நீங்கள் தேடியது "stone throw"

மதுரை:

தி.மு.க. தலைவர் கருணாநிதி மறைந்ததை முன்னிட்டு நேற்று முன்தினம் மாலைக்கு மேல் கடைகள் அடைக்கப்பட்டன. பஸ் போக்குவரத்தும் படிப்படியாக நிறுத்தப்பட்டது.

இந்த நிலையில் ராமநாதபுரத்தில் இருந்து கோவை செல்லும் அரசு பஸ் மதுரை தத்தனேரி சாலையில் சென்றது. ராமநாதபுரத்தைச் சேர்ந்த டிரைவர் முருகேசன் பஸ்சை ஓட்டினார். அப்போது 25 வயது வாலிபர் பஸ் மீது கல்வீசினார்.

இந்த சம்பவத்தில் பஸ்சின் முன்பக்க கண்ணாடி உடைந்து நொறுங்கியது. உடனடியாக பஸ்சை நிறுத்திய டிரைவர் முருகேசன், கல்வீசிய வாலிபரை பிடிக்க முயன்றார்.

ஆனால் அதற்குள் இருளில் அந்த வாலிபர் தப்பி ஓடி விட்டார். இது குறித்து செல்லூர் போலீசில் டிரைவர் முருகேசன் புகார் செய்தார். போலீசார் வழக்குப்பதிவு செய்து பஸ் மீது கல்வீசிய மர்ம நபரை தேடி வருகிறார்கள்.

மதுரை நேதாஜி ரோட்டைச் சேர்ந்த முருகன் (43), தாணப்ப முதலி தெருவில் டீ ஸ்டால் மற்றும் பேக்கரி நடத்தி வருகிறார். இவர் நேற்று கடையை திறந்து வியாபாரம் பார்த்தார்.

அப்போது அங்கு வந்த தி.மு.க. பிரமுகர் மணிகண்டன் வாக்குவாதம் செய்து கடையை சூறையாடியதாக திலகர்திடல் போலீசில் முருகன் புகார் செய்தார். போலீசார் வழக்குப்பதிவு செய்து விசாரணை நடத்தி வருகின்றனர்.

புதுச்சேரி:

வாணரப்பேட்டை அன்னை இந்திராகாந்தி நகரை சேர்ந்தவர் முகமதுஷெரிப் (வயது 32). சில நாட்களுக்கு முன்பு அதே பகுதியில் நின்று கொண்டிருந்தார் அப்போது வாணரப்பேட்டையை சேர்ந்த அசோக், தீனதயாளன் ஆகியோர் சேர்ந்து முகமதுஷெரீப்பை திட்டி கல்லால் தாக்கி கொலை மிரட்டல் விடுத்து விட்டு அங்கிருந்து தப்பி சென்று விட்டனர்.

இதேபோல் பெரியார் நகரை சேர்ந்த சதீஷ்குமார் (21) தேங்காய்த்திட்டு பகுதியில் வந்து கொண்டிருந்தார். அப்போது அவரையும் தீனதயாளன் அவரது நண்பர்கள் சேர்ந்து தாக்கினர்.

இதையடுத்து அவர்கள் கொடுத்த புகாரின் பேரில் முதலியார்பேட்டை போலீஸ் சப்-இன்ஸ்பெக்டர் ராஜன், உதவி சப்-இன்ஸ்பெக்டர் காசிநாதன் ஆகியோர் விசாரணை நடத்தினர். இந்த நிலையில் தீனதயாளனை நேற்று போலீசார் கைது செய்தனர். அவர் மீது பல்வேறு வழக்குகள் உள்ளது குறிப்பிடத்தக்கது.

மதுரை:

மதுரை விளாச்சேரியில் உள்ள தனியார் கல்லூரியில் மாணவ-மாணவிகளுக்கு அபராதம் விதிப்பது, செல்போனில் பேச அனுமதி மறுப்பது உள்ளிட்ட பல்வேறு கட்டுப்பாடுகள் விதிக்கப்பட்டன.

மேலும் கல்லூரியில் உள்ள தனியார் ஒப்பந்த காவலாளிகள் அடிக்கடி சோதனை என்ற பெயரில் நிறுத்துவதாகவும் கூறப்படுகிறது. இதற்கு மாணவ -மாணவிகள் சார்பில் எதிர்ப்பு தெரிவிக்கப்பட்டது.

