புதுக்கோட்டை

புதுக்கோட்டை:

ஆடு திருடர்களை விரட்டி பிடித்த போது திருச்சி நவல்பட்டு சிறப்பு சப்-இன்ஸ்பெக்டர் பூமிநாதன் கொலை செய்யப்பட்ட சம்பவம் எதிரொலியாக ஆடு திருடர்களை பிடிக்க போலீசார் கூடுதல் நடவடிக்கை எடுத்துள்ளனர். திருச்சி சரகத்தில் ஆடு திருடர்களை பிடிக்க டி.ஐ.ஜி. சரவண சுந்தர் தலைமையில் தனிப்படை அமைக்கப்பட்டுள்ளது.

இந்த தனிப்படை போலீசார் புதுக்கோட்டை மாவட்டத்தில் ஆடு திருடும் கும்பலை கண்காணித்து நடவடிக்கை எடுத்து வருகின்றனர். இந்த நிலையில் புதுக்கோட்டை மாவட்டத்தில் நேற்று தனிப்படையினர் நடத்திய சோதனையில் ஆடு திருடும் கும்பலான மச்சுவாடியை சேர்ந்த ரஞ்சித் (வயது 25), போஸ்நகரை சேர்ந்த கோபி (22), அறந்தாங்கி ராஜேந்திரபுரத்தை சேர்ந்த அபுபக்கர் (20), காமராஜ புரத்தை சேர்ந்த புஷ்பராஜ் (20), காந்திநகரை சேர்ந்த 17 வயது சிறுவன் ஆகிய 5 பேரை போலீசார் கைது செய்தனர். மேலும் அவர்களிடம் இருந்து 42 ஆடுகள் மீட்கப்பட்டன.

ஆடுகளை திருட பயன்படுத்திய சரக்கு வேனும் கைப்பற்றப்பட்டன. மேற்கண்ட ஆடுகளை திருமயம், நமணசமுத்திரம், பனையப்பட்டி, பொன்னமராவதி ஆகிய போலீஸ் நிலையங்களின் எல்லைக்குட்பட்ட பகுதியில் திருடப்பட்டவை என தெரியவந்தது. இவர்கள் கும்பலாக சென்று ஆடுகளை திருடி வந்துள்ளனர். தனிப்படை போலீசார் தொடர்ந்து சோதனை மேற்கொண்டு வருகின்றனர்.

ஆலங்குடி:

புதுக்கோட்டை மாவட்டம் கறம்பக்குடி அருகே உள்ள புதுவிடுதி ரெகுநாதபுரம் கிராமத்தை சேர்ந்தவர் கருப்பையா (வயது 67). இவர் தனது வயலில் வேலை பார்த்தார். அப்போது அவரை வி‌ஷபாம்பு கடித்துள்ளது. உடனே அக்கம் பக்கத்தினர் அவரை மீட்டு சிகிச்சைக்காக தஞ்சாவூர் அரசு மருத்துவ கல்லூரி மருத்துவமனையில் சேர்த்தனர். அங்கு சிகிச்சை பலனின்றி அவர் பரிதாபமாக இறந்தார்.

இதுகுறித்து கருப்பையாவின் மனைவி செல்லம்மாள் ரெகுநாதபுரம் காவல் நிலையத்தில் கொடுத்த புகாரின் பேரில் ரெகுநாதபுரம் போலீசார் வழக்கு பதிவு செய்து விசாரணை நடத்தி வருகின்றனர்.

ஆலங்குடி:

புதுக்கோட்டை மாவட்டம் கறம்பக்குடி அம்புக்கோவில் முக்கத்தில் தமிழ்நாடு விவசாயிகள் சங்கம் கறம்பக்குடி ஒன்றிய குழு சார்பாக, ஒன்றிய தலைவர் ராமதாஸ் தலைமையில் மனு கொடுக்கும் ஆர்ப்பாட்டத்தில் ஈடுபட்டனர். ஆர்ப்பாட்டத்தை மாவட்ட தலைவர் ஆரோக்கியசாமி தொடங்கி வைத்தார்.

