புதுக்கோட்டை

புதுக்கோட்டை:

தமிழகம் முழுவதும் கஞ்சா, புகையிலை, குட்கா ஒழிப்பில் போலீசார் அதிரடி நடவடிக்கை எடுத்து வருகிறார்கள். ஆனாலும் கர்நாடகா, ஆந்திரா உள்ளிட்ட வெளி மாநிலங்களில் இருந்து தினமும் வாகனங்களில் குட்கா கடத்தப்பட்டு வருவது தொடர்கதையாகவே உள்ளது.

குறிப்பாக பல்வேறு குற்ற செயல்களுக்கு குட்கா பயன்படுத்துவது, கஞ்சா புகைப்பது அடிப்படையாக இருப்பதாகவும், அதனை அடியோடு ஒழிக்கவும் போலீசார் முயற்சி மேற்கொண்டு வருகிறார்கள். மேலும் இளைஞர்களிடம் அதிகரித்து வரும் கஞ்சா பழக்கத்தை தடுக்க விழிப்புணர்வு நிகழ்ச்சிகளும் நடத்தப்பட்டு வருகிறது.

இந்தநிலையில் கஞ்சாவை தடுக்க வேண்டிய போலீசாரே அதனை ஊக்குவிக்கும் செயல் புதுக்கோட்டை மாவட்டத்தில் அரங்கேறியுள்ளது. புதுக்கோட்டை நகர் காவல் நிலையத்தில் சப்- இன்ஸ்பெக்டராக வேலை பார்த்து வருபவர் சந்திரசேகர்.

இவர் புதுக்கோட்டையில் உள்ள சில கஞ்சா வியாபாரிகளுடன் தொடர்பு இருப்பதாக ரகசிய தகவல் கிடைத்தது. மேலும் திருச்சி சரகத்தில் பணியாற்றி வரும் போலீசாரின் செல்போன் எண்கள் டி.ஐ.ஜி. தலைமையிலான கண்காணிப்பு குழு சார்பில் ஆய்வு செய்யப்படுவது வழக்கம்.

மேலும் 3 மாதங்களுக்கு ஒரு முறை சரகத்தில் உள்ள போலீசார் யார், யாரிடமெல்லாம் பேசியுள்ளனர் என்பது குறித்து அந்த தனிக்குழுவினர் பட்டியல் தயாரித்து ஆய்வு நடத்துகிறார்கள்.

அந்த வகையில் சப்-இன்ஸ்பெக்டர் சந்திரசேகரின் செல்போனை ஆய்வு செய்தபோது அவருக்கு கஞ்சா வியாபாரிகளுடனான தொடர்பு உறுதி செய்யப்பட்டது.

இதேபோல் திருப்புனவாசல் போலீஸ் நிலைய தலைமைக்காவலர் முத்துக்குமார் என்பவரும் கஞ்சா வியாபாரிகளுடன் தொடர்பில் இருந்தது கண்டுபிடிக்கப்பட்டது. இதையடுத்து இருவரையும் சஸ்பெண்டு செய்து திருச்சி சரக டி.ஐ.ஜி. சரவணசுந்தர் உத்தரவிட்டுள்ளார்.

மேலும் இந்த விவகாரம் தொடர்பாக விசாரணை நடத்தப்பட்டு வருகிறது. கஞ்சா வியாபாரிகளுடன் தொடர்பில் இருந்த 2 போலீசார் சஸ்பெண்டு செய்யப்பட்டுள்ள சம்பவம் புதுக்கோட்டை மாவட்டத்தில் பெரும் பரபரப்பை ஏற்படுத்தி உள்ளது.

துவாக்குடியிலுள்ள திருநெடுங்களநாதர் கோவிலில் ஆருத்ரா தரிசனத்தை முன்னிட்டு நடராஜருக்கு சிறப்பு அபிஷேகம் நடைபெற்றது.

மார்கழி மாதத்தில் வரக்கூடிய திருவாதிரை நட்சத்திரத்தன்று அனைத்து சிவாலயங்களிலும் ஆருத்ரா தரிசன வழிபாடுகள் நடைபெறும். இதனை முன்னிட்டு அனைத்து சிவாலயங்களிலும் நடராஜப்பெருமானுக்கு சிறப்பு அபிஷேகம் நடைபெறும்

அதன்படி திருச்சி மாவட்டம் துவாக்குடி அருகே உள்ள திருநெடுங்களநாதர் கோவிலில் ஆருத்ரா தரிசன வழிபாடு நடைபெற்றது.

அப்போது உற்சவர்களான நடராஜர், சிவகாமி சுந்தரி, மாணிக்கவாசகர் ஆகியோ ருக்கு பால், தயிர், இளநீர், தேன் பஞ்சாமிர்தம், பழங்கள், சந்தனம், விபூதி உள்ளிட்ட 16 வகையான அபிஷேக பொருட்களால் சிறப்பு அபிஷேகம் நடைபெற்றது.

இதனை தொடர்ந்து வேத மந்திரங்கள் முழங்க, தேவ வாத்தியம் இசைக்க மகா தீபாராதனையும் நடைபெற்றது. இதில் பக்தர்கள் தேவாரம், திருவாசகம் பாடல்களை பாடி நடராஜரை வழிபட்டனர்.

விழாவிற்கான ஏற்பாட்டினை கோவில் நிர்வாக அலுவலர் வெற்றிவேல் மற்றும் அர்ச்சகர்கள் சோமசுந்தர சிவாச்சாரியார், ரமேஷ், கணேஷ் சிவாச்சாரியர் சிறப்பாக செய்திருந்தனர்.

