கார்

ஆடி நிறுவனம் இந்திய சந்தையில் தனது Q8 இ-டிரான் மற்றும் Q8 ஸ்போர்ட்பேக் இ டிரான் மாடல்களுக்கான முன்பதிவை கடந்த வாரம் துவங்கியது. இரு மாடல்களுக்கான முன்பதிவு கட்டணம் ஐந்து லட்சம் ரூபாய் என்று நிர்ணயம் செய்யப்பட்டு உள்ளது. முன்பதிவு ஏற்கனவே துவங்கிய நிலையில், இரு மாடல்களும் தற்போது இந்தியாவில் அறிமுகம் செய்யப்பட்டன.

புதிய ஆடி Q8 இ டிரான் சீரிஸ் விலை ரூ. 1 கோடியே 14 லட்சம், எக்ஸ்-ஷோரூம் என்று துவங்குகிறது. புதிய ஆடி Q8 இ டிரான் மாடல் எஸ்.யு.வி. மற்றும் ஸ்போர்ட்பேக் என இருவித பாடி ஸ்டைல்களில் கிடைக்கின்றன. இத்துடன் ஒன்பது வித்தியாசமான வெளிப்புற நிறங்கள், மூன்று இன்டீரியர் நிற ஆப்ஷன்களில் கிடைக்கின்றன.

அதன்படி மெடைரா பிரவுன், க்ரோனோஸ் கிரே, கிளேசியர் வைட், மிதோஸ் பிளாக், பிளாஸ்மா புளூ, சொனெரியா ரெட், மேக்னெட் கிரே, ஸ்லாம் பெய்க் மற்றும் மேன்ஹேட்டன் கிரே நிறங்களிலும், இன்டீரியரை பொருத்தவரை ஒகாபி பிரவுன், பியல் பெய்க் மற்றும் பிளாக் நிற ஆப்ஷன்களிலும் கிடைக்கின்றன.

ஆடி Q8 இ டிரான் மாடல் 95 கிலோவாட் ஹவர் மற்றும் 114 கிலோவாட் ஹவர் என இருவித பேட்டரி பேக் ஆப்ஷன்களில் கிடைக்கின்றன. இவை முறையே 340 ஹெச்.பி. பவர், 664 நியூட்டன் மீட்டர் டார்க் மற்றும் 408 ஹெச்.பி. பவர், 664 நியூட்டன் மீட்டர் டார்க் இழுவிசையை வெளிப்படுத்துகின்றன. இத்துடன் வழங்கப்படும் 170 கிலோவாட் டி.சி. ஃபாஸ்ட் சார்ஜர் மூலம் சார்ஜ் செய்யும் போது, காரை 10-இல் இருந்து 80 சதவீதம் வரை சார்ஜ் செய்ய 31 நிமிடங்களே ஆகும். இந்த கார் முழு சார்ஜ் செய்தால் 600 கிலோமீட்டர்கள் வரையிலான ரேன்ஜ் வழங்குகின்றன.

விலை விவரங்கள்:

ஆடி Q8 50 இ டிரான் ரூ. 1 கோடியே 13 லட்சத்து 70 ஆயிரம்

ஆடி Q8 50 ஸ்போர்ட்பேக் இ டிரான் ரூ. 1 கோடியே 18 லட்சத்து 20 ஆயிரம்

ஆடி Q8 55 இ டிரான் ரூ. 1 கோடியே 26 லட்சத்து 10 ஆயிரம்

ஆடி Q8 55 ஸ்போர்ட்பேக் இ டிரான் ரூ. 1 கோடியே 30 லட்சத்து 60 ஆயிரம்

அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு இருக்கிறது.

மஹிந்திரா நிறுவனம் சுதந்திர தினத்தன்று ஸ்கார்பியோ N சார்ந்த பிக்கப் மாடல் மற்றும் எலெக்ட்ரிக் தார் கான்செப்ட் மாடல்களுடன் பல்வேறு புதிய அறிவிப்புகளை வெளியிட்டது. இதில் தார், ஸ்கார்பியோ மற்றும் பொலிரோ போன்ற மாடல்களின் எலெக்ட்ரிக் வெர்ஷன் அறிமுகம் செய்யப்படும் என்றும் மஹிந்திரா நிறுவனம் அறிவித்து விட்டது.

