இது புதுசு

சென்னையில் உள்ள ஆலையை விற்பனை செய்யும் முடிவை மாற்றிக் கொண்டது, புதிய வேலைவாய்ப்பு பற்றிய அறிவிப்புகளை வெளியிட்டது மற்றும் என்டேவர் பெயருக்கு காப்புரிமை கோரி விண்ணப்பித்து இருப்பது உள்ளிட்டவை ஃபோர்டு நிறுவனம் மீண்டும் இந்திய சந்தையில் கால் பதிக்கலாம் என்பதை உணர்த்தும் வகையில் தான் உள்ளது.

முன்னதாக இந்திய சந்தையில் இருந்து வெளியேறுவதாக ஃபோர்டு நிறுவனம் அறிவித்து இருந்தது. எனினும், ஃபோர்டு மீண்டும் இந்தியாவில் தனது வாகனங்களை விற்பனை செய்யலாம் என்று தகவல்கள் வெளியாகின. அந்த வரிசையில், ஃபோர்டு நிறுவனம் தற்போது தாய்லாந்து போன்ற சர்வதேச சந்தைகளில் ஃபோர்டு எவரஸ்ட் என்ற பெயரில் விற்பனை செய்து வரும் கார் டிசைனுக்கு காப்புரிமை கோரியுள்ளது.

2022-ம் ஆண்டு முதல் சர்வதேச சந்தையில் விற்பனை செய்யப்பட்டு வருவதால் இந்த எஸ்.யு.வி. மாடல் இந்திய சந்தையில் புதிதான ஒன்றாகவே இருக்கும். இது குறித்து வெளியாகி இருக்கும் தகவல்களில் ஃபோர்டு நிறுவனம் புதிய என்டேவர் மாடலை சென்னையில் உள்ள ஆலையில் அசெம்பில் செய்ய திட்டமிட்டு வருவதாக கூறப்படுகிறது.

தற்போது ஆண்டிற்கு 2500 யூனிட்கள் வரை இந்தியாவுக்கு வாகனங்களை இறக்குமதி செய்ய அரசு அனுமதி வழங்கி வருகிறது. இதன் காரணமாக ஃபோர்டு நிறுவனம் விரைவில் தனது என்டேவர் மாடலை இந்தியாவில் இறக்குமதி செய்யலாம் என்று கூறப்படுகிறது. என்டேவர் மாடலுக்கு இந்தியாவில் நேரடி போட்டியை ஏற்படுத்தும் மாடலாக டொயோட்டா ஃபார்ச்சூனர் உள்ளது.

இந்தியாவில் டொயோட்டா ஃபார்ச்சூனர் மாடலின் டாப் எண்ட் விலை ரூ. 60 லட்சம் ஆக அதிகரித்துள்ளது. இதன் காரணமாக நேரடியாக இறக்குமதி செய்யப்படும் என்டேவர் மாடல் ஃபார்ச்சூனருக்கு போட்டியை ஏற்படுத்தும் வகையிலேயே இருக்கும். முன்னதாக ஃபோர்டு நிறுவனமும் நேரடியாக இறக்குமதி செய்து வாகனங்கள் விற்பனை செய்ய திட்டமிருப்பதாகவும் தெரிவித்து இருந்தது குறிப்பிடத்தக்கது.

பஜாஜ் நிறுவனம் தனது செட்டாக் எலெக்ட்ரிக் ஸ்கூட்டரை அப்டேட் செய்துள்ளது. இந்த மாடல் பஜாஜ் செட்டாக் பிரீமியம் என்ற பெயரில் அறிமுகம் செய்யப்பட இருக்கிறது. புதிய பஜாஜ் செட்டாக் பிரீமியம் ஜனவரி 5-ம் தேதி அறிமுகம் செய்யப்படுகிறது. இதில் அதிநவீன அம்சங்கள், புதிய டி.எஃப்.டி. டிஸ்ப்ளே வழங்கப்படுகிறது.

தற்போது செட்டாக் மாடல் அர்பேன் மற்றும் பிரீமியம் என இரண்டு வேரியண்ட்களில் விற்பனை செய்யப்படுகிறது. இவை இரண்டும் கிட்டத்தட்ட ஒரே மாதிரியான அம்சங்களை கொண்டிருக்கிறது. இதில் பிரீமியம் வேரியண்ட் அப்டேட் செய்யப்படும் நிலையில், இரண்டு வேரியண்ட்களையும் வித்தியாசப்படுத்தும் வகையில் இது இருக்கும்.

