புதுச்சேரி

புதுச்சேரி:

புதுவை மாநிலத்தில் நேற்று காலை 10 மணியுடன் நிறைவடைந்த 24 மணிநேரத்தில் 3 ஆயிரத்து 826 பேருக்கு கொரோனா வைரஸ் தொற்று பரிசோதனை மேற்கொள்ளப்பட்டது. அதில் 126 பேருக்கு தொற்று பாதிப்பு இருப்பது கண்டறியப்பட்டது. நேற்று ஒரே நாளில் 314 பேர் குணமடைந்து வீடு திரும்பியுள்ளனர். அதே நேரத்தில் உயிரிழப்பு ஏதும் இல்லை.

புதுவை மாநிலத்தில் ஒட்டுமொத்தமாக 3 லட்சத்து 29 ஆயிரத்து 907 பேருக்கு தொற்று பரிசோதனை மேற்கொள்ளப்பட்டுள்ளது. அவர்களில் 2 லட்சத்து 88 ஆயிரத்து 479 பேருக்கு தொற்று இல்லை என்பது கண்டறியப்பட்டது. 35 ஆயிரத்து 675 பேருக்கு தொற்று உறுதி செய்யப்பட்டுள்ளது.

அவர்களில் 510 பேர் ஆஸ்பத்திரிகளில் சிகிச்சை பெற்று வருகின்றனர். 1,130 பேர் வீடுகளில் தனிமைப்படுத்தப்பட்டு சிகிச்சை அளிக்கப்பட்டு வருகிறது. இதுவரை 33 ஆயிரத்து 437 பேர் குணமடைந்து வீடு திரும்பியுள்ளனர்.

598 பேர் உயிரிழந்துள்ளனர். அவர்களில் 493 பேர் புதுச்சேரியையும், 55 பேர் காரைக்காலையும், 43 பேர் ஏனாமையும், 7 பேர் மாகியையும் சேர்ந்தவர்கள். புதுவையில் உயிரிழப்பு என்பது 1.68 சதவீதமாகவும், குணமடைவது 93.73 சதவீதமாகவும் (சுமார் 94 சதவீதம்) உள்ளது என்பது குறிப்பிடத்தக்கது.

மேற்கண்ட தகவலை சுகாதார அமைச்சர் மல்லாடிகிருஷ்ணாராவ் தெரிவித்தார்.

மேலும் அவர் கூறியதாவது:-

தற்போது நாடு முழுவதும் கொரோனா பாதிப்பு அதிகரித்து வருகிறது. தசரா பண்டிகை கொண்டாட்டத்தில் மக்கள் கூடியதால் இந்த எண்ணிக்கை அதிகரித்துள்ளதாக தெரிகிறது. புதுவையில் தற்போது தீபாவளி பண்டிகையையொட்டி மக்கள் நடமாட்டம் அதிகரித்துள்ளது.

கடை வீதிகளில் மக்கள் கூட்டம் அதிகமாக உள்ளது. இதனால் இந்த மாத இறுதியில் கொரோனா பாதிப்பு அதிகரிக்கும் ஆபத்து உள்ளது. பொதுமக்கள் கண்டிப்பாக முகக்கவசம் அணிந்து சமூக இடைவெளியை பின்பற்ற வேண்டும்.

இவ்வாறு அமைச்சர் மல்லாடிகிருஷ்ணாராவ் கூறினார்.

புதுச்சேரி:

புதுவை அரசின் சுகாதாரத்துறையில் சுகாதார உதவி ஆய்வாளராக பணியாற்றி வருபவர் அய்யனார். பழங்கால பொருட்கள் சேகரிப்பில் ஆர்வம் கொண்ட இவர் தனது வீட்டில் 1000-க்கும் மேற்பட்ட பழங்கால பொருட்களை புதுவை சாமிபிள்ளைதோட்டத்தில் உள்ள தனது வீட்டில் சேகரித்து வைத்துள்ளார். இதற்காக கடந்த 20 ஆண்டுகளுக்கும் மேலாக இந்த பொருட்களை சேகரித்து வந்துள்ளார்.

