அரியலூர்

செந்துறை:

அரியலூர் மாவட்டம் செந்துறையில் தாலுகா அலுவலகம் அருகே பத்திரப்பதிவு அலுவலகம் செயல்பட்டு வருகிறது. இங்கு துணைப்பதிவாளராக ஸ்ரீராம் என்பவர் பணியாற்றி வருகிறார். இவர் கடந்த 2 மாதங்களுக்கு முன்பு தான் இங்கு பணி மாறுதலாகி வந்தார்.

கொரோனா பெருந்தொற்று காரணமாக கடந்த ஓராண்டாக குறைந்த அளவே பத்திரப்பதிவு நடைபெற்று வந்தது. இந்த அலுவலகத்தில் பத்திரப்பதிவு செய்வதற்கு சமீப காலமாக அதிக அளவில் லஞ்சம் பெறப்படுவதாக பொதுமக்களிடம் இருந்து லஞ்ச ஒழிப்பு போலீசாருக்கு பல்வேறு புகார் வந்தன.

அதன் அடிப்படையில் நேற்று மாலை திடீரென அரியலூர் மாவட்ட லஞ்ச ஒழிப்பு துறை துணை காவல் கண்காணிப்பாளர் சந்திரசேகர், இன்ஸ்பெக்டர் வானதி தலைமையில் லஞ்ச ஒழிப்பு போலீசார் அதிரடியாக நுழைந்து திடீர் சோதனை நடத்தினர்.

பத்திரப்பதிவு அலுவலகத்தின் ஜன்னல் மற்றும் கதவுகளை பூட்டினர். மேலும் மாலை நேரத்தில் பத்திரப் பதிவு செய்ய வந்த பொதுமக்கள் மற்றும் சார்பதிவாளர் ஸ்ரீராம் மற்றும் உதவியாளர் ஜோதி உள்ளிட்ட அதிகாரிகளிடம் துருவித்துருவி விசாரணை மேற்கொண்டனர்.

நேற்றைய தினம் காலை முதல் மாலை வரை நடைபெற்ற பத்திரப்பதிவு நடவடிக்கைகளின் முழு விபரம், அதற்காக பெறப்பட்ட கட்டணம் உள்ளிட்டவை குறித்து நீண்ட நேரமாக விசாரணை நடத்தப்பட்டது.

அத்துடன் பத்திரப்பதிவு அலுவலகத்தில் பணியாற்றும் ஊழியர்கள் அங்கேயே தங்க வைக்கப்பட்டு அவர்களிடமும் விசாரணை நடத்தப்பட்டது. அப்போது முக்கிய தகவல்களை லஞ்ச ஒழிப்பு போலீசார் குறிப்பெடுத்துக் கொண்டனர். பின்னர் சார் பதிவாளர் ஸ்ரீராமை லஞ்ச ஒழிப்புத்துறை போலீசார் தங்களது அலுவலகத்துக்கு அழைத்துச்சென்றும் விசாரணை நடத்தினர்.

மாலை தொடங்கி நள்ளிரவு வரை நீடித்த இந்த திடீர் அதிரடி சோதனையில் கணக்கில் வராத ரூ.38 ஆயிரம் லஞ்சப்பணம் சிக்கியது. அதனை தொடர்ந்து லஞ்ச ஒழிப்பு போலீசார் முக்கிய ஆவணங்களை கைப்பற்றி விசாரணை மேற்கொண்டு வருகின்றனர். பத்திரப்பதிவு அலுவலகத்தில் லஞ்ச ஒழிப்பு போலீசார் திடீர் சோதனை ஈடுபட்டது செந்துறை பகுதி அரசு ஊழியர்கள் இடையே பெரும் அச்சத்தை ஏற்படுத்தி உள்ளது.

அரியலூர்:

தமிழகத்தில் கடந்த சில மாதங்களாக கொடூர கொலை சம்பவங்கள் அதிகரித்த வண்ணம் உள்ளன. குறிப்பாக அவற்றில் பழிக்குப்பழியாக நடந்த கொலைகள் சற்று அதிகம் இருந்தன. மேலும் கொள்ளை சம்பவங்களும் அதிகரித்தன. இந்த கொலை, கொள்ளைகளில் ஈடுபட்டவர்களும், கொலையானவர்களும் பலர் ரவுடிகள் பட்டியலில் இருந்தனர்.

போலீசார் என்னதான் நடவடிக்கை எடுத்தாலும், கொலையானவர்களின் உறவினர்கள் வன்மம் வைத்து கொலையாளிகள் ஜாமினில் வெளிவரும் போது அவர்களை பழி தீர்த்துக் கொள்கிறார்கள். இந்த சம்பவம் தொடர்கதைபோல் முடிவில்லாமல் சென்று கொண்டிருக்கிறது. இதே போல் கொள்ளை சம்பவங்களும் தொடர்ந்து நடைபெற்றுக்கொண்டு இருக்கிறது.

