கடலூர்

கடலூர் முதுநகர்:

தமிழகம் முழுவதும், குறிப்பாக கடலோர மாவட்டங்களில் கடந்த சில நாட்களாக அவ்வப்போது மழை பெய்து வருகிறது. இந்த நிலையில் வங்கக்கடலில் குறைந்த காற்றழுத்த தாழ்வு பகுதி, கடந்த சில நாட்களாக நிலைகொண்டிருந்தது. அது தற்போது, வடமேற்கு மற்றும் மத்திய மேற்கு வங்க கடலில் ஒடிசா மாநிலம் பாரதீப்பிற்கு 180 கி.மீட்டர் தொலைவில் காற்றழுத்த தாழ்வு மண்டலமாக உருவாகியுள்ளது. இது மேலும் வலுவடைந்து, ஆழ்ந்த காற்றழுத்த தாழ்வு மண்டலமாக மாறி 23-ந்(அதாவது இன்று) தேதி மேற்கு வங்காள மாநிலம் சாகர் தீவுகள் அருகே கரையை கடக்கும் என எதிர்பார்க்கப்படுகிறது.

இதன் காரணமாக தமிழக கடலோர மாவட்டங்களில் லேசானது முதல் மிதமானது வரை மழை பெய்யக் கூடும் என வானிலை ஆய்வு மையம் அறிவித்துள்ளது. இதற்கிடையே வங்கக்கடலில் குறைந்த காற்றழுத்த தாழ்வு மண்டலம் உருவானதையடுத்து, கடலூர் துறைமுகத்தில் நேற்று மதியம் 1.30 மணி அளவில் தூர புயல் எச்சரிக்கையான 1-ம் எண் கூண்டு ஏற்றப்பட்டுள்ளது.

சிறுபாக்கம்:

கடலூர் மாவட்டம் வேப்பூர் அடுத்த சிறுபாக்கம் அருகே உள்ள காஞ்சிராங்குளம் கிராமத்தை சேர்ந்தவள் ஆறுமுகம் மகள் மேகலா(வயது 12). இதேபோல் அதே பகுதியை சேர்ந்தவள் கருப்பையா மகள் மனிஷா(12). தோழிகளான இவர்கள் 2 பேரும் அதே பகுதியில் உள்ள ஊராட்சி ஒன்றிய நடுநிலைப்பள்ளியில் 7-ம் வகுப்பு படித்து வந்தனர். கொரோனா காரணமாக பள்ளிகள் திறக்கப்படாததால், அவர்கள் 2 பேரும் தங்களது வீட்டிலே இருந்து வந்தனர். இந்த நிலையில் நேற்று மாலை 6 மணியளவில் மேகலாவும், மனிஷாவும் அப்பகுதியில் உள்ள ஏரியில் குளிக்க செல்வதாக வீட்டில் உள்ளவர்களிடம் கூறிவிட்டு சென்றனர்.

பின்னர் அவர்கள் 2 பேரும், ஏரியில் குளித்த போது ஆழமான பகுதிக்கு சென்றதாக தெரிகிறது. இதில் நீச்சல் தெரியாததால் மேகலாவும், மனிஷாவும் நீரில் மூழ்கினர்.

இந்த நிலையில் குளிக்க சென்ற குழந்தைகள் நீண்ட நேரமாகியும் வீட்டுக்கு திரும்பாததால் அதிர்ச்சியடைந்த உறவினர்கள் மற்றும் பெற்றோர்கள் ஏரிக்கு சென்று பார்த்தனர். அப்போது சிறுமிகளின் ஆடைகள் மட்டும் வெளியே கிடந்ததால், அவர்கள் நீரில் மூழ்கியிருக்கலாமோ என்ற சந்தேகம் எழுந்தது. இதையடுத்து அக்கம்பக்கத்தினர் ஏரிக்குள் இறங்கி நீண்ட நேர தேடுதலுக்கு பின்னர் சிறுமிகள் 2 பேரையும் பிணமாக மீட்டனர். இதுகுறித்து சிறுபாக்கம் போலீசார் விசாரணை நடத்தி வருகின்றனர். ஏரியில் குளிக்க சென்ற 2 சிறுமிகள் நீரில் மூழ்கி இறந்த சம்பவம் அப்பகுதியில் சோகத்தை ஏற்படுத்தி உள்ளது.

ராமநத்தம்:

கடலூர் மாவட்டம் திட்டக்குடி அருகே உள்ள ராமநத்தம் ஆலம்பாடி ரோட்டுத்தெருவை சேர்ந்தவர் மணி (வயது 65). விவசாயி. இவருடைய மனைவி சாந்தி (55), மகன் சத்தியராஜ். கடந்த 40 நாட்களுக்கு முன்பு தான் சிங்கப்பூரில் இருந்து சத்தியராஜ் திருமணம் செய்வதற்காக ஊருக்கு வந்திருந்தார்.

