வேலூர்

வாலாஜா:

ராணிப்பேட்டை அடுத்த சிப்காட் அண்ணாநகரை சேர்ந்தவர் அமர்நாத் (வயது32). சென்னையில் சினிமா கம்பெனியில் வெல்டராக வேலை செய்து வருகிறார். சிப்காட் முத்து மாரியம்மன் கோவில் தெருவை சேர்ந்தவர் தங்கபாண்டியன் (22). சினிமா துறையில் உதவியாளராக வேலை செய்து வந்தார்.

நண்பர்களான அமர்நாத், தங்க பாண்டியன் 2 பேரும் தீபாவளி கொண்டாட கடந்த சனிக்கிழமை ஊருக்கு வந்தனர். தீபாவளியையொட்டி நேற்று மாலை அண்ணாநகரில் உள்ள காலியிடத்தில் மது அருந்த முடிவு செய்தனர். அப்போது தங்க பாண்டியன் தன்னிடம் பணம் இல்லை. எனவே மதுவாங்கி தருமாறு அமர்நாத்திடம் கேட்டுள்ளார்.

அமர்நாத்தும் என்னிடம் பணம் இல்லை என கூறினார். இதனால் நண்பர்களிடையே வாக்குவாதம் ஏற்பட்டு கைகலப்பாக மாறியது.

அப்போது தங்க பாண்டியன், அமர்நாத்தை தாக்கியுள்ளார். அமர்நாத் தன்னிடம் இருந்த கத்தியால் தங்கபாண்டியனை வெட்டினார்.

இதனால் ஆத்திரமடைந்த தங்கபாண்டியன் தனது அண்ணன் முத்து (25), தம்பி கார்த்திக் (18) ஆகியோருக்கு செல்போன் மூலம் தகவல் கொடுத்தார்.

இதையடுத்து சம்பவ இடத்திற்கு வந்த அண்ணன், தம்பிகளுடன் தங்கபாண்டியனும் சேர்ந்து அமர்நாத்தை சரமாரியாக தாக்கினர். இதில் படுகாயம் அடைந்த அமர்நாத் ரத்த வெள்ளத்தில் மயங்கி சரிந்தார். இதையடுத்து 3 பேரும் அங்கிருந்து தப்பி ஓடிவிட்டனர்.

தகவல் அறிந்த அமர்நாத் உறவினர்கள் அவரை மீட்டு சிகிச்சைக்காக விஷாரம் தனியார் ஆஸ்பத்திரிக்கு கொண்டு சென்றனர். அவரை பரிசோதித்த டாக்டர்கள் அமர்நாத் வரும் வழியிலேயே இறந்து விட்டதாக தெரிவித்தனர்.

சிப்காட் போலீஸ் இன்ஸ்பெக்டர் (பொறுப்பு) திருநாவுக்கரசு, சப்-இன்ஸ்பெக்டர் அருண்ராஜ்குமார் ஆகியோர் வழக்குப்பதிவு செய்து தங்கபாண்டியன், முத்து, கார்த்திக் ஆகியோரை பிடித்து விசாரணை நடத்தி வருகின்றனர்.

வேலூர்:

தீபாவளி பண்டிகையையொட்டி பொதுமக்கள் துணிகள் மற்றும் பொருட்கள் வாங்குவதற்காக பஜார் வீதிகளில் குவிகின்றனர் .வேலூர் மார்க்கெட்டில் நேற்று மாலை பொதுமக்கள் கூட்டம் அலைமோதியது.

இதேபோல் காட்பாடி ரோடு அண்ணாசாலை ஆகிய இடங்களில் உள்ள ஜவுளி கடைகளில் பொதுமக்கள் கூட்டம் அலைமோதுகிறது.

நேற்று மாலை 6 மணி முதல் வாகன நெரிசல் ஏற்பட தொடங்கியது. வேலூர் புதிய பஸ் நிலையம் அருகே உள்ள கிரீன் சர்க்கிளில் கடும் நெரிசல் ஏற்பட்டது.

போக்குவரத்து போலீசார் மற்றும் போலீஸ் நண்பர்கள் குழுவினர் போக்குவரத்தை சீரமைக்கும் பணியில் ஈடுபட்டனர். ஆனாலும் புதிய பஸ் நிலையத்தில் இருந்து வெளியே வரும் வாகனங்கள் க்ரீன் சர்க்கிள் அருகே வெளியேற முடியாமல் சிக்கின .

தீபாவளி பண்டிகையையொட்டி சிறப்பு பஸ்கள் கூடுதலாக இயக்கப்படுவதால் பஸ்நிலையம் நிரம்பி வழிகிறது. மேலும் பயணிகளின் எண்ணிக்கையும் அதிகரித்துள்ளதால் பொதுமக்கள் பஸ்களில் முண்டியடித்து ஏறுகின்றனர்.

