நீலகிரி

நீலகிரி:

நீலகிரி மாவட்டம் தேவாலா, பந்தலூர் பகுதியில் மீண்டும் கனமழை பெய்ததால் புளியம்பாறையில் கோழிக்கொல்லி கிராமத்திற்கு செல்லும் தரைப்பாலம் அடித்துச் செல்லப்பட்டது. தரைப்பாலம் அடித்துச்செல்லப்பட்டதால் 300க்கும் மேற்பட்ட வீடுகளுக்கான போக்குவரத்து துண்டிக்கப்பட்டுள்ளது.

தேவாலா பகுதியில் சாலையில் மரம் விழுந்ததுடன் மண் சரிவும் ஏற்பட்டதால் போக்குவரத்து முற்றிலும் பாதிக்கப்பட்டுள்ளது.

ஊட்டி:

நீலகிரி மாவட்டத்தில் தென்மேற்கு பருவமழை கடந்த வாரம் தீவிரமடைந்து பெய்தது. இதனால் ஊட்டி-கூடலூர் சாலை உள்பட பல்வேறு இடங்களில் மரங்கள் முறிந்து விழுந்தன. மின்கம்பங்கள் சேதம் அடைந்ததால், மின்வினியோகம் பாதிக்கப்பட்டது. இதற்கிடையே தொடர் மழையால் சாலையோரத்தில் உள்ள மண் எப்போதும் ஈரப்பதமாக காணப்படுகிறது.

இந்த நிலையில் நேற்று முன்தினம் நள்ளிரவில் ஊட்டியில் சூறாவளி காற்று வீசியது. இதற்கு தாக்குப்பிடிக்க முடியாமல் ஊட்டி அரசு தலைமை ஆஸ்பத்திரி வளாகத்தில் இருந்த ராட்சத மரம் ஒன்று வேரோடு சாய்ந்து சாலையின் குறுக்கே விழுந்தது. இந்த ராட்சத மரம் பெரியதாக இருந்ததால் அருகே இருந்த கேரட் தோட்டத்தில் மரக்கிளைகளும் விழுந்து கிடந்தன. நள்ளிரவில் விழுந்த மரம் அருகே உள்ள அவசர சிகிச்சைப் பிரிவு மற்றும் தனியார் காட்டேஜ் மீது விழவில்லை. இதனால் உயிர் சேதம் தவிர்க்கப்பட்டது. மேலும் ஊட்டி மருத்துவமனை சாலையில் போக்குவரத்து பாதிக்கப்பட்டது.

இதுகுறித்து தகவல் அறிந்த மாவட்ட தீயணைப்பு அலுவலர் இம்மானுவேல் தலைமையில் தீயணைப்பு வீரர்கள், தேசிய பேரிடர் மீட்பு படையினர் விரைந்து வந்து ராட்சத மரத்தை வெட்டி அகற்றும் பணியில் ஈடுபட்டனர். மரக்கிளைகள் மின்வாள் மூலம் வெட்டி அப்புறப்படுத்தப்பட்டது. ஆனால் அதன் அடிப்பகுதி பெரிய அளவில் இருந்ததால் மின்வாள் மூலம் வெட்டுவதில் சிரமம் ஏற்பட்டது.

தொடர்ந்து கிரேன் வரவழைக்கப்பட்டு அதன் கொக்கியில் தீயணைப்பு வீரர் ஒருவர் அந்தரத்தில் தொங்கியபடி மின் வாள் மூலம் மரத்தை வெட்டினார். சரிவான பகுதியில் உடலில் கயிறு கட்டி பின்னால் வீரர்கள் பிடித்துக்கொண்டனர். பின்னர் படிப்படியாக மரம் துண்டு, துண்டாக வெட்டி அகற்றப்பட்டது. அதனால் மதியத்திற்குப் பின்னர் வாகனங்கள் செல்ல அனுமதிக்கப்பட்டன. ஊட்டி அரசு ஆஸ்பத்திரி சாலையில் ராட்சத மரம் விழுந்ததால் நோயாளிகள் அச்சம் அடைந்தனர். தொடர்ந்து முன்னெச்சரிக்கை நடவடிக்கையாக வளாகத்தில் உள்ள அபாயகரமான 8 மரங்களை வெட்டி அகற்ற நடவடிக்கை எடுக்கப்பட்டு வருகிறது.

