ஈரோடு

தாளவாடி:

ஈரோடு மாவட்டம் சத்தியமங்கலம் வனப்பகுதியில் உள்ள ஊர் தாளவாடி. இங்குள்ள பூஜைகவுடர் வீதியை சேர்ந்தவர் சித்தராஜ் (வயது 30). தொழிலாளி.

இவரது மனைவி பெயர் லாவண்யா (28). திருமணம் ஆகி 2 ஆண்டே ஆகிறது. 1½ வயதில் ஒரு பெண்குழந்தை உள்ளது.

இன்று காலை 7 மணி அளவில் சித்தராஜ் இயற்கை உபாதை கழிப்பதற்காக வீட்டில் இருந்து அருகே உள்ள பகுதிக்கு சென்றார்.

அப்போது மறைந்து இருந்த ஒரு காட்டு பன்றி திடீரென ஆவேசமாக ஓடிவந்து அவரது தொடை பகுதியில் கடித்துதூக்கி வீசியது. இதில் தூக்கி வீசப்பட்ட அவர் படுகாயத்துடன் சத்தம் போட்டபடி துடித்துக் கொண்டிருந்தார்.

இதை கண்ட அக்கம் பக்கத்தினர் உயிருக்கு போராடிக்கொண்டிருந்த சித்தராஜை மீட்டு தாளவாடியில் உள்ள அரசு ஆஸ்பத்திரியில் சேர்த்தனர்.

ஆனால் அங்கு சிகிச்சை பலனின்றி அவர் பரிதாபமாக இறந்தார். இதுகுறித்து தாளவாடி போலீசார் விசாரித்து வருகிறார்கள். வனத்துறையினரும் சம்பவ இடத்துக்கு சென்று பார்வையிட்டனர்.

காட்டு பகுதிக்குள் திரியும் காட்டு பன்றிகள் தற்போது தாளவாடி ஊருக்குள்ளேயே புகுந்துவிடுகிறது. ஏற்கனவே பலபேரை விரட்டி கடித்துள்ள காட்டுபன்றியால் இன்று ஒரு உயிர் பறிபோய் உள்ளது எனவே ஊருக்குள் காட்டு பன்றிகளை வரவிடாமல் வனத்துறையினர் நடவடிக்கை எடுக்க வேண்டும். என தாளவாடி பகுதி மக்கள் கேட்டுக்கொண்டு உள்ளனர்.

ஈரோடு:

ஈரோடு பகுதியை சேர்ந்த 17 வயது சிறுமி ஒருவர் கடந்த 2 தினங்களுக்கு முன் உடல் நலக்குறைவால் ஈரோடு அரசு ஆஸ்பத்திரியில் சேர்க்கப்பட்டார்.

அந்த சிறுமியை டாக்டர்கள் பரிசோதித்த போது அந்த பெண் கர்ப்பம் தரித்திருந்தார். இதை கண்டு அதிர்ச்சி அடைந்த டாக்டர்கள் ஈரோடு மகளிர் போலீசில் புகார் செய்தனர்.

இது குறித்து மகளிர் போலீசார் அந்த சிறுமியிடம் விசாரணை நடத்திய போத அந்த சிறுமி கூறியதாவது:-

சிவகிரி பகுதியை சேர்ந்த வாழை தோட்டம் கார வலசு ஜே.ஜே. நகரை சேர்ந்த சண்முகம் என்பவர் என்னிடம் பழகி ஆசை வார்த்தை கூறி என்னிடம் நெருங்கி பழகினார். திருமணம் செய்வதாக கூறி என்னிடம் உல்லாசமாக இருந்தார். இதில் நான் கர்ப்பமாகி இருக்கிறேன்.

இவ்வாறு அவர் கூறினார்.

இதைத் தொடர்ந்த போலீசார் அடுத்த கட்ட நடவடிக்கை எடுத்தனர். சிறுமி கொடுத்த வாக்குமூலத்தின் அடிப்படையில் வழக்குப் பதிவு செய்து சிறுமி கர்ப்பத்துக்கு காரணமான வாலிபர் சண்முகத்தை கைது செய்தனர்.

அவரிடம் போலீசார் தொடர்ந்து விசாரணை நடத்தி வருகிறார்கள்.

அந்தியூர்:

அந்தியூர் 7-வது வார்டில் உள்ள சிவசக்தி நகரில் சுமார் 100 குடும்பங்கள் உள்ளது. இங்கு கடந்த 2 நாட்களாக குடிநீர் வரவில்லையாம். இதனால் அப்பகுதி மக்கள் இன்று காலை திடீரென அந்தியூர் பத்ரகாளியம்மன் கோவில் முன் திடீர் சாலை மறியல் போராட்டத்தில் ஈடுபட்டனர்.

காலிகுடங்களுடன் பெண்கள் நடுரோட்டில் சாலைமறியலில் ஈடுபட்டதால் பரபரப்பு ஏற்பட்டது. இதனால் போக்குவரத்தும் பாதிக்கப்பட்டது.

