கடலூர்

சிதம்பரம்:

சிதம்பரத்தில் உலக புகழ்பெற்ற நடராஜர் கோவில் அமைந்துள்ளது. இக்கோவிலில் கனகசபையின் மீது ஏறி சாமி தரிசனம் செய்ய பொதுமக்களுக்கு அனுமதி மறுக்கப்பட்டது தொடர்பாக கடந்த சில நாட்களாக பல்வேறு அரசியல் கட்சியினர் மற்றும் போராட்ட குழுவினர் தொடர் போராட்டங்களில் ஈடுபட்டு வந்தனர்.

இதன் காரணமாக கோட்டாட்சியர் ரவி நேற்று சிதம்பரத்தில் 144 தடை உத்தரவை பிறப்பித்துள்ளார். இதுதொடர்பாக அவர் வெளியிட்டுள்ள செய்திக்குறிப்பில் கூறியிருப்பதாவது:-

சிதம்பரம் நடராஜர் கோவில் விவகாரம் தொடர்பாக பல்வேறு நீதிமன்ற ஆணைகள் மற்றும் அரசாணைகள் தீவிரமாக பரிசீலனை செய்யப்பட்டு வந்தது. மேலும் இந்நிகழ்வு தமிழ்நாடு மாநில அரசின் கவனத்திற்கு கொண்டு செல்லப்பட்டதன் பேரில், இறுதி முடிவு எடுக்கும் வகையில் பல்வேறு நிலையில் சட்ட வல்லுனர்களுடன் ஆலோசனைகள் நடைபெற்று வருகிறது.

எனவே அரசின் முடிவை எதிர்நோக்கி உள்ள நிலையில் அரசியல் கட்சிகள், பக்த பேரவைகள், போராட்டக்குழுவினர் மற்றும் இதர பல்வேறு போராட்ட குழுவினர் அரசின் முடிவு வரும் வரையில் சிதம்பரம் நகர பகுதியில் எவ்வித போராட்டங்களோ, ஆர்ப்பாட்டங்களோ நடத்தக்கூடாது. மேலும் கூட்டமாக கூடி ஆலோசனை மேற்கொள்ளுதலும் ஒரு மாத காலத்திற்கு செய்யக்கூடாது என இந்திய குற்றவியல் நடைமுறை சட்டம் 144-ன்படி தடை உத்தரவு பிறப்பிக்கப்படுகிறது. இந்த தடை உத்தரவு இன்று (அதாவது நேற்று) முதல் உடனடியாக அமலுக்கு வருகிறது.

இவ்வாறு அந்த செய்திக்குறிப்பில் கூறப்பட்டுள்ளது.

இதற்கிடையே 144 தடை உத்தரவு அமலுக்கு வந்ததால், சிதம்பரம் பகுதியில் போலீசார் தீவிர பாதுகாப்பு பணியில் ஈடுபட்டுள்ளனர். மேலும் நடராஜர் கோவில் முன்பும் பாதுகாப்புக்காக ஏராளமான போலீசார் குவிக்கப்பட்டுள்ளனர். இதனால் சிதம்பரம் பகுதி பெரும் பரபரப்புடன் காணப்படுகிறது.

பண்ருட்டி:

பண்ருட்டி அருகே மாளிகம்பட்டு கிராமத்தை சேர்ந்த 16 வயது இளம்பெண், கடலூர் பகுதியில் நர்சிங் கல்லூரியில் முதலாம் ஆண்டு படித்து வருகிறார்.

இவரது அக்காள் கணவர் மாளிகம்பட்டு பகுதியை சேர்ந்த அன்பரசன் (28). இவர் அடிக்கடி நர்சிங் மாணவியை சந்தித்து பேசுவது உண்டு. அதோடு அவ்வப்போது பாலியல் தொந்தரவு செய்து உள்ளார்.

அப்போது அன்பரசன் நர்சிங் மாணவியிடம் உன்னையே திருமணம் செய்வதாக உறுதி அளித்து உள்ளார். இதனை நம்பிய அந்த மாணவி அன்பரசனுடன் சென்னைக்கு சென்றார்.

அதிர்ச்சி அடைந்த மாணவியின் பெற்றோர் தனது மகளை பல்வேறு இடங்களில் தேடினர். எங்கு தேடியும் அநத மாணவி கிடைக்கவில்லை. எனவே இதுபற்றி காடாம்புலியூர் போலீசில் புகார் செய்தார்.

