கிருஷ்ணகிரி

சூளகிரி:

காஞ்சிபுரம் மாவட்டத்தில் இருந்து ரூ.15 கோடி மதிப்புள்ள செல்போன்களை ஏற்றிக் கொண்டு ஒரு கன்டெய்னர் லாரி, கடந்த மாதம் 21-ந் தேதி கிருஷ்ணகிரி வழியாக மும்பை நோக்கி சென்று கொண்டிருந்தது. அந்த லாரி சூளகிரி அருகே மேலுமலை பக்கமாக சென்ற போது அதை பின்தொடர்ந்து லாரிகளில் வந்த கொள்ளையர்கள் கன்டெய்னர் லாரியை வழிமறித்தனர்.

பின்னர் லாரி டிரைவர்களை தாக்கி ரூ.15 கோடி மதிப்புள்ள செல்போன்களை கொள்ளையடித்து சென்றனர். பெரும் பரபரப்பை ஏற்படுத்திய இந்த கொள்ளை தொடர்பாக கோவை மேற்கு மண்டல ஐ.ஜி. பெரியய்யா, சேலம் சரக டி.ஐ.ஜி. பிரதீப்குமார், கிருஷ்ணகிரி மாவட்ட போலீஸ் சூப்பிரண்டு பண்டி கங்காதர் ஆகியோர் நேரடி மேற்பார்வையில் 10 தனிப்படைகள் அமைக்கப்பட்டு விசாரணை நடத்தப்பட்டது.

அதில் மத்திய பிரதேச மாநிலம் தீவாஸ் மாவட்டத்தைச் சேர்ந்த அங்கித்ஜான்ஜா தலைமையிலான கொள்ளை கும்பலுக்கு இதில் தொடர்பு இருப்பது தெரிய வந்தது. அவர்களை தேடி 4 போலீஸ் தனிப்படைகள் மத்திய பிரதேச மாநிலத்திற்கு கடந்த 21-ந்தேதி புறப்பட்டு சென்றனர். கொள்ளை நடந்து 12 நாட்கள் ஆன நிலையில் இதுவரையில் கொள்ளையர்கள் குறித்து துப்பு கிடைக்கவில்லை. அதே போல செல்போன்களும் மீட்கப்படவில்லை.

கொள்ளையர்களை பிடிப்பதில், கிருஷ்ணகிரி மாவட்ட தனிப்படை போலீசாருக்கு மத்திய பிரதேச மாநில போலீசார் ஒத்துழைப்பு வழங்கவில்லை என கூறப்படுகிறது. கடந்த 2015-ம் ஆண்டு ஜனவரி மாதம் 24-ந் தேதி குந்தாரப்பள்ளி கூட்டுரோடு அருகே ராமாபுரத்தில் உள்ள பேங்க் ஆப் பரோடா வங்கியில் 6 ஆயிரத்து 300 பவுன் நகைகளை வட மாநில கொள்ளையர்கள், கொள்ளையடித்து சென்றனர்.

வங்கியில் உள்ள பாதுகாப்பு பெட்டியை கியாஸ் வெல்டிங் மூலம் உடைத்து நடந்த இந்த கொள்ளையில் 5 மாதங்களுக்கும் மேலாக தனிப்படை வட மாநிலங்களில் முகாமிட்டு குற்றவாளிகள் சிலரை பிடித்தனர். அந்த வழக்கிலும் கிருஷ்ணகிரி மாவட்ட போலீசாருக்கு வட மாநில போலீசார் ஒத்துழைப்பு தரவில்லை. அதே போல தற்போதும் நடந்துள்ளது. இதனால் ரூ.15 கோடி மதிப்பிலான செல்போன்கள் கொள்ளை போன வழக்கில் தொடர்புடைய குற்றவாளிகளை பிடிப்பதில் தனிப்படை போலீசாருக்கு பின்னடைவு ஏற்பட்டு உள்ளது.

காவேரிப்பட்டணம்:

காவேரிப்பட்டணம் போலீஸ் சிறப்பு சப்-இன்ஸ்பெக்டர் வேடி மற்றும் போலீசார், பீமனூர்-சுருளிஅள்ளி சாலையில் உள்ள ஒரு கோவில் அருகே ரோந்து சென்றனர். அப்போது அந்த வழியாக வந்த டிப்பர் லாரியை நிறுத்தி சோதனை செய்ததில் தென்பெண்ணை ஆற்றில் இருந்து மணல் கடத்தி வந்தது கண்டுபிடிக்கப்பட்டது. இதுதொடர்பாக போலீசார் வழக்குப்பதிவு செய்து டிரைவர் காரிமங்கலம் அருகே உள்ள பூசாரிக்கொட்டாய் பகுதியை சேர்ந்த வேல்மணி (வயது 32), உரிமையாளர் பாலக்கோடு சதாசிவம் டிரைவர் (49) ஆகிய 2 பேரையும் கைது செய்தனர். மேலும் மணலுடன் லாரியை போலீசார் பறிமுதல் செய்தனர்