இது பற்றி தகவல் கிடைத்ததும் அந்தியூர் போலீஸ் சப்- இன்ஸ்பெக்டர் கிருஷ்ணமூர்த்தி தலைமையில் போலீசார் விரைந்து சென்றனர். மறியல் நடத்திய பெண்ணிடம் போலீசார் பேச்சுவார்த்தை நடத்தினர்.

மேலும் அந்தியூர் பேரூராட்சி செயல் அலுவலர் வில்லியம் ஏசுதாசும் அங்கு வந்தார்.

“வெள்ளம் காரணமாக பம்ப்பிங் தொட்டி (கிணறு) பகுதியில் சேறும் சகதியும் அடைத்து உள்ளது. இதனால் குடிநீர் வினியோகம் செய்யப்படவில்லை. இவை சரிசெய்யப்பட்டு விரைவில் குடிநீர் வழங்கப்படும்” என்று வில்லியம் ஏசுதாஸ் கூறினார். இதையொட்டி பெண்கள் சாலை மறியலை கைவிட்டு கலைந்து சென்றனர்.

அந்தியூர்:

ஈரோடு மாவட்டம் அந்தியூர் அருகே வரட்டுப்பள்ளம் அணை வழியாக பர்கூர் கிழக்கு மலைப்பாதையில் கர்நாடக மாநிலம் மைசூர் செல்லும் சாலை உள்ளது.

இன்று காலை காலை 5.30 மணி இந்த வழியாக அந்தியூரில் இருந்து தேவர்மலை, மடம் ஆகிய ஊர்களுக்கு செல்லம் அரசு பஸ் சென்றது. அந்த பஸ்சின் டிரைவராக திருநாவுக்கரசு, கண்டக்டராக குணசேகரன் ஆகியோர் இருந்தனர். பஸ்சில் 10 பயணிகள் இருந்தனர்.

மலைப் பாதையின் முதல் வளைவில் சென்றபோது அங்கு ஒற்றை யானை ஒன்று நின்றது.

நடுரோட்டில் அந்த யானை நின்றதால் அதிர்ச்சி அடைந்த டிரைவர் பஸ்சை சற்று தூரத்தில் நிறுத்தினார். ஆனால் யானை அங்கிருந்து செல்வதாக இல்லை.

வெகுநேரமாக நடுரோட்டில் அந்த யானை வாலை ஆட்டிக்கொண்டே நின்றது. இதனால் அந்த வழியாக போக்குவரத்து பாதிப்பு ஏற்பட்டது.

அரசு பஸ்சுக்கு பின்னால் பால் வாகனம், டிராவல்ஸ் வாகனம் உள்பட 5-க்கும் மேற்பட்ட வாகனங்கள் அணிவகுத்து நின்றன.

காலை 6.45 மணி வரை வாகனங்கள் செல்ல முடியாத நிலை ஏற்பட்டது. பஸ்சில் இருந்த பயணிகளும், மற்ற வாகனங்களில் இருந்தவர்களும் யானை வந்து தாக்கிவிடுமோ என்ற அச்சத்தில் இருந்தனர்.

ஆனால் ஒரு வழியாக 6.45 மணி அளவில் அந்த யானை தானாகவே நடுரோட்டில் இருந்து வனப்பகுதிக்குள் சென்றது. இதையடுத்து அரசு பஸ் உள்ளிட்ட வாகனங்கள் புறப்பட்டு சென்றன. பஸ் பயணிகளும், வாகன ஓட்டிகளும் நிம்மதி அடைந்தனர். 

மொடக்குறிச்சி:

எழுமாத்தூரில் பாரதியார் பல்கலைக்கழக கலை அறிவியல் கல்லூரி உள்ளது. இங்கு ஏராளமான மாணவ-மாணவிகள் படித்து வருகிறார்கள். இந்த கல்லூரியில் கொடுமுடி நடுப்பாளையம் அருகே உள்ள சாணாம்புதூரை சேர்ந்த தினேஷ்குமார் (வயது 20) என்பவர் கம்ப்யூட்டர் சயின்ஸ் 3-ம் ஆண்டு படித்து வந்தார்.

கடந்த சில நாட்களுக்கு முன்பு கல்லூரியில் மாணவர்கள் 2 பிரிவாக பிரிந்து தகராறில் ஈடுபட்டுள்ளார்கள். இது சம்பந்தமாக தினேஷ்குமார் கல்லூரியில் இருந்து இடைநீக்கம் (சஸ்பெண்டு) செய்யப்பட்டுள்ளார். இதனால் மனம் உடைந்து காணப்பட்ட அவர் வீட்டில் தூக்குப்போட்டு தற்கொலை செய்து கொண்டார்.