பஸ்நிலையத்தில் இருந்து வெளியே மற்றும் உள்ளே வரும் வாகனங்கள் நெரிசலில் சிக்கின. புதிய பஸ் நிலையத்தில் இருந்து லட்சுமி தியேட்டர் வரை வாகனங்கள் ஊர்ந்து செல்லும் நிலை ஏற்பட்டது ‌.

இன்று தீபாவளி பண்டிகைக்கு வெளியூர் செல்பவர்கள் எண்ணிக்கை மேலும் அதிகமாக இருக்கும் .மேலும் துணிகள் உள்ளிட்ட பொருட்கள் வாங்குபவர்கள் இருசக்கர வாகனங்களில் அதிக அளவில் வெளியே வருவார்கள்.

இதனால் இன்று மேலும் நெரிசல் ஏற்படும் போக்குவரத்து நெரிசலை தடுக்க கூடுதல் போக்குவரத்து போலீசார் நிறுத்த வேண்டும் என பொதுமக்கள் வலியுறுத்தி உள்ளனர்.

வேலூர்:

வேலூர் மாவட்டம், வாணியம்பாடி கிளை சிறை 2-ம் நிலை காவலர் இளஞ்செழியன். இவர் கடந்த 22-ந் தேதி இரவு குடிபோதையில் தள்ளாடியபடியே பணிக்கு வந்தார்.

தொடர்ந்து அங்கிருந்த கைதிகள், கிளை சிறை பணியாளர்களிடம் தகாத வார்த்தைகளால் பேசி ரகளையில் ஈடுபட்டார். தட்டிக் கேட்ட சிறை காவலர்களிடமும் தகாத வார்தைகளால் பேசியபடி சுமார் 2 மணி நேரத்துக்கும் மேலாக ரகளையில் ஈடுபட்டார்.

இதுகுறித்து வேலூர் மத்திய சிறை அதிகாரிகளுக்கு புகார் தெரிவிக்கப்பட்டது. மேலும் சிறைக்காவலர் இளஞ்செழியன் ரகளையில் ஈடுபட்டதை வீடியோ எடுத்து சிறை அதிகாரிகளுக்கு அனுப்பி வைத்திருப்பதாக கூறப்படுகிறது.

இதுகுறித்து வேலூர் ஜெயில் சூப்பிரண்டு ஆண்டாள் விசாரணை நடத்தி சிறைக்காவலர் இளஞ்செழியனை சஸ்பெண்டு செய்து நேற்று முன்தினம் உத்தரவிட்டார்.

அரக்கோணம்:

அரக்கோணம் வீட்டு வசதி வாரிய சாலையில் பாதாள சாக்கடை பணிக்காக பள்ளம் தோண்டப்பட்டது. பணிகள் முடிந்து நீண்ட நாட்கள் ஆகியும் சிமெண்ட் சாலை அமைக்காததால் சேறும் சகதியுமாக மாறியுள்ளது. இதனால் அவ்வழியாக பள்ளி, கல்லூரி செல்லும் மாணவ, மாணவிகள் பொதுமக்கள் அவதியடைந்து வந்தனர். இது குறித்து நகராட்சி அலுவலகத்தில் பலமுறை புகார் மனு கொடுத்தும் நடவடிக்கை எடுக்கவில்லை என கூறப்படுகிறது.

மேலும் தற்போது பெய்த மழையால் சாலை மேலும் சேதமடைந்துள்ளது. இதனால் ஆத்திரம் அடைந்த அப்பகுதி பொதுமக்கள் இன்று காலை அரக்கோணம் நகராட்சி அலுவலகம் அருகே திருத்தணி சாலையில் 100-க்கும் மேற்பட்டோர் மறியலில் ஈடுபட்டனர். இதனால் சாலையின் 2 பக்கமும் வாகனங்கள் அணிவகுத்து நின்றன. இதனால் பள்ளி, கல்லூரி செல்லும் மாணவ, மாணவிகள் வேலைக்கு செல்வோர் அவதி அடைந்தனர்.

இதுகுறித்து தகவல் அறிந்த அரக்கோணம் டி.எஸ்.பி மனோகரன், டவுன் இன்ஸ்பெக்டர் முத்துராமலிங்கம். தாலுகா இன்ஸ்பெக்டர் அண்ணாதுரை மற்றும் போலீசார் விரைந்து வந்து மறியலில் ஈடுபட்டவர் களிடம் பேச்சு வார்த்தை நடத்தினர். ஆனால் நகராட்சி அலுவலர்கள் நேரில் வந்து உறுதிமொழி அளித்தால் மட்டுமே மறியலை கைவிட முடியும் என கூறினர்.