இன்று காலை கல்லூரிக்கு வந்த மாணவ-மாணவிகள் திடீரென வகுப்புகளை புறக்கணித்து போராட்டத்தில் ஈடுபட்டனர். கல்லூரி வளாகத்தில் அவர்கள் திரண்டு நின்றனர். இதனால் அங்கு பரபரப்பு ஏற்பட்டது.

இதுகுறித்து தகவல் கிடைத்ததும் போலீசார் விரைந்து சென்றனர். இந்த நேரத்தில் கல்லூரி வளாகத்தில் கல்லூரி பஸ் மீது கற்கள் வீசப்பட்டது. இதில் பஸ்சின் கண்ணாடிகள் உடைந்தன.

இதனை தொடர்ந்து கல்லூரி நிர்வாகம் காலவரையற்ற விடுமுறையை அறிவித்தது. அதன் பின்னர் மாணவ-மாணவிகள் கலைந்து சென்றனர்.

தஞ்சாவூர்:

தி.மு.க. தலைவர் கருணாநிதி உடல்நலக் குறைவால் சென்னை காவேரி ஆஸ்பத்திரியில் அனுமதிக்கப்பட்டுள்ளார். அங்கு தீவிர சிகிச்சை பிரிவில் அவருக்கு மருத்துவ நிபுணர்கள் சிகிச்சை அளித்து வருகிறார்கள்.

இந்த நிலையில் நேற்று இரவு 8 மணியளவில் கருணாநிதிக்கு திடீரென உடல்நலத்தில் பின்னடைவு ஏற்பட்டதாக வதந்தி கிளம்பியது. இதனால் சென்னை காவேரி ஆஸ்பத்திரி முன்பு ஏராளமான தி.மு.க நிர்வாகிகள், தொண்டர்கள் திரண்டனர்.

இதேபோல் தமிழகம் முழுவதும் இந்த செய்தி பரவியதால் தி.மு.க.வினர் அதிர்ச்சி அடைந்தனர். இதனால் முக்கிய இடங்களில் போலீஸ் பாதுகாப்பு பலப்படுத்தப்பட்டது.

இந்த நிலையில் கருணாநிதிக்கு உடல்நிலை குறித்து பரவிய தகவலால் தஞ்சை மாவட்டத்தில் 6 அரசு பஸ்களின் கண்ணாடிகள் உடைக்கப்பட்டன.

தஞ்சை பழைய பஸ் நிலையம், ரெயிலடி, மருத்துவக்கல்லூரி ஆகிய இடங்களில் தலா ஒரு அரசு பஸ்களின் முன்பக்க கண்ணாடிகள் உடைக்கப்பட்டன. இதேபோல் கும்பகோணம் அருகே சீனிவாசநல்லூர் மற்றும் செட்டி மண்டபம் பகுதியிலும் தலா ஒரு அரசு பஸ் கண்ணாடிகள் உடைக்கப்பட்டன.

தஞ்சை மாவட்டம் திருவோணம் அருகே வெட்டிக்காடு பகுதியில் நேற்று இரவு சென்ற ஒரு அரசு பஸ்சின் முன்பக்க கண்ணாடிகள் உடைக்கப்பட்டன.

நேற்று இரவில் மட்டும் தஞ்சை மாவட்டத்தில் 6 அரசு பஸ்கள் கண்ணாடிகள் உடைக்கப்பட்டன.

இந்த நிலையில் இரவில் அரசு பஸ்கள் மீது கல்வீச்சு சம்பவம் நடந்ததால் இன்று பஸ்கள் குறைந்த அளவிலேயே இயக்கப்பட்டன.

கும்பகோணம் பஸ் நிலையம் இன்று காலை பயணிகள் நடமாட்டமின்றி வெறிச்சோடி காணப்பட்டது. மேலும் பஸ்கள் அனைத்தும் பாதுகாப்பாக கும்பகோணம் அரசு போக்குவரத்து பணிமனையில் நிறுத்தப்பட்டன.

தற்போது தஞ்சை மாவட்டத்தில் பல்வேறு முக்கிய பகுதிகளில் போலீசார் பாதுகாப்பு பணியில் ஈடுபட்டு வருகின்றனர். #karunanidhi #dmk