நாகப்பட்டினம்

நாகப்பட்டினம்:

நாகை மாவட்டத்தில் புகையிலை பொருட்கள் விற்பனை செய்யப்படுகிறதா ? என போலீசாரும் உணவு பாதுகாப்பு துறை அலுவலர்களும் தீவிர கண்காணிப்பு பணியில் ஈடுபட்டு வருகின்றனர்.

இந்த நிலையில் நாகை நகர் பகுதியில் டவுன் போலீஸ் நிலைய இன்ஸ்பெக்டர் பெரியசாமி தலைமையில் போலீசார் ரோந்து பணியில் ஈடுபட்டு கொண்டிருந்தனர். அப்போது பெரிய கடைத்தெரு பகுதியில் சந்தேகப்படும் வகையில் மோட்டார் சைக்கிளில் வந்த வாலிபரை நிறுத்தி சோதனை செய்தனர். இதில் அவரிடம் அரசால் தடைசெய்யப்பட்ட ஹான்ஸ் உள்ளிட்ட புகையிலை பொருட்கள் இருந்தது தெரியவந்தது.

தொடர்ந்து நடத்திய விசாரணையில் அவர் அந்தணப்பேட்டையை சேர்ந்த முகமது பயாஸ் (வயது 26) என்பதும், தடைசெய்யப்பட்ட புகையிலை பொருட்களை கடைகளுக்கு வினியோகம்செய்ய மோட்டார் சைக்கிளில் எடுத்து வந்ததும் தெரியவந்தது. இதுகுறித்து போலீசார் வழக்குப்பதிவு செய்து முகமது பயாசை கைது செய்தனர். மேலும் அவரிடம் இருந்து ரூ.35 ஆயிரம் மதிப்பிலான 10 கிலோ புகையிலை பொருட்களையும் மற்றும் மோட்டார் சைக்கிளையும் பறிமுதல் செய்தனர்.

வேளாங்கண்ணி:

பரமக்குடி ஆரியநேந்தல் பகுதியை சேர்ந்தவர் ராமமூர்த்தி. இவருடைய மகன் இருளன்சேதுபதி (வயது 19). இவர் திருக்குவளையில் உள்ள அரசு என்ஜினீயரிங் கல்லூரியில் எலெக்ட்ரிக்கல் என்ஜினீயரிங் முதலாமாண்டு படித்து வந்தார். இவர் கல்லூரி விடுதியில் தங்கி படித்து வந்தார்.

இந்த நிலையில் நேற்று முன்தினம் மாலை கல்லூரி முடிந்து இருளன்சேதுபதி மற்றும் அவரது நண்பர்களான நவீன்வரதன், கவுசிக்ராஜன், நிஷாந்த், கோகுல்ராஜன், கோகுல் ஆகியோருடன் திருக்குவளையில் உள்ள தியாகராஜ சுவாமி கோவிலுக்கு சென்றுள்ளனர்.

பின்னர் அங்கு உள்ள குளத்தில் நவீன்வரதன், கவுசிக்ராஜன், இருளன்சேதுபதி ஆகிய 3 பேரும் குளித்துள்ளனர். அப்போது திடீரென இருளன்சேதுபதி தண்ணீரில் மூழ்கி மாயமானார். உடனே அருகில் இருந்தவர்கள் குளத்தில் இறங்கி தேடினர். ஆனால் அவர் கிடைக்கவில்லை. இதுகுறித்து தகவல் அறிந்த தலைஞாயிறு தீயணைப்பு வீரர்கள், திருக்குவளை போலீஸ் சப்-இன்ஸ்பெக்டர் பார்த்திபன் மற்றும் போலீசார் சம்பவ இடத்துக்கு வந்து குளத்தில் இறங்கி இருளன் சேதுபதியின் உடலை மீட்டனர்.

பின்னர் உடலை நாகை அரசு மருத்துவக்கல்லூரி ஆஸ்பத்திரிக்கு பிரேத பரிசோதனைக்காக போலீசார் அனுப்பி வைத்தனர். மேலும் இதுதொடர்பான புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.