இதையடுத்து மறியலில் ஈடுபட்டவர்களின் மீது போலீசார் லேசான தடியடி நடத்தினர். இதனால் மறியலில் ஈடுபட்டவர்கள் சிதறி ஓடினர். இதனால் அங்கு பரபரப்பான சூழ்நிலை ஏற்பட்டது. மறியல் காரணமாக சுமார் ½ மணி நேரம் போக்குவரத்து பாதிக்கப்பட்டது.

திருப்பத்தூர்:

திருப்பத்தூர் மாவட்ட தனி அலுவலர் சிவனருள் திருப்பத்தூர் அரசு மருத்துவமனைக்கு நேரில் சென்று டெங்கு பாதிப்பு குறித்து மருத்துவ அலுவலர் டாக்டர் செல்வகுமாரிடம் கேட்டறிந்தார்.

பின்னர் காய்ச்சலால் பாதிக்கப்பட்டு சிகிச்சை பெற்று வரும் வார்டுகளுக்கு சென்று நோயாளிகளிடம் சிகிச்சை குறித்து கேட்டறிந்தார் மேலும் மருத்துவமனையில் ரத்தப் பரிசோதனை செய்யும் இடம் மாத்திரை வழங்கும் இடம் காய்ச்சலால் பாதிக்கப்பட்ட சிறுவர் சிறுமிகள் பாதிக்கப்பட்ட வார்டுகளுக்கு சென்று பார்வையிட்டார்.

அரசு மருத்துவ மனையில் டெங்கு காய்ச்சல் குறித்து ஆய்வு செய்தோம் தற்போது மருத்துவமனையில் சிறுவர் சிறுமியர் உள்பட 37 பேர் காய்ச்சலால் பாதிக்கப்பட்டுள்ளனர் அவர்களுக்கு  டெங்கு அறிகுறி எதுவும் இல்லை.

அனைத்து பகுதிகளில் கொசு ஒழிப்பு புகை மருந்து உட்பட பல்வேறு நடவடிக்கை எடுக்கப்பட்டு வருகிறது வீட்டில் உள்ள அனைவரும் தங்கள் வீட்டில் உள்ள பழைய டயர் பிளாஸ்டிக் பொருட்களில் தண்ணீர் தேங்கி உள்ளதா? என எச்சரிக்கையுடன் இருக்க வேண்டும் அரசு டெங்கு ஒழிப்பு குறித்து தீவிரம் காட்டி வருகிறது.

இவ்வாறு அவர் கூறினார்.

தொடர்ந்து திருப்பத்தூர் அரசு மருத்துவமனையில் ரூ.22 கோடியில் கட்டப்பட்டு வரும் கட்டிடங்களை ஆய்வு செய்து உடனடியாக முடிக்க உத்தரவிட்டார்.

டாக்டர்கள் பிரபாகரன், சிவக்குமார், குமரவேல், பொதுப்பணித்துறை உதவி என்ஜினீயர்கள் விஜயகுமார், சங்கர், ஆறுமுகம் உடனிருந்தனர்

வேலூர்:

வேலூர் மாவட்டத்தில் நேற்று இரவு இடியுடன் கூடிய பலத்த மழை பெய்ய தொடங்கியது. காவேரிபாக்கம், வாலாஜா, மேல் ஆலத்தூர், காட்பாடி, வடபுதுப்பட்டு, சோளிங்கர், ஆற்காடு, ஆம்பூர் ஆகிய இடங்களில் மழை கொட்டி தீர்த்தது. ஒரு மணி நேரத்திற்கும் மேலாக மழை நீடித்ததால் சாலைகளில் மழை வெள்ளம் பெருக்கெடுத்து ஓடியது.

வாணியம்பாடி, ஆலங்காயம், அரக்கோணம் ஆகிய பகுதியில் லேசான சாரல் மழை பெய்தது .மற்ற இடங்களில் பலத்த மழை பெய்தது. திருப்பத்தூரில் மழை இல்லை. தொடர் மழையால் ஏரிகளிலும் மழைநீர் தேங்கி வருகிறது. இதனால் விவசாயிகள் மகிழ்ச்சி அடைந்துள்ளனர்.