இதுதவிர மஹிந்திரா நிறுவனம் தனது பார்ன்-EV (பிறந்த-EV) எஸ்.யு.வி. மாடல்களுக்கென புதிய லோகோவை அறிமுகம் செய்து இருக்கிறது. மஹிந்தரா நிர்வாக இயக்குனர் மற்றும் தலைமை செயல் அதிகாரி ராஜேஷ் ஜெஜுரிக்கர், "எங்களின் அனைத்து ஐ.சி. என்ஜின் பிரான்டுகளையும் எலெக்ட்ரிக் வடிவம் கொடுப்போம்," என்று தெரிவித்தார்.

பவர்டிரெயினை பொருத்தவரை ஸ்கார்பியோ மற்றும் பொலிரோ EV மாடல்களில் RWD செட்டப், டுவின் மோட்டார்கள் வழங்கப்படுகிறது. ஸ்கார்பியோ.e மாடலில் AWD வசதியும் வழங்கப்படும் என்று தெரிகிறது. மற்ற வெர்ஷன்கள் அனைத்தும் ஒரே பிளாட்ஃபார்மில் உருவாக்கப்பட இருக்கிறது. இரண்டு எஸ்.யு.வி.-க்களின் எலெக்ட்ரிக் வெர்ஷன் எப்போது அறிமுகம் செய்யப்படும் என்பது பற்றி இதுவரை எந்த தகவலும் இல்லை.

ஸ்கார்பியோ கிளாசிக், ஸ்கார்பியோ N மற்றும் பொலிரோ போன்ற மாடல்கள் தொடர்ந்து ஐ.சி. என்ஜின் வடிவிலும் விற்பனை செய்யப்படும். இந்த மாடல்கள் இந்திய சந்தையில் மஹிந்திரா நிறுவனத்திற்கு அதிக விற்பனையை ஈட்டிக்கொடுக்கின்றன.

டாடா மோட்டார்ஸ் நிறுவனம் இந்திய ஆட்டோமொபைல் சந்தையின் எலெக்ட்ரிக் வாகன பிரிவில் முன்னணி இடத்தில் இருந்து வருகிறது. அந்த வகையில், எலெக்ட்ரிக் வாகன உற்பத்தியில் ஒரு லட்சம் யூனிட்களை உற்பத்தி செய்து இருப்பதாக அறிவித்து இருக்கிறது. இதில் கடந்த ஒன்பது மாதங்களில் மட்டும் 50 ஆயிரம் எலெக்ட்ரிக் வாகனங்களை உற்பத்தி செய்து இருக்கிறது.

தற்போது டாடா மோட்டார்ஸ் நிறுவனம் மட்டும் தான் அனைத்து வித பாடி ஸ்டைல்களிலும் எலெக்ட்ரிக் வாகனங்களை விற்பனை செய்து வருகிறது. அந்த வகையில் ஹேச்பேக் பிரிவில் (டியாகோ EV), செடான் பிரிவில் (டிகோர் EV) மற்றும் எஸ்.யு.வி. பிரிவில் (நெக்சான் EV) போன்ற மாடல்கள் இடம்பெற்றுள்ளன. இத்துடன் எக்ஸ்பிரஸ் டி, டிகோர் EV மாடலின் வாடகை கார் வெர்ஷனும் விற்பனை செய்து வருகிறது.

டாடா மோட்டார்ஸ் நிறுவனத்தின் அனைத்து எலெக்ட்ரிக் வாகனங்களின் விலையும் ரூ. 8 லட்சத்து 69 ஆயிரம் என்று துவங்கி அதிகபட்சம் ரூ. 19 லட்சத்து 29 ஆயிரம் வரை நிர்ணயம் செய்யப்பட்டு உள்ளது. அனைத்து விலைகளும் எக்ஸ்-ஷோரும் அடிப்படையில் குறிப்பிடப்பட்டு இருக்கிறது.

2028 ஆண்டு இந்தியாவின் எலெக்ட்ரிக் வாகன சந்தையில் பத்து லட்சம் யூனிட்கள் வரை இருக்கும் என்று டாடா மோட்டார்ஸ் நிறுவனம் நம்பிக்கை தெரிவித்து உள்ளது. இதில் 20 சதவீதம் யூனிட்கள் எலெக்ட்ரிக் பவர்டிரெயின் கொண்டிருக்கும் என்று தெரிவித்து இருக்கிறது.

