புதுச்சேரி

புதுச்சேரி:

புதுவை தர்மாபுரி தனகோடி நகர் முதல் குறுக்கு தெருவை சேர்ந்தவர் கங்காதரன் (வயது56). கட்டிட தொழிலாளி. இவர் நேற்று லாஸ்பேட்டை ராஜாஜி நகரில் கட்டிட பணிகளில் ஈடுபட்டுக்கொண்டிருந்தார்.

அப்போது அந்த வீட்டின் 2-வது மாடியில் இருந்து கீழ் தளத்துக்கு நடந்து வந்த போது எதிர்பாராத விதமாக தடுமாறி கீழே விழுந்தார். இதில் காயம் அடைந்து மயங்கி போன அவரை அங்கிருந்த மற்ற தொழிலாளர்கள் மீட்டு ஜிப்மர் ஆஸ்பத்திரிக்கு கொண்டு வந்தனர். அங்கு பரிசோதித்த டாக்டர்கள் ஏற்கனவே கங்காதரன் இறந்து விட்டதாக தெரிவித்தனர்.

இதுகுறித்து அவரின் மகன் முரளி கொடுத்த புகாரின் பேரில் லாஸ்பேட்டை போலீசார் வழக்கு பதிவு செய்து விசாரணை நடத்தி வருகிறார்கள்.

புதுச்சேரி:

புதுவை முதல்- அமைச்சர் நாராயணசாமி நிருபர்களிடம் கூறியதாவது:-

ஊரடங்கால் அனைத்து மாநிலமும் பொருளாதார நெருக்கடியில் உள்ளன. அரசு ஊழியர்களுக்கு சம்பளம் போடமுடியவில்லை. மக்கள் நலத்திட்டங்கள் நிறைவேற்ற முடியவில்லை. ஊரடங்கினால் மாநில வருமானம் குறைந்துவிட்டது. அதை மத்திய அரசுதான் ஈடு செய்ய வேண்டும். மத்திய அரசு ஊரடங்கை அறிவித்தது. அதை பின்பற்றி மாநிலங்களில் தொழிற்சாலைகள், கடைகள் மூடப்பட்டன.

எனவே மாநிலங்களுக்கு உதவ வேண்டிய பொறுப்பு மத்திய அரசுக்கு உண்டு. எனவே பிரதமர் நிபுணர் குழுவை ஒருவாரத்தில் அமைக்க வேண்டும். அந்த குழு மூலம் எந்தெந்த திட்டங்களை நிறைவேற்றினால் மாநில அரசு பொருளாதாரத்தில் உயர முடியும். மாநில அரசுகளுக்கு எந்த நிதி ஆதாரத்தை மத்திய அரசு கொடுக்க முடியும் என்று பரிந்துரை செய்ய வேண்டும்.

புதுவை மாநிலத்திற்கு ஜி.எஸ்.டி., இழப்பீடு வழங்கவும், நிதி கமி‌ஷனில் சேர்க்கவும் நடவடிக்கை எடுக்க வேண்டும். மாநில அரசுக்கு கிடைக்க வேண்டிய வரி வருவாய் கிடைக்காததால் கடன் வாங்கும் சக்தியை உயர்த்த வேண்டும் என பிரதமருக்கு கடிதம் எழுதியுள்ளேன்.

ஊரடங்கிற்கு முன் கொரோனாவில் 700 பேர் பாதிக்கப்பட்டிருந்தனர். இறப்பு 250 பேராக இருந்தது. ஊரடங்கை கடைபிடிக்கும் தற்போது 60 ஆயிரம் பேர் வரை பாதிக்கப்பட்டுள்ளனர். இறப்பு 2 ஆயிரமாக உயர்ந்துள்ளது. நாம் தனிமைப்படுத்திக் கொண்டாலும் கொரோனா வருவது இப்போது தெளிவாக தெரிகிறது.

கொரோனாவில் இருந்து மீண்டு வருவது 30 சதவீதமாக உள்ளது. ஆகவே இப்போது கொரோனாவை எதிர்த்து வாழ வேண்டும் என்ற சூழ்நிலை ஏற்பட்டுள்ளது. இதை புதுவை மக்கள் தெரிந்து கொள்ள வேண்டும்.

இவ்வாறு முதல்வர் கூறினார்.