புதிய செட்டாக் பிரீமியம் வேரியண்ட் அறிமுகம் பற்றிய தகவலை பஜாஜ் நிறுவனம் தனது சமூக வலைதள அக்கவுண்ட்களில் வெளியிட்டு உள்ளது. இத்துடன் ஸ்கூட்டரின் பாகங்கள் பற்றிய டீசர்களும் வெளியிடப்பட்டன. டிஸ்ப்ளேவின் படி இந்த மாடலில் ப்ளூடூத் கனெக்டிவிட்டி, டர்ன்-பை-டர்ன் நேவிகேஷன் வழங்கப்படும் என தெரியவந்துள்ளது. இத்துடன் ரைடிங் மோட்களும் வழங்கப்படுகிறது.

டீசர்களின் படி புதிய வேரியண்ட் தற்போது விற்பனை செய்யப்படும் மாடல்களை போன்றே காட்சியளிக்கின்றன. இதில் ஒற்றை பக்க முன்புற சஸ்பென்ஷன், ஸ்மார்ட் அலாய் வீல்கள் மற்றும் மெல்லிய வட்ட வடிவம் கொண்ட டிசைன் வழங்கப்படுகிறது. சீட், லைட்கள், ஃபுளோர்போர்டு மற்றும் ஸ்டோரேஜ் உள்ளிட்டவைகளில் எந்த மாற்றமும் மேற்கொள்ளப்படவில்லை. 

டாடா மோட்டார்ஸ் நிறுவனம் தனது ஹேரியர் EV எலெக்ட்ரிக் காரின் ப்ரோடக்ஷன் வெர்ஷனை டெல்லியில் நடைபெற்ற ஆட்டோ எக்ஸ்போ நிகழ்வில் காட்சிக்கு வைத்தது. கிட்டத்தட்ட உற்பத்திக்கு தயாரான நிலையில் டாடா ஹேரியர் EV மாடல் உண்மையில் எப்படி காட்சியளிக்கும் என்பதை வெளிப்படுத்தும் வகையில் இது அமைந்தது.

அடுத்த ஆண்டு அறிமுகமாகும் என்று எதிர்பார்க்கப்படும் நிலையில், டாடா ஹேரியர் EV மாடல் முழு சார்ஜ் செய்தால் 500 கிலோமீட்டர்கள் வரையிலான ரேன்ஜ் வழங்கும் என்று கூறப்படுகிறது. தற்போது டாடா மோட்டார்ஸ் நிறுவனம் விற்பனை செய்து வரும் நெக்சான் EV மாடல் முழு சார்ஜ் செய்தால் 465 கிலோமீட்டர்கள் வரையிலான ரேன்ஜ் வழங்கி வருகிறது.

அந்த வகையில், புதிய ஹேரியர் EV மாடல் ஏற்கனவே விற்பனை செய்யப்படும் நெக்சான் EV மாடலை விட அதிக ரேன்ஜ் வழங்கும் என்று கூறப்படுகிறது. டாடாவின் புதிய எலெக்ட்ரிக் காரின் இன்ஸ்ட்ரூமென்ட் கன்சோலில் டெம்பரேச்சர் காஜ், டைம், மொபைல் கனெக்டிவிட்டி, மியூசிக், நோட்டிஃபிகேஷன், ஹோம் மற்றும் சர்ச் போன்ற ஐகான்கள் இடம்பெற்றுள்ளன.

ஹேரியர் EV மாடலில் முக்கோன வடிவம் கொண்ட ஹெட்லேம்ப், கிரில் பகுதியில் பிளான்க்டு-ஆஃப் டிசைன், புதிய அலாய் வீல்கள், புதிய எல்.இ.டி. டெயில் லைட்கள், முன்புறம் - பின்புறத்தில் எல்.இ.டி. பார்கள் வழங்கப்படுகின்றன.

இன்டீரியரில் 10.25 இன்ச் இன்ஃபோடெயின்மென்ட் ஸ்கிரீன், முழுமையான டிஜிட்டல் கலர் இன்ஸ்ட்ரூமென்ட் கிளஸ்டர், எலெக்ட்ரிக் பார்கிங் பிரேக், ஆட்டோ ஹோல்டு அம்சம், வென்டிலேட் செய்யப்பட்ட முன்புற இருக்கைகள், பானரோமிக் சன்ரூஃப், டிரைவ் மோட்கள், புதிய கியர் டயல் வழங்கப்படும் என தெரிகிறது. 

