சிவகங்கை

காரைக்குடி:

சிவகங்கை மாவட்டம் காரைக்குடி அருகே உள்ள காதி நகரைச் சேர்ந்தவர் ஜெயராஜ். இவர் அஞ்சல் துறையில் போஸ்ட் மாஸ்டராக வேலை பார்த்து ஓய்வு பெற்றவர். இவர் கடந்த ஆண்டு வீட்டை பூட்டிவிட்டு தனது குடும்பத்தினருடன் ராமேசுவரத்தில் உள்ள உறவினர் வீட்டிற்கு சென்றிருந்தார். 2 நாட்கள் கழித்து மீண்டும் வீடு திரும்பினார். அப்போது வீட்டின் கதவுகள் உடைக்கப்பட்டு வீட்டில் இருந்த பீரோக்கள் திறந்து கிடந்தன. அதில் இருந்த 132 பவுன் தங்க நகைகள் கொள்ளை போனது தெரியவந்தது.

இதுகுறித்து ஜெயராஜ் சோமநாதபுரம் போலீசில் புகார் செய்தார். அதன்பேரில் காரைக்குடி துணை போலீஸ் சூப்பிரண்டு அருண் மேற்பார்வையில் சப்-இன்ஸ்பெக்டர் பார்த்திபன் தலைமையிலான தனி போலீஸ் படையினர் தீவிர விசாரணையில் ஈடுபட்டு வந்தனர். இதில் நாமக்கல் பகுதியில் கொள்ளை சம்பவத்தில் ஈடுபட்ட சிலருக்கு காரைக் குடி சம்பவத்திலும் தொடர்பு இருப்பது தெரியவந்தது.

இதுதொடர்பாக மதுரை கூடல்நகரை சேர்ந்த வெற்றிவேல் (வயது 36), பாண்டித்துரை (26) ஆகியோரை பிடித்து விசாரணை மேற்கொண்டனர்.

விசாரணையில் அவர்கள் காதிநகர் கொள்ளை சம்பவத்தில் ஈடுபட்டது உறுதியானது.

இதையடுத்து போலீசார் வழக்கு பதிவு செய்யப்பட்டு 2 பேரையும் கைது செய்தனர். அவர்களிடம் இருந்து கொள்ளையடிக்கப்பட்ட 132 பவுன் தங்க நகைகள் மீட்கப்பட்டன. பின்னர் 2 பேரையும் கோர்ட்டில் ஆஜர்படுத்தி சிறையில் அடைத்தனர். இந்த வழக்கில் தொடர்புடைய சீனிவாசன் என்பவரை போலீசார் தேடி வருகின்றனர்.

திருப்பத்தூர்:

திருப்பத்தூர் அருகே வெங்கடேஸ்வரர் நகர் பகுதியை சேர்ந்தவர் குமார். இவரது மகன் கிருஷ்ணமூர்த்தி (வயது29). கம்பி கட்டும் தொழில் செய்து வந்தார். இவருக்கும் வாணியம்பாடி கோணாமேடு பகுதியை சேர்ந்த பெண் ஒருவருக்கும் திருமணம் நிச்சயிக்கப்பட்டு இன்று திருமணம் நடக்க இருந்தது.

இந்த நிலையில் பெண் வீட்டார் திருமணத்தை அடுத்த ஆண்டு பொங்கல் பண்டிகை முடிந்ததும் நடத்தி கொள்ளலாம் என கூறியுள்ளனர்.

இதை கேட்டு கிருஷ்ணமூர்த்தி அதிர்ச்சியடைந்தார். மனமுடைந்து காணப்பட்ட அவர் வீட்டில் உள்ள மின்விசிறியில் தூக்குப்போட்டு தற்கொலை செய்து கொண்டார். இதுகுறித்து திருப்பத்தூர் தாலுகா போலீசார் வழக்கு பதிவு செய்து விசாரணை நடத்தி வருகின்றனர்.