புதுச்சேரி:

புதுவை குண்டுபாளையம் மாரியம்மன் கோவில் தெருவை சேர்ந்தவர் ஆனந்த ராஜ். இவரது மனைவி சுதா (வயது35). இவர்களது வீட்டின் மாடியில் ஜெகதீசன் என்பவர் தனது தாய் சுசீலா தனது மகன் ராமகிருஷ்ணன், மகள் ஸ்ரீதேவி ஆகியோருடன் வசித்து வருகிறார்.

இதற்கிடையே வீட்டின் உரிமையாளர் சுதாவுக்கும் ஜெகதீசனுக்கும் மின்சாரம் மற்றும் குடிநீரை உபயோகப்படுத்துவது தொடர்பாக அடிக்கடி தகராறு இருந்து வந்தது. மேலும் கொரோனா தொற்று உள்ள நிலையில் ஜெகதீசனின் குடும்பத்தினர் அடிக்கடி வீட்டை விட்டு வெளியே சென்று வந்ததால் இதனை சுதா கண்டித்து வந்ததாக கூறப்படுகிறது.

இந்த நிலையில் சுதாவின் குழந்தைகள் நேற்று ஜெகதீசன் வசித்த மாடியில் விளையாடி கொண்டிருந்தனர். அப்போது இதனை ஜெகதீசனின் குடும்பத்தினர் கண்டித்ததாக தெரிகிறது. இதனால் இருதரப்பினருக்கும் இடையே வாய் தகராறு ஏற்பட்டு மோதலாக மாறியது. இதில் இரு தரப்பினரும் ஆயுதங்களால் மாறிமாறி தாக்கி கொண்டனர். இந்த மோதலில் இருதரப்பை சேர்ந்த சுமதியின் மகள் ஸ்ரீதேவி, சுமதியின் தம்பி சத்யராஜ் மற்றும் ஜெகதீசனின் மகன் ராமகிருஷ்ணன் ஆகிய 3 பேரும் காயம் அடைந்தனர்.

இந்த மோதல் குறித்து இரு தரப்பினரும் தனித்தனியே கோரிமேடு போலீசில் புகார் செய்தனர். போலீசார் இருதரப்பினர் மீதும் வழக்கு பதிவு செய்து விசாரணை நடத்தி வருகிறார்கள்.

புதுச்சேரி:

அரியாங்குப்பம் சொர்ணாநகரில் 3 பேருக்கு கொரோனா பாதிப்பு ஏற்பட்டதையடுத்து சொர்ணாநகர் மற்றும் அதனை சுற்றியுள்ள அம்பேத்கார்நகர், கோட்டைமேடு, பி.சி.பி.நகர், காய்கறி மார்க்கெட், காளான் தோட்டம் உள்பட அதனை சுற்றியுள்ள 10-க்கும் மேற்பட்ட நகர்கள் சீல் வைக்கப்பட்டன. இதனால் அப்பகுதியில் வசிக்கும் பொதுமக்கள் கடந்த 35-நாட்களுக்கும் மேலாக வீட்டிலேயே முடங்கி போனார்கள்.

தற்போது கொரோனா பாதிப்பில் இருந்து 3 பேரும் முற்றிலும் குணமாகி விட்ட நிலையில் சீல் வைக்கப்பட்டுள்ள பகுதிகளை திறந்து விடவேண்டும் என்று அப்பகுதி மக்கள் தொகுதி எம்.எல்.ஏ.வான ஜெயமூர்த்தியிடம் கோரிக்கை விடுத்து வந்தனர். இதனை அவர் முதல்-அமைச்சர் நாராயணசாமியின் கவனத்துக்கு கொண்டு சென்றார். முதல்-அமைச்சர் நாராயணசாமியும் சம்பவ இடத்துக்கு வந்து மத்திய அரசிடம் பேசி விரைவில் சீல் வைக்கப்பட்ட பகுதிகளை திறந்து விட நடவடிக்கை எடுப்பதாக உறுதி அளித்தார்.