கியா நிறுவனம் தனது முற்றிலும் புதிய கார்னிவல் மாடலை அடுத்த ஆண்டு அறிமுகம் செய்ய இருக்கிறது. இந்த நிலையில், புதிய கார்னிவல் மாடலுக்கான டெஸ்டிங்கை கியா இந்தியா துவங்கியுள்ளது. முன்னதாக இந்த மாடல் 2023 ஆட்டோ எக்ஸ்போ நிகழ்வில் KA4 கான்செப்ட் வடிவில் காட்சிக்கு வைக்கப்பட்டது.

தற்போது இந்த மாடலின் டெஸ்டிங் துவங்கியுள்ள நிலையில், கார்னிவல் ஃபேஸ்லிஃப்ட் மாடல் இந்திய சந்தையில் அறிமுகமாகும் என்று தெரியவந்துள்ளது. ஸ்பை படங்களின் படி இந்த கார் முழுமையாக மறைக்கப்பட்ட நிலையில் காட்சியளிக்கிறது.

இதில் அளவில் பெரிய எல்.இ.டி. டி.ஆர்.எல்.கள், "டைகர் நோஸ்" கிரில், ரி-ப்ரோஃபைல் செய்யப்பட்ட பம்ப்பர் உள்ளிட்டவை வழங்கப்பட்டு இருக்கிறது. இதன் பின்புறம் எல் வடிவம் கொண்ட எல்.இ.டி. டெயில்லைட்கள் வழங்கப்படுகிறது. இத்துடன் இந்த மாடலில் புதிய அலாய் வீல்கள் வழங்கப்படும் என்று தெரியவந்துள்ளது.

புதிய தலைமுறை கியா கார்னிவல் மாடல் பிரீமியம் கேபின் கொண்டிருக்கும் என்று தெரிகிறது. உள்புறம் இரண்டு 12.3 இன்ச் ஸ்கிரீன்கள் வழங்கப்படுகிறது. இத்துடன் ரிவைஸ்டு ஏ.சி. வென்ட்கள், இன்ஃபோடெயின்மென்ட் ஸ்கிரீனின் கீழ்புறம் ஆடியோ கண்ட்ரோல்கள் வழங்கப்படுகிறது.

சர்வதேச சந்தையில் 2024 கியா கார்னிவல் மாடல் 7, 9 மற்றும் 11 பேர் பயணம் செய்யக்கூடிய வகையில் இருக்கை அமைப்புகளில் கிடைக்கிறது. இவற்றில் 7 மற்றும் 9 பேர் பயணம் செய்யக்கூடிய மாடல்கள் இந்திய சந்தையில் அறிமுகம் செய்யப்படும் என்று தெரிகிறது. இத்துடன் சுழலும் வகையிலான டிரைவ் செலக்டர், ஹெட்-அப் டிஸ்ப்ளே, டிஜிட்டல் ரியர்வியூ மிரர் உள்ளிட்டவை வழங்கப்படுகிறது.

கியா இந்தியா நிறுவனம் அடுத்த ஆண்டு இறுதிக்குள் இந்திய சந்தையில் மூன்று புதிய கார் மாடல்களை அறிமுகம் செய்ய இருப்பதாக தகவல் வெளியாகி உள்ளது. இதுதவிர கியா நிறுவனம் கடந்த வாரம் அறிமுகம் செய்த சொனெட் ஃபேஸ்லிஃப்ட் மாடலின் விலை விவரங்களை அறிவிக்க இருக்கிறது.

சர்வதேச வெளியீட்டை தொடர்ந்து சொனெட் ஃபேஸ்லிஃப்ட் மாடலுக்கான முன்பதிவை கியா இந்தியா துவங்கியது. 2024 கியா சொனெட் மாடலின் என்ஜின் ஆப்ஷன்கள் எவ்வித மாற்றமும் இன்றி வழங்கப்படுகிறது. இந்த மாடலில் லெவல் 1 ADAS, 10.25 இன்ச் டிஜிட்டல் இன்ஸ்ட்ரூமென்ட் கிளஸ்டர், வெளிப்புறம் மற்றும் உள்புறங்களில் சிறு மாற்றம் செய்யப்பட்டுள்ளது.

கியா சொனெட்-ஐ தொடர்ந்து EV9 ஃபிளாக்ஷிப் எலெக்ட்ரிக் வாகனத்தை கியா இந்தியா அறிமுகம் செய்யும் என்று கூறப்படுகிறது. இந்த மாடல் அடுத்த ஆண்டு ஏப்ரல், மே மாத காலத்தில் அறிமுகம் செய்யப்படலாம். முன்னதாக இந்த ஆண்டு நடைபெற்ற 2023 ஆட்டோ எக்ஸ்போ விழாவில் இந்த மாடல் காட்சிக்கு வைக்கப்பட்டது.