அதேபோல் திருப்பத்தூர் டவுன் புதுப்பேட்டை ரோடு 4-வது தெருவில் வசித்து வருபவர் ரவி. அவரது மகன் ஜெகதீசன் (29). சினிமா தியேட்டரில் வேலை பார்த்து வந்தார்.

அவர் திடீரென தனது வீட்டில் மின்விசிறியில் தூக்கிட்டு தற்கொலை செய்து கொண்டார். இதுகுறித்து திருப்பத்தூர் டவுன் போலீசார் வழக்கு பதிவு செய்து விசாரணை நடத்தி வருகின்றனர்.

சிவகங்கை:

தென் தமிழகத்தில் வளிமண்டல சுழற்சி காரணமாக மதுரை, சிவகங்கை, விருதுநகர், தேனி உள்ளிட்ட மாவட்டங்களில் வானிலை மையம் அறிவித்து இருந்தது. அதன்படி மதுரை மாவட்டத்தில் கடந்த 2 நாட்களாக மாலை நேரங்களில் கரு மேகங்கள் திரண்டு மழை பெய்து வருகின்றன.

அதன்படி மதுரை நகரில் நேற்று பகலில் வெயில் கொளுத்திய நிலையில் மாலையில் இதமான காற்றுடன் கருமேகம் திரண்டு வந்தன. பின்னர் 5 மணியளவில் திடீரென்று பலத்த மழை பெய்தது. சுமார் ஒரு மணிநேரத்துக்கும் மேலாக பெய்த மழையால் நகரில் முக்கிய சாலைகளில் மழைநீர் வெள்ளம் போல் பெருக்கெடுத்து ஓடியது.

மாசி வீதிகளில் ஸ்மார் சிட்டி திட்டத்திற்காக தோண்டப்பட்டு இருந்த பள்ளங்களில் மழைநீர் தேங்கியது. இதனால் பொதுமக்கள் அச்சத்துடனேயே மாசி வீதிகளில் நடந்து சென்றனர். கீழவெளி வீதி, தெற்குவெளி வீதி, பெரியார் பஸ் நிலையம் உள்ளிட்ட பல்வேறு பகுதிகளில் தண்ணீர் தேங்கியதால் வாகன ஓட்டிகள் அவதியடைந்தனர். மீண்டும் இரவு 10 மணிமுதல் பலத்த மழை பெய்தது. ஒரு மணி நேரம் இந்த மழை நீடித்தது.

திருமங்கலம், வாடிப்பட்டி, சோழவந்தான், மேலூர், உசிலம்பட்டி ஆகிய பகுதிகளிலும் பலத்த மழை பெய்தது. இரவு நேரங்களில் கொட்டித்தீர்த்த மழையால் பல இடங்களில் தண்ணீர் தேங்கியது. சில இடங்களில் மரங்கள் முறிந்து விழுந்தன. இதனால் மின்தடையும் ஏற்பட்டது.

மதுரை மாவட்டத்தில் பெய்த மழையின் அளவு மில்லி மீட்டரில் வருமாறு:-

இடையபட்டி -35.50

தல்லாகுளம் -32.30

மதுரை தெற்கு -35.60

உசிலம்பட்டி -27.40

சிட்டம்பட்டி -26.20

ஏர்போர்ட் -24.10

புலிப்பட்டி -23.80

கள்ளிக்குடி -17.80

திருமங்கலம் -15.20

ஆண்டிபட்டி -12.80

குப்பணம்பட்டி -10.40

மாவட்டத்தில் பெய்த மொத்த மழை அளவு 503.10 மில்லி மீட்டர் ஆகும்.

கடந்த சில நாட்களாக மதுரை மாவட்டத்தில் பெய்து வரும் மழையால் விவசாயிகள் மகிழ்ச்சி அடைந்துள்ளனர். மதுரை மாவட்டத்தில் விவசாயத்திற்காக ஏற்கனவே வைகை அணையில் இருந்து பெரியார் கால்வாயில் தண்ணீர் திறந்து விடப்பட்டுள்ளது. இந்த நிலையில் கடந்த சில நாட்களாக மாலை நேரங்களில் பெய்து வரும் மழையால் விவசாய பணிகள் மும்முரமடைந்துள்ளனர்.

