புதுச்சேரி

பாகூர்:

அரியாங்குப்பம் சொர்ணாநகரில் 3 பேருக்கு கொரோனா தொற்று ஏற்பட்டதால் சொர்ணாநகர் மற்றும் அதனை சுற்றியுள்ள 10-க்கும் மேற்பட்ட நகர்கள் மற்றும் அரியாங்குப்பம் மார்க்கெட் பகுதிகள் சீல் வைக்கப்பட்டன. இதனால் அப்பகுதி மக்கள் பெரும் அவதிக்குள்ளானார்கள்.

தற்போது 3 பேரும் குணமடைந்து வீடு திரும்பியதால் சீல் வைக்கப்பட்ட பகுதிகளை திறந்து விடவேண்டும் என்று அப்பகுதி மக்கள் அரசுக்கு கோரிக்கை விடுத்து வந்தனர். இக்கோரிக்கையினை ஏற்று முதல்-அமைச்சர் நாராயணசாமி சீல் வைக்கப்பட்ட பகுதிகளை திறக்க நடவடிக்கை மேற்கொண்டார்.

அதன்பேரில் நேற்று மதியம் சொர்ணாநகரில் ஒருசில தெருக்கள் தவிர மற்ற பகுதிகளில் அமைக்கப்பட்டிருந்த தடுப்புகள் அனைத்தும் அகற்றப்பட்டன. ஜெயமூர்த்தி எம்.எல்.ஏ. இதற்கான ஏற்பாடுகளை செய்திருந்தார்.

இந்த நிலையில் தடுப்புகள் அகற்றப்பட்ட பகுதிகளில் அரியாங்குப்பம் கொம்யூன் பஞ்சாயத்துக்கள் மூலம் கிருமி நாசினி தெளிக்கப்பட்டது. மேலும் அப்பகுதிகளில் போக்குவரத்துக்கும் அனுமதிக்கப்பட்டது. தற்போது அரியாங்குப்பம் புதிய பாலம் வழியே போக்கு வரத்து தொடங்கப்பட்டதால் முன்புபோல் ஏராளமானோர் இருசக்கர வாகனங்களில் வழக்கம்போல் சென்று வருகிறார்கள்.

அதே வேளையில் அரியாங்குப்பம் மார்க்கெட் பகுதியில் காய்கறி கடைகள், மளிகை கடைகள், அரிசி கடைகள் இன்று காலை திறக்கப்பட்டாலும் ஒருசிலர் மட்டுமே காய்கறி மற்றும் பொருட்களை வாங்க வந்தனர். இதனால் அப்பகுதி வெறிச்சோடியே காணப்பட்டது. கொரோனா பீதி காரணமாகவே யாரும் அங்கு பொருட்கள் வாங்கவரவில்லை என்று கூறப்படுகிறது. பழைய பூரணாங்குப்பம் சாலையில் திறந்து இருந்த காய்கறி கடைகளில் கூட்டம் காணப்பட்டது.

புதுச்சேரி:

புதுவை கலெக்டர் அருண் வெளியிட்டுள்ள செய்திக்குறிப்பில் கூறியிருப்பதாவது:-

புதுவையில் 13 பேர் கொரோனா பரிசோதனைக்காக அனுமதிக்கப்பட்டனர். 18 பேர் தனித்திருப்பு மையங்களில் சிகிச்சை பெற்று வருகின்றனர். புதுவையில் ஊரடங்கு உத்தரவை மீறியதாக 3 ஆயிரத்து 135 வழக்குகள் பதிவு செய்யப்பட்டுள்ளது. 16 ஆயிரத்து 250 வாகனங்கள் பறிமுதல் செய்யப்பட்டுள்ளது. தேவையின்றி சாலையில் சுற்றியதாக ஆயிரத்து 356 பேர் கைது செய்யப்பட்டுள்ளனர்.

உழவர் சந்தைகளில் காய்கறிகள் மற்றும் பழ விற்பனை செய்ய கடந்த 2 நாட்களில் 3 ஆயிரத்து 920 விவசாயிகளுக்கு இ-பாஸ் வழங்கப்பட்டது. இதன் மூலம் 819 டன் காய்கறி, பழங்கள் விற்பனை செய்யப்பட்டுள்ளது.

இவ்வாறு அதில் குறிப்பிட்டுள்ளார்.

சேதராப்பட்டு:

புதுவையை அடுத்த தமிழக பகுதியான ஆரோவில் அருகே இடையஞ்சாவடியை சேர்ந்தவர் முத்துகுமார் (வயது40). இவர் அம்மா மக்கள் முன்னேற்ற கழகத்தின் மாநில தகவல் பிரிவு தொடர்பு செயலாளராக இருந்து வருகிறார்.

இந்நிலையில் புதுக்கோட்டை போலீசார் இன்று காலை இடையஞ்சாவடிக்கு வந்தனர். அவர்கள் வீட்டில் இருந்த முத்துகுமாரை திடீரென கைது செய்து அழைத்து சென்றனர்.

இது குறித்து போலீசாரிடம் விசாரித்தபோது கடந்த சில நாட்களுக்கு முன்பு அமைச்சர் விஜயபாஸ்கர் நலத்திட்ட உதவிகளை வழங்கினார். அதனை முத்துகுமார் வருங்கால முதல்-அமைச்சர் விஜயபாஸ்கர் என சித்தரித்து சமூக வலைதளத்தில் அவதூறாக பரப்பியதால் அமைச்சர் விஜயபாஸ்கர் கொடுத்த புகாரின் பேரில் கைது செய்ததாக போலீசார் தெரிவித்தனர்.