இரண்டு மாடல்களின் வரிசையில் முற்றிலும் புதிய கியா கார்னிவல் மாடல் அடுத்த ஆண்டின் இரண்டாவது அரையாண்டு காலக்கட்டத்தில் அறிமுகம் செய்யப்படும் என்று கூறப்படுகிறது. இந்த கார் அதன் முந்தைய வெர்ஷனை விட அதிகளவு ரக்கட், ஸ்போர்ட் தோற்றத்தை கொண்டிருக்கும் வகையில் மாற்றங்களை கொண்டிருக்கிறது.

இவற்றுடன் கியா இந்தியா நிறுவனம் தனது கியா கிளாவிஸ் மாடலை அறிமுகம் செய்ய இருப்பதாக கூறப்படுகிறது. இந்த கார் சொனெட் மற்றும் செல்டோஸ் மாடல்களின் இடையில் நிலை நிறுத்தப்பட இருக்கிறது. இது ஐ.சி. என்ஜின் மற்றும் முழுமையான எலெக்ட்ரிக் பவர்-டிரெயின் என இருவித ஆப்ஷன்களில் கிடைக்கும் என்று கூறப்படுகிறது. 

மெர்சிடிஸ் பென்ஸ் நிறுவனம் தனது GLS ஃபேஸ்லிஃப்ட் மாடல் அடுத்த ஆண்டு துவக்கத்தில் அறிமுகம் செய்யப்படும் என்று அறிவித்து இருக்கிறது. ஃபேஸ்லிஃப்ட் மாடலில் காஸ்மெடிக் அப்கிரேடு மற்றும் புதிய அம்சங்கள் வழங்கப்படும் என்று தெரிகிறது.

புதிய GLS ஃபேஸ்லிஃப்ட் மாடலின் கிரில் மாற்றப்படுகிறது. இத்துடன் ஹெட்லேம்ப்களில், புதிய எல்.இ.டி. பேட்டன் வழங்கப்படுகிறது. இதன் பம்ப்பர் ரி-ப்ரோஃபைல் செய்யப்பட்டு புதிய டிசைன் வழங்கப்படுகிறது. இத்துடன் 20-இன்ச் அளவில் புதிய அலாய் வீல்கள் ஹிமாலயாஸ் கிரே நிறத்தில் வழங்கப்படுகிறது. GLS மாடல் ஏழு பேர் பயணிக்கும் எஸ்.யு.வி. ஆகும்.

இந்த கார் கேட்டலானா பிரவுன் மற்றும் பஹியா பிரவுன் இன்டீரியர் ஆப்ஷன் கொண்டிருக்கிறது. இதன் இன்ஃபோடெயின்மென்ட் யூனிட் அப்டேட் செய்யப்பட்டு அதிநவீன MBUX வழங்கப்படுகிறது. இத்துடன் GLS ஃபேஸ்லிஃப்ட் மாடலில் அறிமுகமாகி இருக்கும் புதிய ஆஃப் ரோடு மோட் 360 டிகிரி கேமரா மூலம் திரையில் அசத்தலான அனுபவத்தை வழங்கும்.

தற்போது விற்பனை செய்யப்படும் மெர்சிடிஸ் GLS மாடலில் 3.0 லிட்டர் டீசல் என்ஜின் வழங்கப்பட்டு இருக்கிறது. இத்துடன் 9-ஸ்பீடு ஆட்டோமேடிக் கியர்பாக்ஸ் வழங்கப்படுகிறது. மேம்பட்ட GLS ஃபேஸ்லிஃப்ட் மாடலிலும் இதே போன்ற என்ஜின் வழங்கப்படும் என்றும் கூடுதலாக பெட்ரோல் என்ஜின் ஆப்ஷனும் வழங்கப்படும் என்று எதிர்பார்க்கலாம். 

ஜாகுவார் லேண்ட் ரோவர் நிறுவனம் முற்றிலும் புதிய ரேன்ஜ் ரோவர் SV மாடலை இந்திய சந்தையில் அறிமுகம் செய்தது. புதிய ரேன்ஜ் ரோவர் SV மாடலின் விலை ரூ. 2 கோடியே 80 லட்சம், எக்ஸ்-ஷோரூம் என்று நிர்ணயம் செய்யப்பட்டு உள்ளது. இந்த எஸ்.யு.வி.-யின் மிகவும் சக்திவாய்ந்த மாடலாக இதில் 4.4 லிட்டர் டுவின் டர்போ பெட்ரோல் என்ஜின் வழங்கப்பட்டு இருக்கிறது.

