காஞ்சிபுரம்

மாமல்லபுரம்:

பிரதமர் நரேந்திர மோடி, சீன அதிபர் ஜின்பிங் ஆகியோர் வருகிற 12, 13-ந் தேதிகளில் மாமல்லபுரத்தில் சந்தித்து பேசுகிறார்கள்.

அப்போது அவர்கள் புராதன சின்னங்கள் உள்ள பகுதிகளான அர்சுனன் தபசு, பட்டர்பால், கடற்கரை கோயில், ஐந்துரதம் ஆகியவற்றை சுற்றிப் பார்க்கிறார்கள்.

இதையடுத்து மாமல்லபுரத்தை அழகுப்படுத்தும் பணிகள் மும்முரமாக நடந்து வருகிறது. மரக்கன்றுகள், புல்வெளிகள் அமைக்கப்படுகின்றன. அங்குள்ள சிலைகளுக்கு வர்ணம் பூசப்படுகின்றன.

மோடி -ஜி ஜின்பிங் பார்வையிடும் புராதன சின்னங்கள் உள்ள பகுதிகள் தற்போது வெடிகுண்டு நிபுணர்கள் கட்டுப்பாட்டுக்குள் வந்துள்ளது. அங்கு ஒவ்வொரு பகுதிகளிலும் வெடிகுண்டு நிபுணர்கள் தீவிர சோதனை மேற்கொண்டு வருகிறார்கள்.

மேலும் புரதான சின்னங்கள் பகுதி உள்ளே நுழையும் பணியாளர்கள், வழிகாட்டிகள், சுற்றுலா பயணிகள் என அனைவரையும் அவர்களது உடமைகளையும் போலீசார் மெட்டல் டிடெக்டர் கருவி மூலம் தீவிரமாக சோதனை செய்து வருகிறார்கள்.

அப்பகுதியில் கண்காணிப்பு கேமராக்கள் பொருத்தப்பட்டு பொதுப் பணித்துறை விருந்தினர் மாளிகையில் திறக்கப்பட்டுள்ள சிறப்பு கட்டுப்பாட்டு அறையில் இருந்து 24 மணி நேரமும் போலீசார் தீவிரமாக கண்காணித்து வருகிறார்கள்.

மாமல்லபுரத்தில் வாகன சோதனையிலும் போலீசார் தீவிரமாக ஈடுபட்டு வருகிறார்கள். தற்போது ஒரு இடத்தில் மட்டுமே வாகன சோதனை நடத்தப்பட்டு வருகிறது. அடுத்த சில தினங்களில் பல இடங்களில் சோதனை சாவடி அமைக்கப்பட்டு வாகன சோதனை நடத்தப்படுகிறது.

மாமல்லபுரத்தையொட்டி உள்ள கிழக்கு கடற்கரை கடலோர பகுதிகளிலும் பலத்த பாதுகாப்பு போடப்பட்டு இருக்கிறது.

மாமல்லபுரம், கோவளம் கடலோர பகுதிகளில் முழுமையாக பாதுகாப்பு வளையத்துக்குள் கொண்டு வரப்பட்டு இருக்கிறது.

கடற்படை வீரர்கள் தீவிரமாக கண்காணித்து வருகிறார்கள். இதே போல் விமானப்படையும் உஷார் படுத்தப்பட்டு இருக்கிறது. அவர்களும் கண்காணிப்பு பணிகளில் ஈடுபடுத்தப்பட உள்ளார்கள்.

இந்நிலையில் பாதுகாப்பு ஏற்பாடுகள் மற்றும் கண்காணிப்பு குறித்து மத்திய பாதுகாப்பு இயக்குனர் ஹரிகிருஷ்ண வர்மா, தமிழக பிரிவு கண்காணிப்பாளர் சுரேஷ்குமார், ஏ.எஸ்.பி. பத்திரிநாராயணன் ஆகியோர் ஆய்வுகளை மேற்கொண்டு வருகிறார்கள்.

