விருதுநகர்

விருதுநகர்:

விருதுநகர் மற்றும் தூத்துக்குடி மாவட்டங்களில் விருதுநகர், சாத்தூர், கோவில்பட்டி ஆகிய பகுதிகளில் எந்திரமயமாக்கப்பட்ட தீப்பெட்டி ஆலைகள் உள்ளன. இந்த பகுதிகளில் சுமார் 600 தீப்பெட்டி ஆலைகள் எந்திரங்கள் மூலம் தீப்பெட்டி தயாரிப்பு செய்து வருகின்றனர். இதன் மூலம் 4 லட்சம் தொழிலாளர்கள் வேலை வாய்ப்பு பெற்றுள்ளனர். இதில் பெரும்பாலானோர் பெண்கள் ஆவர்.

இந்தநிலையில் தீப்பெட்டி உற்பத்திக்கான வேதியல் பொருட்கள், தீக்குச்சி, அட்டைப்பெட்டி ஆகிய மூலப்பொருட்களின் விலை வெகுவாக உயர்ந்து உள்ள நிலையிலும், பெட்ரோல், டீசல் விலையினால் மூலப்பொருட்களின்அடக்க விலை மேலும் அதிகரித்துள்ளது. மூலப்பொருட்களின் விலை அதிகரிப்பால் பெரும் பாதிப்பு ஏற்படும் நிலை உள்ளது.

தீக்குச்சி மட்டுமின்றி வேதிப்பொருட்கள் கிடைப்பதிலும் தட்டுப்பாடு உள்ளது.

இந்தநிலையில் தீப்பெட்டி உற்பத்தியாளர்கள் இன்று முதல் இந்த மாத இறுதி வரை 10 நாட்கள் தீப்பெட்டி ஆலைகளை மூட முடிவு செய்துள்ளனர். இதன் மூலம் 4 லட்சம் தொழிலாளர்கள் வேலை இழக்கும் நிலை ஏற்படும்.

மேலும் அடுத்த மாதம் முதல் 600 தீப்பெட்டிகள் கொண்ட பண்டலுக்கு ரூ.40 விலையை அதிகரிக்க முடிவு செய்துள்ளனர்.

எனவே தமிழக அரசு தீப்பெட்டி உற்பத்தியாளர்களுக்கு மூலப்பொருட்கள் தட்டுப்பாடு இல்லாமல் கிடைப்பதற்கும், வெளி மாநிலங்களுக்கு தீப்பெட்டி பண்டல்களை அனுப்புவதற்கும் தேவையான உதவி கிடைப்பதற்கும் உரிய நடவடிக்கை எடுக்க வேண்டும் என வலியுறுத்தப்பட்டுள்ளது.

விருதுநகர்:

நாம் தமிழர் கட்சியின் ஒருங்கிணைப்பாளர் சீமான் கலந்து கொண்ட பிரசார கூட்டம் நேற்று முன்தினம் இரவு விருதுநகரில் நடந்தது. இதில் விருதுநகர் மாவட்டத்தில் போட்டியிடும் 7 தொகுதிகளின் வேட்பாளர்கள் கலந்து கொண்டனர்.

இந்த பிரசார கூட்டம் இரவு 10 மணிக்கும் மேல் கூடுதலாக 10 நிமிடங்கள் நடைபெற்றதாக நிலை கண்காணிப்புக்குழு அதிகாரி மோகன்ராஜ் விருதுநகர் மேற்கு போலீசில் புகார் அளித்தார்.

அதன் பேரில் சீமான் மற்றும் நாம் தமிழர் கட்சி வேட்பாளர்கள் 7 போ் உள்ளிட்ட 450 பேர் மீது தேர்தல் விதிமுறை மீறல் வழக்கு பதிவு செய்யப்பட்டுள்ளது.

விருதுநகர்:

அருப்புக்கோட்டை, திருச்சுழி தொகுதி தேர்தல் பணிக்கு வந்த வடமாநில அதிகாரி கொரோனாவால் பாதிக்கப்பட்டு உள்ளார். அவரது உதவி அதிகாரிக்கும் நோய்த்தொற்று உறுதி செய்யப்பட்டுள்ளது.

விருதுநகர் மாவட்டத்தில் திருச்சுழி மற்றும் அருப்புக்கோட்டை தொகுதிகளுக்கு சட்டசபை தேர்தல் செலவின பார்வையாளராக நர்சிங்குமார் கால்கோ (வயது 40) நியமனம் செய்யப்பட்டார். இவர் ஜார்கண்ட் மாநிலத்தை சேர்ந்த ஐ.ஆர்.எஸ். அதிகாரி ஆவார்.

இவர் கடந்த 18-ந் தேதி விருதுநகர் மாவட்டத்துக்கு வந்தார். இந்நிலையில் அவருக்கு கொரோனா அறிகுறிகள் இருந்ததால் மருத்துவ பரிசோதனை செய்யப்பட்டதில் அவருக்கு கொரோனா பாதிப்பு உறுதி செய்யப்பட்டது.

இதனை தொடர்ந்து அவர் மதுரையில் உள்ள தனியார் ஆஸ்பத்திரியில் சிகிச்சைக்காக அனுமதிக்கப்பட்டார்.