இதில் உள்ள 4.4 லிட்டர் வி8 என்ஜின் 626 ஹெச்.பி. பவர், 750 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது. இத்துடன் 8 ஸ்பீடு ஆட்டோமேடிக் டிரான்ஸ்மிஷன் வழங்கப்பட்டு இருக்கிறது. இந்த கார் மணிக்கு 100 கிலோமீட்டர்கள் வேகத்தை 3.6 நொடிகளில் எட்டிவிடும். மேலும் மணிக்கு அதிகபட்சம் 290 கிலோமீட்டர்கள் வேகத்தில் செல்லும்.

சக்திவாய்ந்த என்ஜின் மட்டுமின்றி, இந்த எஸ்.யு.வி. மாடலின் லோயர் பாடி ரி-ப்ரோஃபைல் செய்யப்பட்டு இருக்கிறது. இத்துடன் கார்பன் ஃபைபர் டிப் கொண்ட குவாட் டெயில்பைப்கள் வழங்கப்பட்டு உள்ளன. இதன் கேபின் பகுதியில் SV சார்ந்த பெர்ஃபார்மன்ஸ் ஸ்போர்ட் சீட்கள், கார்பன் ஃபைபர் பேக் உள்ளது.

இதில் உள்ள பேக்ரெஸ்ட் மற்றும் கியர் லீவர்களில் இலுமினேட் செய்யப்பட்ட SV லோகோ வழங்கப்பட்டு இருக்கிறது. இந்திய சந்தையில் ரேன்ஜ் ரோவர் SV மாடல் லம்போர்கினி உருஸ், ஆடி RSQ8 மற்றும் ஆஸ்டன் மார்டின் DBX போன்ற மாடல்களுக்கு போட்டியாக அமைகிறது. 

லேண்ட் ரோவர் ஆஸ்திரேலியா லிமிடெட் எடிஷன் டிஃபெண்டர் 90 மாடலை அறிமுகம் செய்து இருக்கிறது. இந்த லிமிடெட் எடிஷன் மாடல் மொத்தத்திலேயே 15 யூனிட்கள் தான் உருவாக்கப்படுகின்றன.

டிஃபென்டர் 90 மாடலை தழுவி உருவாக்கப்பட்டு இருக்கும் புதிய லிமிடெட் எடிஷன் மாடலில் 3.0 லிட்டர் இன்லைன் 6 சிலிண்டர் டுவின் டர்போ டீசல் என்ஜின் வழங்கப்பட்டுள்ளது. இந்த என்ஜின் 245 ஹெச்.பி. பவர், 570 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது.

லிமிடெட் எடிஷன் மாடலின் வெளிப்புறம் பசிபிக் புளூ மேட் பெயின்ட் ஃபினிஷ் மற்றும் காண்டிராஸ்ட் நிற வைட் ஃபினிஷ் கொண்டிருக்கிறது. இத்துடன் கிரில் ஹைலைட்கள், டோர் ஹேண்டில் அக்செண்ட்கள், 18 இன்ச் ஸ்டீல் வீல்கள் வழங்கப்படுகின்றன. இந்த மாடலில் ஸ்லைடிங் பானரோமிக் சன்ரூஃப் பிரைவசி கிளாஸ், எலெக்ட்ரிக் ஏர் சஸ்பென்ஷன் மற்றும் டிரைவ் மோட்கள் உள்ளன.

புதிய லிமிடெட் எடிஷனின் 15 யூனிட்களுடன் டிஃபென்டர் சர்ஃப் போர்டு, பக்கவாட்டில் கியர் கேரியர், சைடு ஸ்டெப்கள், அக்வா ஸ்போர்ட்ஸ் கேரியர், போர்டபில் ரின்ஸ் சிஸ்டம், பிளாக் ரூஃப் ரெயில்கள், டோ ஹிட்ச் ரிசீவர் மற்றும் லாக்கிங் வீல் நட்கள் வழங்கப்பட்டுள்ளன. உள்புறம் ஸ்டீரிங் வீல், டோர் பேனல்களில் வைட் எலிமன்ட்கள் உள்ளன.

