அரியலூர்

தா.பழூர்:



அரியலூர் மாவட்டம், தா.பழூர் அருகே உள்ள கோடாலி கிராமத்தை சேர்ந்தவர் ராஜ்குமார். இவர் கோடங்குடி கிராமத்தில் எலக்ட்ரிக்கல் ஹார்டுவேர்ஸ் கடை வைத்து வியாபாரம் நடத்தி வருகிறார். ராஜ்குமாருக்கு உடல் நிலை சரியில்லாததால், தனது வீட்டை பூட்டிவிட்டு கடந்த 10 நாட்களாக அதே கிராமத்தில் உள்ள அவரது தந்தை ராமதாஸ் வீட்டுக்கு சென்று மனைவி மற்றும் 4 குழந்தைகளுடன் தங்கியிருந்தார்.

நேற்று காலை ராஜ்குமாரின் மனைவி ராஜேஸ்வரி, ஒரு சில பொருட்கள் எடுப்பதற்காக தனது வீட்டுக்கு சென்றார். அப்போது, வீட்டின் பூட்டு உடைக்கப்பட்டு கதவு திறந்து கிடந்தது. இதனால் அதிர்ச்சி அடைந்த ராஜேஸ்வரி, தனது மாமனார் ராமதாஸ் மற்றும் அக்கம் பக்கத்தில் இருந்தவர்களுக்கு தகவல் தெரிவித்து அழைத்துள்ளார். பின்னர் வீட்டிற்குள் சென்று பார்த்தபோது, வீட்டில் இருந்த பீரோவும் உடைக்கப்பட்டு பொருட்கள், துணிகள் சிதறி கிடந்தன.

பீரோவில் இருந்த 30 பவுன் நகை மற்றும் ரூ.3 லட்சத்து 40 ஆயிரம் ரொக்கம் ஆகியவை கொள்ளையடிக்கப்பட்டு இருந்தது தெரியவந்தது. வீட்டில் ஆட்கள் இல்லாததை நோட்டமிட்டு மர்மநபர்கள் இந்த துணிகர கொள்ளையில் ஈடுபட்டுள்ளனர். இதுகுறித்து தா.பழூர் போலீஸ் நிலையத்தில் புகார் செய்யப்பட்டது. அதன்பேரில் போலீஸ் இன்ஸ்பெக்டர் பேபி தலைமையிலான போலீசார் சம்பவ இடத்துக்கு விரைந்து வந்து விசாரணை நடத்தினர்.

அரியலூரில் இருந்து வரவழைக்கப்பட்ட மோப்பநாய் மீனா, சிறிது தூரம் மோப்பம் பிடித்தபடி ஓடி நின்று விட்டது. யாரையும் கவ்வி பிடிக்கவில்லை. விரல்ரேகை நிபுணர்களும் சம்பவ இடத்திற்கு வந்து ஆய்வு செய்து, முக்கிய தடங்களை சேகரித்தனர். மேலும் இது தொடர்பாக போலீசார் வழக்குப்பதிவு செய்து நகை மற்றும் பணத்தை கொள்ளையடித்து சென்ற மர்மநபர்களை வலைவீசி தேடி வருகின்றனர்.

திருமானூர்:

அரியலூர் மாவட்டம், திருமானூர் அருகே உள்ள கல்லூர் கிராமம் தெற்கு தெருவைச் சேர்ந்தவர் சேகர் (வயது 50). மாற்றுத்திறனாளியான இவர் மோட்டார் சைக்கிளில் தனது மகள் காயத்ரி (24), பேத்திகள் குணஸ்ரீ (5), சுபஸ்ரீ (3) ஆகியோருடன் திருமானூரில் இருந்து கல்லூருக்கு சென்றார்.