இதுபற்றி அறிந்ததும் கல்லூரி மாணவ-மாணவிகள் ஆத்திரம் அடைந்தனர். வகுப்புகளை புறக்கணித்துவிட்டு வந்து கல்லூரி முன்பு ஆர்ப்பாட்டத்தில் ஈடுபட்டார்கள்.

ஈரோடு-முத்தூர் ரோட்டில் உள்ள எழுமாத்தூர் பஸ் நிறுத்தம் அருகே ரோட்டில் உட்கார்ந்து சாலை மறியலில் ஈடுபட்டார்கள். இதனால் அந்த வழியாக போக்குவரத்து பாதிக்கப்பட்டது.

இதுபற்றிய தகவல் கிடைத்ததும் போலீசார் விரைந்து சென்று மறியலில் ஈடுபட்ட மாணவ-மாணவிகளுடன் பேச்சுவார்த்தையில் ஈடுபட்டார்கள்.

தினேஷ்குமார் மீது பொய்யான புகார் கூறி இடைநீக்கம் செய்துள்ளார்கள் என்றும் தினேஷ்குமார் சாவுக்கு காரணமான கல்லூரி முதல்வர் மற்றும் பேராசிரியர்கள் மீது நடவடிக்கை எடுக்க வேண்டும் என்றும் மாணவ-மாணவிகள் கூறினர்.

அவர்களிடம் முழுமையாக விசாரணை நடத்தி சம்பந்தப்பட்டவர்கள் மீது நடவடிக்கை எடுப்போம் என போலீசார் தெரிவித்தனர். இதனால் மாணவர்கள் கலைந்து சென்றனர்.

இந்த நிலையில் இன்றும் மாணவ-மாணவிகள் போராட்டத்தில் ஈடுபட்டனர். கல்லூரியை புறக்கணித்த அவர்கள் எழுமாத்தூரில் கூடினர். அவர்களை போலீசார் கலைந்து போகச்செய்தனர்.

இதையடுத்து அவர்கள் 2 வேன்கள் பிடித்து ஈரோடு கலெக்டர் அலுவலகத்துக்கு புறப்பட்டனர். கலெக்டரிடம் மனு கொடுக்க வந்தனர். அங்கு சென்று கலெக்டர் அலுவலகத்தில் மனு கொடுத்தனர்.

அந்த மனுவில் தினேஷ் குமார் சாவுக்கு காரணமான முதல்வர் மற்றும் 4 பேராசிரியர்கள் மீது நடவடிக்கை எடுத்து அவர்களை சஸ்பெண்டு செய்ய வேண்டும்.

தினேஷ்குமார் இறுதி சடங்குக்கு சென்ற 10 மாணவர்களை சஸ்பெண்டு செய்துள்ளனர். அந்த சஸ்பெண்டு நடவடிக்கையை ரத்து செய்ய வேண்டும்.

எழுமாத்தூரில் இருந்து கல்லூரிக்கு 2 கி.மீ. தூரம் நடந்து செல்ல வேண்டி யுள்ளது. இதனால் கல்லூ ரிக்கு செல்ல தாமதம் ஏற்படுகிறது. ஆனால் பேராசிரியர்கள் அவதூறாக பேசுகிறார்கள் பேராசிரியர்கள் மீது நடவடிக்கை எடுக்காவிட்டால் நாங்கள் எங்களது மாற்று சான்றிதழ்களை திரும்ப பெற்றுக்கொள்கிறோம்.

இவ்வாறு அவர்கள் அதில் கூறி உள்ளனர்.

அம்மாபேட்டை:

அம்மாபேட்டை அருகே உள்ள நெரிஞ்சிப்பேட்டை, காட்டையராஜாநகரை சேர்ந்தவர் மாதேஸ்வரன் (வயது 58).

அரிவாள் அடிக்கும் பட்டறை நடத்தி வருகிறார். இவரது மனைவி ருக்மணி. நேற்று மதியம் கணவரும், மனைவியும் வீட்டை பூட்டி விட்டு சேலத்துக்கு சென்றனர்.

மாலையில் அவர்கள் வீடு திரும்பியனர். வீட்டுக்குள் சென்று பார்த்தபோது அங்கிருந்த பீரோ திறந்து கிடந்ததை பார்த்து அதிர்ச்சி அடைந்தனர்.

அதில் இருந்த பிரேஸ் லெட், தோடு, செயின் உள்பட 5 பவுன் நகை திருட்டு போயிருந்தது. வீட்டின் பின் பக்க கதவு நெம்பி திறக்கப்பட்டு கிடந்தது.

யாரோ மர்ம நபர்கள் பின் பக்க கதவு வழியாக உள்ளே நுழைந்து பீரோவை திறந்து அதில் இருந்த நகைகளை திருடி சென்று உள்ளனர்.

இது குறித்து அம்மாபேட்டை போலீஸ் நிலையத்தில் புகார் செய்யப்பட்டது. போலீசார் வழக்குப்பதிவு செய்து விசாரணை நடத்தி வருகிறார்கள்.