கடலூர்

பெண்ணாடம்:

பெண்ணாடம் அருகே உள்ள பெலாந்துறை கிராமத்தை சேர்ந்தவர் கொளஞ்சி மகன் பாலகுமார் (வயது 21). கூலி தொழிலாளியான இவர் கிளிமங்கலம் கிராமத்தில் உள்ள ஒரு தனியார் செங்கல் சூளையில் வேலை பார்த்து வந்தார்.

பாலகுமார் நேற்று அதிகாலை அதேஊரில் உள்ள விவசாயி ஒருவருக்கு சொந்தமான விளை நிலத்தில் மர்மமான முறையில் பிணமாக கிடந்தார். இதைபார்த்து அதிர்ச்சியடைந்த அந்த வழியாக சென்றவர்கள் இதுபற்றி பாலகுமாரின் குடும்பத்தினருக்கு தகவல் தெரிவித்தனர்.

இதைகேட்டு பதறிய குடும்பத்தினர் மற்றும் உறவினர்கள் விரைந்து வந்து பாலகுமாரின் உடலை பார்வையிட்டு கதறி அழுததோடு, அவருடைய உடலை வீட்டுக்கு எடுத்துச் சென்றனர். அப்போது பாலகுமாரின் கால்களில் ரத்த காயங்கள் இருப்பதை பார்த்து அதிர்ச்சியடைந்த உறவினர்கள் இதுபற்றி கருவேப்பிலங்குறிச்சி போலீஸ் நிலையத்துக்கு தகவல் தெரிவித்தனர்.

அதன்பேரில் விருத்தாசலம் டி.எஸ்.பி. மோகன் தலைமையிலான போலீசார் விரைந்து வந்து பாலகுமாரின் உடலையும், அவர் பிணமாக கிடந்த இடத்தை பார்வையிட்டு, அக்கம் பக்கத்தினரிடம் விசாரணை நடத்தினர்.

விசாரணையில், பாலகுமார் நேற்று அதிகாலை அருகே உள்ள வயலுக்கு சென்று இயற்கை உபாதை கழித்து விட்டு கை, கால்களை கழுவுவதற்காக அதேபகுதியில் உள்ள விவசாயி ஒருவருக்கு சொந்தமான பம்பு செட்டுக்கு சென்றபோது, வனவிலங்குகளிடம் இருந்து பயிர்களை பாதுகாப்பதற்காக சட்டவிரோதமாக விளைநிலத்தில் அமைக்கப்பட்டிருந்த மின் வேலியில் சிக்கி உயிரிழந்தது தெரிந்தது. மேலும் விளைநிலத்தில் மின்வேலி அமைத்த நபர்கள் அதிகாலையிலேயே, அந்த மின்வேலியை அகற்றிச் சென்றிருப்பதும் முதற்கட்ட விசாரணையில் தெரியவந்தது.

இதையடுத்து பாலகுமாரின் உடல் பிரேத பரிசோதனைக்காக விருத்தாசலம் அரசு ஆஸ்பத்திரிக்கு அனுப்பி வைக்கப்பட்டது. மேலும் இந்த சம்பவம் குறித்த புகாரின்பேரில் போலீசார் வழக்குப்பதிவு செய்து வாலிபர் சாவுக்கு காரணமான மின்வேலியை அமைத்த நபர்கள் யார்? என விசாரணை நடத்தி வருகிறார்கள்.

இந்த சம்பவம் அப்பகுதியில் சோகத்தை ஏற்படுத்தியுள்ளது.

கடலூர்:

கடலூர் புதுநகர் போலீஸ் சப்-இன்ஸ்பெக்டர் மணிகண்டன் மற்றும் போலீசார் பாரதிசாலை பகுதியில் ரோந்துப் பணியில் ஈடுபட்டனர். அப்போது அங்குள்ள வாடகை பாத்திரக்கடை முன்பு வண்டிப்பாளையத்தை சேர்ந்த கணேசன் (வயது 78) என்பவர் தடை செய்யப்பட்ட லாட்டரி சீட்டுகளை விற்பனை செய்தார். இதையடுத்து அவரை போலீசார் கைது செய்தனர். அவரிடம் இருந்து தடை செய்யப்பட்ட லாட்டரி சீட்டுகள், ரூ.120 ஆகியவற்றை பறிமுதல் செய்தனர்.

இதேபோல் திருப்பாதிரிப்புலியூர் போலீஸ் சப்-இன்ஸ்பெக்டர் கதிரவன் மற்றும் போலீசார் வாய்க்கால் சந்து பகுதியில் ரோந்துப்பணியில் ஈடுபட்ட போது, அங்கு கண்ணகிநகரை சேர்ந்த ஜோதி (51) என்பவர் தடை செய்யப்பட்ட லாட்டரி சீட்டுகளை விற்பனை செய்தார். இதையடுத்து அவரை போலீசார் கைது செய்தனர்.

