ராணிப்பேட்டை

மும்பை திரையுலகம் என்றாலே அதிரடிக்குக் கொஞ்சமும் குறைவிருக்காது என்பது பலருக்கும் தெரிந்த விஷயம். பல சம்பவங்களை திரையுலகினர் வெளியில் சொல்வதில்லை. இப்போது ராணி முகர்ஜி தனக்கு நடந்த ஒரு சம்பவத்தை பகிர்ந்து கொண்டிருக்கிறார். 

ராணிப்பேட்டை:

ஆந்திர மாநிலம், கலவகுண்டா அணையில் இருந்தும் மற்றும் கிளை ஆறுகளில் இருந்தும் சுமார் 65 ஆயிரம் கன அடி தண்ணீர் பொன்னை ஆற்றுக்கு வந்து கொண்டிருக்கிறது. மேலும் வடகிழக்கு பருவ மழையும் பெய்து வருகிறது. இதனால் பொன்னை ஆற்றில் சுமார் 90 ஆண்டுகளுக்கு பிறகு மிக கடுமையான வெள்ளப்பெருக்கு ஏற்பட்டு வெள்ளம் பெருக்கெடுத்து ஓடுகிறது.

பொன்னை அருகே ஆற்றில் வெள்ளம் செல்வதை வேலூர் மாவட்ட கலெக்டர் குமாரவேல் பாண்டியன் நேற்று முன்தினம் இரவு ஆய்வு செய்தார். ராணிப்பேட்டை மாவட்ட கலெக்டர் பாஸ்கர பாண்டியன் நேற்று பொன்னை ஆற்றை ஆய்வு செய்தார்.

பொன்னை ஆற்றிலிருந்து 60 ஆயிரத்து 600 கன அடி தண்ணீர் நேற்று அதிகாலை சுமார் 1 மணி முதல் வெளியேற்றப்பட்டு வருகிறது. பொன்னை ஆற்றின் கரையோரம் 100 நபர்கள் மீட்கப்பட்டு நிவாரண முகாம்களில் தங்க வைக்கப்பட்டு உள்ளனர். மேலும் கால்நடைகளும் மீட்கப்பட்டன.

இந்த நிலையில் வெள்ளப் பெருக்கு காரணமாக, நேற்று அதிகாலை பொன்னை அருகே உள்ள பொன்னையாற்றின் தரைப்பாலத்தின் மீது சுமார் 2 அடி உயர அளவு தண்ணீர் சென்று கொண்டிருந்தது. இதனால் பொன்னை போலீசார் பாலத்தின் இருபுறமும் தடுப்புகளை ஏற்படுத்தி போக்குவரத்துக்கு தடை விதித்தனர். மேலும் இத்தரை பாலத்தின் 5-வது கண்ணுக்கு அருகில் பாலத்தில் உடைப்பு ஏற்பட்டது..

மேலும் மேல்பாடி அருகே உள்ள பொன்னையாற்று பகுதியிலும் வெள்ளப்பெருக்கு ஏற்பட்டுள்ளதால், ஆற்றை கடக்க உதவும் மேல்பாடி தரைப்பாலத்தின் மீதும் பாலமே தெரியாத அளவில், வெள்ளம் பெருக்கெடுத்து ஓடுகிறது. இப்பாலத்திலும் வெள்ளப் பெருக்கு காரணமாக, உடைப்பு ஏற்பட்டுள்ளது.

பொன்னை அருகே இரும்புக் கூரை போட்ட பழைய இரும்பு கடை சாய்ந்து விழுந்தது. இதேபோல் பொன்னை- லாலாபேட்டை சாலையில், கீரைசாத்து அருகே சென்ற ஆட்டோ ஒன்று நிலைதடுமாறி கவிழ்ந்தது. இதில் யாருக்கும் எவ்வித பாதிப்பும் ஏற்படவில்லை.

அமைச்சர் துரைமுருகன் நேற்று திருவலம் அருகே பொன்னை ஆற்றில் வெள்ளம் செல்வதை நேரில் ஆய்வு செய்தார். அப்போது ராணிப்பேட்டை மாவட்ட கலெக்டர் பாஸ்கர பாண்டியன் உள்ளிட்டோர் உடனிருந்தனர்.