அதன் பேரில் பண்ருட்டி அனைத்து மகளிர் போலீஸ் இன்ஸ்பெக்டர் வள்ளி தலைமையில் தனிப்படையினர் பல்வேறு பகுதிகளில் தேடி பார்த்தனர்.

அப்போது மாணவியை அன்பரசன் ஆந்திராவிற்கு அழைத்து செல்ல பண்ருட்டி பஸ்நிலையம் வந்தார். இதனை அறிந்த போலீசார் பண்ருட்டி பஸ் நிலையத்திற்கு சென்று போது கையும் களவுமாக பிடித்தனர்.

இச்சம்பவம் தொடர்பாக மாணவியின் தந்தை அனைத்து மகளிர் காவல் நிலையத்தில் கொடுத்த புகாரின் பேரில் போக்சோ சட்டத்தின் கீழ் அன்பரசனை கைது செய்தனர். மீட்கப்பட்ட மாணவியை மருத்துவ பரிசோதனைக்காக கடலூர் அரசு மருத்துவமனையில் சேர்த்தனர்.

கடலூர்:

கடலூர் முதுநகர் பகுதியை சேர்ந்தவர் சதீஷ்குமார் (வயது 32). டிரைவர். இவரது மனைவி அஞ்சுகம் (வயது 32). இவர் அதே பகுதியில் ஆரம்ப சுகாதார நிலையத்தில் தற்காலிக செவிலியராக பணிபுரிந்து வந்தார்.

இவர்கள் கடந்த 10 ஆண்டுகளுக்கு முன்பு காதலித்து திருமணம் செய்தனர். இவர்களுக்கு ஒரு மகன், ஒரு மகள் உள்ளனர்.

கடந்த ஒரு வருடமாக சதீஷ்குமாருக்கு உடல்நிலை பாதிப்பு இருந்ததால் வீட்டில் இருந்து வந்தார். தற்போது குடும்ப சூழ்நிலை காரணமாக சதீஷ்குமார் வேலைக்கு செல்வதாக தனது மனைவி அஞ்சுகத்திடம் தெரிவித்தார்‌. ஆனால் உடல்நிலை பாதிப்பு ஏற்பட்டதால் வேலைக்கு செல்ல வேண்டாம் என அஞ்சுகம்கூறி உள்ளார். ஆனால் நேற்று அஞ்சுகம் வேலைக்கு சென்ற பிறகு சதீஷ்குமார் வேலைக்கு சென்றுள்ளார்.

நேற்று மாலை வழக்கம் போல் அஞ்சுகம் தனது வேலையை முடித்துவிட்டு வீட்டுக்கு வந்து பார்த்தபோது கணவர் சதீஷ்குமார் காணவில்லை. பின்னர் அவரை தொடர்பு கொண்டு கேட்டபோது வேலையில் இருப்பதாக தெரிவித்துள்ளார். இதனால் மனமுடைந்த அஞ்சுகம் தனது 2 குழந்தைகளை அதே பகுதியில் உள்ள தாய் வீட்டில் டி.வி. பார்க்க சொல்லிவிட்டு, தனது வீட்டில் வந்து தூக்குமாட்டி தற்கொலை செய்து கொண்டுள்ளார்.

நேற்று இரவு வழக்கம் போல் சதீஷ்குமார் வேலையை முடித்துவிட்டு வீட்டுக்கு வந்து பார்த்தபோது கதவு உள்ளே பூட்டிருந்தது. பின்னர் சந்தேகமடைந்த சதீஷ்குமார் ஜன்னல் வழியாக பார்த்தார்.

அப்போது தனது மனைவி அஞ்சுகம் தூக்கு மாட்டி இருந்ததை பார்த்து கதறி அழுதார். இதனை பார்த்த அக்கம் பக்கத்தினர் உடனடியாக கதவை உடைத்து உள்ளே சென்று அஞ்சுகத்தை மீட்டு கடலூர் அரசு மருத்துவமனைக்கு கொண்டு சென்றனர். ஆனால் ஏற்கனவே இறந்துவிட்டதாக டாக்டர்கள் தெரிவித்தனர்.

இதுகுறித்து கடலூர் முதுநகர் போலீசார் வழக்கு பதிவு செய்து விசாரணை நடத்தி வருகின்றனர்.