தற்போது அதிகரித்து வரும் கொலை, கொள்ளை, வழிபறி போன்ற குற்றச்சம்பவங்களை தடுக்கும் வகையில், ரவுடிகள், கொலை, கொள்ளை, வழிபறி போன்றவற்றில் ஈடுபட்டு கைதாகி ஜாமீனில் உள்ள ரவுடிகள், தலைமறைவாக உள்ளவர்களை கைது செய்ய டி.ஜி.பி., போலீசாருக்கு உத்தரவு பிறப்பித்தார்.

இதனை தொடர்ந்து அரியலூர் மாவட்டம் முழுவதும் போலீசார் ரவுடிகளை தேடும் பணியில் ஈடுபட்டனர். அதற்கு பலனாக அரியலூர் மாவட்டத்தில் நேற்று ஒரே நாள் இரவில் 36 ரவுடிகள் கைது செய்யப்பட்டனர். மேலும் ரவுடிகளின் வீடுகளில் போலீசார் சோதனை நடத்தி, அவர்கள் மறைத்து வைத்திருந்த ஆயுதங்களை பறிமுதல் செய்து, குற்றங்களில் செயல்படாமல் இருக்க வேண்டும் என்று எச்சரித்து, அவர்களை போலீஸ் நிலையத்திற்கு அழைத்து சென்று விசாரணை மேற்கொண்டு வருகின்றனர்.

அரியலூர்:

அரியலூர் மாவட்டம் ஜெயங்கொண்டம் அருகே உள்ள வடவீக்கம் கிராமம் மாரியம்மன் கோவில் தெருவைச் சேர்ந்தவர் சரவணன் (வயது 34), கூலித்தொழிலாளி.

இவரது மனைவி மீனா (27). இந்த தம்பதியினருக்குக்கு திருமணம் ஆகி 9 வயது, 4 வயது, 3 வயது என மூன்று பெண் குழந்தைகள் உள்ளனர். இந்த நிலையில் நான்காவதாக கர்ப்பம் அடைந்த மீனா மீண்டும் ஒரு பெண் குழந்தையை பெற்றெடுத்தார். அந்த குழந்தைக்கு சுபஸ்ரீ என்று பெயரிட்டனர்.

ஆனாலும் 4 குழந்தைகளை வைத்துக்கொண்டு அவர்களை எப்படி வளர்த்து ஆளாக்க போகிறோம் என்று தம்பதியினர் தொடர்ந்து புலம்பி வந்துள்ளனர். இது தொடர்பாக உறவினர்களிடமும் ஆலோசித்து வந்தனர்.

இதற்கிடையே கடந்த 2 நாட்களாக பிறந்து 3 மாதங்களேயான குழந்தையை வீட்டில் காணவில்லை. இதுபற்றி அக்கம் பக்கத்தினர் கேட்டபோது, குழந்தை தூங்கிக்கொண்டு இருக்கிறது என்று மழுப்பலாக பதிலளித்து உள்ளனர். இது உறவினர்கள் மற்றும் பலருக்கும் சந்தேகத்தை ஏற்படுத்தியது.

அதுமட்டுமின்றி கடந்த சில நாட்களாக அடையாளம் தெரியாத புதிய நபர்கள் சரவணனின் வீட்டிற்கு அடிக்கடி வந்து சென்றுள்ளனர். அவர்கள் யாரென்று கேட்ட போது, தூரத்து உறவினர்கள், நண்பர்கள் என்று சரவணன் கூறியுள்ளார்.

இதற்கிடையே சரவணன்- மீனா தம்பதியர் பிறந்து மூன்று மாதமான பெண் குழந்தை சுபஸ்ரீயை யாரோ ஒருவருக்கு ரூ.1 லட்சத்து 80 ஆயிரம் ரூபாய்க்கு விற்று விட்டதாக தகவல் கசிந்தது. இதுபற்றிய ரகசிய தகவல் ஜெயங்கொண்டம் துணை போலீஸ் சூப்பிரண்டு கலை கதிரவனுக்கும் கிடைத்துள்ளது.

உடனடியாக அதிரடி விசாரணையில் இறங்கிய அவர், மாவட்ட குழந்தைகள் நல பாதுகாப்பு அலுவலர் துரைமுருகனுக்கு தெரிவித்தார். அதனடிப்படையில் துரைமுருகன் வடவீக்கம் கிராம நிர்வாக அலுவலர் செல்வராஜூடன், சரவணன் வீட்டுக்கு சென்றார். ஆனால் அங்கு வீடு பூட்டப்பட்டு இருந்தது. சரவணனும், அவரது மனைவி மீனாவும் மாயமாகி இருந்தனர். அக்கம்பக்கத்தில் விசாரித்தபோது குழந்தை விற்பனை செய்யப்பட்டது உறுதியானது.

இதையடுத்து குழந்தை விற்பனைக்கு உடந்தையாக இருந்த ஈரோட்டை சேர்ந்த ராஜேந்திரன், செந்தில்குமார், மண்ணச்சநல்லூரை சேர்ந்த முத்தையன் மற்றும் குழந்தையின் பெற்றோர் சரவணன், மீனா ஆகியோரை ஜெயங்கொண்டம் போலீசார் இன்று கைது செய்தனர்.