வெள்ளம் மழை பாதிப்பிற்கு, தமிழக அரசு கோரியுள்ள ரூ.4.025 கோடி நிதி மற்றும் தற்போதைய பாதிப்பிற்கு கோரும் நிதியையும் மத்திய அரசு உடனடியாக வழங்க வேண்டும். முழுமையாக அழிந்துள்ள தாளடி சம்பா நெல் சாகுபடிகளுக்கு ஏக்கர் ஒன்றுக்கு ரூ.30 ஆயிரம் வழங்கிட வேண்டும். தனியார் உர கடைகளில் தற்பொழுது பொட்டாஷ் யூரியா மற்றும் ரசாயன உரங்கள் விவசாயிகளிடம் அதிகப்படியான விலைக்கு விற்பதை, மாவட்ட நிர்வாகம் நியாயமான விலைக்கு விற்க உத்தரவிட வேண்டும்.

கடந்த ஆண்டு பயிர் காப்பீடு செய்த விவசாயிகளுக்கு, பாரபட்சமின்றி துரிதமாக காப்பீடு வழங்க வேண்டும், கால்நடை மருத்துவமனைகளில் கோமாரி தடுப்பூசி போடவும், கோமாரி நோயினால் இறந்த கால்நடை விவசாயிகளுக்கு இழப்பீடு வழங்க வேண்டும்.

கடும் மழை வெள்ளத்திலும் கறம்பக்குடியை சுற்றியுள்ள குளங்கள் நிரம்பாததற்கு வரத்து வாரிகள் வெட்டப்படாததே காரணம் எனில் துரிதமாக வரத்து வாரிகளை மராமத்து செய்திட கோரியும் மனு கொடுக்கும் ஆர்ப்பாட்டத்தில் ஈடுபட்டனர். ஆர்ப்பாட்டத்தில் ஏ.ஐ.டி.யு.சி. உள்ளாட்சி தொழிலாளர் சங்கம் செங்கோடன், ஏ.ஐ.டி.யு.சி. ஆலோசகர் சேசுராஜ் மற்றும் 20க்கும் மேற்பட்ட தமிழ்நாடு விவசாயிகள் சங்கத்தினர் ஆர்ப்பாட்டத்தில் பங்கேற்றனர்.

புதுக்கோட்டை:

புதுக்கோட்டையில் உழவர் சந்தையில் விவசாயிகள் காய்கறிகள், கிழங்கு உள்ளிட்ட விளைபொருட்களை கொண்டு வந்து விற்பனை செய்து வருகின்றனர். மொத்தம் 104 கடைகள் உள்ளன. இதில் திருமயத்தை சேர்ந்த விவசாயி கண்ணையா, சங்கிலியம்மாள் தம்பதியினரின் கடையும் ஒன்று உள்ளது. வாரத்தில் ஞாயிற்றுக்கிழமை மற்றும் முக்கியமான பண்டிகை நாட்கள், விசேஷ நாட்களில் பொதுமக்கள் காய்கறிகள் வாங்க அதிக அளவில் வருவது உண்டு.

இந்த நிலையில் உழவர் சந்தையில் நேற்று வழக்கம் போல மக்கள் கூட்டம் அதிகமாக காணப்பட்டது. பொதுமக்கள் காய்கறி வாங்கிய படி இருந்தனர். இந்த நிலையில் சங்கிலியம்மாள் கடையில் கூட்டம் அதிகமாக காணப்பட்டது. அவர் கடையில் ஓரமாக ஒரு பையில் பணம் மற்றும் கைப்பை, உழவர் சந்தை அட்டை ஆகியவற்றை வைத்திருந்தார்.

இந்த நிலையில் கூட்டத்தை பயன்படுத்தி மர்மநபர் ஒருவர் சங்கிலியம்மாள் வைத்திருந்த பையில் இருந்த பணத்தை திருடிவிட்டு சென்றார். இதற்கிடையில் பையை காணாது கண்டு சங்கிலியம்மாள் மற்றும் அவரது கணவர் அதிர்ச்சியடைந்தனர். அவர்கள் சத்தம் எழுப்பிய நிலையில் பக்கத்து கடை வியாபாரிகளும் விரைந்து வந்து விசாரித்தனர். மேலும் இது குறித்து தகவல் அறிந்த டவுன் போலீசாரும் வந்து விசாரித்தனர்.

