செங்கல்பட்டு

மாமல்லபுரம்:

மாமல்லபுரத்தில் இருந்து புதுச்சேரி வரையான 95கி.மீ., தூரத்திற்கு நான்கு வழிச்சாலை அமைப்பதற்காக, தேசிய நெடுஞ்சாலைத்துறை 1,200 கோடி ரூபாய் நிதி ஒதுக்கீடு செய்து அதன் பணிகள் நடைபெற்று வருகிறது.

இந்த நிலையில் சுற்றுலா தலமான மாமல்லபுரத்தின் நுழைவு வாயில் பகுதிகளில் ஏற்படும் விபத்துக்களை தடுக்க மேற்கு நுழைவு வாயில் பகுதியான பூஞ்சேரி, ஓ.எம்.ஆர், திருக்கழுக்குன்றம் என மூன்று சாலை சந்திப்பு பகுதியில் 1,000 மீட்டர் நீளத்திற்கு வளைவு மேம்பாலம்., மாமல்லபுரம்கிழக்கு கடற்கரை சாலை புறவழி வடக்கு நுழைவு வாயில் பகுதியில் 1,300 மீட்டர் நீளத்திற்கு ஒரு மேம்பாலம், என 2 புதிய மேம்பாலங்கள் கட்டப்பட உள்ளன.

இதற்கான அளவீடு, வடிவமைப்பு, மணல் பரி சோதனை, போன்ற முதற்கட்ட ஆய்வுப்பணிகளை தனியார் ஒப்பந்த நிறுவனம் 3 நாட்களாக செய்து வருகிறது.

மதுராந்தகம்:

சென்னை கோயம்பேடு பஸ் நிலையத்தில் இருந்து அரசு பஸ் அதிகாலை 2 மணிக்கு விழுப்புரம் நோக்கி புறப்பட்டது. இந்த பஸ்சை விழுப்புரம் பணிமனையை சேர்ந்த டிரைவர் குணசேகரன் ஓட்டினார். கண்டக்டராக பெருமாள் (வயது 56) என்பவர் இருந்தார். அதிகாலை 3:30 மணிக்கு மதுராந்தகம் புறவழிச்சாலையில் பயணி ஒருவர் ஏறினார்.

இவரிடம் கண்டக்டர் பெருமாள் டிக்கெட் வாங்குமாறு வலியுறுத்தியுள்ளார். பயணி அளவுக்கு அதிகமான மது போதையில் இருந்ததால் டிக்கெட் எடுக்க மறுத்தார். அத்துடன் கண்டக்டர் பெருமாளுடன் தகராறு செய்தார். இதனால் கண்டக்டர் பெருமாளுக்கும் பயணிக்கும் வாக்குவாதம் முற்றி தகராறு ஏற்பட்டது.

மதுபோதையில் இருந்த பயணி கண்டக்டர் பெருமாளை அடித்துள்ளார். இதனால் பஸ்சில் பயணம் செய்த மற்ற பயணிகள் மது போதையில் இருந்த பயணியை மதுராந்தகம் அருகே அய்யனார் கோயில் என்ற இடத்தில் இறக்கி விட்டுள்ளனர். மேல்மருவத்தூர் நோக்கி பஸ் சென்ற போது கண்டக்டர் பெருமாள் மயக்கம், தலைசுற்றல் ஏற்பட்டு பஸ்சில் சரிந்து விழுந்துள்ளார்.

உடனடியாக மேல்மருவத்தூர் பஸ் நிலையத்தில் பஸ் நிறுத்தப்பட்டது. கண்டக்டர் பெருமாள் மேல்மருவத்தூர் ஆதிபராசக்தி மருத்துவ மனையில் சிகிச்சைக்காக அனுமதிக்கப்பட்டார்.அங்கு அவரை பரிசோதித்த டாக்டர்கள் பெருமாள் ஏற்கனவே இறந்து விட்டதாக கூறினர்.

