செங்கல்பட்டு

செங்கல்பட்டு:

சென்னை வண்டலூரில் இருந்து மீஞ்சூர் வரை 62 கிலோ மீட்டர் நீளத்துக்கு சென்னை வெளிவட்ட சாலை அமைக்கப்பட்டுள்ளது.

ஒவ்வொரு நாளும் சுமார் 35 ஆயிரம் வாகனங்கள் இந்த சாலையை பயன்படுத்துகின்றன. அவற்றில் 15 ஆயிரம் லாரிகளும் அடங்கும்.

கடந்த 2012-ம் ஆண்டு முதல் கட்ட சாலையும், 2016-ம் ஆண்டு 2-ம் கட்ட சாலையும் திறக்கப்பட்டது. இதில் வண்டலூர் முதல் பூந்தமல்லி வழியாக நெமிலிச்சேரி வரை அதிக வாகனங்கள் செல்கின்றன. நெமிலிச்சேரியில் இருந்து மீஞ்சூர் வரை குறைந்த எண்ணிக்கையிலான வாகனங்கள் செல்கின்றன.

இந்த நிலையில் வண்டலூர்-மீஞ்சூர் வெளிவட்ட சாலையில் வரதராஜபுரம், நசரத்பேட்டை அருகே கொளப்பஞ்சேரி, நெமிலிச்சேரி அருகே பழவேடு, பெரியமுல்லைவாயல் ஆகிய இடங்களில் 4 சுங்கச் சாவடிகள் அமைக்கப்பட்டுள்ளன.

இந்திய தேசிய நெடுஞ்சாலைகள் ஆணையம் பயன்படுத்தும் பார்முலாவின் அடிப்படையில் சுங்கச்சாவடி கட்டணங்கள் மாநில அரசின் ஒப்புதலுக்கு அனுப்பப்பட்டுள்ளது. இதற்கு அனுமதி கிடைத்ததும் இந்த 4 சுங்கச்சாவடிகளிலும் கட்டண வசூல் தொடங்கும்.

இந்த சுங்கச்சாவடிகளில் இருபுறமும் உள்ள 3 பாதைகளில் பாஸ்டேக் வசதியும் செய்யப்பட்டுள்ளது. கடைசியாக பணம் செலுத்தும் பாதையும் உள்ளன.

உள்ளூர்வாசிகள் அதன் அருகில் உள்ள பகுதிகளுக்கு செல்ல சேவை பாதைகளை பயன்படுத்த முடியும். அவர்கள் பிரதான பாதையை பயன்படுத்தினால் சுங்கவரி செலுத்த வேண்டும்.

இதுகுறித்து அங்கு வசிக்கும் மக்கள் கூறுகையில், “இந்த சாலையோரத்தில் ஏராளமான கிராமங்கள் மற்றும் தொழிற்பேட்டைகள் உள்ளன. சிறுதொழில் செய்பவர்கள் இந்த சாலையை அடிக்கடி பயன்படுத்த வேண்டும். சாலையின் அருகே விவசாய நிலம் உள்ளவர்கள் விவசாய பொருட்களை சந்தைக்கு கொண்டு செல்ல வேண்டும். அவர்களுக்கு சுங்க வரி கட்டணம் செலுத்துவதில் இருந்து விலக்கு அளிக்க வேண்டும்” என்றனர்.

இது தொடர்பாக நெடுஞ்சாலை என்ஜினீயர் ஒருவர் கூறுகையில், “இந்த சாலையானது வாகன உரிமையாளருக்கு எரிபொருள் சிக்கனம், பயண நேரம் குறைவு, இயக்க செலவுகள் குறைவுக்கு வழி வகுக்கும், மக்கள் சுங்க கட்டணம் செலுத்துவது பற்றி யோசிக்க வேண்டியதில்லை” என்றார்.

ஏமாறும் மக்கள் இருக்கும் வரையில் விதவிதமாக மக்களை ஏமாற்றுபவர்களும் உருவாகி கொண்டே இருப்பார்கள்.

அந்த வகையில் போலி சாமியார்கள் பலர் மக்களை பல வழிகளில் ஏமாற்றி வரும் நிலையில் புதிதாக பெண் சாமியார் கடந்த 2 நாட்களாக சமூக வலைதளங்களில் “டிரெண்டிங்” ஆகி பேசப்பட்டு வருகிறார்.

அன்னபூரணி அம்மாள் என்ற பெயரில் அழைக்கப்படும் அந்த பெண் சாமியார் பட்டு சேலை அணிந்து கொண்டு காரில் இருந்து இறங்கி நடந்து செல்கிறார். சுற்றிலும் மஞ்சள், சிவப்பு, பச்சை நிறங்களில் உடை அணிந்த ஆண்-பெண் பக்தர்கள் அவரை பூக்களை தூவி வரவேற்று அழைத்து செல்கிறார்கள். மண்டபம் போன்ற ஒரு இடத்துக்குள் நுழைந்ததும் பெண் சாமியார் சிறப்பு விருந்தினர்கள் அமரும் ஆடம்பர இருக்கை ஒன்றில் அமர்கிறார்.

