கடலூர்

கடலூர்:

தென்மேற்கு வங்கக்கடலில் நிலவும் வளிமண்டல மேலடுக்கு சுழற்சி காரணமாக தமிழகத்தில் கடலூர், பெரம்பலூர், தஞ்சாவூர், நாகப்பட்டினம் உள்பட பல்வேறு மாவட்டங்களில் இடியுடன் கூடிய பலத்த மழை பெய்யும் என வானிலை ஆய்வு மையம் ஏற்கனவே அறிவித்திருந்தது.

அதன்படி கடலூர் மாவட்டம் முழுவதும் கடந்த சில தினங்களாக காலை நேரங்களில் வெயிலும் இரவு நேரங்களில் மழையும் பெய்து வந்தது.

நேற்றிரவு கடலூர் மற்றும் அதன் சுற்றுவட்டார பகுதிகளில் வானில் கருமேகங்கள் சூழ்ந்து குளிர்ந்த காற்று வீசியது. தொடர்ந்து சிறிது நேரத்தில் பலத்த மழை பெய்ய தொடங்கியது. நேரம் செல்ல செல்ல மழையின் வேகம் அதிகரித்து காணப்பட்டது. அதனை தொடர்ந்து விடிய விடிய பலத்த மழை பெய்தது.

கடலூர், நெல்லிக்குப்பம், பண்ருட்டி, விருத்தாசலம், நெய்வேலி உள்ளிட்ட மாவட்டத்தின் அனைத்து பகுதிகளிலும் இந்த பலத்த மழை பெய்து வருகிறது. இன்று காலையும் மழை நீடித்தது. இந்த மழையால் சாலைகளில் மழை நீர் பெருக்கெடுத்து ஓடியது. தாழ்வான பகுதிகளில் மழைநீர் குட்டை போல் தேங்கி நின்றது.

தொடர் மழையால் விவசாயிகள் தங்கள் விவசாய பணிகளில் மும்முரமாக ஈடுபட்டு வருகின்றனர். மேலும் தென்மேற்கு வங்க கடல் பகுதியில் சூறைக்காற்று வீசுவதால் மீனவர்கள் அந்த பகுதிகளுக்கு மீன்பிடிக்க செல்ல வேண்டாம் என எச்சரிக்கப்பட்டுள்ளனர்.

கடலூர் :

கடலூர் மாவட்ட கலெக்டர் அலுவலகத்தில் 7 மாதங்களுக்கு பிறகு நேற்று வாராந்திர பொதுமக்கள் குறைகேட்பு கூட்டம் நடைபெற்றது. கூட்டத்தில் கலெக்டர் பாலசுப்பிரமணியம் பொதுமக்களிடம் நேரடியாக குறைகளை கேட்டறிந்து, மனுக்களை பெற்றார். இந்த கூட்டத்திற்கு ஆதிதிராவிட நலத்துறை பெண் அதிகாரி ஒருவரும் வந்திருந்தார்.

அவர் கூட்டம் தொடங்கியதில் இருந்தே, பொதுமக்கள் கூறிய கோரிக்கைகள் பற்றி கவனிக்காமல் தனது செல்போனிலேயே மூழ்கியிருந்தார். அப்போது அவர் யூடியூப்பில் சமையல் குறிப்பு தொடர்பான வீடியோக்களை குறைகேட்பு கூட்டம் முடியும் வரை பார்த்துக்கொண்டிருந்தார்.

அப்போது அருகில் இருந்த பிற அதிகாரிகள் மற்றும் மனு அளிக்க வந்த பொதுமக்கள், பெண் அதிகாரியே கூட்டத்தை கவனிக்காமல் சமையல் குறிப்பு பார்த்ததை கண்டு புலம்பினர்.

இதற்கிடையே பெண் அதிகாரி, செல்போனில் சமையல் குறிப்பு பார்த்துக்கொண்டிருந்த வீடியோ தற்போது சமூக வலைதளங்களில் வைரலாகி வருகிறது.