பஸ்சில் பயணம் செய்த மற்ற பயணிகளை பேருந்து டிரைவர் குணசேகரன் மாற்று பஸ் மூலம் பயணிகளை அனுப்பி வைத்தார். இந்த சம்பவம் குறித்து மதுராந்தகம் போலீசார் வழக்கு பதிவு செய்து தீவிர விசாரணை செய்தனர். விசாரணையில் கண்டக்டரை தாக்கியது சூனாம்பேடு பகுதியைச் சேர்ந்த முருகன் என்பது தெரிய வந்துள்ளது. அவரை கைது செய்து போலீசார் தீவிர விசாரணை மேற்கொண்டு வருகின்றனர். இறந்த கண்டக்டர் பெருமாள் கள்ளக்குறிச்சியை சேர்ந்தவர் ஆவார்.

44வது செஸ் ஒலிம்பியாட் போட்டி ஜூலை 28ந்தேதி முதல் ஆகஸ்டு 10ந்தேதி வரை சென்னையை அடுத்த மாமல்லபுரத்தில் நடக்கிறது.

இந்தப் போட்டியை நடத்த முதல்-அமைச்சர் மு.க.ஸ்டாலின் தலைமையில் 23 பேர் கொண்ட ஒருங்கிணைப்புக் குழு அமைக்கப்பட்டுள்ளது.

செஸ் ஒலிம்பியாட் போட்டியை சிறப்பாக நடத்துவதற்கான ஏற்பாடுகளை தமிழக அரசு செய்து வருகிறது. இது தொடர்பான ஆய்வு கூட்டங்களை தலைமை செயலாளர் இறையன்பு உள்ளிட்ட அதிகாரிகள் அவ்வப்போது நடத்தி வருகிறார்கள்.

இந்த நிலையில் போட்டியை சிறப்பாக நடத்துவதற்கு 18 வகையான குழுக்களை அமைத்து தமிழக அரசு உத்தரவிட்டுஉள்ளது. இது குறித்து மாநில அரசு வெளியிட்டுள்ள உத்தரவு வருமாறு:-

செஸ் ஒலிம்பியாட் போட்டியில் பங்கேற்க வரும் வீரர் வீராங்கனைகள், முக்கிய பிரமுகர்கனை வரவேற்க வரவேற்பு குழு சாலை மேம்பாட்டு பணிகளை மேற்கொள்ள தனிக்குழு, போக்குவரத்து உள்ளிட்ட வசதிகளை கண்காணிக்க தனிக்குழு என மொத்தம் 18 வகையான குழுக்கள் நியமிக்கப்பட்டுள்ளன.

இந்த குழுக்களின் தலைவர்களாக சம்மபந்தப்பட்ட துறைகளை சேர்ந்த செயலாளர்கள் நியமிக்கப்பட்டு உள்ளனர்.

வரவேற்பு குழுவுக்கு டி.ஜெகநாதனும், போக்குவரத்துக்கு கே.கோபாலும், ஸ்பான்சர் ஷிப்புக்கு எஸ்.கிருஷ்ணனும், தொடக்க மற்றும் நிறைவு விழா குழுவுக்கு டி.கார்த்திகேயனும், சாலை, குடிநீர் சப்ளை, தூய்மை பணிக்கு சிவ்தாஸ் மீனாவும், விருந்தோம்பல் நிகழ்ச்சி மேலாண்மை, கலைநிகழ்ச்சி, பரிசளிப்பு ஆகியவற்றின் குழுவுக்கு பி.சந்திரமோகனும் தலைவர்களாக நியமிக்கப்பட்டு உள்ளனர்.

