விளையாட்டு

பார்சிலோனா:

இந்த ஆண்டுக்கான பார்முலா1 கார்பந்தயம் உலகம் முழுவதும் 23 சுற்றுகளாக நடத்தப்படுகிறது. இதன் 4-வது சுற்றான ஸ்பெயின் கிராண்ட்பிரி பார்சிலோனாவில் நேற்று நடந்தது. 308.424 கிலோமீட்டர் பந்தய தூரத்தை நோக்கி வழக்கம் போல் 10 அணிகளைச் சேர்ந்த 20 வீரர்கள் காரில் சீறிப்பாய்ந்தனர். இதில் தகுதி சுற்றில் முதலிடம் பிடித்த 7 முறை சாம்பியனான இங்கிலாந்தின் லீவிஸ் ஹாமில்டன் (மெர்சிடஸ் அணி) எதிர்பார்த்தது போலவே முதலாவது வந்து 25 புள்ளிகளை தட்டிச் சென்றார். அவர் பந்தய தூரத்தை 1 மணி 33 நிமிடங்கள் 07.680 வினாடிகளில் எட்டி வெற்றி கண்டார். அவரை விட 15.841 வினாடி பின்தங்கிய நெதர்லாந்து வீரர் மேக்ஸ் வெர்ஸ்டப்பென் (ரெட்புல் அணி) 2-வதாக வந்து 19 புள்ளிகளை பெற்றார். பின்லாந்து வீரர் வால்டெரி போட்டாஸ் (மெர்சிடஸ்) 3-வது இடத்தை பிடித்தார்.

இந்த சீசனில் 3-வது வெற்றியை ருசித்த ஹாமில்டன் சாம்பியன்ஷிப் வாய்ப்பில் மொத்தம் 94 புள்ளிகளுடன் முதலிடத்தில் நீடிக்கிறார். வெர்ஸ்டப்பென் 80 புள்ளிகளுடன் 2-வது இடத்தில் இருக்கிறார். 5-வது சுற்று போட்டி வருகிற 23-ந்தேதி மொனாக்கோவில்நடக்கிறது.

புதுடெல்லி:

வெஸ்ட் இண்டீஸ் கிரிக்கெட் அணியின் முன்னாள் வேகப்பந்து வீச்சாளர் கர்ட்லி அம்ப்ரோஸ் (98 டெஸ்டில் 405 விக்கெட் வீழ்த்தியவர்) யூ டியுப் சேனலுக்கு அளித்த ஒரு பேட்டியில் கூறியதாவது:

இந்திய அணியில் சில சிறந்த வேகப்பந்து வீச்சாளர்கள் இருக்கிறார்கள். அவர்களில் ஜஸ்பிரித் பும்ராவுக்கு நான் மிகப்பெரிய ரசிகன். அவரது பந்து வீச்சை தொடர்ந்து கவனித்து வருகிறேன். மற்ற பவுலர்களைக் காட்டிலும் வித்தியாசமாக பந்து வீசுகிறார். தாக்கத்தை ஏற்படுத்துகிறார்.

அவர் தொடர்ந்து சிறப்பாக பந்து வீசுவதை பார்க்க ஆவல் கொண்டுள்ளேன். அவரால் டெஸ்டில் 400 விக்கெட்டுகளை (27 வயதான பும்ரா தற்போது 19 டெஸ்டில் ஆடி 83 விக்கெட் எடுத்துள்ளார்) கைப்பற்ற முடியுமா? என்று கேட்கிறீர்கள். பந்தை நல்ல முறையில் ஸ்விங் செய்கிறார். மிரட்டலாக யார்க்கர் பந்துகளை வீசுகிறார். நிறைய பந்துவீச்சு அஸ்திரங்கள் அவரிடம் உள்ளன.

உடல் ஆரோக்கியத்துடனும், நீண்ட காலம் விளையாடுவதற்கு ஏற்ப உடல்தகுதியுடனும் அவர் இருக்க வேண்டும். அதிக காலம் தொடர்ந்து உடல்தகுதியுடன் இருக்கும் பட்சத்தில் நிச்சயம் 400 விக்கெட் மைல்கல்லை அவரால் எட்ட முடியும்.

