புதுச்சேரி

புதுச்சேரி:

புதுவை என்.ஆர். காங்கிரஸ், பா.ஜனதா கூட்டணியின் முதல்-அமைச்சராக கடந்த 7-ந்தேதி ரங்கசாமி பதவியேற்றார்.

என்.ஆர். காங்கிரஸ், பா.ஜனதா இடையே அமைச்சர் பங்கீட்டில் உடன்பாடு ஏற்படாததால் கடந்த ஒரு மாதமாக இழுபறி நீடித்தது. இந்த நிலையில் பா.ஜனதா மேலிட தலைவர்களோடு ரங்கசாமி நேரடியாக பேச்சுவார்த்தையில் ஈடுபட்டார்.

இதையடுத்து என்.ஆர். காங்கிரஸ், பா.ஜனதா இடையில் சமரச தீர்வு ஏற்பட்டுள்ளது. பாஜனதாவுக்கு சபாநாயகர், 2 அமைச்சர் பதவி வழங்க ரங்கசாமி சம்மதம் தெரிவித்தார்.

இரு கட்சிகளும் புதிய அமைச்சர்களை தேர்வு செய்யும் பணியில் ஈடுபட்டுள்ளனர். அமைச்சர் பதவியை பெறுவதில் இரு கட்சிக்குள்ளும் போட்டா போட்டி நிலவி வருகிறது.

இந்நிலையில் நேற்று மாலை பா.ஜனதா எம்.எல்.ஏ.க்கள் ஆலோசனை கூட்டம் நடந்தது. இதில் பா.ஜனதா, ஆதரவு தரும் சுயேச்சை எம்.எல்.ஏ.க்கள் பங்கேற்றனர்.

கூட்டத்தின் முடிவில் மாநில தலைவர் சாமிநாதன், யாருக்கு என்ன பதவி என முடிவெடுக்கும் அதிகாரம் தேசிய தலைவர் நட்டா மற்றும் புதுவை பொறுப்பாளர்களுக்கு வழங்கி உள்ளோம் என தெரிவித்தார்.

இதனிடையே பா.ஜனதா மேலிட தலைவர்கள் சி.டி.ரவி, ராஜூ சந்திரசேகர் எம்.பி. ஆகியோர் நாளை (வெள்ளிக்கிழமை) புதுவைக்கு வருகின்றனர். அவர்கள் பா.ஜனதா எம்.எல்.ஏ.க்களோடு ஆலோசனை நடத்துகின்றனர்.

தொடர்ந்து முதல்- அமைச்சர் ரங்கசாமியை சந்தித்து பேசுகின்றனர். அப்போது பா.ஜனதா தரப்பில் அமைச்சர்கள் பட்டியலை ரங்கசாமியிடம் அளிக்கின்றனர்.

அதே நேரத்தில் சபாநாயகர் தேர்தலில் பா.ஜனதா சார்பில் போட்டியிடும் வேட்பாளரையும் தெரிவிக்கின்றனர். தொடர்ந்து சபாநாயகர் தேர்தலுக்கான அறிவிப்பு விரைவில் வெளியாக உள்ளது.

அமைச்சர்கள் பதவியேற்பு அடுத்த வாரம் இருக்கும் என தெரிகிறது. ஏனெனில் வருகிற 10-ந்தேதி அமாவாசை தினமாகும். மரணயோகம் என்பதால் அன்றைய தினம் பதவியேற்பு இருக்காது. 14-ந் தேதி நல்ல முகூர்த்த நாளாக இருப்பதால் அன்றைய தினம் என்.ஆர். காங்கிரஸ் மற்றும் பா.ஜனதா அமைச்சர்கள் பதவியேற்பார்கள் என எதிர்பார்க்கப்படுகிறது.