ஊடகம், விளம்பரத்துக்கு வி.பி.ஜெயசீலனும், பாதுகாப்புக்கு டி.ஜி.பி.சைலேந்திரபாபுவும், தங்குமிடம், உணவுக்கு குமார் ஜெயந்தும், சுகாதாரம், மருத்துவ பணிக்கு பி.செந்தில்குமாரும், அரங்கு ஏற்பாடுக்கு தயாளந்த் கட்டாரியாவும், நிதி, டெண்டருக்கு பிரசாந்த் வாட்நேரையும், மின்சாரத்துக்கு ராஜேஷ் லக்கானியும், சாலை மேம்பாட்டுக்கு தீரஜ்குமாரும், பள்ளி, கல்லூரி மாணவ-மாணவிகள் பங்கேற்பதற்கான குழுவுக்கு காகர்லா உஷாவும், சர்வதேச செஸ் கூட்டமைப்புக்கு ஆர்.ஆனந்த குமாரும், செஸ் ஒலிம்பியாட் கட்டுப்பாட்டு அறைக்கு ஏ.கே.கமல்கிஷோரும், தொழில்நுட்பம் மற்றும் தகவல் தொழில்நுட்ப பணிக்கு நீரஜ் மித்தலும் தலைவர்களாக நியமிக்கப்பட்டு உள்ளனர்.

இவ்வாறு அதில் கூறப்பட்டு உள்ளது.

தாம்பரம்:

ஜமீன் பல்லாவரத்தை சேர்ந்தவர் சங்கர். இவர் இன்று காலை மனைவியுடன் திருமண நிகழ்ச்சிக்கு சென்று விட்டு தாம்பரம் நோக்கி சென்று கொண்டிருந்தார். குரோம்பேட்டை ஜி.எஸ்.டி.சாலையில் வந்த போது காரின் முன் பகுதியில் இருந்து திடீரென புகை வந்தது. இதனால் அதிர்ச்சி அடைந்த சங்கரும், அவரது மனைவியும் உடனடியாக காரை நிறுத்தி விட்டு கீழே இறங்கினர். சிறிது நேரத்தில் தீ மளமளவென பரவி கார் முழுவதும் பற்றி எரிந்தது. தகவல் அறிந்ததும் தாம்பரம் தீயணைப்பு வீரர்கள் விரைந்து வந்து தீயை அணைத்தனர். காரில் தீப்பற்றிய உடன் சங்கரும் அவரது மனைவியும் இறங்கியதால் உயிர் தப்பினர். இதுகுறித்து குரோம்பேட்டை போலீசார் விசாரித்து வருகின்றனர்.

மாமல்லபுரம்:

கூவத்தூர் அருகே கடலோரத்தில் ஆலிக்குப்பம், கடலூர் சின்னகுப்பம், பெரியகுப்பம் ஆகிய மீனவ கிராமங்கள் உள்ளன. இந்த பகுதியில் தொடர்ந்து கடல் அரிப்பு ஏற்பட்டு வருவதால் கடுமையாக பாதிக்கப்பட்டு உள்ளது.

கடற்கரை ஓரம் வீடுகட்டி குடியிருக்கும் மீனவர்களின் வீடுகள் ஏற்கனவே சேதமடைந்து பாதுகாப்பற்ற நிலை இருந்து வருகிறது.

தற்போது வலைகளை காயவைக்கும் கட்டிடம் மற்றும் பிடித்து வரும் மீன்களை ஏலம் விடும் கூடாரம் என அனைத்து கட்டிடங்களும் இடிந்து கடலில் மூழ்கும் நிலை ஏற்பட்டுள்ளது. வழக்கத்தை விட சுமார் 200 மீட்டர் தூரத்துக்கு கடல் அரிப்பு ஏற்பட்டு அலைகள் கரைக்கு வந்துள்ளன.

தற்போது அசானி புயல் காரணமாக கடலில் கூடுதலா அலைகள் சீற்றத்துடன் காணப்படுகிறது. இதனால் கடல் அரிப்பு மேலும் அதிகரித்து வருகிறது.