ஜாகுவார் லேன்ட் ரோவர் நிறுவனம் தனது முற்றிலும் புதிய ரேன்ஜ் ரோவர் மற்றும் ரேன்ஜ் ரோவர் ஸ்போர்ட் மாடல்களை உருவாக்கும் பணிகளில் ஈடுபட்டு வருகிறது. இரு மாடல்களும் அடுத்த ஆண்டு துவக்கத்தில் அறிமுகம் செய்யப்படும் என்று தெரிகிறது. இந்த நிலையில், இரண்டு புதிய எலெக்ட்ரிக் கார்களுக்கான முன்பதிவு நவம்பர் மாதம் துவங்கும் என்று தெரிவித்துள்ளது.

இந்த தசாப்தத்தின் இறுதியில் ஜாகுவார் மாடல்களில் இருந்து 100 சதவீதமும், லேன்ட் ரோவரில் இருந்து 60 சதவீத விற்பனை எலெக்ட்ரிக் மாடல்களாக இருக்க வேண்டும் என்று ஜாகுவார் லேன்ட் ரோவர் இலக்கு நிர்ணயம் செய்து இருக்கிறது. ரி-இமாஜின் யுக்தியின் கீழ் ஜாகுவார் நிறுவனம் 2025-ம் வாக்கில் முழுமையான எலெக்ட்ரிக் வாகன உற்பத்தியாளராக முடிவு செய்து இருக்கிறது.

2030-ம் ஆண்டு லேன்ட் ரோவர் நிறுவனம் முழுமையான எலெக்ட்ரிக் வாகன உற்பத்தியாளராக மாற திட்டமிட்டுள்ளது. லேன்ட் ரோவர் பிரான்டின் முதல் எலெக்ட்ரிக் கார் அடுத்த ஆண்டு அறிமுகம் செய்யப்பட இருக்கிறது. அனைத்து எலெக்ட்ரிக் லேன்ட் ரோவர் மாடல்களும் புதிதாக உருவாக்கப்பட்ட எலெக்ட்ரிக் மாட்யுலர் ஆர்கிடெக்ச்சர் பிளாட்ஃபார்மில் உருவாக்கப்படும்.

வரும் ஆண்டுகளில், இதே பிளாட்ஃபார்ம் மற்ற ஜாகுவார் எலெக்ட்ரிக் வாகனங்களிலும் பயன்படுத்தப்பட உள்ளன. அனைத்து எலெக்ட்ரிக் ரேன்ஜ் ரோவர் மாடல்களும் பிரிட்டனில் உள்ள வால்வெர்ஹாம்ப்டன் ஆலையில் உற்பத்தி செய்யப்பட உள்ளன. இதே ஆலையில் எலெக்ட்ரிக் டிரைவ் யூனிட்கள் மற்றும் பேட்டரி பேக்குகள் உற்பத்தி செய்யப்பட இருக்கின்றன.

அடுத்த ஆண்டு சர்வதேச விற்பனை துவங்கும் என்று எதிர்பார்க்கப்படும் நிலையில், எலெக்ட்ரிக் ரேன்ஜ் ரோவர் மாடல் இந்தியாவிலும் விற்பனைக்கு வரும் என்று தெரிகிறது. இவை முழுமையாக உற்பத்தி செய்யப்பட்ட நிலையில், இந்தியாவுக்கு இறக்குமதி செய்யப்பட உள்ளன. அதன் படி இந்திய பயனர்களும், சர்வதேச வெளியீட்டை தொடர்ந்து புதிய எலெக்ட்ரிக் கார்களை வாங்கிட முடியும்.

டொயோட்டா நிறுவனம் மாருதி சுசுகி எர்டிகா மாடலை தழுவி உருவாக்கப்பட்ட டொயோட்டா ருமியன் மாடலை இந்திய சந்தையில் அறிமுகம் செய்தது. புதிய டொயோட்டா ருமியன் மாடல் மூன்று வேரியன்ட்கள், ஐந்து நிற ஆப்ஷன்களில் கிடைக்கிறது. வரும் வாரங்களில் ருமியன் மாடலுக்கான முன்பதிவு துவங்க இருக்கிறது.

எர்டிகா மாடலை தழுவி உருவாக்கப்பட்டு இருக்கும் போதிலும், ருமியன் மாடலின் ஸ்டைலிங் காரணமாக சற்று வித்தியாசமான தோற்றம் கொண்டிருக்கிறது. அந்த வகையில் ருமியன் மாடலின் முன்புறம் வித்தியாசமான முன்புற கிரில், மெஷ் பேட்டன், ப்ரோஜெக்டர் ஹெட்லேம்ப்கள், பம்ப்பர்கள் மற்றும் அலாய் வீல்கள் ரிடிசைன் செய்யப்பட்டு உள்ளன.