கடலூர்:

தமிழகத்தில் தொற்று நோய் பரவல் நாளுக்கு நாள் குறைந்து வரும் நிலையில் ஊரடங்கில் தமிழக அரசு பல்வேறு தளர்வுகளை அறிவித்துள்ளது.

கடலூரில் வாரந்தோறும் ஞாயிற்றுக்கிழமை மீன்கள் மற்றும் இறைச்சி வாங்குவதற்கு பொதுமக்கள் ஏராளமானோர் கடைகளில் திரள்கின்றனர். இன்று ஞாயிற்றுக்கிழமை என்பதால் கடலூர் துறை முகத்தில் மீன் வாங்குவதற்கு ஏராளமான மக்கள் திரண்டனர். மேலும் பைபர் படகில் மீன்பிடித்து வந்த மீனவர்களிடம் நேரடியாக பொதுமக்கள் தங்கள் தேவைக்கேற்ப மீன்களை போட்டி போட்டுக்கொண்டு ஏலம் எடுத்து வாங்கி சென்றதை காணமுடிந்தது.

புரட்டாசி மாதம் என்றாலும் நகர் முழுவதும் இன்று காலை முதல் இறைச்சி கடைகளில் வழக்கம் போல் பொதுமக்கள் தங்களுக்கு தேவையான இறைச்சிகளை வாங்கி சென்றதும் காணமுடிந்தது. மேலும் கடலூரில் இயங்கி வந்த மீன் மார்க்கெட்டுகளிலும் பொதுமக்கள் தங்களுக்கு தேவையான மீன்களை வாங்கி சென்றனர். இதனை தொடர்ந்து இறைச்சிக்கடை முன்பு பொதுமக்கள் சமூக இடைவெளி உடன் நின்று முகக்கவசம் அணிந்து பாதுகாப்பாக இறைச்சி வாங்கி சென்றனர்.

ஆனால் கடலூர் துறைமுகத்தில் மீன் வாங்குவதற்கு போட்டி போட்டுக்கொண்டு பொதுமக்கள் முககவசம் இன்றி சமூக இடைவெளியை பின்பற்றாமல் கூட்டம் கூட்டமாக நின்று மீன்களை வாங்கி சென்றனர்.

இதனை பார்க்கும்போது திருவிழா காலத்தில் கூட்டம் கூட்டமாக திரண்டிருப்பது போல் எந்தவித அச்சமும் இன்றி நோய் பரவல் எளிமையாக பரவக்கூடிய அளவில் பொதுமக்களின் அலட்சியமாக இருப்பது தெரிய வருகிறது.

ஆகையால் பொதுமக்கள் சமூக நலனில் அக்கறை கொண்டு தொற்று நோய் பரவல் ஏற்படாதவாறு செயல்படுவதற்கு அதிகாரிகள் கடும் நடவடிக்கை எடுக்க வேண்டும் என சமூக ஆர்வலர்கள் கோரிக்கை வைத்துள்ளனர்.

கடலூர்:

மத்திய அரசின் வேளாண் திட்டங்களை எதிர்த்து டெல்லியில் கடந்த 1 ஆண்டாக போராட்டம் நடத்தி வரும் விவசாயிகளுக்கு ஆதரவாக இன்று நாடு முழுவதும் முழு அடைப்பு போராட்டத்தில் ஈடுபடபோவதாக அறிவிக்கப்பட்டிருந்தது.

இந்த போராட்டத்துக்கு வணிகர்கள், வியாபாரிகள் மற்றும் பஸ் உரிமையாளர்கள் ஆதரவு அளிக்குமாறு கடலூர் மாவட்டத்தில் தி.மு.க. மற்றும் அதன் கூட்டணி கட்சியினர் துண்டுபிரசுரம் வழங்கி ஆதரவு கேட்டு வந்தனர்.