அடுத்த மாதம் நடக்கும் உலக டெஸ்ட் சாம்பியன்ஷிப் இறுதிப்போட்டியில் இந்தியா-நியூசிலாந்து அணிகள் மோத உள்ளன. இதில் இ்ந்திய அணி சாதிக்க வேண்டும் என்றால் தொடக்க ஆட்டக்காரர்கள் வலுவான அடித்தளம் அமைத்து தர வேண்டியது அவசியம். ஆரம்பத்திலேயே ஒன்றிரண்டு விக்கெட் சரிந்து விட்டால், அதன் பிறகு விராட் கோலி மற்றும் மிடில் வரிசை பேட்ஸ்மேன்கள் நெருக்கடிக்கு உள்ளாவார்கள். அதேசமயம் நல்ல தொடக்கம் கிடைத்தால் மிடில் வரிசை பேட்ஸ்மேன்கள் நெருக்கடி இன்றி இயல்பாக விளையாட முடியும். அணியும் பெரிய ஸ்கோரை குவிக்கலாம் என தெரிவித்தார்.

ஹராரே:

பாகிஸ்தான், ஜிம்பாப்வே அணிகளுக்கு இடையிலான இரண்டாவது டெஸ்ட் போட்டி ஹராரேயில் நடைபெற்று வருகிறது. டாஸ் வென்ற பாகிஸ்தான் அணி முதலில் பேட்டிங்கை தேர்வு செய்தது.

முதல் இன்னிங்சில் பாகிஸ்தான் அணி 147.1 ஓவரில் 8 விக்கெட் இழப்புக்கு 510 ரன்கள் எடுத்து டிக்ளேர் செய்தது. அபித் அலி 215 ரன்களுடன் ஆட்டமிழக்காமல் இருந்தார். அசார் அலி 126 ரன்னிலும், நவ்மன் அலி 97 ரன்னிலும் ஆட்டமிழந்தனர்.

ஜிம்பாப்வே சார்பில் முசாராபனி 3 விக்கெட்டும், சிசோரா 2 விக்கெட்டும் வீழ்த்தினர்.

இதையடுத்து, ஜிம்பாப்வே அணி முதல் இன்னிங்சை தொடர்ந்தது. இரண்டாம் நாள் முடிவில் ஜிம்பாப்வே 30 ஓவரில் 4 விக்கெட் இழப்புக்கு 52 ரன்கள் எடுத்தது.

இந்நிலையில், நேற்று மூன்றாம் நாள் ஆட்டம் நடைபெற்றது. தொடர்ந்து ஆடிய ஜிம்பாப்வே அணி முதல் இன்னிங்சில் 60.4 ஓவர்களில் 132 ரன்களுக்கு ஆல் அவுட்டானதால் பாலோ-ஆன் ஆனது. அந்த அணியில் சகாப்வா அதிகபட்சமாக 33 ரன்கள் எடுத்தார்.
பாகிஸ்தான் சார்பில் ஹசன் அலி 5 விக்கெட்டும், சஜித் கான் 2 விக்கெட்டும் வீழ்த்தினர்.
இதைத்தொடர்ந்து, ஜிம்பாப்வே இரண்டாவது இன்னிங்சை ஆடியது. இதிலும் பாகிஸ்தான் பந்துவீச்சாளர்கள் அசத்தி விக்கெட்டுகளை விரைவாக வீழ்த்தினர்.

ஆனாலும், சகாப்வா பொறுப்புடன் ஆடி அரை சதமடித்து 80 ரன்னில் அவுட்டானார். பிரெண்டண் டெய்லர் 49 ரன்னில் ஆட்டமிழந்தார்.

மூன்றாம் நாள் முடிவில் ஜிம்பாப்வே அணி 63 ஓவர்கள் முடிவில் 9 விக்கெட்டுகளை இழந்து 220 ரன்கள் எடுத்துள்ளது. லூக் ஜாங்வே 30 ரன்னுடன் களத்தில் உள்ளார். இன்னும் 158 ரன்கள் பின்தங்கியுள்ளது ஜிம்பாப்வே அணி.

பாகிஸ்தான் சார்பில் நவ்மன் அலி 5 விக்கெட்டும், ஷஹீன் அப்ரிதி 4 விக்கெட்டும் வீழ்த்தினர். இதன்மூலம் பாகிஸ்தான் அணி டெஸ்ட் தொடரை 2-0 என கைப்பற்றி விடும் என்பது உறுதி.

மும்பை:

இங்கிலாந்துக்கு எதிரான டெஸ்ட் கிரிக்கெட் தொடரை இந்திய அணி 3-2 என்ற கணக்கில் கைப்பற்றும் என்று இந்திய முன்னாள் கேப்டன் ராகுல் டிராவிட் கூறியுள்ளார்.