பையில் சீட்டு பணம், காய்கறிகள் விற்பனை பணம் என மொத்தம் ரூ.70 ஆயிரம் வைத்திருந்ததாக கண்ணையா போலீசில் புகார் கூறியிருக்கிறார். பணத்தை திருடிச்சென்ற மர்மநபர் குறித்து போலீசார் விசாரணை நடத்தி வருகின்றனர். கூட்ட நேரங்களில் மர்ம நபர்கள் இதுபோன்ற கைவரிசையில் ஈடுபடுவதாகவும், இதனை தடுக்க போலீசார் நடவடிக்கை எடுக்க வேண்டும் என்றும் கடை வியாபாரிகள் கோரிக்கை விடுத்துள்ளனர்.

அறந்தாங்கி:

புதுக்கோட்டை மாவட்டம் அறந்தாங்கி அருகே கிருஷ்ணாஜிபட்டினத்தைச் சேர்ந்தவர்கள் ரபீஸ்கான் (34), இப்ராஹிம் (52), ஜாஹீர் (54). இவர்கள் 3 பேரும் கிருஷ்ணாஜிபட்டினம் கிழக்குக் கடற்கரைசாலையில் முறையே 2 மளிகைகடைகளும், ஒரு காய்கறி கடை ஆகியவற்றை நடத்தி வருகின்றனர்.

இந்நிலையில் நேற்று இரவு வழக்கம்போல் 10 மணிக்கு 3 பேரும் கடையை மூடிவிட்டு வீட்டிற்குச் சென்றுள்ளனர். இதைத் தொடர்ந்து மர்மநபர்கள் இரவு 1 மணி அளவில் கடைகளின் முன்பக்க கதவின் பூட்டை உடைத்து உள்ளே சென்று முதல் மளிகை கடையில் ரூ. 22 ஆயிரம், 2-வது மளிகை கடையில் ரூ. 42 ஆயிரம், காய்கறி கடையில் ரூ.10 ஆயிரம் மற்றும் 40 ஆயிரத்திற்கும் அதிகமான மளிகை பொருட்களை திருடிச் சென்றுள்ளனர்.

தகவலறிந்த கடை உரிமையாளர்கள் சென்று பார்க்கையில் கடை உடைக்கப்பட்டு கொள்ளை போயிருப்பதைக் கண்டு அதிர்ச்சியடைந்துள்ளனர். அதனைத் தொடர்ந்து அவர்கள் மணமேல்குடி காவல் நிலையத்தில் புகார் அளித்துள்ளனர். புகாரின் அடிப்படையில் காவல் சப்-இன்ஸ்பெக்டர் ராஜாமுகமது தலைமையிலான காவல்துறையினர் வழக்குப் பதிந்து விசாரணை மேற்கொண்டு வருகின்றனர்.

கிருஷ்ணாஜிபட்டினம் கிழக்குக் கடற்கரை சாலையில் அடுத்தடுத்து 3 கடைகளில் கொள்ளை போன சம்பவம் அப்பகுதியில் அதிர்ச்சியை ஏற்படுத்தியுள்ளது.

புதுக்கோட்டை:

புதுக்கோட்டை மாவட்டத்தில் நகர்ப்புற உள்ளாட்சி தேர்தலுக்கான வாக்காளர் பட்டியலை மாவட்ட தேர்தல் அலுவலரும், கலெக்டருமான மாவட்ட கலெக்டர் கவிதா ராமு வெளியிட நகராட்சிகள் மற்றும் பேரூராட்சிகளின் தேர்தல் நடத்தும் அலுவலர்கள் பெற்றுக்கொண்டனர்.

புதுக்கோட்டை மாவட்டத்தை பொறுத்தவரையில் 2 நகராட்சிகள் மற்றும் 8 பேரூராட்சிகளுக்கு தேவையான தேர்தல் நடத்தும் அலுவலர்கள், உதவி தேர்தல் நடத்தும் அலுவலர்கள் நியமிக்கப்பட்டுள்ளார்கள். மேலும் நகராட்சிகள் மற்றும் பேரூராட்சிகளில் மொத்தம் 280 வாக்குப்பதிவு மையங்கள் உள்ளன.