இந்த மாற்றங்கள் தவிர, ருமியன் மாடல்- ஸ்பன்கி புளூ, கஃபே வைட், என்டைசிங் சில்வர், ரஸ்டிக் பிரவுன் மற்றும் ஐகானிக் கிரே என ஐந்துவிதமான நிறங்களில் கிடைக்கிறது. புதிய ருமியன் மாடலின் உள்புறம் ஏழு பேர் அமரும் வகையிலான இருக்கை அமைப்புகள், டூயல் டோன் பெய்க் மற்றும் பிளாக் தீம், 7 இன்ச் டச் ஸ்கிரீன் இன்போடெயின்மென்ட் சிஸ்டம், ரியர் ஏசி வென்ட்கள், ஆட்டோமேடிக் கிளைமேட் கன்ட்ரோல், ஸ்டீரிங் மவுன்ட் செய்யப்பட்ட கன்ட்ரோல்கள் வழங்கப்பட்டுள்ளன.

பாதுகாப்பிற்கு டொயோட்டா எம்பிவி மாடலில் நான்கு ஏர்பேக், ஹில்-ஹோல்டு அசிஸ்ட், ஏபிஎஸ் மற்றும் இபிடி, முன்புற சீட்பெல்ட்கள் வழங்கப்பட்டு உள்ளன. ருமியன் எம்பிவி மாடலில் K சீரிஸ் 1.5 லிட்டர் பெட்ரோல் என்ஜின் வழங்கப்பட்டு இருக்கிறது. இத்துடன் CNG வேரியன்ட் வழங்கப்படுகிறது. இந்த என்ஜின் 102 ஹெச்பி பவர், 136.8 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டுள்ளது.

இத்துடன் 5 ஸ்பீடு மேனுவல், 6 ஸ்பீடு டார்க் கன்வெர்ட்டர் ஆட்டோமேடிக் டிரான்ஸ்மிஷன் வழங்கப்படுகிறது. இதன் CNG வேரியன்ட் 87 ஹெச்பி பவர், 121.5 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது. இத்துடன் மேனுவல் டிரான்ஸ்மிஷன் வழங்கப்படுகிறது. 

மெர்சிடிஸ் பென்ஸ் இந்தியா நிறுவனம் தனது புதிய GLC மாடலுக்கான முன்பதிவை கடந்த மாதம் துவங்கியது. முன்பதிவு கட்டணம் ரூ. 1.5 லட்சம் ஆகும். தற்போது, புதிய மெர்சிடிஸ் பென்ஸ் GLC மாடல் விலை ரூ. 73.5 லட்சம், எக்ஸ்-ஷோரூம் என்று நிர்ணயம் செய்யப்பட்டு உள்ளது.

டிசைன் மற்றும் ஸ்டைலிங்கை பொருத்தவரை 2023 மெர்சிடிஸ் பென்ஸ் GLC மாடலில் தற்போதைய மாடலில் இருப்பதை விட வித்தியாசமான காஸ்மடிக் மாற்றங்களை கொண்டிருக்கிறது. இதன் முன்புறம் அளவில் பெரிய கிரில், பாரம்பரியம் மிக்க பென்ஸ் லோகோ, கிடைமட்டமாக பொருத்தப்பட்ட எல்இடி டிஆர்எல்-கள், புதிய எல்இடி ஹெட்லேம்ப்கள் வழங்கப்படுகின்றன.

இந்த காரின் நீளம் 60 மில்லிமீட்டர் வரை நீட்டிக்கப்பட்டு தற்போது 4716 மில்லிமீட்டராக உள்ளது. இதன் மூலம் காரின் வீல்பேஸ் 15 மில்லிமீட்டர் வரை உயர்த்தப்பட்டு தற்போது 2888 மில்லிமீட்டராக இருக்கிறது. காரின் பின்புறத்தில் பம்ப்பர் சற்று கூர்மையாக்கப்பட்டு இருக்கிறது. இத்துடன் புதிய எல்இடி ஹெட்லேம்ப்கள், பவர்டு டெயில்கேட் வழங்கப்படுகிறது.

புதிய மெர்சிடிஸ் பென்ஸ் GLC மாடல் இருவித பவர்டிரெயின் ஆப்ஷன்களில் கிடைக்கிறது. இதில் 2.0 லிட்டர் பெட்ரோல் மற்றும் 2.0 லிட்டர் டீசல் என்ஜின்கள் அடங்கும். இத்துடன் மைல்டு ஹைப்ரிட் மோட்டார் வழங்கப்படுகிறது. இத்துடன் 9 ஸ்பீடு ஆட்டோமேடிக் கியர்பாக்ஸ் மற்றும் 4மேடிக் சிஸ்டம் வழங்கப்படுகிறது.