திருமானூர் பழைய போலீஸ் நிலையம் அருகில் உள்ள திருப்பத்தில் திரும்பும்போது அப்பகுதியில் லோடு ஆட்டோ நின்று கொண்டிருந்தது. இதையடுத்து மோட்டார் சைக்கிளை திருப்பியபோது, பின்னால் வந்த லாரி மோட்டார் சைக்கிள் மீது மோதியது.

இதில் மோட்டார் சைக்கிளில் இருந்த 4 பேரும் தூக்கி வீசப்பட்டனர். சேகர், குணஸ்ரீ பலத்த காயமடைந்தனர். இதையடுத்து 4 பேரையும் பொதுமக்கள் மீட்டு ஆஸ்பத்திரிக்கு கொண்டு சென்றனர். ஆனால் செல்லும் வழியிலேயே சேகர் இறந்தார்.

குணஸ்ரீ சிகிச்சைக்காக தஞ்சை மருத்துவ கல்லூரி மருத்துவமனையில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்பட்டு வந்த நிலையில் இன்று காலை குணஸ்ரீயும் பரிதாபமாக இறந்தாள்.

இந்த விபத்து தொடர்பாக திருமானூர் போலீசார் விசாரணை நடத்தி லாரி டிரைவர் திருவாரூர் மாவட்டம், வாழ்க்கை கிராமத்தை சேர்ந்த சுலைமான் (42) என்பவரை கைது செய்தனர். மேலும் விபத்திற்கு காரணமான லோடு ஆட்டோ டிரைவரை போலீசார் தேடி வருகின்றனர்.

ஜெயங்கொண்டம்:

அரியலூர் மாவட்டம் ஜெயங்கொண்டம் அருகே உள்ள கோடாலி கிராமத்தை சேர்ந்தவர் ராஜ்குமார். இவர் போடங்குடி பகுதியில் ஹார்டுவேர்ஸ் கடை வைத்து நடத்தி வருகிறார்.

இந்தநிலையில் ராஜ்குமாருக்கு உடல்நிலை பாதிப்பு ஏற்பட்டதால் அவர் மனைவி மற்றும் குழந்தைகளுடன் அருகில் வசித்து வரும் அவரது தந்தை ராமதாஸ் வீட்டிற்கு சென்றுவிட்டார்.

அங்கு கடந்த 10 நாட்களாக இருந்து வரும் நிலையில், நேற்று ராஜ்குமாரின் மனைவி அவர் வசித்து வந்த வீட்டை பார்ப்பதற்காக சென்றுள்ளார். அப்போது வீட்டின் முன்பக்க கதவு உடைக்கப்பட்டு கிடந்ததுடன், உள்ளே பல்வேறு பொருட்கள் சிதறிக் கிடந்தது.

மேலும் பீரோ உடைக்கப்பட்டு அதில் இருந்த 30 பவுன் தங்க நகைகள் மற்றும் ராஜ்குமார் ஹார்டுவேர் பொருட்கள் வாங்குவதற்காக வைத்திருந்த ரூ.3.40 லட்சம் ஆகியவை கொள்ளை போயி ருந்தது. அவற்றின் மதிப்பு ரூ.15 லட்சம் இருக்கும்.

இது குறித்து தா.பழுர் போலீசில் புகார் செய்யப்பட்டது. போலீசார் சம்பவ இடத்திற்கு சென்று பார்வையிட்டு விசாரணை நடத்தினர். மோப்ப நாய், கைரேகை நிபுணர்கள் வரவழைக்கப்பட்டு சோதனை நடத்தப்பட்டது.

ராஜ்குமார் வீட்டில் ஆளில்லாததை நோட்டமிட்டு மர்மநபர்கள் கைவரிசையில் ஈடுபட்டுள்ளனர். அவர்கள் யாரென்று விசாரணை நடத்தி போலீசார் வலைவீசி தேடி வருகின்றனர். இந்த சம்பவம் அப்பகுதியில் பரபரப்பை ஏற்படுத்தியுள்ளது.

