கடலூர்

பெண்ணாடம்:

கடலூர் மாவட்டம் பெண்ணாடம் அருகே உள்ளது வெண்கரும்பூர் கிராமம். இந்த கிராமத்தில் உள்ள பஸ் நிறுத்தம் அருகே திட்டக்குடி-விருத்தாசலம் சாலையில் திருமாவளவன் பிறந்தநாளை முன்னிட்டு விடுதலை சிறுத்தை கட்சியினர் வாழ்த்து பேனர் வைத்திருந்தனர்.அதன் அருகே கட்சி கொடிக்கம்பமும் நட்டு கொடி ஏற்றப்பட்டது.

இந்த நிலையில் நள்ளிரவில் அங்கு மர்ம மனிதர்கள் வந்தனர். அவர்கள் திடீரென விடுதலை சிறுத்தை பேனரை கிழித்து சேதப்படுத்தினர். பின்னர் அங்கிருந்து தப்பி ஓடிவிட்டனர்.

இன்று காலை இது பற்றிய தகவல் அறிந்த விடுதலை சிறுத்தை கட்சியினர் அதிர்ச்சியடைந்தனர். உடனே கட்சி நிர்வாகிகள் மற்றும் தொண்டர்கள் ஏராளமானோர் அங்கு திரண்டனர். பேனரை சேதப்படுத்தியவர்கள் மீது நடவடிக்கை எடுக்கக்கோரி கோ‌ஷங்கள் எழுப்பினர்.

இது குறித்து தகவல் அறிந்த பெண்ணாடம் போலீசார் சம்பவ இடத்துக்கு விரைந்து வந்து விடுதலை சிறுத்தை கட்சியினரிடம் பேச்சுவார்த்தை நடத்தினர்.

இதற்கிடையே அங்கு பா.ம.க. வினர் வந்தனர். அவர்கள் பா.ம.க. கொடி கம்பம் அருகே விடுதலை சிறுத்தை கட்சி கொடி கம்பம் வைத்ததை அகற்றி விட்டு அதை வேறு இடத்தில் நட வேண்டும் என கூறி சாலை மறியலில் ஈடுபட்டனர். இதனால் 2 கட்சியினரிடம் போலீசார் சமரச பேச்சு வார்த்தை நடத்தினர்.

இந்த சம்பவத்தால் அந்த பகுதியில் பெரும் பரபரப்பும், பதட்டமும் ஏற்பட்டது.

இதையொட்டி வெண்கரும்பூர் கிராமத்தில் ஏதும் அசம்பாவித சம்பவங்கள் நடைபெறாமல் தடுக்க அங்கு ஏராளமான போலீசார் குவிக்கப்பட்டுள்ளனர்.

கடலூர்:

கடலூர் திருப்பாதிரிப் புலியூர் ஜெகதாம்பாள் நகரை சேர்ந்தவர் ஜெகதாம்பாள் (வயது 75). இவர் இன்று காலை அதே பகுதியில் நடந்து சென்று கொண்டிருந்தார்.

அப்போது பின்னால் வந்த மர்ம மனிதன் ஜெகதாம்பாள் கழுத்தில் அணிந்திருந்த நகையை பறித்தான்.

அப்போது அந்த நகையை ஜெகதாம்பாள் பிடித்தார். இதனால் பாதி நகையை மட்டும் அறுத்து கொண்டு, மோட்டார் சைக்கிளில் வந்த மற்றொரு நபருடன் ஏறிக்கொண்டு கண் இமைக்கும் நேரத்தில் அந்த மர்ம மனிதர்கள் அங்கிருந்து தப்பி சென்று விட்டனர்.

