நீலகிரி

ஊட்டி:

நீலகிரி மாவட்டத்தில் ஆதி திராவிடர் மற்றும் பழங்குடியினர் நலத்துறையின் கீழ் குஞ்சப்பனை, தேவாலா, பொன்னானி, கரிக்கையூர் உள்ளிட்ட 22 இடங்களில் அரசு பழங்குடியினர் உண்டு உறைவிட பள்ளிகள் மற்றும் விடுதிகள் உள்ளன.

கடந்த ஆண்டு கொரோனா ஊரடங்கு காரணமாக பள்ளிகள் மூடப்பட்டன. அந்த சமயத்தில் பழங்குடியின மாணவர்களுக்கு உணவு மற்றும் உதவித்தொகை என மொத்தம் ரூ.7 ஆயிரத்து 300 வழங்க நிதி ஒதுக்கப்பட்டது.

இந்த தொகையை சம்பந்தப்பட்ட உண்டு உறைவிட பள்ளிகளின் தலைமை ஆசிரியர்கள், பழங்குடியின மாணவர்கள் அல்லது சம்பந்தப்பட்ட மாணவரின் பெற்றோர், பாதுகாவலர் வங்கி கணக்கில் செலுத்த வேண்டும். செலுத்திய பின்னர் அதனை அவர்கள் பெற்று கொண்டதனை உறுதிப்படுத்தும் பொருட்டு பணம் பெற்றவர்களிடம் கையெழுத்து பெற்று அனுப்பி வைக்க வேண்டும் என அறிவுறுத்தப்பட்டது.

இந்த திட்டத்தில் மாணவர்களுக்கு முறையாக நிதி உதவி சென்று சேரவில்லை எனவும், இதில் லட்சக்கணக்கில் முறைகேடு நடந்துள்ளதாகவும் புகார் எழுந்தது. இதுதொடர்பாக விசாரணைக்கும் உத்தரவிடப்பட்டது. ஆதிதிராவிடர் மற்றும் பழங்குடியினர் நலத்துறை அதிகாரிகள் விசாரணை நடத்தி வந்தனர்.

விசாரணையில் மாணவர்களுக்கு வழங்கப்பட வேண்டிய உதவிதொகை பணத்தில் முறைகேடு செய்யப்பட்டு இருப்பது உறுதி செய்யப்பட்டது.

இதைத்தொடர்ந்து தேவாலா மற்றும் பொன்னானி பள்ளிகளில் பணியாற்றிய தலைமை ஆசிரியர்கள் பாக்கியநேசன், சேகர் ஆகியோர் சஸ்பெண்டு செய்யப்பட்டனர்.

ஊட்டி:

சின்னக்கலைவாணர் என ரசிகர்களால் அழைக்கப்பட்ட நடிகர் விவேக் நேற்று மரணம் அடைந்தார்.

இவரது மறைவுக்கு தமிழகம் முழுவதும் சிறுவர்கள், இளைஞர்கள் என அனைவரும் மரக்கன்றுகள் நட்டு தங்களது அஞ்சலியை செலுத்தினர்.

கடந்த 2018-ம் ஆண்டு மார்ச் 21-ந் தேதி உலக வன நாளையொட்டி சுற்றுச்சூழலை பாதுகாக்கும் வகையில் 2 லட்சம் மரக்கன்றுகள் நடுவதை தொடங்கி வைத்து பேசினார்.

அதில், நீலகிரி பசுமையான மாவட்டம். இதை பாதுகாப்பது நமது கடமை, மலைகளின் அரசியை மலைகளின் கிழவியாக மாற்ற வேண்டாம். நீலகிரியை பாதுகாக்க அனைவரும் மரம் நட வேண்டும் என்று தனக்கே உரிய நகைச்சுவை பாணியில் பேசி விழிப்புணர்வு ஏற்படுத்தினார்.

நடிகர் விவேக் மறைவை தொடர்ந்து அவருடன் பங்கேற்ற நிகழ்ச்சியை நினைவு கூர்ந்து நீலகிரி மாவட்ட கலெக்டர் இன்னசென்ட் திவ்யா இரங்கல் செய்தி வெளியிட்டுள்ளார். அதில் பசுமையை காக்கும் வகையில் விழிப்புணர்வை பரப்புவதற்காக தனது பிரபல அந்தஸ்தை கொடுக்க எப்போது தயாராக இருக்கும் ஒர் இணக்கமான ஆளுமை.