நீலகிரி மாவட்டத்தில் நேற்று காலை 8 மணியுடன் 24 மணி நேரத்தில் முடிவடைந்த மழையளவு (மில்லி மீட்டரில்) விவரம் வருமாறு:- ஊட்டி-3.1, நடுவட்டம்-17, அவலாஞ்சி-35, அப்பர்பவானி-25, பர்லியார்-35, எடப்பள்ளி-62, கூடலூர்-13, தேவாலா-121, பந்தலூர்-72, சேரங்கோடு-58 உள்பட மொத்தம் 526.6 பதிவாகி உள்ளது. இதன் சராசரி 18.1 ஆகும். அதிகபட்சமாக தேவாலாவில் 12 சென்டி மீட்டர் மழை கொட்டி இருக்கிறது. மழை குறைந்ததால் மின்கம்பங்களை சீரமைக்கும் பணி தீவிரமாக நடந்து வருகிறது.

ஊட்டி:

நீலகிரி மாவட்டத்தில் நேற்று முன்தினம் வரை 948 பேருக்கு கொரோனா தொற்று ஏற்பட்டு இருந்தது. இந்த நிலையில் நேற்று மேலும் 10 பேருக்கு கொரோனா தொற்று உறுதி செய்யப்பட்டு உள்ளது. ஓரநள்ளி கிராமத்தில் நடந்த திருமணத்தில் கலந்து கொண்டவர்களுடன் மூன்றாம் நிலை தொடர்பில் இருந்த தேனாடு கிராமத்தை சேர்ந்த 2 ஆண்கள், 2 சிறுவர்கள், 3 பெண்கள், ஏற்கனவே தொற்று உறுதி செய்யப்பட்டவர்களுடன் தொடர்பில் இருந்த ஊட்டி செவிலியர் குடியிருப்பை சேர்ந்த ஒரு பெண், காந்தல் கீழ் போகி தெருவை சேர்ந்த ஒரு ஆண், கோவை சென்று திரும்பியவருடன் தொடர்பில் இருந்த ஊட்டி பிள்ளையார் கோவில் தெருவை சேர்ந்த ஒரு பெண், ஜெகதளா அருகே காரைக்கொரையை சேர்ந்த ஒரு பெண் ஆகியோருக்கு தொற்று உறுதியானது.

நீலகிரியில் கொரோனா பாதிப்பு 958 ஆக உயர்ந்து உள்ளது. இதில் 803 பேர் பூரண குணமடைந்து வீடு திரும்பி உள்ளனர். 3 பேர் இறந்து விட்டனர். 152 பேர் மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர். இந்த தகவலை கலெக்டர் இன்னசென்ட் திவ்யா தெரிவித்து உள்ளார்.

ஊட்டி:

நீலகிரி மாவட்டத்தில் கடந்த 3-ந் தேதி முதல் தென்மேற்கு பருவமழை தீவிரமடைந்து உள்ளது. நீர்பிடிப்பு பகுதிகள் மட்டுமன்றி மக்கள் வசிக்கும் பகுதிகளிலும் அதிக மழைப்பொழிவு பதிவாகி வருகிறது. இதனால் மரங்கள் விழுந்து போக்குவரத்து பாதிக்கப்பட்டு வருகின்றது. மின் கம்பங்கள், மின் ஒயர்கள் சேதமடைந்துள்ளதால் மின் வினியோகம் தடைபட்டு உள்ளது. இந்த நிலையில் கடந்த 2 நாட்களாக ஊட்டியில் பரவலாக மழை பெய்து வருகிறது. காற்றின் வேகம் குறைந்து காணப்படுகிறது. இருப்பினும் தொடர் மழை பெய்ததால் சாலையோரத்தில் உள்ள மண் எப்போதும் ஈரப்பதமாக காணப்படுகிறது.