தனது வலது கையை காட்டியபடியே பக்தர்களுக்கு ஆசி வழங்கி கொண்டிருக்கும் பெண் சாமியாரின் காலில் விழுந்து பெண்கள், ஆண்கள், குழந்தைகள் என அனைவருமே வழிபடுகிறார்கள்.

கோவிலில் சாமிக்கு தீபம் காட்டுவது போல பெண்கள் அன்னபூரணி அம்மாள் சாமியாருக்கு விதவிதமாக தீபாராதனையும் காட்டுகிறார்கள். அப்போது அவரிடம் ஆசி பெறும் பக்தர்கள் திடீரென சாமி வந்தது போல ஆடுகிறார்கள். அன்னபூரணி அம்மாளின் உடல் அப்போது லேசாக சிலிர்க்கிறது. அவரும் உடலை குலுக்கியபடி வலது கையை காட்டியபடி ஆசி வழங்கிக் கொண்டே இருக்கிறார்.

இந்த நேரத்தில் குடும்பத்தோடு கணவன்-மனைவி, குழந்தை ஆகிய 3 பேரும் தரையோடு படுத்து ஆசி பெறுகிறார்கள். இதுபோன்று வயது வித்தியாசம் இல்லாமல் அனைவருமே பெண் சாமியாரின் காலில் விழுந்து வணங்கும் வீடியோக்கள் சமூக வலைதளங்களில் வைரலாகி வருகிறது.

அதே நேரத்தில் செங்கல்பட்டில் உள்ள தனியார் திருமண மண்டபம் ஒன்றில் புத்தாண்டையொட்டி பெண் சாமியார் காலை 9 மணியில் இருந்து 12 மணி வரை அருள்வாக்கு கூறப்போவதாகவும் அதற்கு பக்தர்கள் முன்பதிவு செய்யலாம் என்றும் பரபரப்பான போஸ்டர்கள் ஒட்டப்பட்டு இருந்தன.

இந்த நிலையில்தான் பெண் சாமியார் பக்தர்களுக்கு ஆசி வழங்கும் வீடியோவுடன் அவரது கடந்த கால வாழ்க்கை தொடர்பான வீடியோவும் வெளியானது. அந்த வீடியோவில் தனியார் தொலைக்காட்சியில் ஒளிபரப்பான குடும்ப பிரச்சினை தொடர்பான சர்ச்சைக்குரிய நிகழ்ச்சியில் சாதாரண உடையில் அந்த பெண் சாமியார் பங்கெடுத்துள்ளார்.

இந்த வீடியோவையும், அவர் பெண் சாமியாக மாறிய வீடியோவையும் பலர் ஒன்றாக இணைத்து வெளியிட்டு காரசாரமான விவாதங்களையும் ஏற்படுத்தி இருந்தனர்.

இதைத் தொடர்ந்து தனியார் திருமண மண்டபத்தில் நடைபெற இருந்த பெண் சாமியாரின் நிகழ்ச்சிக்கு செங்கல்பட்டு போலீசார் தடை விதித்துள்ளனர். மண்டப உரிமையாளரை அழைத்து இது தொடர்பாக பேச்சு நடத்தினர். அப்போது மண்டப உரிமையாளர் குறிப்பிட்ட நிகழ்ச்சிக்கு அட்வான்ஸ் வாங்கியிருப்பதாக தெரிவித்தார். அதனை திருப்பி கொடுத்து விட வேண்டும் எனவும், நிகழ்ச்சி நடத்துவதற்கு எக்காரணத்தை கொண்டும் அனுமதிக்க கூடாது எனவும் போலீசார் கேட்டுக் கொண்டனர்.

இதையடுத்து மண்டப உரிமையாளரும் நிகழ்ச்சியை நடத்த அனுமதி அளிக்க மாட்டோம் என்று உறுதி அளித்துள்ளார்.

இந்த நிகழ்ச்சிக்காக பெண் சாமியாரின் ஆதரவாளர்கள் கடந்த சில நாட்களுக்கு முன்பு மண்டபத்துக்கு சென்று பூஜையும் செய்துள்ளனர். அப்போது அன்னபூரணி அம்மாள் இங்கு வைத்துதான் அருள்வாக்கு சொல்லப் போவதாக கூறி இருக்கிறார். அதற்காகத்தான் பூஜை செய்துள்ளோம் எனவும் பெண் சாமியாரின் சீடர்கள் தெரிவித்துள்ளனர். இதுவும் போலீஸ் விசாரணையில் தெரிய வந்தது.

இதையடுத்து புத்தாண்டு அருள்வாக்கு நிகழ்ச்சிக்கு ஏற்பாடு செய்தவர்களை பிடித்து விசாரணை நடத்த போலீசார் திட்டமிட்டனர்.