வேலூர் மாவட்டத்தில் பெய்த மழை அளவு விவரம் மில்லி மீட்டரில் வருமாறு:-

வேலூர்- 37.3

வாணியம்பாடி- 3.4

ஆலங்காயம்- 3.2

அரக்கோணம்-5.2

காவேரிப்பாக்கம்- 66.6

வாலாஜா- 49.4

ஆற்காடு- 44.2

மேல் ஆலத்தூர்- 48.6

காட்பாடி- 53.2

அம்முண்டி- 25.2

கேத்தாண்டபட்டி- 67.2

வடபுதுபட்டு- 65.2

திருவண்ணாமலை மாவட்டத்தில் நேற்றிரவு பரவலாக மழை பெய்தது. போளூர் சேத்துப்பட்டு வந்தவாசி கலசப்பாக்கம் ஆகிய பகுதிகளில் பலத்த மழை பெய்தது. சுமார் ஒரு மணி நேரம் நீடித்தது. இதனால் சாலைகளில் மழை வெள்ளம் பெருக்கெடுத்தது. திருவண்ணாமலை தண்டராம்பட்டு பகுதிகளில் சாரல் மழை மட்டுமே பெய்தது.

சாத்தனூர் அணைக்கு 694 கனஅடி நீர் வந்து கொண்டிருக்கிறது அணையின் நீர்மட்டம் இன்று காலை 84.6 கன அடியாக இருந்தது 59.04 அடி கொண்ட குப்பநத்தம் அணையில் இருந்து 250 கனஅடி நீர் திறந்து விடப்பட்டுள்ளது. அணைக்கு நீர்வரத்து இல்லை. இதனால் அணையின் நீர்மட்டம் 38.21 கன அடியாக குறைந்துள்ளது.

திருவண்ணாமலை மாவட்டத்தில் பெய்த மழை அளவு விவரம் மில்லி மீட்டரில் வருமாறு:-

சாத்தனூர் அணை- 4.2

போளூர்- 40.2

திருவண்ணாமலை- 3.1

சேத்துப்பட்டு- 33.2

கீழ்பென்னாத்தூர்- 3.2

வெம்பாக்கம்- 74

ஜோலார்பேட்டை:

சென்னை வளசரவாக்கம் கெங்கை அம்மன் கோவில் தெருவை சேர்ந்தவர் சசிகுமார் (வயது 47). டி.வி. நாடகங்களில் கேமரா ஒளிப்பதிவாளராக பணியாற்றி வந்தார். இவரது மனைவி ராகவி தம்பதிக்கு ஒரு பெண் குழந்தை உள்ளது.

சசிகுமார் வேலை பார்த்த ஸ்டுடியோவில் இருந்த கேமராவை ரூ.3 லட்சத்திற்கு அடமானம் வைத்துள்ளதாக கூறப்படுகிறது. இதனை அவரால் மீட்டு நிறுவனத்துக்கு திருப்பி தர முடியவில்லை.

இதனையடுத்து ஸ்டுடியோ நிறுவனம் சார்பில் விருகம்பாக்கம் போலீஸ் நிலையத்தில் சசிகுமார் மீது புகார் அளித்தனர்.

இதனால் மனமுடைந்த சசிகுமார் கடந்த 9-ந் தேதி வீட்டை விட்டு வெளியே சென்றார். பின்னர் அவர் வீடு திரும்பவில்லை.

இந்த நிலையில் நேற்று வேலூர் மாவட்டம் ஜோலார்பேட்டை பஸ் நிலையம் அருகே உள்ள ஏரிக்கரையில் உள்ள ஒரு மரத்தில் தூக்கில் சசிகுமார் பிணமாக தொங்கினார். அவர் பிணமாக தொங்குவதை கண்ட பொதுமக்கள் ஜோலார்பேட்டை போலீஸ் நிலையத்திற்கு தகவல் தெரிவித்தனர்.

போலீசார் சம்பவ இடத்திற்கு சென்று உடலை மீட்டு விசாரணை நடத்தினர். அவரது சட்டைப் பையிலிருந்த மணிபர்சில் மனைவி குழந்தைகளுடன் எடுத்துக்கொண்ட போட்டோ இருந்தது.

மேலும் அவரது செல்போன் மூலம் அவர் யார் என்பதை போலீசார் தெரிந்து கொண்டனர். இதுபற்றி வளசரவாக்கத்தில் உள்ள அவரது குடும்பத்தினருக்கு தகவல் தெரிவித்தனர்.

மேலும் அவரது உடல் பிரேத பரிசோதனைக்காக திருப்பத்தூர் அரசு ஆஸ்பத்திரிக்கு அனுப்பி வைக்கப்பட்டது.

அவரது மனைவி ராகவி சசிகுமார் சாவில் சந்தேகம் இருப்பதாக ஜோலார்பேட்டை போலீசில் புகார் அளித்தார். இதுதொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.