செங்கல்பட்டு:

காஞ்சிபுரத்தைச் சேர்ந்தவர் கன்னியம்மாள் (வயது 65). இவருக்கு நேற்று நள்ளிரவு திடீரென நெஞ்சுவலி ஏற்பட்டது.

இதையடுத்து உடனடியாக 108 ஆம்புலன்சுக்கு தகவல் தெரிவித்தனர். ஆம்புலன்சு வந்ததும் அதில் கன்னி அம்மாளை ஏற்றி மேல் சிகிச்சைக்காக செங்கல்பட்டு அரசு ஆஸ்பத்திரிக்கு அழைத்து வந்து கொண்டு இருந்தனர்.

ஆம்புலன்சை டிரைவர் ஜெயக்குமார் (38) ஓட்டினார். உதவியாளராக தினகரன் இருந்தார். கன்னியம்மாளுடன் உறவினர் ஒருவரும் அம்புலன்சில் வந்தார்.

செங்கல்பட்டு அருகே ஆத்தூர் பகுதியில் காஞ்சிபுரம்-செங்கல்பட்டு சாலையில் வந்து கொண்டு இருந்த போது சாலையோரத்தில் நிறுத்தப்பட்டு இருந்த தனியார் கம்பெனி பஸ்சின் பின் பகுதியில் பயங்கரமாக மோதியது.

இதில் ஆம்புலன்சின் முன் பகுதி முழுவதும் நொறுங்கியது. அதில் இருந்த டிரைவர் ஜெயக்குமார், நோயாளி கன்னியம்மாள் ஆகியோர் சம்பவ இடத்திலேயே உடல் நசுங்கி பலியானார்கள்.

மேலும் ஆம்புலன்சில் இருந்த உதவியாளர் தினகரன் மற்றும் கன்னியம்மாளின் உறவினர் ஆகியோர் படுகாயம் அடைந்தனர். தகவல் அறிந்ததும் செங்கல்பட்டு டவுன் போலீசார் விரைந்து வந்து மீட்பு பணியில் ஈடுபட்டனர்.

படுகாயம் அடைந்த 2 பேரும் மேல் சிகிச்சைக்காக சென்னை அரசு ஆஸ்பத்திரியில் அனுமதிக்கப்பட்டு உள்ளனர். அவர்களுக்கு தீவிர சிகிச்சை அளிக்கப்படுகிறது.

இதுகுறித்து செங்கல்பட்டு தாலுக்கா போலீசார் வழக்குப்பதிவு செய்து விசாரணை நடத்தி வருகிறார்கள். இந்த விபத்தால் அப்பகுதியில் சிறிது நேரம் போக்குவரத்து பாதிக்கப்பட்டது.

ஆஸ்பத்திரிக்கு அழைத்து சென்றபோது பெண் நோயாளியும் ஆம்புலன்சு டிரைவரும் விபத்தில் பலியான சம்பவம் உறவினர்களை சோகம் அடையச் செய்து உள்ளது.

காஞ்சிபுரம்:

காஞ்சிபுரத்தை அடுத்த பிள்ளையார் பாளையம் மடம் தெருவைச் சேர்ந்தவர் சதீஷ்குமார் (28). கடந்த 2 மாதத்துக்கு முன்பு அவர் செய்யாறு வேல் சோமசுந்தரம் நகர் பகுதிக்கு சென்று குடும்பத்துடன் வசித்து வந்தார்.

நேற்று காலை திருமணத் தடை நீங்குவதற்காக கோவிலுக்கு சென்று தீபம் ஏற்றி வழிபட்டார். பின்னர், செய்யாறு டவுன் புதிய காஞ்சிபுரம் சாலையில் உள்ள திரையரங்கம் அருகே மோட்டார் சைக்கிளை நிறுத்திவிட்டு டீ குடித்துக் கொண்டிருந்தார்.