இத்துடன் பவுடர் கோட் செய்யப்பட்ட டேஷ்போர்டு, 12 வழிகளில் அட்ஜஸ்ட் செய்யக்கூடிய மற்றும் ஹீடெட் முன்புற இருக்கைகள், எபோனி லெதர், மேம்பட்ட மெரிடியன் சவுண்ட் சிஸ்டம் வழங்கப்பட்டு இருக்கிறது. மேலும் லிமிடெட் எடிஷன் யூனிட்களை அடையாளப்படுத்தும் வகையில் 1 முதல் 15 வரையிலான பேட்ஜிங் வழங்கப்படுகிறது. 

2024 கியா சொனெட் மாடல் இந்திய சந்தையில் அறிமுகம் செய்யப்பட்டது. 2020-ம் ஆண்டு அறிமுகம் செய்யப்பட்ட நிலையில், கியா சொனெட் மாடல் முதல் முறையாக மிகப் பெரிய அப்டேட் பெற்று இருக்கிறது. புதிய சொனெட் மாடலுக்கான முன்பதிவுகள் டிசம்பர் 20-ம் தேதி துவங்கும் என்று அறிவிக்கப்பட்டு இருக்கிறது.

ஃபேஸ்லிஃப்ட் செய்யப்பட்ட கியா சொனெட் மாடல் HTE, HTK, HTK+, HTX, HTX+, GTX+, மற்றும் X-Line என ஏழு வேரியண்ட்கள், 11 வெளிப்புற நிறங்களில் கிடைக்கிறது. இதன் மோனோடோன் வெர்ஷன் கிளேசியர் வைட் பியல், ஸ்பார்க்லிங் சில்வர், கிராவிட்டி கிரே, அரோரா பிளாக் பியல், இன்டென்ஸ் ரெட், இம்பீரியல் புளூ, க்ளியர் வைட், பீவ்டெர் ஆலிவ் மற்றும் மேட் கிராஃபைட் போன்ற நிறங்களில் கிடைக்கிறது.

டூயல் டோன் ஆப்ஷன்களில் இன்டென்ஸ் ரெட் மற்றும் கிளேசியர் வைட் நிறங்கள் பிளாக் ரூஃப் உடன் வழங்கப்படுகிறது. 2024 கியா சொனெட் மாடலின் முன்புறம் மாற்றப்பட்டு இன்வெர்ட் செய்யப்பட்ட "L" வடிவ எல்.இ.டி. டி.ஆர்.எல்.கள் வழங்கப்படுகின்றன. இத்துடன் முற்றிலும் புதிய டிசைன் கொண்ட எல்.இ.டி. ஹெட்லேம்ப்கள், புதிய எல்.இ.டி. ஃபாக் லேம்ப்கள், பின்புறத்தில் லைட் பார் டெயில்கேட் முழுக்க நீளும் வகையில் வழங்கப்பட்டு இருக்கிறது.

கேபின் பகுதியில் புதிய டிஜிட்டல் இன்ஸ்ட்ரூமென்ட் கிளஸ்டர், 10.25 இன்ச் அளவில் டச் ஸ்கிரீன் இன்ஃபோடெயின்மென்ட் ஸ்கிரீன், லெவல் 1 ADAS சூட், புதிய ஏ.சி. பேனல், ஜன்னல்களில் வாய்ஸ் கண்ட்ரோல் வசதி, முன்புற இருக்கைகளில் வென்டிலேஷன் வசதி வழங்கப்படுகிறது.

புதிய 2024 கியா சொனெட் மாடலின் மெக்கானிக்கல் அம்சங்களில் மாற்றம் செய்யப்படாமல், அதே என்ஜின் வழங்கப்பட்டு இருக்கிறது. அந்த வகையில், இந்த மாடலிலும் 1.2 லிட்டர் NA பெட்ரோல் என்ஜின், 1.5 லிட்டர் டீசல் என்ஜின் மற்றும் 1.0 லிட்டர் டர்போ பெட்ரோல் என்ஜின் வழங்கப்பட்டு இருக்கிறது. இவற்றில் 1.2 லிட்டர் பெட்ரோல் என்ஜின் 82 ஹெச்.பி. பவர், 115 நியூட்டன் மீட்டர் டார்க் இழுவிசையை வெளிப்படுத்துகிறது.

1.5 லிட்டர் டீசல் யூனிட் 114 ஹெச்.பி. பவர், 250 நியூட்டன் மீட்டர் டார்க் இழுவிசையை வெளிப்படுத்துகிறது. டர்போ பெட்ரோல் என்ஜின் 118 ஹெச்.பி. பவர், 172 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது. டிரான்ஸ்மிஷனை பொருத்தவரை 5 ஸ்பீடு மேனுவல், 6 ஸ்பீடு மேனுவல், 6 ஸ்பீடு iMT, 6 ஸ்பீடு ஆட்டோமேடிக் மற்றும் 7 ஸ்பீடு DCT கியர்பாக்ஸ் போன்ற ஆப்ஷன்கள் வழங்கப்படுகிறது.