ஸ்பிக்நகர்:

தூத்துக்குடி முத்தையாபுரம் அருகே உள்ள அபிராமி நகரை சேர்ந்தவர் மாணிக்கராஜ். இவருடைய மகள் சோனிகா (வயது 22). இவர் பாளையங்கோட்டையில் உள்ள ஒரு கல்லூரியில் பி.எட். படித்து வந்தார். மழையின் காரணமாக கல்லூரிக்கு விடுமுறை விடப்பட்டு உள்ளதால் அவரது அப்பா மாணிக்கராஜ், சோனிகாவை வீட்டிற்கு அழைத்து வந்துள்ளார். நேற்று முன்தினம் காலையில் மாணிக்கராஜ் தூத்துக்குடிக்கு சென்றார். மதியம் 3 மணிக்கு அவர் வீட்டிற்கு திரும்பியபோது, குடும்பத்தினர் அனைவரும் சாப்பிடாமல் இருந்துள்ளனர். அனைவரும் ஏன் சாப்பிடாமல் இருந்தீர்கள்? என அவர் கேட்டுள்ளார். அதற்கு அவர்கள் சோனிகாவிற்கு வயிற்று வலி உள்ளதாக கூறி அறையில் தூங்க சென்றுள்ளார். நீங்கள் வந்த பின்பு அனைவரும் சேர்ந்து சாப்பிடலாம் என்று இருக்கிறோம் என்று கூறினர்.

உடனே அவர் சோனிகாவை சாப்பிடுவதற்கு அழைக்க அவரது அறைக்கு சென்றார். அப்போது அவரது அறையின் கதவு உள்பக்கம் பூட்டப்பட்டிருந்தது. மாணிக்கராஜ் கதவை தட்டியும் கதவு திறக்கப்படவில்லை. நீண்ட நேரம் தட்டியும் திறக்காததால் கதவை உடைத்துக் கொண்டு உள்ளே சென்றனர். அப்போது அங்கு சோனிகா சேலையால் தூக்குப்போட்டு தொங்கிய நிலையில் இருந்துள்ளார். இதனை கண்டு பதறிப்போன குடும்பத்தினர் உடனடியாக சோனிகாவை மீட்டு தூத்துக்குடியில் ஒரு தனியார் ஆஸ்பத்திரிக்கு கொண்டு சென்றனர்.

அங்கு முதலுதவி சிகிச்சை அளித்த பின்னர், மேல் சிகிச்சைக்காக அவரை தூத்துக்குடி அரசு ஆஸ்பத்திரிக்கு கொண்டு சென்றனர். ஆனால் செல்லும் வழியிலேயே அவர் பரிதாபமாக இறந்தார். இது குறித்த புகாரின் பேரில் முத்தையாபுரம் போலீசார் வழக்குப்பதிவு செய்து விசாரணை நடத்தி வருகின்றனர்.

வாலாஜா:

ராணிப்பேட்டை மாவட்டம் வாலாஜாபேட்டை அணைக்கட்டு தடுப்பணைக்கு நீர்வரத்து 1,05,000 கனஅடியாக உயர்ந்துள்ளதால் உபரி நீர் அப்படியே வெளியேற்றப்படுகிறது. இதனால் பாலாற்றின் கரையோரங்களில் உள்ள 30க்கும் அதிகமான கிராம மக்களுக்கு மாவட்ட நிர்வாகத்தின் சார்பில் வெள்ள அபாய எச்சரிக்கை விடுக்கப்பட்டுள்ளது.

வங்கக்கடலில் ஏற்பட்ட குறைந்த காற்றழுத்த தாழ்வு நிலை காரணமாக ராணிப்பேட்டை மாவட்டத்திற்கு ரெட் அலர்ட் விடுக்கப்பட்டிருந்தது.

இந்த நிலையில் நேற்று காலை முதல் கனமழை தொடர்ந்து மழை பெய்து வருகிறது. இதன் காரணமாக ராணிப்பேட்டை மாவட்டத்தில் உள்ள பாலாற்றில் அதிகப்படியான வெள்ளப்பெருக்கு ஏற்பட்டுள்ளது.

வரலாறு காணாத வகையில் சுமார் 100 வருடங்களுக்கு பின்பு வாலாஜா அணைக்கட்டு தடுப்பணைக்கு பொன்னை மற்றும் பாலாற்றிலிருந்து நீர்வரத்து அதிகரித்து தற்போது தடுப்பணைக்கு 1,05,000 கன அடி நீர் வருகிறது. அந்த தண்ணீர் அப்படியே திறந்து விடப்பட்டுள்ளது.

இதனால் பாலாற்றில் கடுமையான வெள்ளப்பெருக்கு ஏற்பட்டுள்ளது. கரையோரம் உள்ள சாதம்பாக்கம், திருமலைச்சேரி, பூண்டி, சுமைதாங்கி உள்ளிட்ட 30-க்கும் அதிகமான கிராமங்களில் வசிக்கும் பொதுமக்களுக்கு வெள்ள அபாய எச்சரிக்கை விடுக்கப்பட்டுள்ளது.