புதுவை பொறுப்பாளரான நிர்மல்குமார் சுரானா காலில் ஏற்பட்ட காயத்துக்காக பெங்களூருவில் சிகிச்சை பெற்று வருகிறார். அவரை இன்று புதுவை மாநில பா.ஜனதா தலைவர் சாமிநாதன், சட்டமன்ற கட்சித்தலைவர் நமச்சிவாயம் ஆகியோர் சந்தித்தனர். அவர்களுடன் நிர்மல்குமார் சுரானா, அமைச்சர்கள் நியமனம் குறித்து ஆலோசனை நடத்தினார்.

புதுச்சேரி:

புதுவையில் தற்போது கொரோனா நோயால் பாதிக்கப்பட்டு சிகிச்சை பெற்று வருபவர்களுக்கும், சிகிச்சை முடிந்த கொரோனா நோயாளிகளுக்கும் கருப்பு பூஞ்சை தாக்கம் ஏற்பட்டு வருகிறது.

புதுவையில் இதுவரை 40 நோயாளிகளுக்கு கருப்பு பூஞ்சை நோய் ஏற்பட்டு அதில் 2 பேர் மரணத்தை தழுவியுள்ளனர். இதுபற்றி சுகாதாரத்துறை செயலர் டாக்டர் அருண் கூறியதாவது:-

கொரோனா நோயால் பாதிக்கப்பட்டு சிகிச்சை பெற்றவர்கள் தங்களது ரத்த சர்க்கரை அளவினை பரிசோதித்து அதற்கான மருந்துகளை எடுத்து சர்க்கரை அளவினை சீராக பாதுகாத்து வந்தால் இந்த நோய் வராமல் பாதுகாத்துக் கொள்ளலாம்.

வீட்டிலேயே ஆக்சிஜன் உபயோகப்படுத்துபவர்கள் சுத்திகரிக்கப்பட்ட நீரை மட்டுமே பயன்படுத்த வேண்டும்.

இது ஒருவரிடம் இருந்து மற்றவர்களுக்கு பரவும் நோய் அல்ல. கொரோனா நோய் பாதிக்கப்பட்டவர்களுக்கு உடலில் ரத்தக்குழாயில் ஏற்படும் பாதிப்பினால் நோயின் தாக்கம் அதிகரிக்கிறது.

மருத்துவரின் பரிந்துரையின்றி ஸ்டீராய்டு மருந்து மாத்திரைகளை உட்கொள்பவர்களுக்கு இந்த நோய் ஏற்படுகிறது.

இதனை ஆரம்பகட்ட நிலையிலேயே அறிந்து கொள்ள கருப்பு பூஞ்சை நோயின் அறிகுறிகள் பற்றி விழிப்புணர்வு ஏற்படுத்தப்பட்டு வருகிறது. கொரோனா நோயிலிருந்து குணமடைந்தவர்களுக்கு தலைவலி, மூக்கடைப்பு, கருப்புநிற சளி, மூக்கு வாய் பகுதியில் கருப்பு புள்ளிகள் காணப்படுவது, கண்ணில் வலி அல்லது வீக்கம், ரெட்டை பார்வை, பல்வலி, பல் ஆடுதல் ஆகிய அறிகுறிகள் ஏதேனும் தென்பட்டால் உடனடியாக மருத்துவரை ஆலோசிக்க வேண்டும்.

இந்த நோயை ஆரம்ப நிலையிலேயே கண்டறிந்து சிகிச்சை அளித்தால் முற்றிலும் குணப்படுத்த முடியும். அவ்வாறு இல்லாமல் கால தாமதமானால் இந்த கருப்பு பூஞ்சை நோய் மூக்கின் வழியாக மூளைக்கு பரவும் வாய்ப்பு அதிகமாகி உயிரிழப்பு கூட நேரிடலாம்.

இவ்வாறு அருண் கூறினார்.

புதுச்சேரி:

புதுவையில் கொரோனா தொற்று அதிவேகமாக பரவியதை தொடர்ந்து ஏப்ரல் 26-ந் தேதி முதல் தளர்வுகளுடன் கூடிய ஊரடங்கு அமல் படுத்தப்பட்டது.