பண்ருட்டி:

கடலூர் மாவட்டம் பண்ருட்டி அருகே கொஞ்சிகுப்பம் பகுதியைச் சேர்ந்தவர் உத்திராபதி (வயது 25). இவர் அதே பகுதியை சேர்ந்த முருகனின் மகளை திருமணம் செய்து கொள்ள பெண் கேட்டார். இதற்கு முருகன் பெண் தர மாட்டேன் என மறுப்பு தெரிவித்துள்ளார். இதனால் இவர்களுக்குள் அடிக்கடி வாய் தகராறு ஏற்பட்டு முன்விரோதம் இருந்து வந்துள்ளது.

நேற்று மாலை முருகன் தனது குடும்பத்துடன் கொஞ்சிகுப்பம் பகுதியிலிருந்து பண்ருட்டிக்கு பொருட்கள் வாங்குவதற்காக சென்றார். இதனை அறிந்துகொண்ட உத்திராபதி நேராக முருகனின் வீட்டிற்கு சென்று வீட்டுக்கு தீ வைத்தார்.

இந்த விபத்தில் வீடு முழுவதும் தீயில் எரிந்து சாம்பல் ஆனது. பின்னர் பண்ருட்டியில் இருந்து வீடு திரும்பிய முருகன் வீட்டைப் பார்த்து அதிர்ச்சியடைந்து இதுகுறித்து காடாம்புலியூர் போலீஸ் நிலையத்தில் உத்திராபதி மீது புகார் தெரிவித்தார்.

புகாரின் பேரில் போலீஸ் இன்ஸ்பெக்டர் ராஜா தாமரை பாண்டியன் தலைமையிலான போலீசார் சம்பவ இடத்திற்கு விரைந்து சென்று தீக்கு இரையான வீட்டை பார்வையிட்டு உத்திராபதியை கைது செய்தனர். கைதான அவர் பண்ருட்டி கோர்ட்டில் ஆஜர்படுத்தி கடலூர் சிறையில் அடைக்கப்பட்டார்.

பண்ருட்டி:

பண்ருட்டி அருகே மாளிகம்பட்டு கிராமத்தை சேர்ந்த 16 வயது இளம்பெண், கடலூர் பகுதியில் நர்சிங் கல்லூரியில் முதலாம் ஆண்டு படித்து வருகிறார்.

இவரது அக்காள் கணவர் மாளிகம்பட்டு பகுதியை சேர்ந்த அன்பரசன் (28). இவர் அடிக்கடி நர்சிங் மாணவியை சந்தித்து பேசுவது உண்டு. அதோடு அவ்வப்போது பாலியல் தொந்தரவு செய்து உள்ளார்.

அப்போது அன்பரசன் நர்சிங் மாணவியிடம் உன்னையே திருமணம் செய்வதாக உறுதி அளித்து உள்ளார். இதனை நம்பிய அந்த மாணவி அன்பரசனுடன் சென்னைக்கு சென்றார்.

அதிர்ச்சி அடைந்த மாணவியின் பெற்றோர் தனது மகளை பல்வேறு இடங்களில் தேடினர். எங்கு தேடியும் அந்த மாணவி கிடைக்கவில்லை. எனவே இதுபற்றி காடாம்புலியூர் போலீசில் புகார் செய்தார்.

அதன் பேரில் பண்ருட்டி அனைத்து மகளிர் போலீஸ் இன்ஸ்பெக்டர் வள்ளி தலைமையில் தனிப்படையினர் பல்வேறு பகுதிகளில் தேடி பார்த்தனர்.

அப்போது மாணவியை அன்பரசன் ஆந்திராவிற்கு அழைத்து செல்ல பண்ருட்டி பஸ்நிலையம் வந்தார். இதனை அறிந்த போலீசார் பண்ருட்டி பஸ் நிலையத்திற்கு சென்றபோது கையும் களவுமாக பிடித்தனர்.

இச்சம்பவம் தொடர்பாக மாணவியின் தந்தை அனைத்து மகளிர் காவல் நிலையத்தில் கொடுத்த புகாரின் பேரில் போக்சோ சட்டத்தின் கீழ் அன்பரசனை கைது செய்தனர். மீட்கப்பட்ட மாணவியை மருத்துவ பரிசோதனைக்காக கடலூர் அரசு மருத்துவமனையில் சேர்த்தனர்.