ஹூண்டாய் நிறுவனம் தனது அல்கசார் மற்றும் கிரெட்டா அட்வென்ச்சர் எடிஷன் மாடல்களின் விலையை நேற்று அறிவித்தது. முன்னதாக இந்த மாடலுக்கான டீசர்கள் பலமுறை இணையத்தில் வெளியாகி வந்த நிலையில், இதன் விலை மற்றும் இதர விவரங்கள் அறிவிக்கப்பட்டு இருக்கின்றன. இரண்டு கார்களின் ஸ்பெஷல் எடிஷன் மாடல்களும் இரண்டு வேரியண்ட்களில் கிடைக்கின்றன.

அந்த வகையில் ஹூண்டாய் அல்கசார் மற்றும் கிரெட்டா அட்வென்ச்சர் எடிஷன் மாடல்களில் என்னென்ன மாற்றங்கள் மேற்கொள்ளப்பட்டு இருக்கின்றன என்ற விவரங்களை தொடர்ந்து பார்ப்போம்.

ஹூண்டாய் அல்கசார் மற்றும் கிரெட்டா அட்வென்ச்சர் எடிஷன் மாடல்கள் ரேன்ஜர் காக்கி நிற ஃபினிஷ் செய்யப்பட்டு உள்ளன. இவைதவிர காரின் கிரில், ஸ்கிட் பிலேட்கள், சைடு சில்கள், ரூஃப் ரெயில்கள், ஷார்க் ஃபின் ஆன்டெனா, ORVM-கள், அலாய் வீல் உள்ளிட்டவை பிளாக்டு-அவுட் செய்யப்பட்டுள்ளன.

இத்துடன் காரின் பின்புறம் இருக்கும் ஹூண்டாய் லோகோ, கிரெட்டா மற்றும் அல்கசார் எழுத்துக்கள் உள்ளிட்டவை டார்க் க்ரோம் ஃபினிஷ் செய்யப்பட்டுள்ளது. இதன் முன்புற ஃபெண்டரில் அட்வென்ச்சர் லோகோ உள்ளது. உள்புறத்தில் ஆல் பிளாக் தீம் செய்யப்பட்டு இருக்கிறது.

இத்துடன் சேஜ் கிரீன் இன்சர்ட்கள், புதிய இருக்கை மேற்கவர்கள், டூயல் கேமரா கொண்ட டேஷ்கேம், அட்வென்ச்சர்-ஸ்பெக் மேட் மற்றும் மெட்டல் பெடல்கள் வழங்கப்படுகின்றன. கிரெட்டா அட்வென்ச்சர் எடிஷன் மாடல்- அபைஸ் பிளாக், அட்லஸ் வைட், டைட்டன் கிரே, ரேன்ஜர் காக்கி உள்ளிட்ட மோனோடோன் நிறங்களும், அட்லஸ் வைட்-ரேன்ஜர் காக்கி, இரண்டு நிறங்களிலும் அபைஸ் பிளாக் ரூஃப் போன்ற நிறங்களில் கிடைக்கிறது.

ஹூண்டாய் அல்கசார் அட்வென்ச்சர் எடிஷன் மாடல்- அபைஸ் பிளாக், அட்லஸ் வைட், டைட்டன் கிரே மற்றும் ரேன்ஜர் காக்கி போன்ற மோனோ டோன் நிறங்களிலும், அட்லஸ் வைட், ரேன்ஜர் காக்கி மற்றும் டைட்டன் கிரே நிறங்களுடன் அபைஸ் பிளாக் ரூஃப் வழங்கப்படுகிறது.

புதிய அல்கசார் அட்வென்ச்சர் எடிஷன் மாடலில் 1.5 லிட்டர் டர்போ பெட்ரோல் என்ஜின், 1.5 லிட்டர் டீசல் என்ஜின் ஆப்ஷன்களில் கிடைக்கிறது. இத்துடன் 6 ஸ்பீடு மேனுவல் யூனிட், 6 ஸ்பீடு டார்க் கன்வெர்ட்டர் ஆட்டோமேடிக் யூனிட், 7 ஸ்பீடு டிசிடி யூனிட் வழங்கப்படுகிறது. கிரெட்டா அட்வென்ச்சர் எடிஷன் மாடலில் 1.5 லிட்டர் NA பெட்ரோல் என்ஜின் வழங்கப்படுகிறது. இத்துடன் 5 ஸ்பீடு மேனுவல், IVT யூனிட் வழங்கப்படுகிறது.