கவாசகி நிறுவனம் தனது எலிமினேட்டர் 450 மாடலை அடுத்த ஆண்டு துவக்கத்தில் அறிமுகம் செய்யலாம் என்று தகவல் வெளியாகி உள்ளது. முன்னதாக வெளியான தகவல்களில், கவாசகி எலிமினேட்டர் 450 மாடல் இந்தியா பைக் வார நிகழ்வில் அறிமுகம் செய்யப்படும் என கூறப்பட்டது. எனினும், இதற்கு மாற்றாக அந்நிறுவனம் W175 ஸ்டிரீட் மாடலை அறிமுகம் செய்தது.

இந்த நிலையில், தான், கவாசகி நிறுவனத்தின் எலிமினேட்டர் 450 க்ரூசர் மாடல் மோட்டார்சைக்கிள் அடுத்த ஆண்டு பிப்ரவரி முதல் மார்ச் மாதத்திற்குள் அறிமுகம் செய்யப்படும் என்று கூறப்படுகிறது. இந்திய வாடிக்கையாளர்களில் பலர் எலிமினேட்டர் 450 குறித்த தகவல்களை கவாசகியிடம் தொடர்ந்து கேட்டு வருவதாக தெரிகிறது.

தற்போது கவாசகி நிறுவனம் க்ரூயிசர் பிரிவில் வல்கன் எஸ் 650சிசி மாடலை விற்பனை செய்து வருகிறது. இதன் எடை 235 கிலோ ஆகும். இதன் காரணமாக இந்திய சந்தையில் 176 கிலோ எடை கொண்ட எலிமினேட்டர் மாடல் வல்கன் எஸ் மோட்டார்சைக்கிளை விட குறைந்த விலையில் கிடைக்கும் ஆப்ஷனாக அமையும்.

புதிய எலிமினேட்டர் 450 மாடலில் 451சிசி, பேரலல் டுவின் என்ஜின் வழங்கப்பட்டு இருக்கிறது. இந்த என்ஜின் 49 ஹெச்.பி. பவர் வெளிப்படுத்தும் திறன் கொண்டிருக்கிறது. இத்துடன் 6 ஸ்பீடு கியர்பாக்ஸ் வழங்கப்படுகிறது. இந்த மாடலில் டிரெலிஸ் ஃபிரேம் உள்ளது. மேலும் டெலிஸ்கோபிக் ஃபோர்க்குகள், டூயல் ஸ்ப்ரிங்குகள், இருபுறமும் டிஸ்க் பிரேக்குகள் வழங்கப்படுகின்றன.

இந்திய சந்தையில் கவாசகி எலிமினேட்டர் 450 மாடல் ராயல் என்பீல்டு சூப்பர் மீடியோர் 650-க்கு போட்டியாக அமையும். புதிய எலிமினேட்டர் 450 மாடல் இந்தியாவுக்கு முழுமையாக உருவாக்கப்பட்ட நிலையில், இறக்குமதி செய்யப்படுமா அல்லது பாகங்கள் கொண்டுவரப்பட்டு இந்தியாவில் அசெம்பில் செய்யப்படுமா என்பது கேள்விக்குறியாகவே உள்ளது. 

இந்திய இருசக்கர வாகனங்கள் சந்தையில் அதிக பிரபல மாடல்களான லூனா மற்றும் கைனெடிக் ஹோண்டா ஸ்கூட்டர்களை விற்பனை செய்து வந்த கைனெடிக் கிரீன் இந்தியாவில் முற்றிலும் புதிய எலெக்ட்ரிக் ஸ்கூட்டரை அறிமுகம் செய்து இருக்கிறது. கைனெடிக் ஜூலு (Zulu) என அழைக்கப்படும் புதிய எலெக்ட்ரிக் ஸ்கூட்டர் அந்நிறுவனத்தின் நான்காவது மாடல் ஆகும்.

ஹப் மோட்டார் மூலம் இயங்கும் கைனெடிக் ஜூலு 2.1 கிலோவாட் பவர் வெளிப்படுத்தும் திறன் கொண்டிருக்கிறது. இந்த ஸ்கூட்டர் மணிக்கு அதிகபட்சம் 60 கிலோமீட்டர்கள் வரையிலான வேகத்தில் செல்லும். இந்த மாடலில் 2.27 கிலோவாட் ஹவர் பேட்டரி வழங்கப்பட்டு இருக்கிறது. இந்த பேட்டரி முழு சார்ஜ் செய்தால் அதிகபட்சம் 104 கிலோமீட்டர்கள் வரையிலான ரேன்ஜ் வழங்கும் என சான்று பெற்றுள்ளது.

