவகங்கை மாவட்டத்தில் உள்ள போலீசாருக்கு போலீஸ் நிலையங்களில் பதிவு செய்யப்படும் வழக்குகளை கையாள்வது குறித்த பயிற்சி 5 நாட்கள் சிவகங்கையில் உள்ள மாவட்ட போலீஸ் சூப்பிரண்டு அலுவலகத்தில் நடைபெறுகிறது. இந்த பயிற்சியை மாவட்ட போலீஸ் சூப்பிரண்டு ரோஹித்நாதன் தொடங்கி வைத்தார். அப்போது அவர் கூறியதாவது:-

சிவகங்கை மாவட்டத்தில் உள்ள ஒவ்வொரு போலீஸ் நிலையத்திலும் பணிபுரியும் 2 தலைமை காவலர்கள், 2 முதல் நிலை காவலர் மற்றும் இரண்டு காவலர்களுக்கு இந்த பயிற்சி கொடுக்கப்படுகிறது.

இந்த பயிற்சியின் போது கோப்புகளை எப்படி எழுதுவது மற்றும் சாட்சிகள், தடயங்களை எவ்வாறு கையாள்வது என்பது பற்றி பயிற்சி அளிக்கப்படுகிறது. இதனால் போலீஸ் நிலையங்களில் வழக்குகள் தேக்கம் இன்றி நீதிமன்ற விசாரணைக்கு செல்வதற்கு உதவியாக இருக்கும்.

இதில் பயிற்சி பெற்ற காவலர்கள், வழக்கு கோப்புகளை திறம்பட கையாண்டு குற்றம் சாட்டப்பட்டவர்களுக்கு தண்டனை பெற்று தர இது மிகவும் பயனுள்ளதாக இருக்கும்.

இவ்வாறு அவர் கூறினார்.

சிங்கம்புணரி:

ஆண்டுதோறும் வரும் தீபாவளி பண்டிகையின் போது பட்டாசு சத்தம் காதை கிழிக்கும் வகையிலும், அன்றைய தினம் புத்தாடை அணிந்து, வீடுகளில் விருந்து உபசாரம் நடைபெற்றும், தலை தீபாவளி பண்டிகையை கொண்டாடும் புதுமண தம்பதிகளுக்கு விஷேச கவனிப்பும் நடைபெறுவது வழக்கம். இந்த ஆண்டு தீபாவளி பண்டிகை வருகிற நவம்பர் மாதம் 14-ந்தேதி கொண்டாடப்படுகிறது.

இந்தநிலையில் ஒரு பக்கம் கொரோனா தொற்று மக்களை தாக்கி வரும் வேளையில் இந்த ஆண்டு தீபாவளி பண்டிகையை கொண்டாடலாமா அல்லது புறக்கணிக்கலாமா என்று மக்கள் நினைத்து வரும் வேளையில் கடந்த 66 ஆண்டுகளாக சிங்கம்புணரி அருகே உள்ள 12 கிராமங்களைச் சேர்ந்த 1500-க்கும் மேற்பட்ட குடும்பங்கள் தீபாவளி பண்டிகையை கொண்டாடாமல் தவிர்த்து வருகின்றனர்.

இந்த பருவ மழை காலத்தின் போது தமிழகம் முழுவதும் விவசாய பணிகள் மும்முரமாக நடைபெறுவது வழக்கம். இந்த நேரத்தில் தான் இந்த தீபாவளி பண்டிகை வருவதும் வழக்கமாக இருந்து வருகிறது. இந்தநிலையில் தீபாவளி பண்டிகையை இந்த கிராம மக்கள் தவிர்த்து இன்று வரை கடைபிடித்து வருகின்றனர். இதுகுறித்து இந்த கிராமத்தைச் சேர்ந்த பெரிய அம்பலக்காரர் சபா ராசராசன் என்பவர் கூறியதாவது:-

கடந்த 1953-ம் ஆண்டு கடுமையான வறட்சி ஏற்பட்டது. இங்குள்ள எஸ்.மாம்பட்டி மற்றும் அதனைச் சுற்றியுள்ள கிராமங்களில் விவசாய பணி முடங்கியது.

ஆனாலும் இந்த கிராமங்களில் வாழ்ந்த மக்கள் தங்களது விவசாய பணியை துறக்க முடியாமல் இருந்த நிலையில் அப்போது இங்கு வசித்த பணம் படைத்தவர்களிடம் விவசாயத்திற்கு தேவையான பொருட்களை கடனாகப் பெற்று விவசாயத்தை மேற்கொண்டனர். அந்த காலகட்டத்தில் தீபாவளி பண்டிகை வந்தது. ஏற்கனவே கடும் வறட்சி காரணமாக விவசாயம் பாதிக்கப்பட்ட நிலையிலும், மற்றொரு புறம் கடன் வாங்கி விவசாயத்தை மேற்கொண்ட வகையில் அப்போது வசித்த கிராம மக்களுக்கு கையில் பணம் இல்லாமல் இருந்தனர்.

இதுகுறித்து அப்போது இந்த கிராமத்தில் வசித்த பெரிய அம்பலக்காரரான பெரி சேவுகன் என்பவரது தலைமையில் கிராம மக்கள் ஊர் கூட்டம் கூடி தற்போது மிகவும் கஷ்டமான காலத்தில் இருப்பதால் தீபாவளி பண்டிகையை கொண்டாடாமல் தவிர்த்து இனி வரும் காலங்களிலும் நமது சந்ததியினரை இந்த தீபாவளி பண்டிகையை கொண்டாட அனுமதிக்கக்கூடாது என முடிவு செய்தனர். இதற்கு பதிலாக விவசாயம் அறுவடை காலமாக தை பொங்கல் தினத்தை தொடர்ந்து 3 நாட்கள் கோலாகலமாக கொண்டாடுவது என முடிவு செய்தனர்.

அப்போது அந்த கிராம மக்கள் எடுத்த முடிவை சுமார் 66 வருடங்களுக்கு பின்னர் இன்று வரை இந்த 12 கிராமத்தைச் சேர்ந்த கிராம மக்கள் கடைபிடித்து வருகிறோம். இதுதவிர இந்த கிராமங்களில் இருந்து பெண் கொடுத்தாலோ அல்லது மற்ற ஊர்களில் இருந்து பெண் எடுத்தாலோ அவர்கள் கூட இன்று வரை தலை தீபாவளியை கொண்டாடாமல் தவிர்த்து வருகின்றனர். தற்போதைய தலைமுறையினரும் இதை கடைபிடித்து வருகின்றனர்.

இவ்வாறு அவர் கூறினார்.