அ.ம.மு.க. பிரமுகர் திடீரென கைது செய்யப்பட்டதால் ஆரோவில் பகுதியில் பெரும் பரபரப்பு ஏற்பட்டுள்ளது.

புதுச்சேரி:

புதுவை வைத்திகுப்பம் பச்சைவாழியம்மன்கோவில் தெருவை சேர்ந்தவர் மலையாளத்தான் (வயது65). மீனவர். இவருக்கு தையல் நாயகி என்ற மனைவியும் 2 மகன்கள் மற்றும் 2 மகள்கள் உள்ளனர். மகன்கள் மற்றும் மகள்களுக்கு திருமணம் ஆகி விட்டது.

மலையாளத்தானுக்கு மது குடிக்கும் பழக்கம் இருந்து வந்தது. தற்போது ஊரடங்கு உத்தரவால் மதுக்கடைகள் மூடப்பட்டதால் மலையாளத்தான் மது குடிக்க முடியாமல் திண்டாடி வந்தார்.

இதனால் மனமுடைந்த மலையாளத்தான் தற்கொலை செய்துகொள்ள முடிவு செய்தார். நேற்று வீட்டின் குளியல் அறையில் அவர் கயிற்றால் தூக்குபோட்டு தொங்கினார். உடனடியாக மலையாளத்தானை அவரது குடும்பத்தினர் மீட்டு புதுவை அரசு ஆஸ்பத்திரிக்கு கொண்டு சென்றனர். அங்கு பரிசோதித்த டாக்டர்கள் மலையாளத்தான் ஏற்கனவே இறந்து விட்டதாக தெரிவித்தனர்.

இதுகுறித்த புகாரின் பேரில் சோலைநகர் புறக்காவல் நிலைய போலீசார் வழக்குபதிவு செய்து விசாரணை நடத்தி வருகிறார்கள்.

புதுச்சேரி:

புதுவை மரப்பாலம் மற்றும் வெங்கட்டாநகர் துணை மின் நிலையங்களில் நாளை (செவ்வாய்க்கிழமை) பராமரிப்பு பணிகள் நடைபெற உள்ளது. எனவே புதுவை நகர பகுதி முழுவதும் (கடற்கரை சாலை முதல் எல்லைப் பிள்ளைச்சாவடி மற்றும் அரியாங்குப்பம் முதல் முத்தியால்பேட்டை வரையுள்ள பகுதிகள்) காலை 10.30 மணி முதல் மதியம் 1 மணி வரை மின்சாரம் நிறுத்தப்படுகிறது.

இதேபோல் நேத்தாநகர், எம்.ஜி.ஆர்.நகர், ரமணர்நகர், சிவா விஷ்ணு நகர், அன்சாரி துரைசாமி நகர், ஜெயம்நகர், பி.எஸ்.சி. பேங்க் காலனி, ஜோதி நகர், வாரியார் நகர், காயத்திரி நகர், ஜான்பால் நகர் ஆகிய பகுதிகளில் காலை 10.30 மணி முதல் மதியம் 2.30 மணி வரையும், அக்காசாமி வீதிக்கும் குபேர் சாலைக்கும் இடைப்பட்ட பகுதி, சின்னையாபுரம் சாலை, குபேர் பாடசாலை பகுதி, அப்பாவுநகர் பகுதி களில் காலை 10.30 மணி முதல் மாலை 5.30 மணி வரையும் மின்சாரம் நிறுத்தப்படுகிறது.

இந்த தகவலை மின்துறை செயற்பொறியாளர் தெரிவித்துள்ளார்.

சேதராப்பட்டு:

புதுவையை அடுத்த சின்னகோட்டக்குப் பத்தில் தென்னந்தோப்புடன் கூடிய பண்ணை வீடு உள்ளது. இந்த பண்ணை வீடு சென்னையை சேர்ந்த தொழிலதிபருக்கு சொந்தமானது. இந்த பண்ணை வீட்டில் புதுவை சண்முகாபுரம் மாரியம்மன் கோவில் தெருவை சேர்ந்த சாமிநாதன் (வயது61) என்பவர் தொழிலாளியாக வேலை பார்த்து வந்தார்.

இந்த நிலையில் நேற்று முன்தினம் வழக்கம் போல் பண்ணை வீட்டிற்கு வேலைக்கு வந்த சாமிநாதன் அதன்பிறகு வீடு திரும்பவில்லை. இதனால் சந்தேகம் அடைந்த அவரது மகன் சத்யநாதன் நேற்று பண்ணை வீட்டிற்கு வந்து பார்த்தார். அப்போது அங்கு அவரது தந்தை சாமிநாதன் மர்மமான முறையில் இறந்து கிடந்ததை கண்டு அதிர்ச்சி அடைந்தார்.

இதுகுறித்து அவர் கோட்டக்குப்பம் போலீசில் புகார் செய்தார். போலீசார் உடலை கைப்பற்றி பிரேத பரிசோதனைக்காக பிம்ஸ் ஆஸ்பத்திரிக்கு அனுப்பிவைத்தனர். மேலும் வழக்குபதிவு செய்து வி‌ஷபூச்சி கடித்ததால் சாமிநாதன் இறந்தாரா? அல்லது திடீர் மாரடைப்பால் இறந்து போனாரா? என்பது குறித்து விசாரணை மேற்கொண்டு வருகிறார்கள்.