வாக்காளர்களை பொறுத்தவரை புதுக்கோட்டை நகராட்சியில் 60,668 ஆண் வாக்காளர்கள், 64,984 பெண் வாக்காளர்கள், 17 மூன்றாம் பாலின வாக்காளர்கள் என மொத்தம் 1,25,669 வாக்காளர்களும், அறந்தாங்கி நகராட்சியில் 16,573 ஆண் வாக்காளர்கள், 18,065 பெண் வாக்காளர்கள் என மொத்தம் 34,638 வாக்காளர்களும் என நகராட்சிகளில் 77,241 ஆண் வாக்காளர்கள், 83,049 பெண் வாக்காளர்கள், 17 மூன்றாம் பாலின வாக்காளர்கள் ஆக மொத்தம் 1,60,307 வாக்காளர்கள் உள்ளனர்.

பேரூராட்சிகளில் பொறுத்தவரை ஆலங்குடி பேரூராட்சியில் 4,815 ஆண் வாக்காளர்கள், 4,917 பெண் வாக்காளர்கள் என 9,732 வாக்காளர்களும், அன்னவாசல் பேரூராட்சியில் 3,727 ஆண் வாக்காளர்கள், 3,789 பெண் வாக்காளர்கள், 1 மூன்றாம் பாலின வாக்காளர் என 7,517 வாக்காளர்களும், அரிமளம் பேரூராட்சியில் 3,480 ஆண் வாக்காளர்கள், 3,751 பெண் வாக்காளர்கள், 1 மூன்றாம் பாலின வாக்காளர் என 7,232 வாக்காளர்களும் உள்ளனர்.

இலுப்பூர் பேரூராட்சியில் 5,887 ஆண் வாக்காளர்கள், 6,094 பெண் வாக்காளர்கள், 1 மூன்றாம் பாலின வாக்காளர் என 11,982 வாக்காளர்களும், கறம்பக்குடி பேரூராட்சியில் 6,447 ஆண் வாக்காளர்கள், 6,546 பெண் வாக்காளர்கள் என 12,993 வாக்காளர்கள் உள்ளனர்.

கீரமங்கலம் பேரூராட்சியில் 3,828 ஆண் வாக்காளர்கள், 3,952 பெண் வாக்காளர்கள் என 7,780 வாக்காளர்களும், கீரனூர் பேரூராட்சியில் 4,591 ஆண் வாக்காளர்கள், 4,847 பெண் வாக்காளர்கள், என 9,438 வாக்காளர்களும், பொன்னமராவதி பேரூராட்சியில் 5,261 ஆண் வாக்காளர்கள், 5,631 பெண் வாக்காளர்கள், என 10,892 வாக்காளர்களும் என பேரூராட்சிகளில் 38,036 ஆண் வாக்காளர்கள், 39,527 பெண் வாக்காளர்கள், 3 மூன்றாம் பாலின வாக்காளர்கள் என மொத்தம் 77,566 வாக்காளர்கள் உள்ளனர்.

புதுக்கோட்டை மாவட்டத்தில் உள்ள 2 நகராட்சிகள், 8பேரூராட்சிகளில் 1,15,277 ஆண் வாக்காளர்களும், 1,22,576 பெண் வாக்காளர்களும், 20 மூன்றாம் பாலின வாக்காளர்களும் என மொத்தம் 2,37,873 வாக்காளர்கள் உள்ளனர். மேலும் 45 பதற்றமான வாக்குசாவடிகள் கண்டறியப்பட்டு இந்த பதற்றமான வாக்குசாவடிகளில் சிசிடிவி கேமராக்கள் பொறுத்தும் பணிகள் மேற்கொள்ள நடவடிக்கை மேற்கொள்ளப்பட்டுள்ளது என்றார்.