சிவகங்கை மாவட்டத்தில் நேற்று மாலை பெரும்பாலான இடங்களில் கனமழை பெய்தது. சிவகங்கையில் நேற்று மாலை ஒரு மணிநேரமும், இரவு விட்டுவிட்டு பலத்த மழையும் பெய்தது. இதன் காரணமாக முக்கிய சாலைகளில் மழை நீர் தேங்கியது.

காளையார்கோவில், தேவகோட்டை, கல்லல், காரைக்குடி உள்ளிட்ட பகுதிகளில் மழை கொட்டித் தீர்த்தது.

இதேபோல் மானாமதுரையில் நேற்று மாலை திடீரென பலத்த மழை பெய்தது. 1 மணிநேரத்துக்கும் மேலாக பெய்த இந்த மழையால் அங்குள்ள மண்பாண்ட தொழிற்கூடங்களில் மழைநீர் புகுந்தது. இதனால் இன்று தொழிலாளர்கள் வேலையை தொடங்க முடியாமல் அவதி அடைந்தனர். மானாமதுரையை சுற்றியுள்ள கிராமங்களில் பெய்த மழை காரணமாக விவசாயிகள் மகிழ்ச்சி அடைந்தனர்.

மானாமதுரை:

சிவகங்கை மாவட்டம் மானாமதுரை அழகாபுரி நகரைச் சேர்ந்தவர், செல்வக்குமார்(வயது 27). இவர் தச்சு வேலை செய்து வருகிறார். விருதுநகர் பாண்டியன் நகரை சேர்ந்த சீனிவாசன் மகள் சுவேதா(20).

செல்வக்குமாருக்கும், சுவேதாவிற்கும் திருமணம் நிச்சயிக்கப்பட்டு நேற்று முன்தினம் மானாமதுரையில் உள்ள ஒரு கோவிலில் திருமணம் நடைபெற்றது.

திருமணம் முடிந்த நிலையில் புதிதாக கட்டிய வீட்டில் புதுமண தம்பதிகள் குடியேறினர். இந்தநிலையில் புதுப்பெண் அவரது கணவரிடம் அருகில் உள்ள பழைய வீட்டில் உள்ள தனது செல்போனை எடுத்து வரும்படி கூறினார். இதையடுத்து போனை எடுத்து வருவதற்காக செல்வக்குமார் சென்றார். அப்போது மணப்பெண் சுவேதா புதுவீட்டின் கதவை அடைத்துள்ளார். இதைக் கண்டு அதிர்ச்சியடைந்த செல்வக்குமார் கதவை திறக்கும்படி சத்தம்போட்டுள்ளார்.

ஆனால் சுவேதா கதவை திறக்கவில்லை. இதையடுத்து அக்கம்பக்கத்தினர் உதவியுடன் செல்வக்குமார் கதவை உடைத்து உள்ளே சென்றபோது வீட்டின் மின்விசிறியில் சேலையால் தூக்குப்போட்டு தற்கொலை முயற்சியில் ஈடுபட்டுள்ளார். இதையடுத்து அவரை மீட்டு மானாமதுரை அரசு மருத்துவமனைக்கு கொண்டு சென்றனர். அங்கு டாக்டர்கள் பரிசோதித்த போது, ஏற்கனவே சுவேதா இறந்து விட்டது தெரியவந்தது.

இதுகுறித்து மானாமதுரை போலீசார் வழக்குப்பதிவு செய்து, என்ன காரணத்திற்காக சுவேதா தற்கொலை செய்து கொண்டார் என்பது குறித்து விசாரணை நடத்தி வருகின்றனர். திருமணமான 2-வது நாளில் மணப்பெண் தற்கொலை செய்ததால் சிவகங்கை கோட்டாட்சியர் முத்துகழுவன் மேல்விசாரணை நடத்தி வருகிறார். இந்த சம்பவம் அந்த பகுதியில் பரபரப்பை ஏற்படுத்தியது.