கடலூர்

கடலூர்:

தமிழகத்தில் நாளுக்கு நாள் கனரக வாகனங்களின் போக்குவரத்து அதிகமாகிக் கொண்டிருக்கிறது. இந்த கனரக வாகனங்களின் போக்குவரத்தால் பல்வேறு பகுதிகளில் கடும் அவதி ஏற்பட்டுள்ளது.

அதன்படி கடலூர் மாநகராட்சியிலும் இந்த கனரக வாகனங்களின் போக்குவரத்து நெரிசல் அதிகமாக ஏற்படுகிறது. குறிப்பாக ஞாயிற்றுக்கிழமை முடிந்து திங்கள் முதல் சனிக்கிழமை வரை கடலூர் லாரன்ஸ் சாலையில் காலை முதலே இந்த போக்குவரத்து நெரிசல் அதிகமாக ஏற்படுகிறது.

திங்கள் முதல் சனிக்கிழமை வரை பள்ளி கல்லூரிகளுக்கு செல்பவர்கள் மற்றும் வேலைக்கு செல்பவர்கள் பஸ், ஆட்டோ மற்றும் தனது ஸ்கூட்டரில் செல்வதுண்டு. இருந்த போதிலும் காலை 7 மணி முதலே லாரி, டாரஸ். கண்டெய்டனர் போன்ற பெரிய வாகனங்களில் மணல், ஜல்லி மற்றும் பிற இதர பொருட்களை கொண்டு செல்வதால் பெரும் போக்குவரத்து நெரிசல் ஏற்படுகிறது.

குறிப்பாக பள்ளி கல்லூரிக்கு செல்லும் மாணவர்கள் அதிகளவில் செல்வதால் அவர்களுக்கு இடையூறாக இந்த கனரக வாகனங்கள் செல்கின்றன. இதனால் மாணவர்கள் மற்றும் பிற வேலைக்கு செல்பவர்கள் மிகுந்த மன வேதனைக்கு ஆளாகின்றனர்.

இவர்களுக்கு இடையூறாக செல்வதால் மாணவ மாணவிகள் உரிய நேரத்தில் பள்ளி கல்லூரிகளுக்கு செல்ல முடிவதில்லை. மற்றும் அலுவலகங்களுக்கு வேலைக்கு செல்லும் பலர் உரிய நேரத்தில் அலுவலகத்திற்கு செல்ல முடியாமல் இந்த போக்குவரத்து நெரிசலால் தவித்து வருகின்றனர்.

பெரிய அளவிலான கனரக வாகனங்கள் செல்வதால் சாலைகளில் ஆங்காங்கே குண்டும் குழியுமாக ஏற்பட்டு சாலைகள் சேதமாகிறது. மேலும் இந்த வாகனங்களில் மணல், ஜல்லி போன்றவை கொண்டு செல்வதால் அதிலிருந்து வெளியேறும் தூசி புகை வாகன ஓட்டிகளின் கண்களில் படுவதால் விபத்து ஏற்படும் அபாயம் ஏற்படுகிறது இதனால் வாகன ஓட்டிகள் பெரிதும் அவதி படுகின்றனர்.

இதன்காரணமாக வாகன ஓட்டிகள் கண்களில் தூசி புகை படுவதால் அவர்களுக்கு உடல்நிலை பாதிப்பு ஏற்படும் அபாயமும் உள்ளது.

சென்னை, கோவை உள்ளிட்ட பெருநகரங்களில் காலை 7 மணி முதல் காலை 10 மணி வரை கன ரக வாகனங்கள் நகருக்குள் வர தடைவிதிக்கப்பட்டு உள்ளது. ஆனால் கடலூர் மாநகராட்சி பகுதியில் அப்படி இல்லை. விதிகளை மீறி கனரக வாகனங்கள் சென்று வருகிறது. இதனால்தான் காலை நேரங்களில் போக்குவரத்து நெருக்கடி ஏற்படுகிறது.