புதுடெல்லி:

மத்திய பா.ஜனதா அரசு கடந்த ஆண்டு செப்டம்பர் மாதம் 3 வேளாண் திருத்த சட்டங்களை கொண்டு வந்தது. விவசாய விளை பொருட்கள் விற்பனை மற்றும் வர்த்தகம் (மேம்பாடு மற்றும் எளிமைப்படுத்துதல்) சட்டம், விவசாயிகளுக்கு விலை உத்தரவாத ஒப்பந்தம் மற்றும் விவசாய சேவைகள் சட்டம், அத்தியாவசிய பொருட்கள் திருத்த சட்டங்களை கொண்டு வந்து பாராளுமன்றத்தில் நிறைவேற்றியது.

இந்த சட்டங்கள் மூலம் விவசாயிகளுக்கு பெரும் பலன்கள் கிடைக்கும் என்று மத்திய அரசு கூறியது. ஆனால் இந்த வேளாண் சட்டங்கள் விவசாயிகளின் நலனுக்கு எதிரானது என்று விவசாய சங்கங்கள் எதிர்ப்பு தெரிவித்தன. உடனே இந்த சட்டங்களை வாபஸ் பெற வேண்டும் என்று விவசாயிகள் வலியுறுத்தினார்கள்.

40 விவசாய சங்கங்கள் ஒன்றிணைந்த சம்யுக்தா கிஷான் மோர்ச்சா அமைப்பு டெல்லி எல்லையில் போராட்டத்தை தொடங்கியது. மேலும் பல விவசாய சங்கங்களும் போராட்டத்தில் இறங்கின. இதில் பஞ்சாப், அரியானா, ராஜஸ்தான், உத்தரபிரதேசம் உள்பட பல மாநிலங்களை சேர்ந்த ஆயிரக்கணக்கான விவசாயிகள் டெல்லியில் குவிந்து போராட்டத்தில் ஈடுபட்டு வருகிறார்கள்.


வேளாண் சட்டங்கள் குறித்து சுப்ரீம் கோர்ட்டில் வழக்குகளும் தொடரப்பட்டன. இதில் டெல்லியில் போராட்டம் நடத்திய விவசாயிகளால் இடையூறு ஏற்படுவதாக பொது நல வழக்குகளும் தொடரப்பட்டன.

ஒரு ஆண்டுக்கு மேலாக நீடித்து வரும் இந்த போராட்டத்தில் விவசாயிகள் பலர் உயிரிழந்தும் உள்ளனர். இதற்கிடையேதான் நேற்று நாட்டு மக்களுக்கு உரையாற்றிய பிரதமர் மோடி 3 வேளாண் சட்டங்களும் வாபஸ் பெறப்படுவதாக அறிவித்தார்.

அப்போது அவர் கூறும் போது, “விவசாயிகளின் நலனுக்காகவே வேளாண் சட்டங்கள் கொண்டு வரப்பட்டன. ஆனால் விவசாயிகளின் ஒரு பிரிவினருக்கு அதைப்பற்றி விளக்க முடியவில்லை. வேளாண் சட்ட முக்கியத்துவத்தை விளக்குவதற்கு எங்களால் இயன்ற அளவுக்கு முயற்சித்தோம். ஆனால் அது நடக்கவில்லை. இதற்காக நாட்டு மக்களிடம் மன்னிப்பு கேட்டுக்கொள்கிறேன். இந்த மாதம் பிற்பகுதியில் தொடங்கும் பாராளுமன்ற கூட்டத்தொடரில் 3 வேளாண் சட்டங்களும் ரத்து செய்யப்படுவதற்கான நடைமுறைகள் மேற்கொள்ளப்படும்” என்று அறிவித்தார்.

மோடியின் இந்த அறிவிப்பை விவசாய சங்கங்கள் வரவேற்று உள்ளன. ஆனாலும் தங்களது போராட்டம் தொடரும் என்று அறிவித்து உள்ளனர். பாராளுமன்றத்தில் வேளாண் சட்டங்களை ரத்து செய்யும் வரை தங்களது போராட்டம் தொடரும் என்றும், அதுவரை போராட்டத்தை வாபஸ் பெற மாட்டோம் என்றும் விவசாய சங்கங்கள் அறிவித்து உள்ளன.

இதற்கிடையே விவசாய விளை பொருட்களுக்கான குறைந்தபட்ச ஆதார விலை கோரி அடுத்தக்கட்ட போராட்டத்தை முன்னெடுத்து செல்வோம் என்று விவசாய சங்கம் அறிவித்து உள்ளது.