கடலூர்:

கொரோனா வைரஸ் 2-வது அலை பரவல் காரணமாக புதிய கட்டுப்பாடுகளை அரசு அமல்படுத்தியுள்ளது. அதாவது காய்கறி, மளிகை கடைகள், பால் விற்பனை நிலையங்கள், மருந்தகங்கள், டீக்கடைகளை மதியம் 12 மணி வரை மட்டுமே திறந்திருக்க வேண்டும் என்றும், ஓட்டல்களில் பார்சலுக்கு மட்டுமே அனுமதி அளித்தும் அரசு உத்தரவிட்டிருந்தது. மேலும் இதர அனைத்து வகை கடைகளையும் வருகிற 20-ந் தேதி வரை திறக்கக்கூடாது என்றும் உத்தரவிடப்பட்டிருந்தது. அதன்படி அத்தியாவசிய பொருட்கள் விற்பனை செய்யும் கடைகளை தவிர, பிற கடைகள் தடையை மீறி திறந்துள்ளதா என போலீசார், வருவாய்த்துறை அதிகாரிகள், நகராட்சி அதிகாரிகள் தீவிர சோதனை நடத்தி வருகின்றனர்.

அந்த வகையில் கடலூர் நகராட்சி வருவாய் அலுவலர் ரவிச்சந்திரன் தலைமையில் வருவாய் ஆய்வாளர்கள் பாஸ்கர், அசோகன், சக்திவேல் ஆகியோர் கடலூர் நகராட்சிக்குட்பட்ட பகுதியில் யாரேனும் அரசின் புதிய கட்டுப்பாடுகளை மீறி கடைகளை திறந்து வைத்துள்ளார்களா? என வீதி வீதியாக சென்று சோதனை மேற்கொண்டனர்.

அப்போது செம்மண்டலத்தில் உள்ள ஒரு செல்போன் கடை தடையை மீறி திறக்கப்பட்டிருந்தது. இதை பார்த்த அதிகாரிகள் அந்த கடையின் உரிமையாளரை எச்சரித்தனர். பின்னர் கடையில் இருந்து ஊழியர்களை வெளியே அனுப்பி விட்டு, கடையை பூட்டி சீல் வைத்தனர்.

இதேபோல் தடையை மீறி திறக்கப்பட்டிருந்த கோண்டூரில் உள்ள ஒரு கடைக்கும், கடலூர் அரசு ஆஸ்பத்திரி அருகில் இருந்த ஒரு கடைக்கும் அதிகாரிகள் சீல் வைத்தனர். மேலும் கொரோனா வழிகாட்டு நெறிமுறைகளை கடைபிடிக்காத செம்மண்டலத்தில் உள்ள ஒரு பேக்கரிக்கு ரூ.5 ஆயிரம் அபராதம் விதிக்கப்பட்டது. இதேபோல் கடைகளில் சமூக இடைவெளியை கடைபிடிக்காததால், 4 கடைகளுக்கு அபராதம் விதிக்கப்பட்டது.

இந்த நடவடிக்கைகளின் போது புதுநகர் இன்ஸ்பெக்டர் ராதாகிருஷ்ணன், சப்-இன்ஸ்பெக்டர்கள் எழில்தாசன், மணிகண்டன் மற்றும் போலீசார் பாதுகாப்பு பணியில் ஈடுபட்டிருந்தனர்.

நெய்வேலி:

நெய்வேலி அருகே உள்ள மீனாட்சிபேட்டை பகுதியை சேர்ந்தவர் வைத்திலிங்கம். இவரது மகன் மாதேஸ்வரன் (வயது 19). இவருக்கும் அதே பகுதியை சேர்ந்த பிளஸ்-1 மாணவிக்கும் கடந்த சில மாதங்களுக்கு முன்பு பழக்கம் ஏற்பட்டுள்ளது. மாணவியின் பெற்றோர் கேரளாவில் தங்கியிருந்து கூலி வேலை பார்த்து வருகின்றனர். இதனால் மாணவி அதே பகுதியில் உள்ள தனது பாட்டியுடன் வசித்து வந்தார்.

இந்த நிலையில் சம்பவத்தன்று மாணவியின் பாட்டி வேலைக்கு சென்றதை அறிந்த மாதேஸ்வரன், மாணவியின் வீட்டுக்கு சென்றுள்ளார். பின்னர் அங்கு தனியாக இருந்த மாணவியிடம் திருமணம் செய்து கொள்வதாக ஆசை வார்த்தை கூறி உல்லாசம் அனுபவித்துள்ளார். இதில் தற்போது அந்த மாணவி 3 மாத கர்ப்பிணியாக உள்ளார்.

இதுபற்றி அறிந்த மாதேஸ்வரன், மாணவியை மீனாட்சி பேட்டையில் உள்ள மாரியம்மன் கோவிலுக்கு அழைத்து சென்று திருமணம் செய்து கொண்டதாக கூறப்படுகிறது. இதுகுறித்து தகவல் அறிந்த மாணவியின் பெற்றோர் கேரளாவில் இருந்து சொந்த ஊருக்கு வந்தனர். பின்னர் நடந்த சம்பவம் குறித்து மாணவியிடம் கேட்டறிந்தனர். இதையடுத்து மாணவியின் தந்தை,கொடுத்த புகாரின் பேரில் நெய்வேலி அனைத்து மகளிர் போலீசார் போக்சோ சட்டத்தின் கீழ் வழக்குப்பதிவு செய்து மாதேஸ்வரனை கைது செய்தனர்.