இதேபோல் கடலூர் வண்டிப்பாளையத்தை சேர்ந்த அகிலபிரியா (33), கடலூர் கப்பியம்பேட்டை சேர்ந்த சங்கீதா (25), கடலூர் திருப்பாதிரிப்புலியூர் வெள்ளிமோட்டான் தெரு சேர்ந்த ஜோதி (19) ஆகிய 3 பேரும் தனித்தனியாக அந்தந்த பகுதியில் உள்ள சாலையில் நடந்து செல்லும் போது மர்ம ஆசாமிகள் மோட்டார் சைக்கிள் வந்து நகையை பறித்தனர்.

ஆனால் இந்த நகை பறிப்பில் வண்டிபாளையத்தை சேர்ந்த அகில பிரியா நகையை மட்டும் பறித்து சென்றனர். இதில் சங்கீதா மற்றும் ஜோதி ஆகியோர் நகையை பிடித்து கொண்டதால் அவர்களிடம் இருந்து நகையை பறிக்க முடியவில்லை.

இந்த நகை பறிப்பு சம்பவத்தில் மூதாட்டி ஜெகதாம்பாள் மற்றும் அகில பிரியா ஆகியோரிடம் இருந்து சுமார் 5 பவுன் நகை பறிக்கப்பட்டது தெரியவந்தது. இதன் மதிப்பு ரூ.1 லட்சம் ஆகும்.

இது குறித்து கடலூர் திருப்பாதிரிப்புலியூர் போலீசார் வழக்குப்பதிவு செய்து மர்ம மனிதர்களை வலைவீசி தேடி வருகின்றனர்.

இதனை தொடர்ந்து மாவட்ட போலீஸ் சூப்பிரண்டு சரவணன் உத்தரவின் பேரில் மோட்டார் சைக்கிளில் வரும் நபர்களை போலீசார் தீவிரமாக கண்காணித்து வருகின்றனர்.

கடலூரில் இன்று பட்டப்பகலில் ஒரே நேரத்தில் தொடர்ந்து 4 பெண்களிடம் மர்ம மனிதர்கள் நகை பறிப்பு சம்பவத்தில் ஈடுபட்டதால் பெரும் பரபரப்பு ஏற்பட்டுள்ளது.

ஸ்ரீமுஷ்ணம்:

கர்நாடக மாநிலத்தில் பருவமழை தீவிரம் அடைந்துள்ளது. இதனால் அங்குள்ள கபினி மற்றும் கிருஷ்ணராஜசாகர் அணைகளில் இருந்து தமிழகத்துக்கு அதிகதண்ணீர் திறந்து விடப்பட்டுள்ளது. இதனால் மேட்டூர் அணைக்கு நீர்வரத்து அதிகரித்துள்ளது. இதைத் தொடர்ந்து அணையில் இருந்து 1½ லட்சம் கனஅடி தண்ணீர் திறந்து விடப்பட்டுள்ளது. இதனால் காவிரி ஆற்றில் வெள்ளம் கரைபுரண்டு ஓடுகிறது.

கொள்ளிடம் ஆற்றில் அதிகளவில் தண்ணீர் திறந்து விடப்பட்டுள்ளதால், தஞ்சாவூர் மாவட்டத்தில் கொள்ளிடம் ஆற்றின் குறுக்கே அமைந்துள்ள கீழணையை காவிரி நீர் வந்தடைந்தது. அங்கிருந்து வினாடிக்கு 85 ஆயிரம் கன அடி தண்ணீர் உபரிநீராக கொள்ளிடம் ஆற்றில் திறந்து விடப்பட்டுள்ளது. இந்த நீர் சிதம்பரம் அருகே வல்லம்படுகை கொள்ளிடம் ஆறு வழியாக கொடியம் பாளையத்தில் வங்க கடலில் கலக்கிறது.

இந்த நிலையில், கடலுக்குள் நீர் உள் வாங்காததால், வெள்ள நீர் எதிர்த்து பழைய கொள்ளிடம் ஆற்றில் உட்புகுந்துள்ளது. அந்த நீர் கரையோரம் உள்ள கீழகுண்டலபாடி, திட்டுக் காட்டூர், ஜெயங்கொண்டபட்டினம் உள்ளிட்ட 7 கிராமங்களை நேற்று முன்தினம் வெள்ளம் சூழ்ந்தது. இதனால் அந்த பகுதி மக்கள் தவித்து வருகிறார்கள்.