இதில் வெண்கலம், பித்தளை, செம்பு உள்ளிட்ட உலோகங்களால் செய்யப்பட்ட செம்பு, டம்ளர், பாத்திரங்கள், பூஜை பொருட்கள், பானைகள், எடைக்கற்கள், மரக்கால் என விதம்விதமாக இடம்பெற்றுள்ளன.

தமிழகம், புதுவையில் பல்வேறு இடங்களுக்கு சென்று இந்த பொருட்களை வாங்கியுள்ளார். புதுவை சண்டே மார்க்கெட்டிலும் ஏராளமான பொருட்களை வாங்கி குவித்துள்ளார். இதுதொடர்பாக அய்யனார் கூறியதாவது:-

பழங்கால பொருட்கள் குறித்த விவரங்களை வருங்கால நமது சந்ததியினர் தெரிந்துகொள்வதற்காக இந்த பொருட்களை சேகரித்து வைத்துள்ளேன். எனக்கு சிறுவயது முதலே நாணயங்கள் சேகரிப்பதில் ஆர்வம் அதிகம்.

இந்த பொருட்களை நமது பெண்கள் புளிபோட்டு துலக்குவார்கள். அது ஒரு உடற்பயிற்சியாகவே அமைந்தது. இந்த பொருட்களில் உணவு சமைத்து உண்பதால் நமக்கு நோய்கள் வராது. ஆனால் இப்போது பிளாஸ்டிக்குகளால் ஆன பாத்திரங்களை பயன்படுத்துவதால் நோய் பாதிக்க அதிக வாய்ப்பு உள்ளது.

வெண்கல பொருட்களில் சூடான பொருட்களை வைத்தால் அது பல மணிநேரம் அப்படியே இருக்கும். இத்தகைய பொருட்களை பயன்படுத்தியதால் நம் முன்னோர் நூறாண்டுகள் வரை வாழ்ந்தனர். ஆனால் நாம் அதை மறந்ததால் நமது வாழும் காலம் குறைந்து வாழ்க்கை முறையும் மாறிவிட்டது.

நம்மில் பலரது வீடுகளில் மூதாதையர் பயன்படுத்திய பல பொருட்கள் உள்ளன. அதை பயன்படுத்தாமல் பரணில் போட்டு வைக்காதீர்கள். அதேநேரத்தில் நல்ல விலை கிடைக்கிறது என்று விற்றுவிடவும் கூடாது. முன்னோர்கள் பயன்படுத்திய சாமான்களை நாமும் பயன்படுத்த வேண்டும். இந்த பாத்திரங்களின் பெயர்கள், அவற்றின் பயன்பாடு குறித்து புத்தகம் ஒன்றை தயாரிக்கவேண்டும் என்பது எனது விருப்பம். அதேபோல் அனைவரும் இந்த பாத்திரங்களை பார்த்து ரசிக்க நிரந்தர காட்சியகம் ஒன்றை ஏற்படுத்த வேண்டும்.

இப்போது ஆயுதபூஜை தினத்தன்று மட்டுமே அனைத்து பொருட்களையும் காட்சிக்கு வைக்கிறேன். மற்ற நேரங்களில் வீட்டில் போதிய வசதியில்லாததால் மூட்டையாக கட்டி வைத்து விடுகிறேன்.

இவ்வாறு அய்யனார் கூறினார்.

புதுச்சேரி:

எதிர்வரும் வடகிழக்கு பருவமழை மற்றும் குறைந்த காற்றழுத்த தாழ்வுநிலை காரணமாக பொதுமக்களின் பாதுகாப்பு அம்சங்களை கருத்தில்கொண்டு பேரிடர் மற்றும் மழைக்காலங்களில் பொதுமக்கள் என்னென்ன தற்காப்பு நடவடிக்கைகள் மேற்கொள்ள வேண்டும்? மின் சாதனங்களை எவ்வாறு கையாண்டு விபத்துகளை தவிர்ப்பது எப்படி? என்பது தொடர்பாக மின்துறை செயற்பொறியாளர் ராமநாதன் விடுத்துள்ள செய்திக்குறிப்பில் கூறியிருப்பதாவது:-

மின் கம்பங்களில் பந்தல், கொடிக்கம்பி கயிறு மற்றும் மாடு முதலியவற்றை கட்டக்கூடாது. மின்துறை மேல்நிலை கம்பிகளுக்கு அருகில் உள்ள மரக்கிளைகளை அகற்ற மின்துறை அலுவலர்களை அணுகவேண்டும். இடி மின்னல் விழும்போது தண்ணீர் தேங்கியுள்ள பகுதியில் நிற்கக்கூடாது. மின் கம்பிகள் அறுந்து கிடந்தால் தொட முயற்சிக்க வேண்டாம்.