இது தொடர்பாக அவர்களது செல்போன்களை தொடர்பு கொண்டபோது அந்த எண்கள் சுவிட்ச் ஆப் செய்யப்பட்டு உள்ளன. இருப்பினும் பெண் சாமியாரின் பின்னணி குறித்து உரிய விசாரணை நடத்த ரகசிய விசாரணையில் போலீசார் இறங்கி இருக்கிறார்கள்.

இது தொடர்பாக செங்கல்பட்டு போலீசார் கூறும்போது, “அருள்வாக்கு கூறுவதாக கூறி மண்டபத்தை பதிவு செய்த பெண் ஈரோட்டில் இருப்பதாக கூறப்படுகிறது. அது தொடர்பாக விசாரணை நடத்தி வருகிறோம். நிகழ்ச்சி ஏற்பாட்டாளர்களின் செல்போன்கள் சுவிட்ச் ஆப் செய்யப்பட்டுள்ளதால் அவர்களை தொடர்பு கொள்ள முடியவில்லை” என தெரிவித்தனர்.

நாட்டில் ஏற்கனவே பல போலி சாமியார்கள் பெருகி பக்தர்களை ஏமாற்றி வருகிறார்கள். இந்த நிலையில் சர்ச்சைக்குரிய நிகழ்ச்சியில் பங்கேற்ற ஒருவர் திடீரென பெண் சாமியாராக அவதாரம் எடுத்திருப்பது குறித்து சமூக வலைதளங்களில் பலரும் காரசாரமாக கருத்துக்களை பதிவிட்டு வருகிறார்கள்.

மாமல்லபுரம்:

கல்பாக்கம் அடுத்த புதுப்பட்டினம் பகுதியை சேர்ந்தவர் ஆதிமூலம். இவரது மகன் சூர்யா( வயது18). அதே பகுதியில் உள்ள சலூன் கடையில் வேலைபார்த்து வந்தார்.

இவரது தங்கை அப்பகுதியில் உள்ள பள்ளியில் படித்து வருகிறார். அவரை பள்ளியில் விடுவதற்காக சூர்யா தனது மோட்டார் சைக்கிளில் அழைத்து சென்றார்.

சகோதரியை பள்ளியில் இறக்கி விட்டதும் அவர் வீடு நோக்கி திரும்பி வந்து கொண்டு இருந்தார்.

புதுப்பட்டினம், கிழக்கு கடற்கரை சாலையை கடந்த போது கட்டுப்பாட்டை இழந்த மோட்டார் சைக்கிள் அங்கிருந்த தடுப்பு கல்லில் மோதியது. இதில் தலையில் பலத்த காயம்அடைந்த சூர்யா சம்பவ இடத்திலேயே பலியானார்.

இதுகுறித்து கல்பாக்கம் போலீசார் வழக்குப்பதிவு செய்து விசாரணை நடத்தி வருகிறார்கள்.

மாமல்லபுரம்:

மாமல்லபுரத்தில் 2022- ம் ஆண்டு ஆங்கில புத்தாண்டை கொண்டாட விடுதிகள், ரிசாட்டுகள் ஏற்பாடுகள் செய்து வருகின்றன. இதையொட்டி வருகிற 31-ந்தேதி (வெள்ளிக்கிழமை) நள்ளிரவில் மாமல்லபுரம் பகுதியில் உள்ள விடுதிகளில் தங்குவதற்கு இப்போதே ஆன்லைன் மூலம் முன்பதிவு நடைபெற்று வருகிறது.

இந்நிலையில் செங்கல்பட்டு மாவட்ட போலீஸ் சூப்பிரண்டு அரவிந்தன், மாவட்ட வருவாய் அலுவலர் மேனுவல்ராஜு ஆகியோர் புத்தாண்டு கொண்டாட்ட பாதுகாப்பு ஏற்பாடுகள் தொடர்பாக மாமல்லபுரம் விடுதி, ரிசார்ட் நிர்வாகிகளை அழைத்து ஆலோசனை கூட்டம் நடத்தினர்.

புத்தாண்டை கொண்டாட மாமல்லபுரம், கோவளம், கேளம்பாக்கம் பகுதிகளில் உள்ள ஹோட்டல், ரிசார்ட்களில் முன்பதிவு செய்துள்ள பயணிகள் முறையான ரசீதும், கொரோனா தடுப்பூசி சான்றிதழும் வைத்திருக்க வேண்டும். தடுப்பூசி சான்றிதழ் இல்லாமல் வருபவர்கள் 31-ந்தேதி மாமல்லபுரம் நுழைய முடியாது.

அவர்கள் இ.சி.ஆர் - ஓ.எம்.ஆர் வழிகளில் போலீஸ் சோதணை சாவடிகளில் திருப்பி அனுப்பப்படுவர்.

விடுதிகள், கடற்கரை ஓரம் சட்ட விரோதமாக கேளிக்கை விழாவோ, தனியார் பங்களாக்களில் ஆபாச நடனமோ, அனுமதி இல்லாத வெளிநாட்டு மது, போதை விருந்தோ நடத்தினால் அவர்கள் மீது கடும் நடவடிக்கை எடுக்கப்படும்.

இவ்வாறு அவர் கூறினார்.