இன்று 3-வது நாளாக 7 கிராமங்களை வெள்ளம் சூழ்ந்துள்ளது. அங்கு இன்னும் தண்ணீர் வடிய வில்லை. இதனால் அப்பகுதி மக்கள் பெரும் அவதியடைந்து வருகிறார்கள். இதனால் பெராம்பட்டு, திட்டுகாட்டிற்கும், இடையே அமைக்கப்பட்டிருந்த தரைப்பாலம் மூழ்கியது. இதனால் அங்கு போக்கு வரத்து துண்டிக்கப்பட்டது. இதைத்தொடர்ந்து கிராம மக்கள் தங்களது அவசர தேவைக்காக படகு மூலம் திட்டுக்காட்டூருக்கு சென்று வருகிறார்கள். படகில் அதிகபேர் செல்வதால் ஆபத்து ஏற்படும் சூழ்நிலை ஏற்பட்டுள்ளது.

சிதம்பரத்தை அடுத்துள்ள வல்லம்படுகை அருகே எருக்கன்காட்டு படுகையில் ஊராட்சிஒன்றிய தொடக்கப்பள்ளி உள்ளது. இந்த பள்ளியை சுற்றி வெள்ளம் சூழ்ந்துள்ளது. இதன் காரணமாக இன்று பள்ளிக்கு விடுமுறை விடப்பட்டுள்ளது.

கொள்ளிட கரையோர கிராமங்களில் உள்ள படுகை பகுதியில் பயிர் செய்யப்பட்ட மரவள்ளி கிழங்கு, வாழை, நெல், கத்திரி, வெண்டை, மிளகாய் உள்ளிட்ட பயிர்களை தண்ணீர் சூழ்ந்துள்ளது. சுமார் 1000 ஏக்கர் பரப்பில் வெள்ளம் சூழ்ந்து காணப்படுகிறது. பயிர்கள் அனைத்தும் தண்ணீரில் மூழ்கியதால் விவசாயிகள் கவலையடைந்துள்ளனர்.

இதற்கிடையே கர்நாடகா அணையில் இருந்து 2 லட்சம் கன அடி தண்ணீர் திறந்துவிடப்பட்டுள்ளதால் மேட்டூர் அணையில் இருந்து 1.70 லட்சம் கனஅடி தண்ணீர் திறந்து விடப்பட்டுள்ளது. இதனைத்தொடர்ந்து கொள்ளிடம் ஆற்றில் வெள்ளப்பெருக்கு அதிகரிக்க வாய்ப்பு உள்ளது. இதனால் ஆற்றுப்பகுதிக்கு யாரும் செல்லக்கூடாது என்றும், பாதுகாப்பாக இருக்க வேண்டும் என்றும் பொதுப்பணித்துறை அதிகாரிகள் எச்சரிக்கை விடுத்துள்ளனர். இதனால் கொள்ளிட கரையோர மக்கள் அச்சத்தில் உள்ளனர்.

இந்த நிலையில் வெள்ளம் பாதித்த கிராமங்களை பாண்டியன் எம்.எல்.ஏ., சிதம்பரம் கோட்டாட்சியர் ராஜேந்திரன், தாசில்தார் அமுதா ஆகியோர் படகு மூலம் சென்று பார்வையிட்டனர். அப்போது அவர்கள் உங்களுக்கு தேவையான குடிநீர், உணவு வசதிகள் செய்து தருகிறோம் எதற்கும் கவலைப்படவேண்டாம். 24 மணி நேரமும் தீயணைப் புதுறையினர் மீட்பு பணி யில் ஈடுபட தயாராக இருப்பதாக கூறினர்.