இதைத்தொடர்ந்து இந்த போராட்டத்துக்கு பெரும்பான்மையான பஸ் உரிமையாளர்கள் ஆதரவு தெரிவித்து இன்று பஸ்களை இயக்கவில்லை. இதைத்தொடர்ந்து கடலூரில் இருந்து புதுவைக்கு இயக்கப்படும் தனியார் பஸ்கள் முழுமையாக இயங்காததால் பொதுமக்கள் தாங்கள் செல்லவேண்டிய இடங்களுக்கு உரிய நேரத்தில் செல்லமுடியாமல் அவதியடைந்தனர். மேலும் ஒருசில இடங்களில் பஸ்சுக்காக பயணிகள் நீண்டநேரம் காத்திருக்க வேண்டிய நிலையும் ஏற்பட்டது.

கடலூரில் இருந்து புதுவைக்கு அரசு பஸ்கள் வழக்கம் போல் இயங்கின. தனியார் பஸ்கள் இயக்கப்படாததால் அரசு பஸ்களில் பொதுமக்களின் கூட்டம் அதிக அளவில் காணப்பட்டது. கடலூரில் இருந்து புதுவை செல்லும் பயணிகள் அரசு பஸ்களில் முண்டியடித்துக்கொண்டு ஏறினர்.

கடலூர்:

வங்க கடலில் நேற்று முன்தினம் உருவான குறைந்த காற்றழுத்த தாழ்வுபகுதி புயலாக மாறியது. இந்த புயலுக்கு குலாப் என்று பெயர் சூட்டப்பட்டுள்ளது.

இந்த புயல் இன்று வடக்கு ஆந்திரா-ஒடிசா கடற்கரையை ஒட்டிய கலிங்கப்பட்டிணம் என்ற இடத்தில் கரையை கடக்கும் என்று வானிலை ஆய்வு மையம் அறிவித்துள்ளது.

இதன் காரணமாகவும், வளிமண்டலத்தில் நிலவும் மேலடுக்கு சுழற்சிகாரணமாகவும், தமிழகத்தில் இன்று முதல் 4 நாட்களுக்கு மழை பெய்யும் என வானிலை ஆய்வு மையம் தெரிவித்திருந்தது. இதைத்தொடர்ந்து கடலூர் துறைமுகத்தில் 2-ம் எண் புயல் எச்சரிக்கை கூண்டு ஏற்றப்பட்டது. கடலூரில் நேற்று காலை முதல் மாலை வரை வெயிலின் தாக்கம் அதிகமாக இருந்தது.

இந்த நிலையில் நள்ளிரவு 12 மணி அளவில் பலத்த காற்று வீசியது. சிறிது நேரத்தில் இடி-மின்னலுடன் மழை பெய்ய தொடங்கியது.

கடலூர் மஞ்சக்குப்பம், புதுநகர், முதுநகர், நெல்லிக்குப்பம், மேல்பட்டாம்பாக்கம் உள்பட பல்வேறு பகுதிகளிலும் பலத்த மழை கொட்டியது. இதனால் சாலைகளில் மழைநீர் வெள்ளம்போல் பெருக்கெடுத்து ஓடியது. தாழ்வான பகுதிகளில் மழைநீர் குளம்போல் தேங்கியது.

இடி-மின்னலுடன் பலத்தமழை பெய்ததால் கடலூர் மற்றும் அதன் சுற்றுவட்டார பகுதிகளில் உள்ள பெரும்பாலான பகுதிகளில் நள்ளிரவு மின்தடை ஏற்பட்டது. சுமார் 3 மணி நேரத்துக்கு மேலாக மின்விநியோகம் இல்லாததால் கடலூர் நகரமே இருளில் மூழ்கியது. இதனால் பொதுமக்கள் பெரிதும் அவதியடைந்தனர்.

பகல் நேரத்தில் வெயில் சுட்டெரித்தபோதும், நள்ளிரவு பெய்த கனமழையின் காரணமாக கடலூர் பகுதியில் குளிர்ந்த காற்று வீசியதால் பொதுமக்கள் சற்று நிம்மதியடைந்தனர்.

கடலூர் மாவட்டத்தில் பண்ருட்டி, நெல்லிக்குப்பம் உள்பட மாவட்டத்தின் பல்வேறு பகுதிகளிலும் நேற்று இரவு இடி-மின்னலுடன் பலத்த மழை பெய்தது.