நிகழ்ச்சியில் மாவட்ட ஊரக வளர்ச்சி முகமை திட்ட இயக்குநர் ஜி.கருப்பசாமி, மாவட்ட ஆட்சியரின் நேர்முக உதவியாளர் (தேர்தல்கள்) கிருஷ்ணமூர்த்தி, நகராட்சிகள் மற்றும் பேரூராட்சிகள் தேர்தல் நடத்தும் அலுவலர்கள் மற்றும் அலுவலர்கள் கலந்துகொண்டனர்.

விராலிமலை:

புதுக்கோட்டை மாவட்டத்தில் இந்த ஆண்டு வடகிழக்கு பருவமழை வரலாறு காணாத அளவில் பெய்துள்ளது. குறிப்பாக விராலிமலை, புதுக்கோட்டை, அறந்தாங்கி, ஆலங்குடி பகுதிகளில் பெய்த கனமழையால் அனைத்து நீர் நிலைகளும் நிரம்பி வழிகிறது.

இதில் புதுக்கோட்டை அருகேயுள்ள மாவட்டத்தின் முக்கிய நீர்வள ஆதாரமான கவிநாடு கண்மாய் 15 ஆண்டுகளுக்கு பிறகு நிரம்பி முழு கொள்ளளவை எட்டியது. கண்ணுக்கெட்டிய தூரம் வரை கடல் போல் காட்சியளித்துவரும் இதனை காண மாவட்டம் முழுவதிலும் இருந்து பொதுமக்கள் வந்த வண்ணம் உள்ளனர்.

இதேபோல் விராலிமலை அருகே உள்ள பேராம்பூர் பெரியகுளம் சுமார் மூன்று மீட்டர் நீளமும், 15 மீட்டர் சுற்றளவும் கொண்ட மிகப்பெரிய குளமாகும். இந்த குளமும் தற்போது பெய்த வடகிழக்கு பருவமழையினால் சுமார் 15 வருடங்களுக்கு பிறகு நிரம்பி வழிகிறது.

இந்த குளத்தில் இருந்து அப்பகுதி விவசாய நிலங்களுக்கு பாசன வசதிக்காக தண்ணீர் செல்லும் வகையில் கடந்த 100 ஆண்டுகளுக்கு முன்னால் அப்போதைய ஆங்கிலேய அரசால் தடுப்பணை கட்டப்பட்டது. ஆனால் முறையான பராமரிப்பின்மை காரணமாக அந்த பெரிய குளத்தின் கரைகள், மதகுகள் உள்ளிட்ட பகுதிகள் தொடர் மழையால் சேதமடைந்து உடையும் நிலைக்கு தள்ளப்பட்டிருந்தது.

இதுதொடர்பாக வந்த தகவலை தொடர்ந்து அரசு அதிகாரிகள் அப்பகுதியை சோதனையிட்டு பாலத்தின் உறுதித்தன்மையை ஆய்வு செய்தனர். மழை காலம் முடிந்தவுடன் பராமரிப்பு பணிகளை மேற்கொள்ளவும் திட்டமிட்டு இருந்தனர்.

இந்த நிலையில் மழையினால் நீர் நிரம்பி உள்ள குளத்திற்கு பல்வேறு கிளை வாய்க்கால்கள் வழியாக தண்ணீர் வந்து கொண்டிருந்தது. இதனால் நீரை தாக்குப்பிடிக்க முடியாமல் குளத்தின் மதகுகள் இன்று உடைந்தது. இதிலிருந்து ஆக்ரோ‌ஷமாக ஆர்ப்பரித்து வெளியேறும் தண்ணீர் அருகிலுள்ள விவசாய விளை நிலங்களுக்குள் புகுந்து வருகிறது.

இதனால் நெல், சோளம் பயிரிட்டுள்ள விவசாயிகள் கவலை அடைந்துள்ளனர். உடனடியாக அதிகாரிகள் மதகு உடைப்பை சரிசெய்து விவசாய நிலங்களை காப்பாற்ற வேண்டும் என்றும் கோரிக்கை விடுத்துள்ளனர்.

தொடர்ந்து தண்ணீர் வெளியேறும் நிலை ஏற்பட்டால் விளை நிலங்களை தொடர்ந்து அருகிலுள்ள குடியிருப்புகளையும் சூழ்ந்து கொள்ளும் அபாயமும், அச்சமும் ஏற்பட்டுள்ளது.