இதற்கிடையே நேற்று ஊட்டியில் இருந்து குருத்துக்குளி கிராமத்துக்கு செல்லும் சாலையில் ராட்சத மரம் முறிந்து விழுந்தது. இதுகுறித்து தகவல் அறிந்த தீயணைப்பு வீரர்கள் சம்பவ இடத்துக்கு சென்று மின் வாள் மூலம் மரத்தை துண்டு, துண்டாக வெட்டி அப்புறப்படுத்தினர். எமரால்டு அருகே பேலிதளா பகுதியில் இருந்து வினோபாஜி நகருக்கு செல்லும் சாலையில் சுமார் 2 கிலோ மீட்டர் தூரத்துக்கு அடுத்தடுத்து 50-க்கும் மேற்பட்ட மரங்கள் முறிந்து விழுந்து கிடந்தன. இதனால் அப்பகுதியில் வசித்த 6 குடும்பத்தினர் வீட்டை விட்டு வெளியே வர முடியாமல் தவித்தனர். தகவல் அறிந்த மாவட்ட தீயணைப்பு அலுவலர் இம்மானுவேல் அறிவுரையின் பேரில், தீயணைப்பு வீரர்கள் சம்பவ இடத்துக்கு சென்று மரங்களை வெட்டி அப்புறப்படுத்தும் பணியில் ஈடுபட்டனர்.

ராட்சத மரங்கள் விழுந்ததால் அகற்றுவதில் காலதாமதம் ஏற்பட்டது. தொடர்ந்து தீயணைப்பு வீரர்கள் ஒரு நாள் முழுவதும் போராடி அப்புறப்படுத்தினர். மேலும் 6 குடும்பத்தினர் பாதுகாப்பாக மீட்கப்பட்டு எமரால்டு நிவாரண முகாமில் தங்க வைக்கப்பட்டனர். ஊட்டி- கூடலூர் தேசிய நெடுஞ்சாலை தவளைமலை பகுதியில் கனமழை காரணமாக பாறைகள் சாலையில் உருண்டு விழுந்தன. மேலும் மரங்கள் முறிந்து விழுந்தது. இதனால் போக்குவரத்து நிறுத்தப்பட்டது. தொடர்ந்து நேற்றும் பாறைகளை உடைத்து அகற்றும் பணி நடந்தது. 3 பொக்லைன் எந்திரங்கள், உதவியோடு பாறைகள் அப்புறப்படுத்தப்பட்டன. நேற்று முன்தினம் மாலையில் ஒருவழிப்பாதையாக வாகனங்கள் சென்றன.

நேற்று முழுமையாக பாறைகள் மரங்கள் அப்புறப்படுத்தப்பட்டதை அடுத்து இரு வழிப்பாதையாக வாகனங்கள் செல்ல நடவடிக்கை எடுக்கப்பட்டு வருகிறது. கொட்டும் மழையை பொருட்படுத்தாமல் மீட்புப்பணிகள் நடந்து வந்தது. ஊட்டி அருகே கல்லட்டி நீர்வீழ்ச்சியில் கடந்த 2 மாதங்களாக நீர்வரத்து குறைந்து காணப்பட்டது. தற்போது பெய்த தொடர் கனமழையால் வனப்பகுதிகளில் தண்ணீர் உற்பத்தியாவதால் நீர்வரத்து அதிகரித்து உள்ளது. இதனால் கல்லட்டி நீர்வீழ்ச்சியில் வெள்ளியை உருக்கியது போல் தண்ணீர் ஆர்ப்பரித்து கொட்டுகிறது.

நீலகிரி மாவட்டத்தில் நேற்று காலை 8 மணியுடன் 24 மணி நேரத்தில் முடிவடைந்த மழையளவு (மில்லி மீட்டரில்) விவரம் வருமாறு:- ஊட்டி-8, நடுவட்டம்-82, அவலாஞ்சி-108, எமரால்டு -16, அப்பர்பவானி-65, எடப்பள்ளி-25, கூடலூர்-79, தேவாலா -341, அப்பர் கூடலூர்-62, ஓவேலி-51, செருமுள்ளி-53, பாடாந்தொரை-51, பந்தலூர்-188, சேரங்கோடு 181 உள்பட மொத்தம் 1398 மழை பதிவாகி உள்ளது. இதன் சராசரி 48.21 ஆகும். அதிகபட்சமாக தேவாலாவில் ஒரே நாளில் 34 சென்டி மீட்டர் மழை பதிவாகி இருக்கிறது.

அவலாஞ்சியில் மழைப்பொழிவு குறைந்து உள்ளது.