திருமணத்திற்கு தேவையான நகை, பணத்தையும் அவர்கள் சேகரித்து வீட்டில் உள்ள பீரோவில் வைத்திருந்தனர். இதுதவிர சத்தியராஜியின் அக்காள் நகைகளும் அவர்களது வீட்டில் தான் வைத்திருந்ததாக கூறப்படுகிறது. இந்நிலையில் நேற்று முன்தினம் இரவு 3 பேரும் வீட்டு வராண்டாவில் படுத்து தூங்கினர். அப்போது மர்ம நபர்கள், மணி வீட்டின் பக்கவாட்டில் இருந்த மர ஜன்னலை கடப்பாரையால் உடைத்தனர். பின்னர் அதன் வழியாக உள்ளே புகுந்த கொள்ளையர்கள், வீட்டை உள்பக்கமாக பூட்டினர்.

தொடர்ந்து வீட்டில் இருந்த பீரோவை உடைத்து, அதில் இருந்த 74 பவுன் நகைகள், ரூ.6 லட்சம் ரொக்கத்தை கொள்ளையடித்துவிட்டு தப்பிச் சென்றனர்.

நேற்று காலை எழுந்தபோது தான் ஜன்னல் உடைக்கப்பட்டு கிடந்ததை பார்த்து அவர்கள் அதிர்ச்சி அடைந்தனர். தொடர்ந்து வீட்டில் இருந்த பீரோவை பார்த்த போது, அது உடைக்கப்பட்டு, அதில் இருந்த நகை, பணத்தை மர்ம நபர்கள் கொள்ளையடித்து சென்றது தெரிய வந்தது.

இதேபோல் அதேதெருவில் வசித்து வரும் தனியார் கல்லூரி ஊழியர் வீட்டிலும் கொள்ளையர்கள் கைவரிசை காட்டி உள்ளனர். இதன் விவரம் வருமாறு:-

ஆலம்பாடி ரோட்டுத்தெருவை சேர்ந்த சாமிதுரை மகன் ராம்குமார்(39). இவர் தொழுதூரில் உள்ள தனியார் கல்லூரியில் ஊழியராக வேலை பார்த்து வருகிறார். இவருடைய மனைவி செந்தாமரை (30), தாய் ஜோதி (60). நேற்று முன்தினம் 3 பேரும் வீட்டில் படுத்து தூங்கிக்கொண்டிருந்தனர்.

அப்போது நள்ளிரவில் ஜன்னலை உடைத்து வீட்டுக்குள் புகுந்த கொள்ளையர்கள், அங்கிருந்த 2 பீரோவையும் உடைத்தனர். பின்னர் அதில் இருந்த நகை, பணத்தை கொள்ளையடித்தனர். மற்றொரு பீரோ வீட்டு வராண்டாவில் இருந்தது. இதை உடைத்தால் வெளியில் சத்தம் கேட்கும் என நினைத்த கொள்ளையர்கள் அதை லாவகமாக வெளியே தூக்கிச்சென்றனர். பின்னர் வீட்டு பின்புறம் உள்ள வயல்வெளியில் போட்டு, அதை உடைத்து, அதில் இருந்த நகை, பணம் மற்றும் வெள்ளிப்பொருட்களையும் கொள்ளையடித்து சென்றுள்ளனர்.

இதில் மொத்தம் 37 பவுன் நகைகள், வெள்ளிப்பொருட்கள், ரூ.1 லட்சத்து 20 ஆயிரம் கொள்ளை போய் இருந்தது. இதை காலையில் எழுந்து பார்த்த ராம்குமார் குடும்பத்தினர், அதிர்ச்சி அடைந்தனர். பின்னர் 2 வீட்டாரும் இது பற்றி ராமநத்தம் போலீசில் தனித்தனியே புகார் செய்தனர்.

அதன்பேரில் திட்டக்குடி துணை போலீஸ் சூப்பிரண்டு வெங்கடேசன், போலீஸ் இன்ஸ்பெக்டர் ரமேஷ்பாபு தலைமையிலான போலீசார் சம்பவ இடத்திற்கு சென்று விசாரணை நடத்தினர். மேலும் கடலூர் மாவட்ட போலீஸ் சூப்பிரண்டு ஸ்ரீஅபிநவ் சம்பவ இடத்திற்கு நேரில் சென்ற விசாரணை நடத்தினார். இது தவிர கடலூரில் இருந்து மோப்பநாய் அர்ஜூன் வரவழைக்கப்பட்டது. மோப்பநாய் வீட்டில் இருந்து மோப்பம் பிடித்தபடி அதர்நத்தம் ரோட்டை நோக்கி ஓடியது. அது தொடர்ந்து சுமார் 3 கிலோ மீட்டர் தூரம் ஓடி நின்றது. ஆனால் யாரையும் கவ்வி பிடிக்கவில்லை.

இதற்கிடையில் கடலூர் தடயவியல் நிபுணர்கள் வினோத்குமார், தசரதன் தலைமையிலான குழுவினர் 2 வீடுகளில் இருந்த முக்கிய தடயங்களை சேகரித்தனர். இது தொடர்பாக ராமநத்தம் போலீசார் வழக்குப்பதிவு செய்து, 2 வீடுகளில் கொள்ளையடித்து சென்ற கொள்ளையர்களை வலைவீசி தேடி வருகின்றனர். மேலும் இதற்காக நியமிக்கப்பட்ட தனிப்படை போலீசாரும் அவர்களை தேடி வருகின்றனர்.