அப்போது காரில் வந்த 10 பேர் கும்பல் சதீஷ்குமாரை பயங்கர ஆயுதங்களுடன் சுற்றி வளைத்தனர். உடனே சதீஷ்குமார், அங்கு வந்த தனியார் பஸ்சில் ஏறினார்.

பின்னால் ஏறிய கொலை கும்பல் சதீஷ்குமாரை இருக்கையில் வைத்தே கொடூரமாக வெட்டிக் கொன்றனர். பின்னர் அவர்கள் காரில் தப்பிச் சென்றுவிட்டனர்.

இதுகுறித்து செய்யாறு போலீசார் விசாரணை நடத்தி வருகிறார்கள். கொலை கும்பல் தப்பிச் சென்ற காரின் பதிவு எண் அங்குள்ள பெட்ரோல் பங்கின் கேமராவில் பதிவாகி உள்ளது. அந்த கார் யாருடையது என்பது பற்றி விசாரணை நடக்கிறது.

இந்த நிலையில் கொல்லப்பட்ட சதீஷ்குமார் காஞ்சிபுரத்தை சேர்ந்த பிரபல ரவுடியான ஸ்ரீதரின் கூட்டாளியாக இருந்தது தெரிய வந்துள்ளது.

வெளிநாட்டுக்கு தப்பிச் சென்று தலைமறைவாக இருந்த ரவுடி ஸ்ரீதர் கடந்த 2017-ம் ஆண்டு கம்போடியா நாட்டில் உள்ள ஓட்டலில் தற்கொலை செய்து கொண்டார்.

ஸ்ரீதரின் மறைவுக்கு பின்னர் அவருடன் நெருக்கமாக இருந்த தினேஷ், தணிகா ஆகியோர் தனித்தனி கோஷ்டிகளாக செயல்பட்டனர். அவர்களிடையே யார் பெரியவர்? என்பதில் அடிக்கடி மோதல் ஏற்பட்டு வந்தது.

இதில் தினேஷ் கோஷ்டியில் சதீஷ்குமார் இருந்தார். மேலும் கடந்த சில மாதங்களுக்கு முன்பு தணிகா கோஷ்டியை சேர்ந்த சிவா என்பவரை கொலை செய்ய முயற்சி நடந்தது.

இந்த கொலையில் சதீஷ்குமாருக்கு தொடர்பு இருந்ததாக தெரிகிறது. இதனால் சதீஷ்குமாரை பழிக்குப்பழி வாங்க எதிர் கோஷ்டியினர் திட்டமிட்டு வந்தனர்.

இந்த நிலையில் செய்யாறில் பஸ்சுக்குள் வைத்து சதீஷ்குமாரை மர்ம கும்பல் கொடூரமாக வெட்டி கொலை செய்து உள்ளது.

எனவே ரவுடிகளுக்கு இடையே ஏற்பட்ட கோஷ்டி மோதலில் இந்த கொலை நடந்து இருக்கலாம் என்று போலீசார் சந்தேகிக்கிறார்கள். இதற்கிடையே 3 பேரை போலீசார் பிடித்துள்ளனர். அவர்களிடம் தீவிர விசாரணை நடக்கிறது.

ஆலந்தூர்:

திண்டுக்கல்லை சேர்ந்தவர் முகமது சாகிப். கால்டாக்சி டிரைவர். இவர் கிண்டியில் தங்கி தனியார் கால்டாக்சி நிறுவனத்துடன் ஒப்பந்தம் செய்து காரை ஓட்டி வந்தார்.

கடந்த சில நாட்களுகு முன்பு சென்னை விமான நிலையத்தில் இருந்து செல்ல பயணி ஒருவர் காரை முன் பதிவு செய்தபோது அதனை டிரைவர் முகமது சாகிப் ரத்து செய்துவிட்டதாக கூறப்படுகிறது.