இந்திய கிரிக்கெட் அணி இங்கிலாந்தில் உள்ள சவுத்தம்டன் நகரில் அடுத்த மாதம் (ஜூன்) 18-ந்தேதி முதல் 22-ந்தேதி வரை நடக்கும் உலக டெஸ்ட் சாம்பியன்ஷிப் இறுதிப்போட்டியில் நியூசிலாந்தை எதிர்கொள்கிறது. அதைத் தொடர்ந்து அங்கேயே இங்கிலாந்துக்கு எதிராக 5 போட்டிகள் கொண்ட டெஸ்ட் தொடரில் பங்கேற்கிறது. இந்தியா- இங்கிலாந்து இடையிலான முதலாவது டெஸ்ட் ஆகஸ்டு 4-ந்தேதி நாட்டிங்காமில் தொடங்குகிறது. இதையொட்டி விராட் கோலி தலைமையிலான இந்திய அணி அடுத்த மாதம் 2-ந்தேதி இங்கிலாந்துக்கு புறப்படுகிறது.
இங்கிலாந்து மண்ணில் கடைசியாக 2007-ம் ஆண்டு ராகுல் டிராவிட் தலைமையிலான இந்திய அணி டெஸ்ட் தொடரை (1-0) வென்றது. அதன் பிறகு 3 முறை இங்கிலாந்துக்கு சென்றுள்ள இந்திய அணி ஒவ்வொரு முறையும் டெஸ்ட் தொடரில் படுதோல்வியுடன் தான் தாயகம் திரும்பியிருக்கிறது.

இந்த நிலையில் இங்கிலாந்து தொடர் குறித்து முன்னாள் கேப்டன் ராகுல் டிராவிட் நேற்று அளித்த பேட்டியில் கூறியதாவது:-

இங்கிலாந்து அணி பந்து வீச்சில் பலம் வாய்ந்தது. அதில் எந்த சந்தேகமும் இல்லை. குறிப்பாக அவர்களின் வேகப்பந்து வீச்சு தாக்குதல் அற்புதமானது. அவர்களிடம் நிறைய திறமையான வீரர்கள் உள்ளனர். இங்கிலாந்தின் டாப் 6-7 பேட்ஸ்மேன்களை பார்த்தால் அதில் ஒருவர் உலகத்தரம் வாய்ந்த மிகச்சிறந்த பேட்ஸ்மேனாக விளங்குகிறார். அவர் தான் ஜோ ரூட். இதே போல் பென் ஸ்டோக்சையும் குறிப்பிட்டாக வேண்டும். அவர் சிறந்த ஆல்-ரவுண்டர். ஆனால் அவருக்கு எதிராக இந்தியாவில் நமது சுழற்பந்து வீச்சாளர் ஆர்.அஸ்வின் அசத்தினார். இப்போதும் அவருக்கு எதிராக சிறப்பாக செயல்படுவார் என்று தோன்றுகிறது. இவர்கள் இடையிலான நீயா-நானா? மோதல் இந்த போட்டியில் சுவாரஸ்யமாக இருக்கும்.

இந்த தொடருக்காக இந்திய அணி சிறந்த முறையில் தயாராகும் என்று நினைக்கிறேன். ஆஸ்திரேலிய மண்ணில் டெஸ்ட் தொடரை வென்றதால் அணியின் நம்பிக்கை அதிகரித்துள்ளது. சில வீரர்கள் ஏற்கனவே சில முறை இங்கிலாந்துக்கு சென்று விளையாடி இருக்கிறார்கள். பேட்டிங்கை பொறுத்தவரை இந்த முறை நிறைய அனுபவம் வாய்ந்த பேட்ஸ்மேன்கள் உள்ளனர். அதனால் இந்த தடவை டெஸ்ட் தொடரை கைப்பற்ற இந்தியாவுக்கு நல்ல வாய்ப்பு உள்ளது. அனேகமாக இந்திய அணி டெஸ்ட் தொடரை 3-2 என்ற கணக்கில் கைப்பற்றலாம் என்று கருதுகிறேன்.

உலக டெஸ்ட் சாம்பியன்ஷிப் இறுதிப்போட்டி முடிந்த பிறகு இங்கிலாந்துக்கு எதிரான டெஸ்ட் தொடங்குவதற்கு ஒரு மாதம் முழுமையாக இருக்கிறது. எந்த ஒரு அணிக்கும் இது போன்று நீண்ட நாட்கள் தயாராவதற்கு வாய்ப்பு கிடைக்காது. அந்த வகையில் இந்தியாவுக்கு இது சாதகமான அம்சமாக இருக்கும். அணி சரியான கலவையில் அமைந்துள்ளது.