காய்கறி, மளிகை, இறைச்சி உட்பட அத்தியாவசிய கடைகள் மட்டும் காலை 6 முதல் மதியம் 12 வரை திறக்க அனுமதிக்கப்பட்டது.

தமிழகத்தில் கடந்த 11-ந் தேதி முழு ஊரடங்கு அமல்படுத்தப்பட்டது. இதனால் புதுவையிலும் முழு ஊரடங்கு அமல்படுத்தப்படலாம் என்ற நிலை ஏற்பட்டது.

புதுவை அரசு தொடர்ந்து தளர்வுகளுடன் கூடிய ஊரடங்கை நீட்டித்து வந்தது. தற்போது தமிழகத்தில் ஜூன் 7-ந் தேதி வரை ஊரடங்கு நீட்டிக்கப்பட்டுள்ளது.

புதுவையில் கவர்னர் தமிழிசை தலைமையில் கொரோனா மேலாண்மை கூட்டம் நடந்தது. கூட்டத்தில் ஊரடங்கை நீட்டிக்க வலியுறுத்தப்பட்டது.

இதனையடுத்து புதுவையில் தளர்வுகளுடன் கூடிய ஊரடங்கு வருகிற 7-ந் தேதி வரை நீட்டிக்கப்பட்டு உள்ளது. இதற்கான உத்தரவை கவர்னர் பிறப்பித்துள்ளார்.

இந்த ஊரடங்கில் மின்சாரம், குடிநீர் குழாய், நீர் சுத்திகரிப்பு, மோட்டார் பழுதுநீக்குதல் (ஒர்க்ஷாப்) போன்ற அடிப்படை தேவைகளை சுய தொழிலாக செய்பவர்களுக்கு கட்டுப்பாட்டில் இருந்து விலக்கு அளிக்க முடிவு செய்யப்பட்டுள்ளது.

புதுச்சேரி:

புதுவை அரசு சுகாதாரத்துறை 18 வயதிற்கு மேல் உள்ள அனைவருக்கும் கொரோனா தடுப்பூசி போடுவதற்கான முயற்சியில் உள்ளது.

இதற்கான முயற்சியாக பல்வேறு முகாம்கள் அமைத்து 45 வயதிற்கு மேல் உள்ளவர்களுக்கு தொடர்ந்து கொரோனா தடுப்பூசி போடப்பட்டு வருகின்றது. அதனைத்தொடர்ந்து கர்ப்பிணி பெண்கள் மற்றும் குழந்தைகள் தவிர 18 வயது முதல் 44 வயது வரை உள்ளவர்களுக்கு தடுப்பூசி போட இணையதளத்தில் முன்பதிவு தொடங்கி உள்ளது.

இதற்கு மக்கள் மிகுந்த வரவேற்பு அளித்துள்ளனர். இளம் வயதினர் ஆர்வத்துடன் தாமாக முன்வந்து தடுப்பூசியை போட்டுக்கொண்ட வண்ணம் உள்ளனர். இதய நோய் உள்ளவர்கள் அதற்கான சிகிச்சை எடுத்து கொள்பவர்கள், ரத்தக்கொதிப்பு, சர்க்கரை, ஆஸ்துமா, பக்கவாதம், சிறுநீரகம், கல்லீரல், டயாலிசிஸ், புற்று நோய், எச்.ஐ.வி., தல சீமியா, தசைநார் தேய்வு, மனநலம் குன்றியோர், மாற்றுதிறனாளிகள் ஆகியோர் கொரோனா தடுப்பூசி செலுத்துவதில் முன்னுரிமை உள்ளது.

அவர்கள் எந்தவித தயக்கமும் பயமும் இன்றி அவர்களுக்கான முன்னுரிமையுடன் கொரோனா தடுப்பூசியை செலுத்தி கொள்ள வேண்டும். தாய்ப்பால் ‌ஊட்டும் தாய்மார்களும் தடுப்பூசியை எடுத்துக் கொள்ளலாம்.

இந்த தகவலை சுகாதாரத்துறை செயலாளர் அருண் தெரிவித்துள்ளார்.