நாகப்பட்டினம்

வேதாரண்யம்:

இலங்கையில் இருந்து படகில் வந்திறங்கிய குடும்பத்தினரிடம், போலீசார் தீவிர விசாரணை மேற்கொண்டு வருகின்றனர். வேதாரண்யம் அருகேயுள்ள கோடியக்கரையில், இலங்கை திரிகோணமலையில் இருந்து முகமது அன்சாரி, சல்மா வேகம் மற்றும் இவர்களது பத்து வயது மகன் ஆகியோர் சவுக்கு ப்ளாட் கடற்கரை பகுதிக்கு படகில் வந்தனர். தகவலறிந்து வந்த வேதாரண்யம் கடலோர காவல்படையினர், கியூ பிரான்ச் போலீசார் அவர்களை கைதுசெய்து விசாரித்து வருகின்றனர்.

சிக்கல்:

நாகை மாவட்டம் கீழ்வேளூர் ஒன்றியம் கொடியாலத்தூர் கிராமத்தில் வெள்ளை ஆற்று பாசனம் மூலம் மாவூர் ரெகுலேட்டர் அருகில் இருந்து தனி பாசனவாய்க்கால் மூலம் 7 கி.மீ தூரத்தில் இருந்து தண்ணீர் வந்து பல வருடங்களாக பாசனம் செய்து வந்தோம். ஆனால் இந்த வருடம் மாவூர் அருகே ஆற்று கீழ்குமுளி பொதுபணித்துறையினரால் புதிதாக கட்டப்பட்டுள்ளது. ஆங்கிலேயர்கள் ஆட்சி காலத்தில் 4 அடி ஆற்று கீழ்குமுளி கட்டப்பட்டு அதன் மூலம் எங்கள் பகுதிக்கு வந்த தண்ணீரை கொண்டு சாகுபடி செய்து வந்தோம். தற்போது அதை உடைத்து விட்டு புதிதாக 2 அடி அகலம் மட்டும் கட்டியதால் தண்ணீர் வரத்து சரியானபடி வராமல் தடைப்பட்டு போனது. புதிதாக கட்டப்படும் ஆற்று கீழ்குமுளி அமைப்பது தொடர்பாக அதிகாரிகள் விவசாயிகளிடம் கேட்காமல் 2 அடி கட்டியதால் தான் இவ்வளவு பாதிப்பு ஏற்பட்டுள்ளது.

இதனால் எங்கள் கிராமத்தில் உள்ள சம்பா நெற்பயிர்கள் 500 ஏக்கர் தண்ணீர் வரத்து இல்லாமல் கருகி போனது. இதனால் மோட்டார் என்ஜின் வைத்து தண்ணீர் இரைத்து சாகுபடி செய்து வருகிறோம். இந்தநிலையில் கடந்த சில நாட்களுக்கு முன்பு மழை பெய்ததால் பயிர்கள் ஓரளவு வளர்ந்து வந்தது. தற்போது நாங்கள் பயிர்களை காப்பாற்ற மழையை நம்பி உள்ளோம். கடந்த சில நாட்களாக வெயிலின் தாக்கம் அதிகம் உள்ளதால் பயிர்கள் கருக தொடங்கி உள்ளன. இதனால் விவசாயிகள் கவலை அடைந்து உள்ளனர். எனவே சம்பந்தப்பட்ட அதிகாரிகள் ஆற்றுக்கீழ்குமுளியை பழையபடி மாற்றி அமைத்து தண்ணீர் வர ஏற்பாடு செய்ய வேண்டும் என விவசாயிகள் கோரிக்கை விடுத்துள்ளனர்.

கொள்ளிடம்:

நாகை மாவட்டம் கொள்ளிடம் பகுதியில் தேசிய பறவையான மயில் அதிக அளவில் காணப்படுகிறது. கடந்த ஐந்து ஆண்டுகளுக்கு முன்பு இந்த பகுதியில் மயில்கள் குறைவாகவே இருந்தன. தற்போது மயில்களின் எண்ணிக்கை அதிகரித்து மயில்கள் தனது குஞ்சுகளுடன் கொள்ளிடம் ஆற்றின் கரையோர பகுதி மற்றும் பழையார், சின்னகொட்டாய்மேடு, தொடுவாய், வேட்டங்குடி, எடமணல், சரஸ்வதிவளாகம், கீரங்குடி, குன்னம், வடரங்கம், மற்றும் அனைத்து இடங்களிலும் பரவலாக காணப்படுகிறது.

நேற்று கொள்ளிடம் அருகே உள்ள மடவாமேடு பகுதியில் வானம் மேகமூட்டத்துடன் காணப்பட்டது. மேலும் குளிர்ச்சியான காலநிலை உருவாகி மழை பெய்யும் சூழல் உருவானது. அப்போது அங்கு உலாவிக்கொண்டிருந்த ஒரு ஆண் மயில் தோகை விரித்து ஆடியது. திடீரென மயில் தோகை விரித்து ஆடியதை அந்த வழியாக சென்ற மக்கள் பார்த்து ரசித்து சென்றனர்.