இங்கிலாந்தை பொறுத்தவரை அங்குள்ள சீதோஷ்ண நிலைக்கு நீங்கள் எப்போதும் மதிப்பு கொடுத்தாக வேண்டும். இந்தியா, ஆஸ்திரேலியாவுடன் ஒப்பிடும் போது அங்குள்ள சூழல் சற்று வித்தியாசமாக இருக்கும். வானிலை மாறும் போது, 40-50 ஓவர்களுக்கு பிறகுகூட பந்து ஸ்விங் ஆகும்.

இவ்வாறு டிராவிட் கூறினார்.

மாட்ரிட்:

மாட்ரிட் ஓபன் சர்வதேச டென்னிஸ் போட்டி ஸ்பெயினில் நடந்தது. களிமண் தரை போட்டியான இதில் நேற்று முன்தினம் இரவு அரங்கேறிய பெண்கள் ஒற்றையர் இறுதி ஆட்டத்தில் ‘நம்பர் ஒன்’ வீராங்கனை ஆஸ்திரேலியாவின் ஆஷ்லி பார்ட்டியும், 7-ம் நிலை வீராங்கனை அரினா சபலென்காவும் (பெலாரஸ்) மோதினர்.

இதில் தொடக்கத்தில் ஆதிக்கம் செலுத்திய சபலென்கா, முதல் செட்டில் ஒரு கேமை கூட (6-0) இழக்காமல் அசத்தினார். ஒரு செட்டில் ஆஷ்லி பார்ட்டி ஒரு கேம் கூட வெல்லாதது கடந்த 4 ஆண்டுகளில் இதுவே முதல் முறையாகும். இதன் பின்னர் 2-வது செட்டை கைப்பற்றி மீண்ட ஆஷ்லி, கடைசி செட்டில் சபலென்காவின் ஆக்ரோஷத்துக்கு ஈடுகொடுக்க முடியாமல் பணிந்தார்.

1 மணி 39 நிமிடங்கள் நடந்த ஆட்டத்தின் முடிவில் சபலென்கா 6-0, 3-6, 6-4 என்ற செட் கணக்கில் வாகை சூடி பட்டத்தை வசப்படுத்தினார். இதன் மூலம் 2 வாரத்துக்கு முன்பு ஜெர்மனியில் நடந்த ஸ்டட்கர்ட் ஓபன் டென்னிஸ் இறுதி ஆட்டத்தில் அடைந்த தோல்விக்கு சபலென்கா பழிதீர்த்துக் கொண்டார். அத்துடன் களிமண் தரை ஆடுகளத்தில் தொடர்ச்சியாக 16 ஆட்டங்களில் வென்றிருந்த ஆஷ்லியின் வீறுநடையும் முடிவுக்கு வந்தது.

23 வயதான சபலென்கா கூறுகையில், ‘உண்மையை சொல்ல வேண்டும் என்றால் ஸ்டட்கர்ட் ஓபன் டென்னிஸ் இறுதிப்போட்டிக்கு பிறகு காயத்தால் அவதிப்பட்டேன். இதனால் மாட்ரிட் ஓபனில் இருந்து விலகலாம் என்று நினைத்தேன். ஆனால் அதன் பிறகு 4 நாட்களில் காயத்தில் இருந்து வேகமாக குணமடைந்ததால் களம் திரும்பி இப்போது சாம்பியனாக நிற்கிறேன். இது எனக்கு வியப்புக்குரிய வாரமாக அமைந்தது’ என்றார்.

இது சபலென்காவுக்கு 10-வது சர்வதேச பட்டமாகும். அதே சமயம் களிமண் தரை போட்டியில் அவருக்கு இது முதல் மகுடமாகும். அவருக்கு ரூ.2 கோடியே 81 லட்சம் பரிசுத்தொகையும், ஆயிரம் தரவரிசை புள்ளிகளும் கிடைத்தன. இன்று வெளியாகும் புதிய தரவரிசையில் சபலென்கா 4-வது இடத்துக்கு முன்னேறுகிறார். அவரது சிறந்த தரநிலை இதுவாகும். 2-வது இடம் பிடித்த ஆஷ்லி பார்ட்டிக்கு ரூ.1 கோடியே 68 லட்சம் கிடைத்தது.