குன்னூர் மற்றும் சுற்றுவட்டார பகுதியில் கடந்த சில தினங்களாக மழை பெய்து வருகிறது. நேற்று மதியம் பெய்ய தொடங்கிய மழை தொடர்ந்து பெய்து கொண்டு இருந்தது. இந்த நிலையில் குன்னூர்-டால்பின் நோஸ் சாலையில் கரன்சி மற்றும் டால்பின்நோஸ் இடையே சாலையில் தடுப்பு சுவர் கட்டும் பணி நடைபெற்று வந்தது. மழையின் காரணமாக சாலையின் மேற்புறம் இருந்த பாறைகளுடன் தடுப்பு சுவர் இடிந்து விழுந்தது. இதனால் சாலை ஒருபுறம் சேதம் அடைந்தது, இதனால் அந்த சாலை வழியாக போக்குவரத்து துண்டிக்கப்பட்டது.

இதுகுறித்து தகவல் அறிந்த நெடுஞ்சாலை துறையினர் சம்பவ இடத்திற்கு சென்று ஆய்வு மேற்கொண்டனர். தடுப்பு சுவர் கட்டும் பணியில் நேற்று 10 தொழிலாளர்கள் ஈடுபட்டு இருந்தனர். மழையின் காரணமாக ஒதுங்கி நின்றதால் அதிர்ஷ்டவசமாக உயிர்தப்பித்தனர்.

கூடலூர்:

கூடலூர் அருகே லோயர்கேம்பில் முல்லைப்பெரியாறு நீர்மின் உற்பத்தி நிலையம் உள்ளது. இங்கு முல்லைப்பெரியாறு அணையில் இருந்து திறந்து விடப்படும் தண்ணீர் மூலம் மின்சாரம் உற்பத்தி செய்யப்பட்டு வருகிறது. அங்கு மின் உற்பத்திக்காக 4 ஜெனரேட்டர்கள் அமைக்கப்பட்டுள்ளன. ஒவ்வொரு ஜெனரேட்டர்கள் மூலமும் 42 மெகாவாட் மின்சாரம் உற்பத்தி செய்ய முடியும். ஒரு ஜெனரேட்டருக்கு வினாடிக்கு 450 கன அடி வீதம் தண்ணீர் திறந்துவிட வேண்டும்.

கடந்த 4-ந்தேதி முல்லைப்பெரியாறு அணையில் இருந்து வினாடிக்கு 600 கன அடி வீதம் தண்ணீர் திறந்துவிடப்பட்டது. இதையொட்டி 2 ஜெனரேட்டர்கள் மூலம் 54 மெகாவாட் மின்சாரம் உற்பத்தி தொடங்கியது. இந்தநிலையில் நீர்ப்பிடிப்பு பகுதிகளில் பெய்து வரும் தொடர் மழையால் அணைக்கு நீர்வரத்து அதிகரித்தது. தற்போது அணையின் நீர்மட்டம் 132 அடியை எட்டியது. இதனால் முல்லைப்பெரியாறு அணையில் இருந்து கூடுதல் தண்ணீர் திறக்கப்படுகிறது. இதனால் லோயர்கேம்ப் மின் நிலையத்தில் உள்ள 4 ஜெனரேட்டர்கள் இயக்கப்பட்டு, 168 மெகாவாட் மின்சாரம் உற்பத்தி செய்யப்படுகிறது.

கூடலூர்:

தேனி, திண்டுக்கல், மதுரை உள்பட 5 மாவட்ட மக்களின் ஜீவாதாரமாக முல்லைப்பெரியாறு அணை விளங்குகிறது. இந்த அணையை நம்பி கம்பம் பள்ளத்தாக்கு பகுதியில் மட்டும் 17 ஆயிரம் ஏக்கர் பரப்பில் விவசாய நிலத்தில் இருபோக பயிர் சாகுபடி செய்யப்படுகிறது.


இந்தநிலையில் நேற்று முன்தினம் நீர்ப்பிடிப்பு பகுதிகளில் கனமழை கொட்டித்தீர்த்தது. இதனால் அணைக்கு நீர்வரத்து வினாடிக்கு 17 ஆயிரத்து 740 கன அடியாக அதிகரித்தது. இதனால் அணையின் நீர்மட்டம் கிடுகிடுவென உயர்ந்தது. நேற்று முன்தினம் காலை நிலவரப்படி 125 அடியாக இருந்த அணையின் நீர்மட்டம், நேற்று 130 அடியாக உயர்ந்தது. அதாவது ஒரேநாளில் 5 அடி உயர்ந்தது குறிப்பிடத்தக்கது.