இதன் காரணமான கடலோரத்தில் படகுகளை நிறுத்த இடம் இல்லாமல் ரோட்டில் நிறுத்தும் நிலை உருவாகி உள்ளது. மேலும் பஸ் போக்குவரத்தும் மீனவ கிராமங்களுக்கு வருவது நிறுத்தப்பட்டது. இதன் காரணமாக ஆலிக்குப்பம், கடலூர் சின்னகுப்பம், பெரியகுப்பம் ஆகிய 3 மீனவ கிராமமக்கள் பாதிக்கப்பட்டு உள்ளனர். புயல், கடல் சீற்றம் ஏற்படும் போது உயிர் பயத்தில் வாழும் நிலை ஏற்பட்டுள்ளது.

இதுகுறித்து அப்பகுதி மக்கள் கூறுமுபோது, இந்த 3 மீனவ கிராமங்களிலும் விரைவில் தூண்டில் வளைவு அமைக்க வில்லை என்றால், கரையோர கட்டிடங்கள் படிப்படியாக கடலில் மூழ்கும். எனவே விரைவில் தூண்டில் வளைவு அமைக்க வேண்டும் என்றனர். மீன்வளத்துறை அதிகாரிகள் கடந்த ஆண்டு இப்பகுதியில் ஆய்வுகள் மேற்கொண்டு மக்களின் கருத்துக்களை கேட்டு மத்திய, மாநில அரசிடம் ஆய்வறிக்கை சமர்பித்துள்ளனர்.

விழுப்புரம் மாவட்டம் மரக்காணம் அருகே ஆலம்பரை குப்பத்தில் மத்திய மீன்வ ளத்துறை சார்பில் கட்டப்பட இருக்கும் மீன்பிடி துறைமுகம் பணிகள் தொடங்கும் போது இந்த பகுதியில் தூண்டில் வளைவு கட்டும் பணியும் தொடங்கும் என்று அதிகாரிகள் தெரிவித்து உள்ளனர்.

வண்டலூரில் உள்ள உயிரியல் பூங்காவில் 183 வகையான சுமார் 2,350 விலங்குகள் பராமரிக்கப்பட்டு வருகின்றன. கொரோனாவுக்கு முன்னர் தினந்தோறும் சுமார் 6 ஆயிரம் சுற்றுலா பயணிகள் பூங்காவுக்கு வந்து சென்றனர்.

கொரோனா கட்டுப்பாடுகளால் சரிந்து இருந்த சுற்றுலா பயணிகளின் எண்ணிக்கை தற்போது மெல்ல, மெல்ல அதிகரித்து வருகிறது. இப்போது தினந்தோறும் சராசரியாக 4,500 பேர் பூங்காவை ரசித்து செல்கிறார்கள்.

கோடைகாலம் தொடங்கி உள்ளதால் பூங்காவில் உள்ள விலங்குகளுக்கு சிறப்பு ஏற்பாடுகள் செய்யப்பட்டு உள்ளன. யானைகள் உல்லாச குளியல் போட ஷவர்கள் அமைக்கப்பட்டு உள்ளன. இதே போல் பறவைகள் இருக்கும் இடங்களில் அவ்வப்போது தண்ணீர் தெளிக்கப்பட்டு வருகிறது. சிங்கம், புலி உள்ளிட்ட விலங்குள் மீது சூட்டை தணிப்பதற்காக தண்ணீர் பீய்ச்சி அடிக்கப்படுகிறது. மனித குரங்கு, கரடிகளுக்கு நீர்ச்சத்தை அதிகரிக்கும் தர்பூசணி உள்ளிட்ட பழங்கள் கொடுக்கப்பட்டு வருகின்றன.

இந்த நிலையில் கோடை விடுமுறை நாட்களில் வண்டலூர் பூங்காவில் சுற்றுலா பயணிகளின் வருகையை அதிகரிக்கவும், அவர்களை ஈர்க்கவும் மேலும் 6 இடங்களை சுற்றுலா பயணிகள் பயன்பாட்டுக்கு கொண்டு வர நடவடிக்கை எடுக்கப்பட்டு வருகிறது.