திருச்சி நெ.1 டோல்கேட் அருகே உள்ள உத்தமர் கோவிலில் திருவாதிரையை முன்னிட்டு நடராஜருக்கு 36 வகையான சிறப்பு அபிஷேகம் மற்றும் தீபாராதனை நடைபெற்றது. முன்னதாக விநாயகர் பூஜை, கலச பூஜை உள்ளிட்ட பூஜைகள் நடைபெற்றது.

அதனைத் தொடர்ந்து உற்சவர் நடராஜருக்கு பால், தயிர், தேங்காய் துருவல், தேன், இளநீர், மாதுளை, பன்னீர் உள்ளிட்ட 36 வகையான சிறப்பு அபிஷேகம் செய்யப்பட்டது. தொடர்ந்து கடம் புறப்பாடு கண்டு கோவில் பிரகாரத்தை வலம் வந்து நடராஜருக்கு புனித நீர் ஊற்றி அபிஷேகம் நடைபெற்று மகா தீபாராதனை காண்பிக்கப்பட்டது.

இதேபோன்று திருவாசி மாற்றுரைவரதீஸ்வரர் கோவிலில் நடராஜருக்கு பால், தயிர், மஞ்சள்பொடி, திரவியப்பொடி உள்ளிட்ட 16 வகையான பொருட்களால் சிறப்பு அபிஷேகம் நடைபெற்று தீபாராதனை காண்பிக்கப்பட்டது. இதில் திரளான பக்தர்கள் கலந்து கொண்டு தரிசனம் செய்து வழிபட்டனர்.

ஆலங்குடி:

புதுக்கோட்டை மாவட்டம் கறம்பக்குடி அருகே பல்லவராயன்பத்தை கிராமத்தில் குடிநீர் வசதி வேண்டி காலி குடங்களுடன் மாவட்ட ஆட்சியர் மற்றும் தமிழக அரசு கோரிக்கை வைத்தனர்.

புதுக்கோட்டை மாவட்டம் கறம்பக்குடி அருகே உள்ள பல்லவராயன்பத்தை கிராமத்தில் உள்ள 4 வது வார்டில் ஆழ்குழாய் கிணறு கடந்த 2 வருடங்களாக செயல்படாமல் உள்ளது.

இக்கிரமத்தில் சுமார் 100-க்கும் மேற்பட்ட குடும்பங்கள் வசித்து வருகின்றனர். ஆழ்குழாய் கிணறு செயல்படாத கரணத்தால் 5 கிலோமீட்டர் தொலைவில் சென்று குடிநீர் எடுத்து வரும் அவல நிலை ஏற்பட்டுள்ளது.

இது தொடர்பாக சம்பந்தப்பட்ட அதிகாரிகள் அனைவருக்கும் மனுக்கள் அளித்தும் எந்த ஒரு நடவடிக்கையும் எடுக்கப்படவில்லை. இதனால் ஆத்திரமடைந்த அப்பகுதி பொதுமக்கள் காலி குடங்களுடன் வீதிக்கு வந்து போராட்டத்தில் ஈடுபட்டனர். அப்போது அவர்கள் கூறுகையில்,

உடனடியாக மாவட்ட கலெக்டர் மற்றும் தமிழக அரசு பொதுமக்களின் இந்த அவல நிலையை கருத்தில் கொண்டு உடனடியாக ஆழ்குழாய் கிணற்றை சீரமைத்து தண்ணீர் வசதி செய்து தர வேண்டும் என்று தெரிவித்தனர்.

புதுக்கோட்டை:

புதுக்கோட்டை மாவட்டம் அரிமளம் அருகே மருதம்பட்டியில் மருதுடைய அய்யனார் கோவில் உள்ளது. இங்கு நேற்று முன்தினம் கோவில் கதவை உடைத்து உள்ளே நுழைந்த மர்ம நபர்கள், அங்கு வைத்திருந்த ரூ.30 ஆயிரம் மதிப்பிலான பித்தளை பாத்திரங்களை கொள்ளையடித்து சென்றுள்ளனர்.

இதுகுறித்து கோவில் டிரஸ்டி ராமசாமி கொடுத்த புகாரின்பேரில் அரிமளம் காவல் நிலைய சப்-இன்ஸ்பெக்டர் ரவிச்சந்திரன் வழக்குப்பதிவு செய்து விசாரணை நடத்தி வருகின்றார்.

அறந்தாங்கி:

புதுக்கோட்டை மாவட்டம் அறந்தாங்கி அருகே பருத்தினி கிராமத்தில் அரிய வகை நட்சத்திர ஆமை ஒன்று பிடிபட்டுள்ளது. 13 நட்சத்திரங்களை கொண்ட ஆமை பஞ்சாத்தி கிராம மக்கள் செல்லும் வழியில் ஊர்ந்து சென்றபோது பிடிபட்டுள்ளது.

ஆந்திரா வனப்பகுதிகளில் அதிகம் காணப்படும் இவ்வகையான ஆமை, தமிழகத்தில் நீர் நிலைகள் அல்லாது, தரை பகுதிகளில் ஒரு சில இடங்களில் காணப்படுகிறது. அவ்வாறு பருத்தினி வயல் பகுதிகளில் கண்டெடுக்கப்பட்ட நட்சத்திர ஆமை, அறந்தாங்கி வனச்சரக அலுவலகத்தில் ஒப்படைக்கப்பட்டது.

வனச்சரக அலுவலர் சதாசிவம், வனவர் அன்புமணி, வேட்டைத் தடுப்புக் காவலர் சைமன் ஆகியோர் முன்னிலையில் ஒப்படைக்கப்பட்ட ஆமையானது, வனத்துறைக்கு சொந்தமான காப்புக்காடு பகுதிகளில் பாதுகாப்பாக விடப்பட்டது.