இதையடுத்து முகமது சாகிப்பை கால்டாக்சி நிர்வாகத்தினர் அழைத்து விசாரித்தனர். அப்போது தகராறு ஏற்பட்டது. இதுபற்றி முகமது சாகிப் கிண்டி போலீசில் புகார் செய்தார். இதேபோல் கால்டாக்சி நிர்வாகத்தினரும், முகமது சாகிப் மீது புகார் செய்தனர். இதுபற்றி போலீசார் விசாரணை நடத்தி வந்தனர்.

இந்தநிலையில் நேற்று இரவு டிரைவர் முகமது சாகிப் கிண்டியில் உள்ள கவர்னர் மாளிகை முன்பு வந்தார். திடீரென அவர் தனது உடலில் பெட்ரோலை ஊற்றி தீக்குளிக்க முயன்றார்.

இதனைப்பார்த்து அதிர்ச்சி அடைந்த பாதுகாப்புக்கு நின்ற போலீசார் அவரை மடக்கி பிடித்து தடுத்தனர். பின்னர் முகமது சாகிப்பை மீட்டு கிண்டி போலீசாரிடம் புகார் செய்து இருப்பதாக குற்றம்சாட்டினர்.

இதற்கிடையே கவர்னர் மாளிகை முன்பு தற்கொலைக்கு முயன்ற முகமது சாகிப் மீது போலீசார் வழக்குப்பதிவு செய்து கைது செய்தனர். பின்னர் அவரை கோர்ட்டில் ஆஜர்படுத்தி புழல் சிறையில் அடைத்தனர்.

மதுராந்தகம்:

மதுராந்தகத்தை அடுத்த கருங்குழி பஜனை கோவில் தெருவில் வசித்து வருபவர் லூர்து டேவிட். தாம்பரத்தில் உள்ள தனியார் கம்பெனியில் வேலை பார்த்து வருகிறார்.

இவரது மனைவி அந்தோணி அம்மாள் தனியார் பள்ளியில் தலைமை ஆசிரியையாக உள்ளார். நேற்று மாலை லூர்து டேவிட் வேலைக்காக சென்று விட்டார். இரவு அந்தோணி அம்மாள் தனது மகன், மகளுடன் வீட்டை பூட்டிவிட்டு அறையில் தூங்கினார்.

நள்ளிரவில் வந்த மர்ம கும்பல் வீட்டின் பூட்டை உடைத்து உள்ளே புகுந்தனர். பீரோவில் இருந்த 75 பவுன் நகை, வெள்ளி பொருட்களை அள்ளி தப்பிச்சென்று விட்டனர்.

அறையில் தூங்கிய அந்தோணி அம்மாளுக்கு வீட்டில் கொள்ளை நடந்து இருப்பது தெரியவில்லை. அதிகாலை எழுந்த போது தான் கொள்ளையர்கள் நகையை எடுத்து சென்றிருப்பது தெரியவந்தது.

இதுகுறித்து மதுராந்தகம் போலீசார் விசாரணை நடத்தி வருகிறார்கள்.

ஆலந்தூர்:

ஆதம்பாக்கம்- மேடவாக்கம் சாலை பகுதியில் ஒரு வாலிபர் சில தினங்களாக கலாட்டா செய்து வந்தார். இது குறித்து போலீசாருக்கு தகவல் கொடுக்கப்பட்டது.

இந்த நிலையில் ஆதம்பாக்கத்தில் உள்ள ஒரு கடையில் புகுந்து அந்த வாலிபர் ரகளை செய்தார். அதை தடுக்க முயன்றவர்களை உருட்டுக்கட்டையால் தாக்கினார். இதில்,முருகன், மூர்த்தி ஆகியோர் காயம் அடைந்தனர். உதய மூர்த்தி ஆபத்தான நிலையில் ஆஸ்பத்திரியில் சேர்க்கப்பட்டுள்ளார்.

கலாட்டா செய்த வாலிபரை ஆதம்பாக்கம் போலீசார் கைது செய்தனர். அவரது பெயர் குருநாயக் (30), ஒடிசாவை சேர்ந்தவர். அவரை கோர்ட்டில் ஆஜர்படுத்தி ஜெயிலில் அடைத்தனர்.