காஞ்சிபுரம்

காஞ்சீபுரம்:

தமிழக அரசு வெளியிட்ட செய்திக்குறிப்பில் கூறியிருப்பதாவது:-
அகில இந்திய அளவிலும், பன்னாட்டு அளவிலும் நடைபெறும் பல்வேறு விளையாட்டு போட்டிகளில் தமிழகத்தை சேர்ந்த விளையாட்டு வீரர்கள் மற்றும் வீராங்கனைகள் பங்கு கொண்டு வெற்றி வாகை சூடும் வகையில் பல்வேறு முனைப்பான நடவடிக்கைகளை தமிழக அரசு எடுத்து வருகிறது.

அந்த வகையில் காஞ்சீபுரம் மாவட்ட விளையாட்டு வளாகத்தில் பழுதடைந்த நிலையில் இருந்த கட்டிடங்கள் மற்றும் விளையாட்டு உள்கட்டமைப்புகளை இடித்துவிட்டு, அந்த இடத்தில் ரூ.15 கோடியே 62 லட்சத்து 27 ஆயிரம் மதிப்பீட்டில் நவீன தரத்துடன் கட்டப்பட்டுள்ள கூட்ட அரங்கம், அலுவலர் அறை, பயிற்றுனர் அறை, அலுவலக அறை, ஆண்கள், பெண்கள் உடை மாற்றும் அறை, சமையலறை, உணவருந்தும் கூடம், தங்குமிட வசதி, கணினி அறை, நூலகம், பதிவறை, இருப்பு அறை, முதல் உதவி அறை, கழிப்பறை உள்ளிட்ட வசதிகளுடன் கூடிய விளையாட்டு வளாக நிர்வாக கட்டிடம், பார்வையாளர் மாடத்துடன் கூடிய திறந்தவெளி விளையாட்டரங்கம், கூடைப்பந்து மற்றும் கையுந்து பந்து ஆடுகளங்களை முதல்-அமைச்சர் எடப்பாடி பழனிசாமி சென்னை தலைமை செயலகத்தில் இருந்து காணொலி காட்சி மூலம் திறந்து வைத்தார்.

இதேபோல, செங்கல்பட்டு மாவட்டம், மேலக்கோட்டையூரில் அமைந்துள்ள தமிழ்நாடு உடற்கல்வியியல் மற்றும் விளையாட்டு பல்கலைக் கழக வளாகத்தில் சைக்கிளிங் பயிற்சி மற்றும் போட்டிகள் நடத்த ஏதுவாக ரூ.6 கோடியே 97 லட்சத்து 50 ஆயிரம் மதிப்பீட்டில் அமைக்கப்பட்டுள்ள 333 மீட்டர் சுற்றளவு கொண்ட சைக்கிளிங் வெலோடிரம், பார்வையாளர் மாடம், விளையாட்டு வீரர்கள் மற்றும் வீராங்கனைகளுக்கு தனித்தனியே தங்குமிட வசதி, சைக்கிள் பட்டறை, சைக்கிள் இருப்பு அறை, உடற்பயிற்சிக் கூடம், பயிற்றுனர் அறை, அலுவலக அறை, கழிப்பறை உள்ளிட்ட வசதிகளுடன் கூடிய நிர்வாகக் கட்டிடம், நீலகிரி மாவட்டம் உதகமண்டலத்தில் உள்ள மாவட்ட விளையாட்டு வளாகத்தில் மத்திய, மாநில அரசுகளின் பங்களிப்புடன் ரூ.4 கோடியே 84 லட்சத்து 50 ஆயிரம் மதிப்பீட்டில் அமைக்கப்பட்டுள்ள ஆறு வரிசைகள் கொண்ட 400 மீட்டர் செயற்கை இழை ஓடுதளப்பாதை என ஒட்டுமொத்தமாக ரூ.27 கோடியே 44 லட்சத்து 27 ஆயிரம் மதிப்பீட்டில் கட்டப்பட்டுள்ள விளையாட்டு கட்டமைப்புகளையும் எடப்பாடி பழனிசாமி திறந்து வைத்தார். இவ்வாறு அதில் கூறப்பட்டு உள்ளது.