ஓசூர்:

கிருஷ்ணகிரி மாவட்டம் ஓசூரில் முதல் சிப்காட் பகுதியில் தனியார் நிறுவனம் உள்ளது. இதில் வடமாநில தொழிலாளர்கள் பணியாற்றி வருகிறார்கள். இந்த நிலையில் ஒடிசா மாநிலத்தைச் சேர்ந்த தொழிலாளர்கள் மகேஷ்வர் (வயது 27), சரத்பேரா (35), தாசா நத்தா மாலிக் (50) உள்ளிட்டோர் ஒரு தொட்டியில் பழைய இரும்பு குழாய்களை ஓரிடத்தில் இருந்து மற்றொரு இடத்திற்கு மாற்றி கொண்டிருந்தனர்.

அப்போது பழைய தொட்டி சுவர் திடீரென இடிந்து விழுந்தது. இதில் சுவர் இடிபாடுகளுக்குள் சிக்கி மகேஷ்வர், சரத்பேரா உள்ளிட்ட 3 பேரும் படுகாயமடைந்தனர். இதில் சிறிது நேரத்தில் மகேஸ்வர் சம்பவ இடத்திலேயே பரிதாபமாக உயிரிழந்தார். இதனால் அதிர்ச்சி அடைந்த சக தொழிலாளர்கள் மற்ற 2 பேரையும் மீட்டு ஓசூர் அரசு ஆஸ்பத்திரியில் சேர்த்தனர். பின்னர் மேல் சிகிச்சைக்காக அவர்கள் அங்குள்ள தனியார் ஆஸ்பத்திரியில் சேர்க்கப்பட்டனர். அங்கு அவர்களுக்கு தீவிர சிகிச்சை அளிக்கப்படுகிறது.

இதுகுறித்து ஓசூர் சிப்காட் போலீஸ் நிலையத்திற்கு தகவல் தெரிவிக்கப்பட்டது. அதன்பேரில் போலீசார் சம்பவம் நடந்த தனியார் நிறுவனத்திற்கு சென்று சுவர் இடிந்து விழுந்து இறந்த மகேஸ்வரின் உடலை மீட்டு பிரேத பரிசோதனைக்காக ஓசூர் அரசு மருத்துவமனைக்கு அனுப்பி வைத்தனர். இந்த விபத்து குறித்து ஓசூர் சிப்காட் போலீசார் வழக்குப்பதிவு செய்து விசாரணை நடத்தி வருகிறார்கள். தனியார் நிறுவனத்தில் சுவர் இடிந்து விழுந்து வடமாநில தொழிலாளி பலியான சம்பவம் அந்த பகுதியில் சோகத்தை ஏற்படுத்தியது.

காரிமங்கலம்:

கிருஷ்ணகிரி மாவட்டம் காவேரிப்பட்டணம் ஹவுசிங் போர்டு பகுதியை சேர்ந்தவர் ரங்கநாதன் (வயது 53). இவருடைய உறவினர் ஓசூர் பகுதியை சேர்ந்தவர் கோவிந்தராஜ் (56). சலவை தொழிலாளிகள். இவர்கள் 2 பேரும் தர்மபுரி மாவட்டம் தடங்கம் கிராமத்தில் உறவினர் வீட்டு வளைகாப்பு நிகழ்ச்சியில் கலந்து கொள்ள மோட்டார் சைக்கிளில் வந்தனர்.

பின்னர் நிகழ்ச்சியை முடித்துவிட்டு நேற்று மாலை அவர்கள் 2 பேரும் மீண்டும் ஊருக்கு புறப்பட்டனர். மோட்டார் சைக்கிளை கோவிந்தராஜ் ஓட்டி சென்றார். பின்னால் ரங்கநாதன் அமர்ந்து இருந்தார். அப்போது காரிமங்கலம் அருகே கெரகோடஅள்ளி தேசிய நெடுஞ்சாலை பிரிவு சாலையில் அவர்கள் சென்று கொண்டு இருந்தனர். அப்போது கிருஷ்ணகிரியில் இருந்து தர்மபுரி நோக்கி சென்ற தனியார் பஸ், மோட்டார் சைக்கிள் மீது மோதியது.

இந்த விபத்தில் ரங்கநாதன், கோவிந்தராஜ் ஆகிய 2 பேரும் சம்பவ இடத்திலேயே பலியானார்கள். விபத்து குறித்த தகவல் அறிந்த காரிமங்கலம் போலீசார் விரைந்து சென்று 2 பேரின் உடல்களையும் மீட்டு பிரேத பரிசோதனைக்காக தர்மபுரி அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து காரிமங்கலம் போலீசார் வழக்குப்பதிவு செய்து விசாரணை நடத்தி வருகின்றனர். விபத்தில் உறவினர்கள் இறந்த சம்பவம் அந்த பகுதியில் சோகத்தை ஏற்படுத்தியது.