இதுகுறித்து 40 சங்கங்கள் இணைந்த அமைப்பான சம்யுக்தா கிஷான் மோர்ச்சா கூறும்போது, “கருப்பு சட்டங்களான வேளாண் திட்ட மசோதாக்களை ரத்து செய்வதற்காக மட்டும் விவசாயிகள் போராட்டத்தை நடத்தவில்லை. அனைத்து விவசாய விளை பொருட்களுக்கும் அனைத்து விவசாயிகளுக்கும் குறைந்த பட்ச ஆதார விலைக்கான உத்தரவாதம் அளிக்க வேண்டும் என்பதும் முக்கியமான கோரிக்கை. இந்த கோரிக்கை இன்னும் நிலுவையில் உள்ளது.

அதேபோல மின்சார திருத்த மசோதா வாபஸ் பெற வேண்டும் என்பதும் நிலுவையில் உள்ளது. இதுதொடர்பாக சம்யுக்தா கிஷான் மோர்ச்சா சார்பில் விரைவில் கூட்டம் நடத்தப்படும். இதில் எங்களின் அடுத்தக்கட்ட முடிவை தெரிவிப்போம்” என்று தெரிவித்து உள்ளது.

விவசாயிகளின் நீண்ட நாள் கோரிக்கையை ஏற்று 3 வேளாண் சட்டங்களும் வாபஸ் பெறப்படும் என்று அறிவிக்கப்பட்டுள்ள நிலையில் விவசாய சங்கங்கள் தங்களது போராட்டத்தை வாபஸ் பெற மறுத்து உள்ளன. போராட்டத்தை கைவிட வேண்டும் என்ற பிரதமர் மோடியின் கோரிக்கையை அவர்கள் நிராகரித்து உள்ளனர்.

ஏற்கனவே விவசாயிகள் ஓராண்டுக்கு மேலாக டெல்லி எல்லையில் தொடர் போராட்டத்தில் ஈடுபட்டு வருகிறார்கள். அதேபோல பல்வேறு மாநிலங்களிலும் போராட்டங்கள் நடந்து வருகிறது. இதில் உயிரிழப்பு சம்பவங்களும் நடந்து உள்ளன. தற்போது விவசாயிகள் கோரி வந்த 3 வேளாண் சட்டங்கள் திரும்ப பெறப்படும் என்ற அறிவிப்புக்கு பிறகு அடுத்தக்கட்டமாக குறைந்தபட்ச ஆதார விலை கேட்டு விவசாயிகள் தங்களது போராட்டத்தை மீண்டும் தீவிரப்படுத்துவோம் என்று தெரிவித்து இருப்பது சுமூகமான முடிவுக்கு வருவதில் சிக்கலை ஏற்படுத்தி இருக்கிறது.

இந்த விவகாரத்தில் மத்திய அரசு கீழே இறங்கி வந்தநிலையில் விவசாயிகள் தங்களது போராட்டத்தை கைவிடாமல் பிடிவாதம் காட்டி வருகிறார்கள். இது போராட்டத்தை முடிவுக்கு கொண்டு வரும் மத்திய அரசின் முயற்சிக்கு முட்டுக்கட்டையை ஏற்படுத்தி உள்ளது.

நாகூர்:

நாகூர் பாலத்தடி அருகில் நேற்று முன்தினம் இரவு நாகூர் போலீஸ் சப்-இன்ஸ்பெக்டர் ராஜேஷ் மற்றும் போலீசார் வாகன சோதனையில் ஈடுபட்டனர். அப்போது அந்த வழியாக சந்தேகம்படும் வகையில் வந்த ஒரு வாலிபரை நிறுத்தி விசாரணை நடத்தினர். அவர் முன்னுக்கு பின் முரணாக பதில் கூறியதால் சந்தேகம் அடைந்த போலீசார் அவர் வைத்திருந்த பையை சோதனை செய்தனர். இதில் 1 கிலோ கஞ்சா இருந்தது.

இதை தொடர்ந்து போலீசார் நடத்திய விசாரணையில், அவர் நாகூர் ஆரிய நாட்டு தெருவை சேர்ந்த மகேந்திரன் மகன் வேந்தன் (வயது 30) என்பதும், கஞ்சாவை விற்பனைக்கு கொண்டு சென்றதும் தெரிய வந்தது.

இதுகுறித்து போலீசார் வழக்குப்பதிவு செய்து வேந்தனை கைது செய்து அவரிடம் இருந்து ரூ.10 ஆயிரம் மதிப்பிலான 1 கிலோ கஞ்சாவை பறிமுதல் செய்தனர்.