அதேபோல் இடி மின்னல் இருக்கும்போது டி.வி., கம்ப்யூட்டர், தொலைபேசி போன்றவற்றை பயன்படுத்த வேண்டாம். மின்மாற்றிகள், மின்பெட்டிகள், மின் இழுவை கம்பிகள் ஆகியவற்றை தொடக்கூடாது. கனரக வாகனங்களை மின் கம்பங்கள், மின்மாற்றிகள் அருகில் நிறுத்தி பொருட்களை ஏற்றவோ, இறக்கவோ கூடாது. மின்சாரத்தால் ஏற்படும் தீயை தண்ணீரை ஊற்றி அணைக்க முயற்சிக்காமல் தீயணைப்புத்துறையின் உதவியை நாடவேண்டும்.

வீட்டின் சுவர்களில், மின் சாதனங்களில் மின் அதிர்ச்சியை உணர்ந்தால் உலர்ந்த ரப்பர் காலணி அணிந்து மெயின் சுவிட்சை அணைத்துவிட்டு மின்துறைக்கு தகவல் தெரிவிக்க வேண்டும். சைக்கிள் செயின், கம்பிகள், பச்சை கொடிகள், ஈரமான பூமாலை போன்றவற்றை மின் கம்பிகளில் தூக்கி எறிவது ஆபத்தை விளைவிக்கும்.

பழுதான மின் சாதனங்களை பயன்படுத்தக்கூடாது. உடைந்த சுவிட்ச், பிளக், பியூஸ் போன்றவற்றை உடனடியாக மாற்றவேண்டும். மின்சார சார்ஜரில் இணைப்பில் இருக்கும்போது செல்போனை பயன்படுத்தக் கூடாது. தரை கழுவும்போது ஈரக் கைகளால் இணைப்பில் இருக்கும் மின்விசிறி போன்றவற்றை நகர்த்தக் கூடாது. கிரைண்டர் போன்ற உபகரணங்களுக்கு தனியாக நில இணைப்பு (எர்த்) கொடுக்கவேண்டும். மின்மோட்டார், தண்ணீர் பம்பு மோட்டார் போன்றவற்றின் மீது மழைநீர் படாமல் பார்த்துக்கொள்ள வேண்டும்.

இவ்வாறு அதில் கூறப்பட்டுள்ளது.

புதுச்சேரி:

உலக நாடுகளை அச்சுறுத்தி வரும் கொரோனாவால் பாதிக்கப்படுவர்களின் எண்ணிக்கை நாளுக்கு நாள் அதிகரித்த வண்ணம் உள்ளது. இன்று காலை மத்திய சுகாதார அமைச்சகம் வெளியிட்ட தகவலின்படி இந்தியாவில் கொரோனாவால் பாதிக்கப்பட்டவர்களின் மொத்த எண்ணிக்கை 83 லட்சத்தை கடந்துள்ளது. மொத்த பாதிப்பு  83,13,877 ஆக உள்ளது. கடந்த 24 மணி நேரத்தில் 46,254 பேருக்கு கொரோனா தொற்று உறுதி செய்யப்பட்டுள்ளது. 514 பேர் மரணம் அடைந்துள்ளனர். இதன்மூலம் கொரோனா வைரசால் உயிரிழந்தோர் எண்ணிக்கை 1,23,611 ஆக உயர்ந்துள்ளது.

இந்நிலையில், புதுச்சேரியில் இன்று 108 பேருக்கு கொரோனா தொற்று உறுதி செய்யப்பட்டதால் பாதிக்கப்பட்டவர்களின் எண்ணிக்கை 35,429ஆக உயர்ந்துள்ளது.