மேலும் பொதுமக்கள் யாரும் பாலாற்று வெள்ளத்தில் செல்பி எடுக்கவோ, குளிக்கவோ அல்லது, ஆற்றினை கடக்க முயற்சி செய்ய வேண்டாம் எனவும் தாழ்வான பகுதிகளில் வசிக்க கூடிய பொதுமக்கள் பாதுகாப்பான இடங்களுக்கு செல்லவும் மாவட்ட நிர்வாகம் அறிவுறுத்தியுள்ளது.

மேலும் வெள்ளத்தால் பாதிப்பு ஏற்படக்கூடிய கிராமங்களுக்கு நேரடியாக சென்று வருவாய்த்துறை அதிகாரிகள் பொதுமக்களை மீட்டு மாவட்ட நிர்வாகத்தின் சார்பில் ஏற்பாடு செய்யப்பட்டுள்ள முகாம்களில் தங்க வைத்துள்ளனர்.

வாலாஜா அடுத்த சாதிக்பாட்சா நகர் பாலாற்றை ஒட்டி தாழ்வான பகுதியில் உள்ள 300-க்கும் மேற்பட்ட குடியிருப்புகளை பாலாற்று வெள்ளம் சூழ்ந்தது. குடியிருப்புகளில் வசித்து வந்த 1200-க்கும் மேற்பட்ட மக்கள் மற்றும் 200-க்கும் மேற்பட்ட கால்நடைகள் மீட்கப்பட்டு அருகில் உள்ள நிவாரண முகாம்களில் தங்க வைக்கப்பட்டுள்ளனர்.

பாலாறு அணைக்கட்டில் அதிகாலை 3 மணியளவில் கலெக்டர் பாஸ்கர பாண்டியன் பார்வையிட்டு ஆய்வு செய்தார்.

ஸ்ரீரங்கம் அருகே திருவானைக்காவலில் பிரசித்தி பெற்ற ஜம்புகேஸ்வரர், அகிலாண்டேஸ்வரி அம்மன் கோவில் உள்ளது. இங்கு கார்த்திகை மாதம் பவுர்ணமி அன்று கார்த்திகை தீப சொக்கப்பனை ஏற்றப்படும்.

அதன்படி இந்த ஆண்டு நேற்று சொக்கப்பனை ஏற்றப்பட்டது. முன்னதாக சுவாமி சன்னதியில் தீப பூஜைகள் நடைபெற்றன. பின்னர் ஜம்புகேஸ்வரர், அகிலாண்டேஸ்வரி மூலஸ்தானங்களில் தீபங்கள் ஏற்றப்பட்டன. அதன்பின் உற்சவர்கள் ஜம்புகேஸ்வரர், அகிலாண்டேஸ்வரி மாலை 6 மணிக்கு உற்சவ மண்டபத்தில் இருந்து புறப்பட்டு மாலை 7 மணியளவில் கார்த்திகை கோபுரம் அருகே உள்ள நாலுகால் மண்டபத்திற்கு வந்தனர். சுவாமி, அம்பாளுக்கும் முன்னதாக விநாயகரும், முருகனும், சண்டிகேஸ்வரரும் வந்தனர். அங்கு கோபுரத்திற்கும் நாலுகால் மண்டபத்திற்கும் நடுவே பனை ஓலைகளால் அமைக்கப்பட்டிருந்த சொக்கப்பனை ஏற்றப்பட்டது. அதனை கண்டருளினர்.

அதன் பின் சுவாமி, அம்மன் உள்பட பஞ்சமூர்த்திகள் 4-ம் பிரகாரத்தில் ஊர்வலமாக வந்து மேல வாசல் வழியாக அம்மன் சன்னதிக்கு வந்தடைந்தனர். பின்னர் அங்கு ஏற்றப்பட்ட சொக்கப்பனையை கண்டருளினர். தொடர்ந்து தெற்கு வாசல் வழியாக சங்கமேஸ்வரர் சன்னதிக்கு வந்தனர். அங்கு சொக்கப்பனையை கண்டருளிய பின் வீதி உலா வந்து மேலவாசல் வழியாக கோவில் உள்ளே சென்று உற்சவ மண்டபத்தை அடைந்தனர்.

கார்த்திகை தீப திருநாளையொட்டி நேற்று கோவிலில் 3 இடங்களில் சொக்கப்பனை ஏற்றப்பட்டது. இதில் ஏராளமான பக்தர்கள் கலந்து கொண்டு சிவ, சிவ என்ற பக்தி கோஷத்துடன் வழிபட்டனர்.