செங்கல்பட்டு:

சென்னையில் கடந்த மாதம் கொரோனாவால் உயிரிழந்த டாக்டரின் உடலை புதைக்க எதிர்ப்பு தெரிவித்து, சிலர் போராட்டத்தில் ஈடுபட்டனர். அப்போது உடலை கொண்டு வந்த ஆம்புலன்சு மீது கல்வீச்சும் நடந்தது. இது தொடர்பாக 14 பேர் மீது வழக்கு பதிவு செய்யப்பட்டு உள்ளது.

இந்த நிலையில் உடல்நலக்குறைவால் இறந்த வாலிபரின் உடலை புதைக்க எதிர்ப்பு தெரிவித்து, பொதுமக்கள் வாக்குவாதத்தில் ஈடுபட்ட சம்பவம் மீண்டும் நடந்துள்ளது.
அசாம் மாநிலத்தை சேர்ந்த நஜ்மல் (வயது 25) என்பவர் திருப்போரூரில் தங்கி அங்குள்ள தனியார் நிறுவனத்தில் வேலை பார்த்து வந்தார். ஊரடங்கு காரணமாக அவர் அறையிலேயே முடங்கியிருந்தார். கடந்த வாரம் அவருக்கு திடீரென உடல்நலக்குறைவு ஏற்பட்டது.

அவரை உடனடியாக செங்கல்பட்டு ஆஸ்பத்திரியில் சேர்த்தனர். அவருக்கு கொரோனா பரிசோதனையும் செய்யப்பட்டது. இதில் அவருக்கு நோய் தொற்று எதுவுமில்லை. சிறுநீரக பாதிப்பு இருந்ததாக தெரிகிறது.

இதற்கிடையே நேற்று முன்தினம் உடல்நிலை மோசமடைந்த நஜ்மல் சிகிச்சை பலனின்றி பரிதாபமாக இறந்தார். இதுபற்றி அவரது குடும்ப த்தினருக்கு தகவல் தெரிவிக்கப்பட்டது.

பின்னர் நஜ்மலின் உடலை செங்கல்பட்டு அருகே திருமணி பகுதியில் உள்ள பெத்தேல் நகர் சுடுகாட்டில் புதைக்க ஆம்புலன்சில் எடுத்துச் சென்றனர்.

சுடுகாடு அருகே ஆம்புலன்ஸ் வந்து நின்றதும், அப்பகுதி மக்கள் ஏராளமானோர் அங்கு திரண்டு வந்தனர். அவர்கள் கொரோனாவால் இறந்த நோயாளியை புதைக்க எடுத்து வந்திருப்பதாக நினைத்து, கடும் வாக்குவாதத்தில் ஈடுபட்டனர். இதனால் அப்பகுதியில் பெரும் பரபரப்பு ஏற்பட்டது.

அவர்களிடம் போலீசார் பேச்சுவார்த்தை நடத்தினர். இறந்த வாலிபருக்கு கொரோனா தொற்று இல்லை என்பதை தெரிவித்தனர். எனினும் நஜ்மல் உடலை அங்கு புதைக்க தொடர்ந்து எதிர்ப்பு தெரிவிக்கப் பட்டது.

இதையடுத்து, செங்கல்பட்டு டவுனில் உள்ள முஸ்லிம்கள் உடல் அடக்கப்படும் இடத்தில் நஜ்மலின் உடல் கொண்டு செல்லப்பட்டு புதைக்கப்பட்டது.