எனினும், போக்குவரத்து மிக்க சாலைகளில் இந்த ஸ்கூட்டர் அதிகபட்சம் 75 கிலோமீட்டர்கள் வரையிலான ரேன்ஜ் வழங்கும் என்று எதிர்பார்க்கலாம். அந்த வகையில், இந்த மாடல் அன்றாட பயன்பாட்டுக்கு ஏற்ற வாகனமாக இருக்கும்.

கைனெடிக் ஜூலு மாடலில் டெலிஸ்கோபிக் ஃபோர்க், டுவின் ஷாக் அப்சார்பர்கள், இருபுறமும் டிஸ்க் பிரேக்குகள், 10 இன்ச் வீல்கள் வழங்கப்பட்டு உள்ளன. இத்துடன் எல்.சி.டி. யூனிட், எல்.இ.டி. டி.ஆர்.எல். வழங்கப்பட்டு இருக்கிறது. இந்திய சந்தையில் புதிய கைனெடிக் ஜூலு மாடலின் விலை ரூ. 94 ஆயிரத்து 490, எக்ஸ்-ஷோரூம் என்று நிர்ணயம் செய்யப்பட்டு உள்ளது.

மாருதி சுசுகி நிறுவனம் தனது முதல் எலெக்ட்ரிக் கார் மாடலை இந்திய சந்தையில் அறிமுகம் செய்வதற்கான பணிகளில் ஈடுபட்டு வருகிறது. மாருதியின் முதல் எலெக்ட்ரிக் கார் eVX என்ற பெயரில் அறிமுகம் செய்யப்பட இருக்கிறது. அடுத்த ஆண்டு இந்திய சந்தையில் அறிமுகம் செய்யப்பட இருக்கும் மாருதி சுசுகி eVX மாடல், டொயோட்டா பிராண்டிங்கிலும் அறிமுகம் செய்யப்பட இருக்கிறது.

இந்தியாவில் உற்பத்தி செய்யப்படுவதோடு இந்த மாடல் வெளிநாட்டு சந்தைகளிலும் ஏற்றுமதி செய்யப்பட இருக்கிறது. இந்த காரின் வெளியீடு பற்றி பல்வேறு தகவல்கள் வெளியாகி வந்த நிலையில், 2025 நிதியாண்டு வாக்கில் மாருதி சுசுகி eVX மாடல் வெளியிடப்படும் என்று அந்நிறுவனம் உறுதிப்படுத்தி இருப்பதாக தகவல் வெளியாகி உள்ளது.

அதன்படி புதிய மாருதி சுசுகி eVX மாடல் அடுத்த ஆண்டு அக்டோபர் மாத வாக்கில் அறிமுகம் செய்யப்பட்டு இதன் விலை விவரங்கள் 2025 துவக்கத்தில் அறிவிக்கப்படும் என்று எதிர்பார்க்கலாம்.

"எங்களின் முதல் எலெக்ட்ரிக் வாகனம், ஒரு எஸ்.யு.வி. மாடல் அடுத்த நிதியாண்டு வாக்கில் அறிமுகம் செய்யப்படும். தற்போது ஹன்சல்பூரில் உள்ள ஆலையில் மூன்று பிரிவுகள் செயல்பட்டு வருகின்றன. இத்துடன் எலெக்ட்ரிக் வாகனங்களை உற்பத்தி செய்ய தனி பிரிவு உருவாக்கப்பட இருக்கிறது," என மாருதி சுசுகி நிறுவனத்தின் நிர்வாக இயக்குனர் ராகுல் பாரதி தெரிவித்து இருக்கிறார்.

"எங்களின் எலெக்ட்ரிக் வாகன கான்செப்ட் கார் ஏற்கனவே அறிமுகம் செய்யப்பட்டுவிட்டது. இது அதிக அம்சங்கள் நிறைந்த எஸ்.யு.வி.யாக இருக்கும். இந்த எலெக்ட்ரிக் கார் 60 கிலோவாட் ஹவர் பேட்டரி மற்றும் 550 கிலோமீட்டர்கள் வரையிலான ரேன்ஜ் வழங்கும் திறன் கொண்டிருக்கும்," என அவர் மேலும் தெரிவித்தார்.