இவரது ஆதரவுடன் நீலகிரி மாவட்டத்தில் 4 லட்சம் மரக்கன்றுகள் நடவு செய்ய முடிந்தது. நீலகிரி மக்கள் எப்போதும் விவேக்கை தங்கள் அன்பாக நினைவு கொண்டிருப்பார்கள் என தெரிவித்துள்ளார்.

ஊட்டி அடுத்துள்ளது பகல்கோடு என்ற பகுதி. இங்கு தோடர் பழங்குடியின மக்கள் வசித்து வருகிறார்கள். விவேக் இறந்ததை கேட்டு அதிர்ச்சியடைந்த அவர்கள், அவருக்கு அஞ்சலி செலுத்தும் விதமாக தங்கள் பகுதியில் மரக்கன்றுகளை நட்டு வைத்து அஞ்சலி செலுத்தினார்கள். இதேபோல் ஊட்டி முத்தோரையில் உள்ள அப்துல் கலாம் ஆதரவற்றோர் காப்பகத்திலும் விவேக் மறைவுக்கு அஞ்சலி செலுத்தி மரக்கன்றுகள் நடப்பட்து.

நடிகர் விவேக் நீலகிரி மாவட்டம் குன்னூர் ஓட்டுபட்டறையில் உள்ள சாந்தி விஜய் ஆரம்ப பள்ளியில் 1 முதல் 3-ம் வகுப்பு வரை படித்தார். சமீபத்தில் குன்னூர் சென்றிருந்த விவேக் அங்கு பணியாற்றிய ஆசியர்கள், மாணவர்களுடன் தனது பழைய நினைவுகளை பகிர்ந்து கொண்டார். விவேக் பள்ளிக்கு வந்து கலகலப்பாக பேசிச் சென்றதை இப்போது நினைவு கூறும் அங்குள்ள ஆசிரியர்களும், மாணவர்களும் கண் கலங்கினர்.

கோவை மாவட்டத்தில் விவேக் மறைவுக்கு அஞ்சலி செலுத்தும் விதமாக கோவை ரேஸ்கோர்ஸ், சாய்பாபா காலனி, குனியமுத்தூர் பகுதிகளில் தேவைப்படுவோருக்கு 100 மரக்கன்றுகளை வழங்கிய தோடு, பல்வேறு இடங்களில் 100 மரக்கன்றுகளையும் நட்டு வைத்தனர். இதேபோல் கீரணத்தம் உள்பட மாவட்டத்தின் அனைத்து பகுதிகளிலும் மரக்கன்றுகள் நடவு செய்து அஞ்சலியை செலுத்தினர்.

ஈஷா யோக மைய நிறுவனர் சத்குரு தனது டுவிட்டர் பதிவில், தமிழ்நாட்டின் மாபெரும் மரங்கள் நடும் திட்டத்தை தொடங்கிய விவேக் என்றும் நம் நினைவில் நிற்பார். அவர் இதயம் இந்த மண்ணுக்காகவும், மக்களுக்காகவும் துடித்தது என கூறியுள்ளார்.

ஊட்டி:

காந்தல் பகுதியில் சாண்டி நள்ளா நீர்த்தேக்கத்தை ஒட்டியுள்ள அரசு கால்நடைப் பண்ணைக்கு அருகே உள்ள விவசாய நிலத்தில் கடந்த 2 நாட்களுக்கு முன் காட்டு யானை ஒன்று புகுந்துள்ளது. அங்கு பயிரிடப்பட்ட கேரட் தோட்டத்தை தின்றும், மிதித்தும் முற்றிலும் சேதப்படுத்தியது. இதுகுறித்து தோட்ட உரிமையாளர்கள் அளித்த தகவலின்பேரில் வனத் துறையினர் அப்பகுதியை ஆய்வு செய்தபோது ஒற்றை பெண் யானையாக இருக்கலாம் என்று தெரியவந்தது.

இந்த யானை மசினகுடி பகுதியில் இருந்து சோலூர் பகுதி வழியாக முத்தநாடு பகுதிக்கு வந்து அங்கிருந்து சாண்டிநள்ளா நீர்த்தேக்கத்தின் மறு கரைக்கு வந்து காந்தல் பகுதிக்குள் நுழைந்திருக்கலாம் என கருதப்படுகிறது.

இதுதொடர்பாக வனத் துறையினர் இப்பகுதிகளில் தீவிர கண்காணிப்பில் ஈடுபட்டுள்ளோம். பொதுமக்கள் மற்றும் விவசாயிகள் எச்சரிக்கையுடன் இருக்க வேண்டும். இவ்வாறு அவர் கூறினர்.