மாருதி சுசுகி நிறுவனத்தின் ஆல்டோ மாடல் இந்திய விற்பனையில் 45 லட்சம் யூனிட்கள் எனும் மைல்கல்லை எட்டியிருக்கிறது. இந்திய சந்தையில் 2000-வது ஆண்டு அறிமுகம் செய்யப்பட்ட மாருதி சுசுகி ஆல்டோ மாடல் அந்நிறுவனத்தின் நீண்ட காலம் விற்பனையில் உள்ள மாடல் என்ற பெருமையையும் பெற்று இருக்கிறது.

இந்திய சந்தையில் சுமார் இரண்டு தசாப்தங்களுக்கும் அதிகமாக மாருதி சுசுகி ஆல்டோ மாடல் விற்பனை செய்யப்பட்டு வருகிறது. தற்போது இந்த மாடல் பெட்ரோல் மற்றும் CNG என இருவித பவர்டிரெயின் ஆப்ஷன்களில் விற்பனை செய்யப்பட்டு வருகிறது. இந்தியாவில் புதிய மாருதி சுசுகி ஆல்டோ மாடலின் விலை ரூ. 3 லட்சத்து 99 ஆயிரம், எக்ஸ்-ஷோரூம் என்று துவங்குகிறது.

2000-வது ஆண்டு அறிமுகம் செய்யப்பட்ட மாருதி சுசுகி ஆல்டோ மாடல் 2016-ம் ஆண்டு வாக்கில் விற்பனையில் 30 லட்சம் யூனிட்களை கடந்தது. அதன் பிறகு எட்டே ஆண்டுகளில் இந்த கார் 15 லட்சம் யூனிட்கள் விற்பனையாகி இருக்கிறது. இந்த காரில் முதல் தலைமுறை ஆல்டோ K10 மாடல் 2010-ம் ஆண்டு அறிமுகம் செய்யப்பட்டது.

இந்திய சந்தையில் தற்போது விற்பனை செய்யப்பட்டு வரும் ஆல்டோ K10 மாடலில் 1.0 லிட்டர் NA பெட்ரோல் என்ஜின் வழங்கப்பட்டு இருக்கிறது. இத்துடன் 5 ஸ்பீடு மேனுவல் மற்றும் AMT யூனிட் வழங்கப்படுகிறது. இந்த காரின் VXi வேரியன்டில் CNG கிட் பொருத்திக் கொள்ளும் வசதியும் வழங்கப்படுகிறது. இதன் விலை ரூ. 5 லட்சத்து 96 ஆயிரம், எக்ஸ்-ஷோரூம் ஆகும்.

டாடா மோட்டார்ஸ் நிறுவனம் இந்திய சந்தையில் தனது பன்ச் iCNG மாடலை அறிமுகம் செய்தது. முன்னதாக ஆட்டோ எக்ஸ்போ 2023 நிகழ்வில் காட்சிக்கு வைக்கப்பட்ட நிலையில், தற்போது இந்த மாடல் அறிமுகம் செய்யப்பட்டு இருக்கிறது. புதிய பன்ச் iCNG மாடலின் விலை ரூ. 7 லட்சத்து 10 ஆயிரம், எக்ஸ்-ஷோரூம் என்று துவங்குகிறது.

இந்திய சந்தையில் டாடா பன்ச் iCNG மாடலின் முன்பதிவு கடந்த மாதம் துவங்கி நடைபெற்று வருகிறது. புதிய பன்ச் iCNG மாடலில் 1.2 லிட்டர், மூன்று சிலிண்டர்கள் கொண்ட NA பெட்ரோல் என்ஜின் வழங்கப்பட்டு உள்ளது. இத்துடன் 5 ஸ்பீடு மேனுவல் டிரான்ஸ்மிஷன் வழங்கப்படுகிறது.

பெட்ரோல் மோடில் இந்த என்ஜின் 84 ஹெச்பி பவர், 113 நியூட்டன் மீட்டர் டார்க் இழுவிசையை வெளிப்படுத்துகிறது. CNG மோடில் இந்த என்ஜின் 72 ஹெச்பி பவர், 103 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது.

