காஞ்சிபுரம்

காஞ்சிபுரம்:

காஞ்சிபுரம் மாவட்டத்தில் கொரேனா நோய்த்தொற்று பரவுதலை தடுக்கும் விதத்தில் பல்வேறு நடவடிக்கைகள் எடுக்க மாவட்ட கலெக்டர் பொன்னையா உத்தரவிட்டு உள்ளார்.

இதைத்தொடர்ந்து காஞ்சிபுரம் பெரு நகராட்சி கமி‌ஷனர் மகேஸ்வரி காஞ்சிபுரம் காந்தி சாலை, விளக்கடி கோயில் தெரு, மேட்டுத்தெரு, வள்ளல் பச்சையப்பன் தெரு ஆகிய பகுதிகளில் உள்ள நகைக்கடை, சைக்கிள் விற்பனை நிலையம், பழக் கடை, ஜியோ விற்பனை நிலையம் உள்ளிட்ட கடைகளில் ஆய்வு மேற் கொண்டார். அப்போது சமூக இடை வெளியை முறையாக பின் பற்றாத 11 கடைகளுக்கு சீல் வைத்து எச்சரித்தார்.

இதேபோல் காஞ்சிபுரம் வட்டாட்சியர் பவானி துணை வட்டாட்சியர் நடராஜன் மற்றும் பெரு நகராட்சி ஊழியர்கள் இணைந்து மாவட்ட கலெக்டர் அலுவலகம் அருகே நகர சாலைகளில் இருசக்கர வாகனங்களில் முகக்கவசம் அணியாமல் வந்தவர்களுக்கு ரூ.100 அபராதம் விதித்தனர்.

ஒரேநாளில் 750 பேருக்கு அபராதம் விதிக்கப்பட்டது. இதன்மூலம் ரூ. 75ஆயிரம் அபராதமாக வசூலிக்கப்பட்டது.

மதுராந்தகம்:

செய்யூர் அருகே உள்ள பெருக்கரணை ஊராட்சியில் சுமார் 500-க்கும் மேற்பட்ட குடும்பத்தினர் வசித்து வருகின்றனர்.

இந்த ஊராட்சியில் கடந்த மூன்று நாட்களாக குடி தண்ணீர் வினியோகிக்கப்படவில்லை. இதனால் அப்பகுதி மக்கள் கடும் அவதி அடைந்தனர். இது பற்றி சம்பந்தப்பட்ட அதிகாரிகளிடம் தெரிவித்தும் நடவடிக்கை எடுக்க வில்லை என்று தெரிகிறது.

தொடர்ந்து குடிநீர் வழங்கப்படாததால் அப்பகுதி மக்கள் பெரும் சிரமம் அடைந்தனர். இதனால் ஆத்திரம் அடைந்த பெண்கள் உள்பட சுமார் 50-க்கும் மேற்பட்டோர் காலி குடங்களுடன் குடிதண்ணீர் கேட்டு அப்பகுதியில் திடீரென ஆர்ப்பாட்டத்தில் ஈடுபட்டனர்.

தகவல் அறிந்ததும் வட்டார வளர்ச்சி அலுவலர்கள் பரணி மற்றும் நிர்மலன் ஆகியோர் விரைந்து வந்து பொது மக்களிடம் பேச்சு வார்த்தை நடத்தினர். உடனடியாக குடிநீர் பிரச்சினையை தீர்க்க நடவடிக்கை எடுக்கப்படும் என்று உறுதி அளித்தனர்.

இதையடுத்து போராட்டத்தில் ஈடுபட்டவர்கள் அங்கிருந்து கலைந்து சென்றனர். பின்னர், ஒரு மணி நேரத்தில் மின் மோட்டார் சீரமைத்து பொது மக்களுக்கு குடிநீர் வழங்கப்பட்டது.