காஞ்சீபுரம்:

காஞ்சீபுரம் மாவட்டத்தில் பிளஸ்-2 தேர்வு முடிந்து, விடைத்தாள்கள் திருத்தும் மையங்களான காஞ்சீபுரம் எஸ்.எஸ்.கே.வி. பெண்கள் மெட்ரிக் மேல்நிலை பள்ளி மற்றும் மாமல்லன் மெட்ரிக் மேல்நிலைப்பள்ளி போன்ற மையங்களில் நாளை(புதன்கிழமை) முதல் விடைத்தாள் திருத்தும் பணிகள் நடைபெறவுள்ளது. அதையொட்டி, விடைத்தாள் திருத்தும் மையமான காஞ்சீபுரம் மாமல்லன் மெட்ரிக் மேல்நிலைப்பள்ளியில் செய்யப்பட்டுள்ள அடிப்படை வசதிகளை மாவட்ட கலெக்டர் பொன்னையா பார்வையிட்டு ஆய்வு செய்தார்.

பின்னர் அவர் கூறியதாவது:-

காஞ்சீபுரம் மாவட்டத்தில் மொத்தம் 52 ஆயிரம் விடைத்தாள் திருத்தும் பணிகள் காஞ்சீபுரம் எஸ்.எஸ்.கே.வி.பெண்கள் மேல்நிலைப்பள்ளி மற்றும் மாமல்லன் மெட்ரிக் மேல்நிலைப்பள்ளி போன்ற இரு மையங்களில் மே மாதம் 27-ந்தேதி முதல் தொடங்குகிறது. 545 ஆசிரியர்கள் விடைத்தாள் திருத்தும் பணியில் ஈடுபடவுள்ளனர். மேலும் 64 கூர்ந்தாய்வு அலுவலர்கள், 64 முதன்மை தேர்வு அலுவலர்கள் விடைத்தாள் திருத்தும் பணியை கண்காணிக்க உள்ளனர். இவர்களுக்கு உடல் வெப்பநிலை சோதனை, கைகளை கிருமிநாசினி கொண்டு கழுவிய பின்னரே மையத்தின் உள்ளே அனுமதிக்கப்படுவர். மேலும் நகராட்சி மூலம் மையங்களுக்கு கிருமிநாசினி தெளித்து சுத்தம் செய்யப்படுகிறது. இவ்வாறு அவர் கூறினார்.

இந்த ஆய்வின் போது, மாவட்ட வருவாய்த்துறை அதிகாரி சுந்தரமூர்த்தி, மாவட்ட கல்வி அதிகாரி மகேஸ்வரி, நகராட்சி ஆணையர் மகேஸ்வரி, காஞ்சீபுரம் தாசில்தார் பவானி, நகராட்சி என்ஜினீயர் மகேந்திரன் உள்பட பலர் உடன் இருந்தனர்.

காஞ்சீபுரம்:

தமிழ்நாடு தீயணைப்பு மீட்பு பணிகள் துறை சார்பில், தீயணைப்பு துறையில் உள்ள நவீன கருவிகள் மூலம் கொரோனா நோய் பரவுதலை தடுக்கும் விதத்தில் கிரிமி நாசினி தெளிக்க மாவட்ட நிர்வாகத்தினருக்கு ஒத்துழைக்க அறிவுறுத்தபட்டதன்பேரில் காஞ்சீபுரம் மாவட்ட தீயணைப்பு மீட்புபணிகள் துறையினர், காஞ்சீபுரம் பெருநகராட்சியுடன் இணைந்து காஞ்சீபுரம் நகர் முழுவதும் நவீன எந்திரம் மூலம் கிருமி நாசினி தெளிக்கப்பட்டு வருகிறது.

அதன்படி மாவட்ட தீயணைப்பு அலுவலர் குமார், உதவி மாவட்ட அலுவலர் திருநாவுக்கரசு ஆகியோர் தலைமையில் 10-க்கும் மேற்பட்ட தீயணைப்பு வீரர்கள் காஞ்சீபுரம் நகரின் முக்கிய வீதிகளான ராஜவீதிகள், பஸ் நிலையம், அன்னை இந்திராகாந்தி சாலை, சங்கர மடம் சாலை உள்ளிட்ட பொதுமக்கள் அதிகம் நடமாடும் பகுதிகளில் அதிவேக மற்றும் ஸ்பிரிங்களர் தெளிப்பான் என்ற நவீன கருவிகள் மூலம் கிருமி நாசினி மருந்து தெளித்து வருகின்றனர்.