அரியலூர்:

அரியலூர் மாவட்டம் திருமானூரை சேர்ந்தவர் ஸ்ரீதர் (வயது 53). இவர் அரிமா சங்க மாவட்ட தலைவராக இருந்து வருகிறார். அரியலூர் அருகே கீழப்பழுவூரில் உள்ள தனியார் கல்லூரி தாளாளர் பாஸ்கர்.

இவர் பெட்ரோல் விற்பனை நிலையம் ஆரம்பித்த போது, ஸ்ரீதரிடம் ரூ.5 லட்சம் கடனாகப் பெற்றிருந்தார். இதற்கு ஈடாக 5 லட்சத்திற்கு வழங்கிய காசோலையை வங்கியில் செலுத்திய போது பாஸ்கர் வங்கி கணக்கில் பணம் இல்லாமல் திரும்ப வந்து விட்டது. வழக்கறிஞர் மூலம் அனுப்பிய நோட்டீசுக்கு பதில் வராததால் அரியலூரில் உள்ள குற்றவியல் நீதித்துறை நடுவர் நீதிமன்றத்தில் 2017 ஆம் ஆண்டு ஸ்ரீதர் வழக்கு தொடர்ந்தார்.

இந்த வழக்கில் நான்கு ஆண்டுகளுக்குப் பிறகு தீர்ப்பு வழங்கப்பட்டது. செக் மோசடி வழக்கில் அரியலூர் தனியார் கல்லூரி தாளாளர் பாஸ்கருக்கு 6 மாதம் சிறை தண்டனையும் ரூ.5 லட்சம் அபராதமும் கட்டத் தவறினால் மேலும் ஒரு மாதம் சிறை தண்டனை விதித்து குற்றவியல் நீதித்துறை நடுவர் நீதிமன்ற நீதிபதி (எண் 2) செந்தில்குமார் தீர்ப்பு வழங்கியுள்ளார்.

அரியலூர்:

கொரோனா பரவல் குறைந்ததை தொடா்ந்து, அரசின் உத்தரவின்படி 9 முதல் பிளஸ்-2 வரையிலான மாணவர்களுக்கு பள்ளிகள் திறக்கப்பட்டு, வகுப்புகள் நடந்து வருகின்றன.

இந்நிலையில் அரியலூர் மாவட்டத்தில் பள்ளி மாணவிகள் கொரோனா தொற்றால் பாதிக்கப்பட்டு, மருத்துவமனையில் சிகிச்சைக்காக அனுமதிக்கப்பட்டும், வீடுகளில் தனிமைப்படுத்தப்பட்டும் உள்ளனர். இந்நிலையில் அரியலூரில் உள்ள ஒரு பள்ளியில் பிளஸ்-2 படித்து வரும் மாணவர் ஒருவருக்கு, கடந்த 2 நாட்களுக்கு முன்பு உடல் சோர்வும், அதிக காய்ச்சலும் இருந்தது. இதைத்தொடர்ந்து நேற்று முன்தினம் அந்த மாணவருக்கும், பள்ளியில் அவருடன் படிக்கும் 67 மாணவ, மாணவிகளுக்கும், ஆசிரிய, ஆசிரியைகளுக்கும் கொரோனா பரிசோதனை செய்யப்பட்டது. இதில் அந்த மாணவருக்கு தொற்று உறுதியானது. பரிசோதனை முடிவில் மற்றவர்களுக்கு தொற்று இல்லை என்பது தெரியவந்தது.

இதையடுத்து கொரோனாவால் பாதிக்கப்பட்ட மாணவர், தனிமைப்படுத்திக்கொள்ளும்படி அறிவுறுத்தப்பட்டு வீட்டிற்கு அனுப்பி வைக்கப்பட்டார். அந்த மாணவர் படித்த வகுப்புகள் உள்பட அனைத்து வகுப்புகளும் தொடர்ந்து நடந்தன. மேலும் அனைத்து வகுப்புகளிலும் கிருமிநாசினி தெளிக்கப்பட்டு, பள்ளி வளாகம் சுத்தம் செய்யப்பட்டது.

கடந்த 1-ந் தேதி பள்ளிகள் திறக்கப்பட்ட பிறகு அரியலூர் நகரில் ஒரு பள்ளியில் ஒன்பதாம் வகுப்பு மாணவிக்கும், பிளஸ்-2 மாணவிக்கும், வரதராஜன்பேட்டையில் ஒரு பள்ளியில் 9-ம் வகுப்பு படிக்கும் மாணவிக்கும், தொற்று உறுதியானது. இதைத்தொடர்ந்து தற்போது மேலும் ஒரு மாணவருக்கு தொற்று உறுதியாகியுள்ளது. இதனால் மாவட்டத்தில் இதுவரை 4 மாணவ, மாணவிகள் பாதிக்கப்பட்டுள்ளனர் என்பது குறிப்பிடத்தக்கது.