அம்சங்களை பொருத்தவரை டாடா பன்ச் iCNG மாடலில் எலெக்ட்ரிக் சன்ரூப், ஆறு ஏர்பேக், டுவின் சிலிண்டர் CNG டேன்க், CNG மோடில் டைரக்ட் ஸ்டார்ட் வசதி, 7 இன்ச் இன்போடெயின்மென்ட் சிஸ்டம், ஆப்பிள் கார்பிளே, ஆண்ட்ராய்டு ஆட்டோ, ஆட்டோமேடிக் கிளைமேட் கண்ட்ரோல், 16 இன்ச் டைமண்ட் கட் அலாய் வீல்கள் வழங்கப்படுகின்றன.

எம்ஜி மோட்டார்ஸ் நிறுவனம் இந்திய சந்தையில் தனது கொமெட் கேமர் எடிஷன் மாடலை அறிமுகம் செய்தது. புதிய கேமர் எடிஷன் விலை அதன் ஸ்டாடன்டர்டு எடிஷனை விட ரூ. 65 ஆயிரம் வரை அதிகம் ஆகும். இந்தியாவின் முன்னணி கேமர் நமன் மதுர் என்ற மார்டல் உடனான கூட்டணியில் புதிய கேமர் எடிஷன் மாடல் உருவாக்கப்பட்டு இருக்கிறது.

புதிய எம்ஜி கொமெட் கேமர் எடிஷன் மாடலின் வீல், டோர் உள்ளிட்டவைகளில் ஸ்பெஷல் அக்சென்ட்களும், பி பில்லரில் ஸ்டிக்கர்களும் வழங்கப்படுகிறது. உள்புறம் நியான் லைட்கள், வித்தியாச டெக்ஸ்ச்சர் கொண்ட பொருட்கள் வழங்கப்படுகின்றன. இந்திய சந்தையில் எம்ஜி கொமெட் மாடல் மே 4-ம் தேதி அறிமுகம் செய்யப்பட்டது.

எம்ஜி கொமெட் எலெக்ட்ரிக் மாடல் விலை ரூ. 7 லட்சத்து 98 ஆயிரம், எக்ஸ்-ஷோரூம் என்று நிர்ணயம் செய்யப்பட்டது. இந்த எலெக்ட்ரிக் கார் பேஸ், பிளே மற்றும் புஷ் என மூன்று வேரியன்ட்களில் கிடைக்கிறது. இதன் டாப் என்ட் மாடல்களில் டச் ஸ்கிரீன் வசதி கொண்ட இன்போடெயின்மென்ட், ஆப்பிள் கார்பிளே, ஆண்ட்ராய்டு ஆட்டோ, பவர் மிரர் மற்றும் வின்டோக்கள் வழங்கப்படுகின்றன.

இந்திய சந்தையில் எம்ஜி கொமெட் மாடல் 17.3 கிலோவாட் ஹவர் பேட்டரி பேக் கொண்டிருக்கிறது. இத்துடன் எலெக்ட்ரிக் மோட்டார் வழங்கப்பட்டு இருக்கிறது. இந்த மோட்டார் 41 ஹெச்பி பவர், 76 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது. இந்த எலெக்ட்ரிக் கார் முழு சார்ஜ் செய்தால் 230 கிலோமீட்டர்கள் வரையிலான ரேன்ஜ் வழங்கும் என்று தெரிவிக்கப்பட்டு இருக்கிறது.

டாடா மோட்டார்ஸ் நிறுவனத்தின் அதிகம் எதிர்பார்க்கப்படும் பன்ச் CNG மாடல் விரைவில் இந்திய சந்தையில் அறிமுகம் செய்யப்பட இருக்கிறது. ஆட்டோ எக்ஸ்போ 2023 நிகழ்வில் காட்சிக்கு வைக்கப்பட்ட நிலையில், டாடா பன்ச் CNG மாடலின் முன்பதிவு நாடு முழுக்க சில விற்பனை மையங்களில் மட்டும் துவங்கி இருப்பதாக தகவல் வெளியாகி உள்ளது.

எனினும், டாடா மோட்டார்ஸ் இதுபற்றி எந்த தகவலும் வழங்கவில்லை. அந்த வகையில், தற்போதைய முன்பதிவுகள் அதிகாரப்பூர்வமற்ற நிலையில் நடைபெற்று வருகிறது. ஆட்டோ எக்ஸ்போ 2023 நிகழ்வில் டாடா பன்ச் CNG மாடலுடன் அல்ட்ரோஸ் CNG மாடலும் காட்சிக்கு வைக்கப்பட்டது குறிப்பிடத்தக்கது. அல்ட்ரோஸ் CNG போன்றே பன்ச் CNG மாடலும் பல்வேறு வேரியன்ட்களில் கிடைக்கும் என்று தெரிகிறது.