மீன்சுருட்டி:

அரியலூர் மாவட்டம், கங்கைகொண்ட சோழபுரம் பகுதியில் இந்தியன் ஓவர்சீஸ் வங்கி உள்ளது. இந்த வங்கியில் மராட்டிய மாநிலத்தை சேர்ந்த விஷால் நாராயண் காம்ளே என்பவர் கிளை மேலாளராக பணியாற்றி வந்தார். அந்த வங்கியில் ஜெயங்கொண்டம் பகுதியை சேர்ந்த பாலசுப்பிரமணியன் (வயது 72) கணக்கு வைத்து வரவு-செலவு செய்து வருகிறார். இவர் ஜெயங்கொண்டம் அரசு மருத்துவமனையில் டாக்டராக பணியாற்றி ஓய்வு பெற்றவர் ஆவார்.

இந்நிலையில் பாலசுப்பிரமணியன் தனக்கு சொந்தமான இடத்தில் வணிக வளாகம் கட்டுவதற்கு, கடன் பெறுவதற்காக அந்த வங்கிக்கு சென்றார். அங்கு அவர் கிளை மேலாளர் விஷால் நாராயண் காம்ளேவை சந்தித்து, ஆவணங்கள் உள்ளிட்டவற்றை காட்டி கடன் வழங்குமாறு கேட்டுள்ளார்.

அப்போது கிளை மேலாளர் இந்தியில் பேசியதோடு, பாலசுப்பிரமணியனுக்கு இந்தி தெரியுமா? என்று ஆங்கிலத்தில் கேட்டதாக தெரிகிறது. அதற்கு பாலசுப்பிரமணியன் தனக்கு இந்தி தெரியாது என கூறி உள்ளார். உடனே வங்கி மேலாளர் தனக்கு தமிழ் தெரியாது என்று கூறி கடன் வழங்க மறுத்ததாகவும் கூறப்படுகிறது. இதனால் மன உளைச்சலுக்கு ஆளான டாக்டர் பாலசுப்பிரமணியன், மான நஷ்டஈடு கேட்டு வங்கி கிளை மேலாளருக்கு நோட்டீஸ் அனுப்பினார்.

இந்த சம்பவம் தற்போது பெரும் பரபரப்பை ஏற்படுத்தியுள்ளது. இந்த சம்பவத்தை தொடர்ந்து வங்கி கிளை மேலாளர் விஷால் நாராயண் காம்ளேவை திருச்சிக்கு இடமாற்றம் செய்து திருச்சி மண்டல இந்தியன் ஓவர்சீஸ் வங்கி அதிகாரி உத்தரவிட்டுள்ளார்.

இதற்கிடையே ஜெயங்கொண்டத்தில் டாக்டர் பாலசுப்பிரமணியன் நடத்தி வரும் கிளினிக்கிற்கு, அரியலூர் மாவட்ட போலீஸ் சூப்பிரண்டு சீனிவாசன் உள்ளிட்ட அதிகாரிகள் சென்று, அவரிடம் விசாரணை நடத்தினர். அப்போது அவர், தன்னை ஒரு முதியவர் என்றும் பாராமல், அமரவும் சொல்லாமல் அலட்சியமாக வங்கி கிளை மேலாளர் செயல்பட்டார். அந்த பகுதியில் படிக்காத விவசாயிகள் உள்ளிட்ட பலர் அந்த வங்கியில் கணக்கு வைத்துள்ளனர். என்னை போன்று அவர்களை கிளை மேலாளர் அலட்சியப்படுத்தக்கூடாது என்பதே எனது நோக்கம். அவரை பணியிட மாற்றம் செய்ததில் எனக்கு உடன்பாடு கிடையாது, என்று தெரிவித்துள்ளார். வங்கி மேலாளர் மீது மேலும் சில வாடிக்கையாளர்களும் புகார் தெரிவித்து உள்ளனர்.