இவரது உதவி அதிகாரியாக கருவூலத்துறை கண்காணிப்பாளர் முருகன் நியமிக்கப்பட்டு இருந்தார். அவருக்கும் மருத்துவ பரிசோதனை செய்ததில் பாதிப்பு இருந்தது உறுதி செய்யப்பட்டது.

ஆனால் இவருக்கு அறிகுறி ஏதும் இல்லாத நிலையில் நோய்த்தொற்று உறுதி செய்யப்பட்டு இருப்பதால் அருப்புக்கோட்டையில் தனிமைப்படுத்தப்பட்டு உள்ளார்.

ராஜபாளையம்:

ராஜபாளையத்தில் அ.தி.மு.க. வேட்பாளர் அமைச்சர் கே.டி.ராஜேந்திர பாலாஜியை ஆதரித்து நடிகை விந்தியா பிரசாரம் செய்தார். அப்போது அவர் திரண்டு இருந்த மக்கள் மத்தியில் பேசியதாவது:-

வெற்றிநடை போடும் தமிழகம் என்றுமே வீரநடை போட வேண்டும். அதற்கு இப்பகுதி மக்கள் இரட்டை இலை சின்னத்திற்கு வாக்கு அளித்து அமைச்சர் கே.டி.ராஜேந்திர பாலாஜியை வெற்றி பெற செய்ய வேண்டும்.

விருதுநகர் மாவட்டத்தில் ஆலமரம் போல் தாங்கி நிற்கும் சக்தி அமைச்சர் ராஜேந்திர பாலாஜிக்கு உண்டு.

உங்களுக்காக போராடுபவர். இவரை நம்பினால் வீடும், நாடும் நன்றாக இருக்கும். தி.மு.க.வை நம்பாதீர்கள். 10 ஆண்டுகளாக காய்ந்து போய் இருக்கிறார்கள். அவர்கள் அகோரப்பசியில் இருக்கிறார்கள். பணத்தை மட்டுமல்ல, மக்களையும் புடுங்கி சாப்பிட்டு விடுவார்கள். தயவுசெய்து உஷாராக இருங்கள்.

வராத மழைக்கு வானிலை அறிக்கை கூறுவதும், வராத ஆட்சிக்கு தி.மு.க.வினர் இஷ்டத்திற்கு வாக்குறுதி கொடுத்திருப்பதும் ஒன்றுதான்.. எந்த பிரச்சினையை தி.மு.க. ஆட்சி காலத்தில் தீர்த்து வைத்தார்கள். இப்போது ஆட்சிக்கு வந்தால் 100 நாட்களில் பிரச்சினைகளை முடிப்பேன் என ஸ்டாலின் கூறுகிறார். அவரை நம்பாதீர்கள். எத்தனை கட்சி கூட்டணி சேர்ந்தாலும் அ.தி.மு.க.வை தோற்கடிக்க முடியாது.

இரட்டை இலை சின்னத்திற்கு வாக்களித்து அமைச்சர் கே.டி. ராஜேந்திர பாலாஜியை அதிக வாக்குகள் வித்தியாசத்தில் வெற்றி பெற செய்ய வேண்டும்.

இவ்வாறு அவர் பேசினார்.

அதேபோல சிவகாசி சட்டமன்ற தொகுதி அ.தி.மு.க. வேட்பாளர் லட்சுமி கணேசனை ஆதரித்து நடிகை விந்தியா சிவகாசி -திருத்தங்கல் ரோட்டில் உள்ள தேவர் சிலை அருகே பிரசாரம் செய்தார். அப்போது அவர் பேசியதாவது:-

நாங்கள் தீபாவளியின் போது மகிழ்ச்சியாக இருக்க உங்கள் உயிரை பணயம் வைத்து வேலை செய்கிறீர்கள். உங்களது உழைப்பை நாடே போற்றுகிறது. தமிழகத்தில் தொடர்ந்து எடப்பாடி பழனிசாமி ஆட்சி அமைய போகிறது. மக்கள் அனைவரும் மகிழ்ச்சியோடு வாழ போகிறார்கள். இந்த பகுதியில் உள்ள தீப்பெட்டி, பட்டாசு, அச்சுத்தொழில் பாதுகாக்கப்படும்.

இவ்வாறு அவர் பேசினார்.

பிரசாரத்தின் போது அமைச்சர் கே.டி. ராஜேந்திர பாலாஜி, வேட்பாளர் லட்சுமி கணேசன் ஆகியோர் உடனிருந்தனர்.

ஸ்ரீவில்லிபுத்தூர்:

ஸ்ரீவில்லிபுத்தூரில் நடைபெற்ற தேர்தல் அலுவலகம் திறப்பு விழாவிற்கு அமைச்சர் ராஜேந்திரபாலாஜி வந்திருந்தார். அப்போது அவர் நிருபர்களுக்கு பேட்டி அளித்தார்.

இந்தநிலையில் அ.ம.மு.க. பற்றி நிருபர் ஒருவர் கேள்வி கேட்டதற்கு, உடனே அமைச்சர், அ.ம.மு.க. பற்றி பேச வேண்டாம் என்று கூறியதோடு, சப்புன்னு அடிக்க போறேன் பாரு, என கூறினார். இதனால் திடீர் சலசலப்பு ஏற்பட்டது.