இந்நிலையில் கேரளாவில் பெய்துவரும் கனமழை காரணமாக இன்று முல்லைப்பெரியாறு அணையின் நீர்மட்டம் 132 அடியை தாண்டியது. அணை நீர்மட்டம் 133.00 அடியாகவும், நீர் இருப்பு 5,586 மில்லியன் கனஅடியாகவும் உள்ளது.

முல்லைப்பெரியாறு அணைக்கு நீர்வரத்து 11,533 கனஅடியாக உள்ளது. அணையிலிருந்து 1,671 கனஅடி நீர் வெளியேற்றப்படுகிறது.

நீர்ப்பிடிப்பு பகுதிகளில் தொடர்ந்து மழை பெய்து வருவதால் அணையில் நீர்மட்டம் மேலும் அதிகரிக்க வாய்ப்பு உள்ளது. இதனால் விவசாயிகள் மகிழ்ச்சி அடைந்துள்ளனர்.

கோத்தகிரி:

கோத்தகிரி தினசரி சந்தையில் காய்கறி, பழம், மீன், இறைச்சி கடைகள் என்று 100-க்கும் மேற்பட்ட கடைகள் உள்ளன. கொரோனா பரவலை கட்டுப்படுத்த சந்தை மூடப்பட்டது. இதனால் கடந்த 2 மாதங்களாக சந்தையில் உள்ள கடைகள் காந்தி மைதானத்தில் திறந்த வெளியில் மாற்றப்பட்டது.

இங்கு போதிய பாதுகாப்பு இல்லாததாலும், மழை பெய்யும்போது கடைகளுக்குள் வெள்ளம் புகுந்து விடுவதாலும் விவசாயிகள் அவதியடைந்து வருகிறார்கள். எனவே இந்த கடைகளை மீண்டும் தினசரி சந்தை செயல்பட்ட பகுதிக்கு மாற்ற வேண்டும் என்று சாந்திராமு எம்.எல்.ஏ.விடம் கோரிக்கை விடுத்தனர்.

இது தொடர்பாக எம்.எல்.ஏ. ஆய்வு செய்து, அதிகாரிகளிடம் தெரிவித்தார். இதையடுத்து சந்தையை திறக்க அதிகாரிகள் அனுமதி அளித்தனர். இதையடுத்து பூட்டி வைக்கப்பட்டு இருந்த கடைகளை வியாபாரிகள் திறந்து சுத்தம் செய்யும் பணியில் ஈடுபட்டனர். மேலும் இந்த சந்தையில் உள்ள கடைகளை இரு பிரிவாக பிரித்து பாதி கடைகளை ஒருநாளும், மீதமுள்ள கடையை மற்றொரு நாளிலும் திறக்க முடிவு செய்யப்பட்டு உள்ளது.

இதற்காக கோத்தகிரி பேரூராட்சி செயல் அதிகாரி மணிகண்டன் உத்தரவின்பேரில் சுகாதார ஆய்வாளர் ரஞ்சித் தலைமையில் அலுவலர்கள் சந்தைக்கு சென்றனர். பின்னர் அவர்கள் அங்குள்ள கடைகளை ஆய்வு செய்து குறியீடு செய்தனர். இது குறித்து அதிகாரிகள் கூறும் போது கோத்தகிரி பேரூராட்சிக்கு உட்பட்ட இந்த சந்தையில் உள்ள கடைகள் ஏ மற்றும் பி என்று இரு பிரிவாக பிரிக்கப்பட்டு உள்ளது. அதன்படி ஏ என்று குறியீடு போடப்பட்ட கடைகள் அனைத்தும் ஒரு நாளிலும், பி என்று குறியீடு போட்ட கடைகள் மற்றொரு நாளிலும் திறக்கப்படும் என்றனர்.

அதுபோன்று திறந்தவெளி மைதானத்தில் செயல்பட்டு வந்த மீன், கோழி, ஆட்டு இறைச்சி கடைகள் செயல்பட்ட இடத்தில் மழை வெள்ளம் புகுந்ததால் அந்த கடைகளை, மேடான இடத்தில் அமைக்க பேரூராட்சி அனுமதி அளித்தது. இதையடுத்து மழையில் பாதிக்காதவாறு வியாபாரிகள் தங்கள் கடைகளை மாற்றி அமைக்கும் பணியில் ஈடுபட்டு வருகிறார்கள்.