எனவே சம்பந்தப்பட்ட அதிகாரிகள் இதற்கு உரிய நடவடிக்கை எடுத்து பள்ளி கல்லூரிகளுக்கு செல்லும் மாணவ மாணவிகள் பாதுகாப்பாக செல்ல வலியுறுத்தி தக்க தீர்வு காண வேண்டுமென பொதுமக்கள் மற்றும் சமூக ஆர்வலர்கள் கோரிக்கை விடுத்துள்ளனர்.

கடலூர்:

கடலூரில் தமிழ்நாடு வணிகர் சங்கங்களின் பேரமைப்பு மற்றும் கடலூர் சேம்பர் ஆஃப் காமர்ஸ் இணைந்து திருச்சியில் நடைபெறும் மாநாடு சம்பந்தமாக நிர்வாகிகள் பொதுக்குழு கூட்டம் நடைபெற்றது. இதில் மாநிலத் தலைவர் விக்கிரமராஜா சிறப்பு விருந்தினராக கலந்துகொண்டு நிருபர்களுக்கு பேட்டி அளித்தார்.

தமிழ்நாடு வணிகர் சங்கங்களின் பேரமைப்பு சார்பில் வருகிற மே 5-ந் தேதி திருச்சியில் நடைபெற உள்ள வணிகர் தின மாநாடு முதல்-அமைச்சர் மு.க.ஸ்டாலின் பங்கேற்க உள்ளார். இந்த மாநாட்டில் தமிழகம் முழுவதும் உள்ள வியாபாரிகள் கொரோனா பரவல் காரணமாக கடுமையாக நலிவடைந்த நிலையில் இந்த மாநாடு தீர்வு காணும் வகையில் அமையும்.

மேலும் அந்த மாநாட்டு மேடையில் முதலமைச்சர் வணிகர்களின் பல்வேறு பாதிப்புகளுக்கு தீர்வுகள் அறிவிப்பார் என லட்சக்கணக்கான வணிகர்கள் நெஞ்சில் நம்பிக்கை ஏற்பட்டு உள்ளது. இந்த மாநாட்டில் 20 ஆயிரத்திற்கும் மேற்பட்ட வணிகர்கள் திரளாக கலந்து கொள்வார்கள். ஆங்கிலேயர்கள் ஆண்ட பிறகு தற்போது வரை கடலூர் மாவட்டம் எந்த வித மாற்றமும் இல்லாமல் உள்ளது.

தற்போது கடலூர் மாவட்டத்தில் பெட்ரோ கெமிக்கல் தொழிற்சாலை வருவதற்கு அனைத்து பணிகளும் மேற்கொண்டு வருகின்றனர். கடலூர் துறை முகத்தில் வேகமாக அனைத்து பணிகளும் நடைபெற்று வருகின்றன. தமிழகத்தில் தொழில் வளம் மற்றும் தொழில் வளர்ச்சி அடைவதற்கு பல்வேறு நடவடிக்கைகளை முதலமைச்சர் மு.க.ஸ்டாலின் ஏற்படுத்தி வருகிறார்.

மேலும் மிக முக்கியமாக கருதப்படும் மார்க்கெட்களில் உள்ள கடைகள் மிகக் குறைந்த அளவில் கட்டிடம் உள்ள நிலையில் அதிக வாடகை நிர்ணயிக்கப்பட்டு உள்ளது. ஆகையால் கட்டிடத்தை விரிவுபடுத்தி நவீனப்படுத்த வேண்டும். மேலும் வணிகர்களுக்கு வங்கி மூலம் குறைந்த வட்டியில் நிதியுதவி வழங்க வேண்டும்.

திருச்சியில் நடைபெறும் மாநாட்டில் மிக முக்கியமாக அறநிலை துறை கட்டுப்பாட்டிலுள்ள கடைகளுக்கு வாடகை கடுமையாக உயர்த்தப்பட்டுள்ளது. இது சம்பந்தமாக ஒழுங்கு நடவடிக்கை குழு அமைக்க வேண்டும் என்ற கோரிக்கை அடிப்படையில் தலைமைச் செயலாளர் தலைமையில் அமைக்கப்பட்டுள்ளது. இந்த குழுவில் வணிகர் சங்க நிர்வாகிகளை இணைக்க வேண்டும்.