ஏற்கனவே சிறுவர் பூங்கா, இரவுநேர விலங்குகள் இல்லம், பாம்பு பண்ணை ஆகியவை பொதுமக்கள் பார்வைக்காக சமீபத்தில் திறக்கப்பட்டு உள்ளது.

இதேபோல் மீன் கண்காட்சி, லயன் சபாரி, மற்றும் வண்ணத்துப்பூச்சி பூங்கா ஆகியவை சுற்றுலா பயணிகள் பார்வைக்கு விரைவில் திறக்கப்பட உள்ளன. இதற்கான ஏற்பாடுகள் முழுவதும் முடிவடைந்து இருக்கிறது.

பூங்காவில் ஏராளமான வயதான விலங்குகள் உள்ளன. இதையடுத்து புதிய விலங்குளை பரிமாற்ற அடிப்படையில் பெறவும் நடவடிக்கை எடுக்கப்பட்டு வருகிறது.

சிங்கம், பல்வேறு பறவைகள், வரிக்குதிரை, ஒட்டகச்சிவிங்கி உள்ளிட்ட விலங்குள் மங்களூரு, கோரக்பூர், திருவனந்தபுரம் ஆகிய உயிரியல் பூங்காக்க ளில் இருந்து விரைவில் கொண்டு வரப்பட உள்ளன.

மேலும் 3 வயதான வங்காள புலி, 2 ஜோடி காட்டு நாய்கள், 2 ஜோடி கீல்பேக் பாம்புகள் மங்களூரில் உள்ள பில்லிகுலா உயிரியல் பூங்காவில் இருந்து வர இருக்கிறது.

இது தொடர்பாக பூங்கா அதிகாரி ஒருவர் கூறியதாவது:

வண்டலூர் பூங்காவுக்கு கோடை விடுமுறை காரணமாக இந்த மாதம் சுற்றுலா பயணிகள் வருகை மேலும் உயரும் என்று எதிர்பார்க்கிறோம். குழந்தைகள் விளையாடும் பகுதி, இரவு நேர விலங்குகள் இல்லம் மற்றும் பாம்பு பண்ணை ஆகியவை திறக்கப்பட்டு உள்ளது.

மேலும், மான் மற்றும் சிங்கம் சபாரி, மீன் கண்காட்சி மற்றும் வண்ணத்துப்பூச்சி பூங்கா ஆகியவற்றுக்கான பணிகள் முடிவடைந்து உள்ளன. இவற்றை இந்த மாதத்தில் திறக்க ஏற்பாடு நடைபெற்று வருகிறது. இது பார்வையாளர்களை அதிகளவில் ஈர்க்கும் என்று எதிர்பார்க்கிறோம்.

நாடு முழுவதும் உள்ள பல்வேறு உயிரியல் பூங்காக்களுடன் நாங்கள் தொடர்பில் உள்ளோம். அங்கிருந்து சிங்கம், வரிக்குதிரை மற்றும் ஒட்டகச்சிவிங்கியைப் பெற திட்டமிட்டுள்ளோம். பெறப்படும் மற்ற விலங்குகளுக்கு ஈடாக புலிகளை கொடுக்க நாங்கள் விரும்புகிறோம். இந்த நடைமுறைக்கு சில மாதங்கள் ஆகும். இது தொடர்பாக பாட்னா, கோரக்பூர் மற்றும் திருவனந்தபுரத்தில் உள்ள உயிரியல் பூங்காக்களுடன் நாங்கள் பேசி வருகிறோம்.

கொரோனா நோய் தொற்று பரவலின் போது மூடப்பட்ட சபாரிகள் மற்றும் வண்ணத்துப்பூச்சி பூங்கா விரைவில் மீண்டும் திறக்கப்படும்.

இவ்வாறு அவர் கூறினார்.