பண்ருட்டி:

கடலூர் மாவட்டம் பண்ருட்டி திருவதிகை எடப்பாளையம் தெருவைச் சேர்ந்த ராஜி. இவரது மனைவி ரம்யா (வயது21). இவர்களுக்கு திருமணமாகி 5 வருடம் ஆகிறது. 2 குழந்தைகள் உள்ளனர்.

சம்பவத்தன்று நேற்று முன்தினம் ரம்யா மற்றும் 2 குழந்தைகள் உறவினர் வீட்டின் சுப நிகழ்ச்சிக்கு சென்று வருவதாக கூறிவிட்டுச் சென்றார். பின்னர் அவர்கள் வீடு திரும்பவில்லை. ரம்யா மற்றும் 2 குழந்தைகளை அவரது கணவர் ராஜி பல இடங்களில் தேடி பார்த்தும் எங்கு தேடியும் கிடைக்கவில்லை.

இதுகுறித்து பண்ருட்டி போலீஸ் நிலையத்தில் புகார் தெரிவித்தார்.

இதேபோன்று பண்ருட்டி திருவதிகை ரெயில்வே பகுதியைச் சேர்ந்த அரி கோவிந்தன். இவரது மகள் நந்தினி (24) இவர் எம்.ஏ பி.எட் படித்துவிட்டு வீட்டில் இருந்து வந்துள்ளார். கடந்த 20-ந் தேதி வீட்டில் இருந்தவர் திடீரென்று காணாமல் போனார். இவரை அரிகோவிந்தன் தோழி வீடு மற்றும் பல்வேறு இடங்களில் தேடியும் கிடைக்கவில்லை.

இதுகுறித்து அரிகோவிந்தன் பண்ருட்டி போலீஸ் நிலையத்தில் புகார் தெரிவித்தார் புகாரின்பேரில் போலீஸ் இன்ஸ்பெக்டர் சந்திரன் வழக்கு பதிவு செய்து காணாமல் போன ரம்யா, அவரது குழந்தைகள், நந்தினி என்ன ஆனார்கள்? எங்கு சென்றார்கள் ? யாராலும் கடத்தப்பட்டாரா ? என்பது குறித்து பல்வேறு கோணங்களில் விசாரணை நடத்தி வருகின்றனர்.

கடலூர் முதுநகர்:

வாரணாசி-ராமேஸ்வரம் வாராந்திர எக்ஸ்பிரஸ் ரெயிலில் கஞ்சா கடத்தப்படுவதாக திருச்சி கோட்ட பாதுகாப்பு படை முதுநிலை ஆணையர் ராமகிருஷ்ணக்கு ரகசிய தகவல் கிடைத்தது. இதையடுத்து அவரது உத்தரவின் பேரில், கடலூர் முதுநகர் ரெயில்வே பாதுகாப்பு படை இன்ஸ்பெக்டர் மகாலிங்கம் தலைமையில், சப்-இன்ஸ்பெக்டர் ரவிச்சந்திரன், ஏட்டு தேவசகாயம் ஆகியோர் காலை 11 மணி அளவில், விழுப்புரம் அருகே உள்ள சேந்தனூர் ரெயில் நிலையத்தில் எக்ஸ்பிரஸ் ரெயிலில் சோதனை செய்தனர்.

அப்போது ரெயில் பெட்டியில் உள்ள ஒரு கழிவறையில் 1½ கிலோ கஞ்சா ஒரு சாக்கு பையிலும், 18 கிலோ கொண்ட குட்கா பொருட்கள் ஒரு சாக்குமூட்டையிலும் இருந்தது தெரியவந்தது.

இதை யார் கடத்தி வந்தது என்பது குறித்து தெரியவில்லை. கஞ்சா மற்றும் குட்கா உள்ளிட்ட புகையிலை பொருட்களை பறிமுதல் செய்த கடலூர் முதுநகர் ரெயில்வே போலீசார், அதனை விழுப்புரம் போதை பொருள் தடுப்பு பிரிவு இன்ஸ்பெக்டர் பத்மஸ்ரீயிடம் ஒப்படைத்தனர். இதுகுறித்து விழுப்புரம் போதைப் பொருள் தடுப்புப் பிரிவு போலீசார் வழக்குப்பதிவு செய்து விசாரணை நடத்தி வருகின்றனர்.