இதற்கிடையே நேற்று கோட்டைமேடு பகுதி மக்கள் அப்பகுதியில் உள்ள தடுப்புகளை கட்டைகளை அகற்றி தங்களுக்கு நிவாரணம் வழங்கவேண்டும் என்று நேற்று மறியல் போராட்டத்தில் ஈடுபட்டனர். இதையடுத்து சம்பவ இடத்துக்கு ஜெயமூர்த்தி எம்.எல்.ஏ. விரைந்து வந்து பேச்சு வார்த்தை நடத்தினார். சீல் வைக்கப்பட்ட பகுதிகளை உடனடியாக திறக்க நடவடிக்கை எடுப்பதாக உறுதி அளித்தார்.

அதன்படி சொர்ணா நகரை தவிர மற்ற பகுதிகள் அனைத்தும் இன்று காலை திறக்கப்பட்டன. கலெக்டர் அருண் முன்னிலையில் ஜெயமூர்த்தி எம்.எல்.ஏ. அவ்வழிகளை திறந்து வைத்து பொதுமக்களுக்கு பயன்பாட்டிற்கு வழிவகை ஏற்படுத்தினார். இதனால் அப்பகுதி மக்கள் பெரிதும் மகிழ்ச்சிக்குள்ளானார்கள்.

பாகூர்:

அரியாங்குப்பம் சொர்ணாநகர் பகுதியை சேர்ந்த 3 பேர் கொரோனா வைரசால் பாதிக்கப்பட்டனர். இதையடுத்து நோய் பரவாமல் தடுக்க சொர்ணாநகர் மற்றும் அதனை சுற்றி உள்ள பகுதிகளை போலீசார் சீல் வைத்தனர்.

மேலும் கொரோனா தொற்று உடைய 3 பேரும் கதிர்காமம் அரசு ஆஸ்பத்திரியில் அனுமதிக்கப்பட்டு சிகிச்சை அளிக்கப்பட்டது. அவர்கள் குணம் அடைந்து வீட்டிற்கு அனுப்பி வைக்கப்பட்டனர். எனினும் சொர்ணாநகர் மற்றும் அதனை சுற்றி உள்ள பகுதிகளில் யாரையும் போலீசார் அனுமதிக்கவில்லை. அதுபோல் அப்பகுதியில் வசிப்போரையும் வெளியே விடவில்லை. இதனால் அப்பகுதி மக்கள் வீட்டிலேயே முடங்கி பெரும் அவதிக்குள்ளாகி வந்தனர்.

இதற்கிடையே முத்தியால்பேட்டை, திருவாண்டர் கோவில், ரெட்டியார்பாளையம் உள்ளிட்ட சீல் வைக்கப்பட்ட பகுதிகளை போலீசார் தளர்வு ஏற்படுத்திய நிலையில் சொர்ணாநகர் மற்றும் அதனை சுற்றியுள்ள பகுதிகள் மட்டும் தொடர்ந்து அதேநிலை நீடித்தது. இதனால் அப்பகுதி மக்கள் கடும் அதிருப்தியில் இருந்தனர்.

இதுகுறித்து தொகுதி எம்.எல்.ஏ.வான ஜெயமூர்த்தியிடம் முறையிட்டனர். அவர் இதுபற்றி முதல்-அமைச்சர் நாராயணசாமியிடம் தெரிவித்தார். நேற்று முன்தினம் முதல்-அமைச்சர் நாராயணசாமி அப்பகுதி மக்களை நேரில் சந்தித்து மத்திய அரசிடம் முறையிட்டு வழிகளை திறந்து விட நடவடிக்கை எடுப்பதாக உறுதி அளித்தார்.

இந்த நிலையில் சீல் வைக்கப்பட்டுள்ள பகுதிகளை திறந்து விடக்கோரி அரியாங்குப்பம் கோட்டைமேடு பகுதியை சேர்ந்த 50-க்கும் மேற்பட்ட பொதுமக்கள் இன்று காலை அரியாங்குப்பம் 3 முனை சந்திப்பில் சமூக இடைவெளியை கடை பிடித்து சாலை மறியலில் ஈடுபட்டனர். இதுபற்றி தகவல் அறிந்ததும் ஜெயமூர்த்தி எம்.எல்.ஏ. மற்றும் போலீசார், வருவாய்த்துறையினர் சம்பவ இடத்துக்கு சென்று மறியல் போராட்டத்தில் ஈடுபட்ட பொதுமக்களிடம் பேச்சுவார்த்தை நடத்தினர். இந்த திடீர் சாலை மறியல் போராட்டத்தால் அப்பகுதியில் பெரும் பரபரப்பு ஏற்பட்டது.