தமிழகம் முழுவதும் அறநிலையத் துறை உள்ள கடைகளுக்கு சீரான வாடகையை நிர்ணயம் செய்ய அதிகாரிகள் நடவடிக்கை வேண்டும். வணிக வாரிய உறுப்பினர் சேர்க்கை தொடர்பாக முதலமைச்சர் தீவிர நடவடிக்கை எடுத்த காரணத்தினால் தற்போது தீவிர உறுப்பினர் சேர்க்கை நடந்து வருகிறது. இதில் ஜி.எஸ்.டி இல்லாத வணிகர்களையும் இணைத்து வருகிறோம். மேலும் இதில் சேர்மன் கமிட்டி அமைத்து நடவடிக்கை எடுக்க வேண்டும்.

தற்போது உற்பத்தியாளர்கள் விளைவிக்கும் சாமானியர்களுக்கு ஒரு விலையும், சூப்பர் மார்க்கெட் உரிமையாளர் ஒரு விலையும், கார்ப்பரேட் நிறுவனங்களுக்கு ஒரு விலையும் நிர்ணயம் செய்வதை உடனடியாக அரசு தடை செய்ய வேண்டும். இதன் மூலம் பல லட்சம் வியாபாரிகள் நலிவடையும் நிலை ஏற்படும். தமிழகத்தில் பிளாஸ்டிக் பைகள் பயன்படுத்துவதை நிறுத்த நடவடிக்கை எடுக்கப்படும்.

மேலும் முதல்-அமைச்சர் சீரிய முயற்சியால் தற்போது மஞ்சப்பை எடுத்துச் செல்ல நடவடிக்கை ஏற்படுத்தப்பட்டுள்ள நிலையில் நூல் மற்றும் பொருட்களுக்கு வரிகளில் குறைக்க நடவடிக்கை எடுக்க வேண்டும். மேலும் விக்கிரவாண்டி- தஞ்சாவூர் சாலையை உடனடியாக சீரமைத்து அனைவரும் பயன்படுத்த நடவடிக்கை எடுக்க வேண்டும்.

இவ்வாறு அவர் கூறினார்.

அப்போது மண்டலத் தலைவர் சண்முகம், நகர தலைவர் ஜி.ஆர்.துரைராஜ், ஆனந்த பவன் குரூப்ஸ் உரிமையாளர்கள் நாராயணன், ராம்கி நாராயணன், நகர பொருளாளர் தேவி முருகன், மாவட்ட இணைச் செயலாளர் முருகன் மற்றும் பலர் உடன் இருந்தனர்.

கடலூர்:

வங்ககடலின் மத்திய பகுதி மற்றும் பூமத்திய ரேகையை ஒட்டிய இந்திய பெருங்கடல் பகுதியில் ஆழ்ந்த காற்றழுத்த தாழ்வுநிலை உருவாகி உள்ளது.

இதனால் நேற்று முதல் நாளை (7-ந் தேதி) வரை டெல்டா மாவட்டங்களில் மழை பெய்யக்கூடும் என்றும் பலத்த காற்று வீசக்கூடும் என்றும் வானிலை ஆய்வு மையம் எச்சரித்திருந்தது.

அதன்படி கடலூர் துறைமுகத்தில் 3-ம் எண் புயல் எச்சரிக்கை கூண்டு ஏற்றப்பட்டது. மீன்வளத்துறை அதிகாரிகள் எச்சரித்ததின்பேரில் கடலூர் மீனவ கிராமங்களை சேர்ந்த ஏராளமான மீனவர்கள் கடலுக்கு மீன்பிடிக்க செல்லவில்லை. தங்களது கிராமங்களிலேயே முடங்கினர். 2-வது நாளாக இன்றும் அவர்கள் மீன்பிடிக்க கடலுக்கு செல்லவில்லை.

இதனால் தங்களது படகுகளை கடலூர் முதுநகர் துறைமுக பகுதியில் பாதுகாப்பாக அவர்கள் நிறுத்தி உள்ளனர்.