தற்போது பன்ச் CNG மாடல் விற்பனை மையங்களுக்கு வரத் துவங்கிய நிலையில், விரைவில் இதன் வெளியீடு நடைபெறும் என்று எதிர்பார்க்கலாம். பன்ச் CNG மாடலில் ஆறு ஏர்பேக், ப்ரோஜெக்டர் ஹெட்லேம்ப், 16-இன்ச் அலாய் வீல்கள், ஆட்டோமேடிக் கிளைமேட் கன்ட்ரோல், 7 இன்ச் டச் ஸ்கிரீன் இன்போடெயின்மென்ட் சிஸ்டம், எலெக்ட்ரிக் சன்ரூப் வழங்கப்படுகிறது.

பன்ச் CNG மாடலில் 1.2 லிட்டர் NA பெட்ரோல் என்ஜின் வழங்கப்படுகிறது. இத்துடன் 5 ஸ்பீடு கியர்பாக்ஸ் வழங்கப்படுகிறது. CNG மோடில் இந்த கார் 76 ஹெச்பி பவர், 97 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது.

இந்திய சந்தையில் டாடா பன்ச் மாடல் சிட்ரோயன் C3, மாருதி சுசுகி இக்னிஸ், நிசான் மேக்னைட் மற்றும் ரெனால்ட் கைகர் போன்ற மாடல்களுக்கு போட்டியாக அமைகிறது. CNG மாடல் என்ற வகையில், இந்த கார் ஹூன்டாய் எக்ஸ்டர் CNG மாடலுக்கு போட்டியாக அமைகிறது. 

டொயோட்டா கிர்லோஸ்கர் மோட்டார் நிறுவனம் தனது இன்னோவா க்ரிஸ்டா காரின் தேர்வு செய்யப்பட்ட வேரியன்ட்களின் விலையை உயர்த்தி இருக்கிறது. விலை உயர்வு ஏற்கனவே அமலுக்கு வந்துவிட்டது. இதன் விலை ரூ. 19 லட்சத்து 99 ஆயிரம், எக்ஸ்-ஷோரூம் என்று துவங்குகிறது. இந்த கார் ஐந்து விதமான நிறங்கள் மற்றும் மூன்று வேரியன்ட்களில் கிடைக்கிறது.

புதிய இன்னோவா க்ரிஸ்டா மாடலின் டாப் என்ட் ZX வேரியன்ட் விலை ரூ. 37 ஆயிரம் அதிகரிக்கப்பட்டு இருக்கிறது. விலை உயர்வு காரணமாக இந்த வேரியன்டின் விலை ரூ. 26 லட்சத்து 05 ஆயிரம் என்று மாறி இருக்கிறது. இதே போன்று VX வேரியன்டின் 7 சீட்டர் மற்றும் 8 சீட்டர் வேரியன்ட்களின் விலை ரூ. 35 ஆயிரம் அதிகரித்து உள்ளது.

இவைகளின் புதிய விலை முறையே ரூ. 24 லட்சத்து 39 ஆயிரம் மற்றும் ரூ. 24 லட்சத்து 44 ஆயிரம் என்று மாறி இருக்கிறது. அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு இருக்கிறது. இன்னோவா க்ரிஸ்டா மாடலின் என்ட்ரி லெவல் விலையில் மட்டும் எவ்வித மாற்றமும் மேற்கொள்ளப்படவில்லை.

இந்திய சந்தையில் டொயோட்டா இன்னோவா க்ரிஸ்டா மாடலில் 2.4 லிட்டர் டீசல் என்ஜின் வழங்கப்பட்டு இருக்கிறது. இத்துடன் 5 ஸ்பீடு மேனுவல் டிரான்ஸ்மிஷன் வழங்கப்படுகிறது. இந்த என்ஜின் 148 ஹெச்பி பவர், 343 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது.

புதிய டொயோட்டா இன்னோவா க்ரிஸ்டா மாடல் சூப்பர் வைட், ஆட்டிட்யுட் மைக்கா பிளாக், பிளாட்டினம் வைட் பியல், அவான்ட்-கார்டெ பிரான்ஸ் மெட்டாலிக் மற்றும் சில்வர் மெட்டாலிக் போன்ற நிறங்களில் கிடைக்கிறது. சமீபத்தில் தான் இன்னோவா க்ரிஸ்டா மாடலின் ஆம்புலன்ஸ் வெர்ஷன் அறிமுகம் செய்யப்பட்டது.